خبراردو :
بی جے پی نے آرٹیکل 35Aپر جاری بحث پر تبصرہ کرتے ہوئے بتایا کہ سپریم کورٹ کی طرف سے جو بھی فیصلہ آئے گا وہ بھارتیہ جنتا پارٹی کو قابل قبول ہوگا اور دیگر جماعتوں کو بھی اسے تسلیم کرنا چاہیے۔ انہوں نے بتایا کہ بی جے پی معاملے کو مؤخر کرنے کے حق میں نہیں ہے لہٰذا سپریم کورٹ جو بھی فیصلہ صادر کرتی ہے وہ پارٹی کو قبول ہوگا۔ محبوبہ مفتی کی حالیہ تقریر جس میں انہوں نے بی جے پی کے ساتھ اتحاد کو ’زہر کا پیالہ پینے کے مترادف‘ قرار دیا تھا کو کذب بیانی سے تعبیر کرتے ہوئے بی جے پی نے بتایا کہ اگر انہیں پہلے ہی محسوس ہوا تھا تو 2سال کے عرصے تک اقتدار کے مزے کیوں لوٹے؟ انہوں نے بتایا کہ پی ڈی پی کی جانب سے ایجنڈا آف الائنس کی بار بار کتربیونت کرنے کی وجہ سے بی جے پی نے آخر کار حکومت سے اپنی حمایت واپس لی۔

بھارتیہ جنتا پارٹی کے جنرل سیکرٹری اشوک کول نے ریاست جموں وکشمیر میں آرٹیکل 35Aپر جاری بحث پر تبادلہ خیال کرتے ہوئے کہا کہ معاملہ فی الوقت سپریم کورٹ میں زیر سماعت ہے لہٰذا وہاں سے جو بھی فیصلہ آتا ہے بی جے پی اسے قبول کرے گی۔ انہوں نے بتایا کہ آرٹیکل 35Aکا معاملہ اس وقت سپریم کورٹ میں زیر سماعت ہے جو ملک سے سب سے بڑا ادارہ ہے لہٰذا ادارہ کی اہمیت اور سمان کو دیکھتے ہوئے جو بھی فیصلہ سامنے آئے گا ہم اسے دل سے قبول کریں گے۔ ایک سوال کے جواب میں اشوک کول نے بتایا کہ اگر کانگریس والے اس معاملے کو لے کر سڑکوں پر احتجاج کریں گے، جیل بھرو تحریک شروع کریں گے، بھوک ہرٹال شروع کریں گے تو اس سے یہی اخذ کیا جاسکتا ہے کہ کانگریس کو ملک کے سب سے بڑے ادارے سپریم کورٹ کا احترام نہیں ہے۔ انہوں نے کانگریس کو مشورہ دیا کہ وہ سپریم کورٹ کی طرف سے کسی بھی فیصلے کو تسلیم کریں۔

انہوں نے بتایا کہ گورنر این این ووہرا نے اگر اپنی طرف سے مرکزی سرکار کو معاملے کو فی الحال مؤخر کرنے کا مطالبہ کیا ہے تو وہ اُن کی اپنی سوچ ہے اور اس کے ساتھ بی جے پی کا کوئی بھی لینا دینا نہیں ہے۔ بی جے پی کا ماننا ہے کہ سپریم کورٹ سے جو بھی فیصلہ سامنے آئے گا وہ ہمیں قبول ہوگا ۔ پی ڈی پی صدر اور ریاست کی سابق وزیر اعلیٰ محبوبہ مفتی کی حالیہ تقریر جس میں انہوں نے بی جے پی کے ساتھ اتحاد کو ’زہر کا پیالہ پینے کے مترادف‘ قرار دیا تھا کو کذب بیانی سے تعبیر کرتے ہوئے اشوک کول نے بتایا کہ اگر انہیں پہلے ہی محسوس ہوا تھا کہ بی جے پی کے ساتھ اتحاد زہر پینے کے برابر ہے تو انہوں نے 2سال تک اقتدار کے مزے کیوں لوٹے؟ انہوں نے بتایا کہ پی ڈی پی صدر اقتدار میں رہتے ہوئے نریندر مودی، نتن گڑکری، راجناتھ سنگھ جیسے لیڈران کو محبت برے الفاظ سے یاد کیا کرتی ہے لیکن اقتدار سے بے دخلی کے بعد انہوں نے نئی لکیر کھینچنی شروع کردی۔
انہوں نے بتایا کہ پی ڈی پی صدر محبوبہ مفتی کو اقتدار چھن جانے کا اتنا شاق گزرا ہے کہ اب وہ کذب بیانی سے کام لے رہی ہے۔ اشوک کول نے بتایا کہ بی جے پی نے اگر چہ بارہا یہ بات دہرائی کہ مخلوط حکومت اپنی مدت کار مکمل کرے گی تاہم پی ڈی پی کی جانب سے ایجنڈا آف الائنس کی بار بار کتربیونت کرنے سے بی جے پی نے آخر کار حکومت سے اپنی حمایت واپس لی۔

انہوں نے بتایا کہ پی ڈی پی نے ہر محاذ پر ایجنڈا آف الائنس میں شامل نکات کو کھلے دل سے کام نہیں کیا جس کی وجہ سے ریاست میں حالات بد سے بدتر ہوتے گئے۔ ریاست میں جاری حکومت سازی کی قیاس آرائیوں پر بی جے پی لیڈر نے بتایا کہ پارٹی کے پاس فی الوقت ایسا کوئی ایجنڈا نہیں ہے۔ انہوں نے بتایا کہ جو لوگ اس حوالے سے درپردہ یا عیاں کوششیں کررہے ہیں وہی اس کا بہتر طور پر جواب دے سکتے ہیں۔ KNS