جموں، 7 اکتوبر (یواین آئی) مرکزی وزیر ڈاکٹر جتیندر سنگھ نے بدھ کو بتایا کہ جموں و کشمیر کے ڈوڈہ ضلع کے ایک شخص کی لاش نیوزی لینڈ سے واپس لانے کی کوششیں کی جا رہی ہیں، جو وہاں ایک سڑک حادثے میں ہلاک ہوگیا تھا۔

ڈاکٹر سنگھ نے ایکس پر پوسٹ شیئر کرتے ہوئے کہا کہ ڈوڈہ ضلع کے آنجہانی سندیش سنگھ کے معاملے میں مسلسل پیش رفت پر نظر رکھی جا رہی ہے۔ سندیش سنگھ نیوزی لینڈ میں ایک افسوسناک سڑک حادثے میں ہلاک ہوگئے تھے اور ان کے اہل خانہ نے ڈوڈہ ویسٹ کے رکن اسمبلی اور سابق وزیر شکتی راج پریہار کے ذریعے مدد طلب کی تھی۔

انہوں نے کہا کہ اس معاملے میں نیوزی لینڈ میں ہندوستانی ہائی کمیشن کے ساتھ مسلسل رابطہ رکھا جا رہا ہے اور متوفی کی لاش جلد از جلد ہندوستان واپس لانے کے لیے تمام ممکنہ کوششیں کی جا رہی ہیں۔

قابل ذکر ہے کہ جموں و کشمیر کے ڈوڈہ ضلع کے رہنے والے نوجوان سندیش سنگھ کی نیوزی لینڈ کے کوئنس ٹاؤن میں سڑک حادثے میں موت ہوگئی تھی۔

ہندوستانی مشن کی جانب سے شیئر کی گئی معلومات کے مطابق، نیوزی لینڈ پولیس نے 4 اکتوبر کو کوئنس ٹاؤن میں ایک مہلک سڑک حادثے کی اطلاع دی تھی، جس میں ایک شخص کے ہلاک ہونے کی بات کہی گئی تھی اور اس کے ہندوستانی پاسپورٹ رکھنے والے سندیش سنگھ ہونے کا شبہ ظاہر کیا گیا تھا۔

متوفی کی باضابطہ شناخت کا عمل ابھی زیر التوا تھا، کیونکہ پولیس کے مطابق حادثے میں چہرے پر آنے والی چوٹوں کی وجہ سے ظاہری شناخت ممکن نہیں تھی۔

ہندوستانی ہائی کمیشن نیوزی لینڈ پولیس، اہل خانہ اور کوئنس ٹاؤن میں ہندوستانی برادری کے ارکان کے ساتھ رابطے میں تھا اور اس نے لاش ہندوستان واپس لانے کے عمل میں ہر ممکن قونصلر مدد فراہم کرنے کی یقین دہانی کرائی تھی۔

باضابطہ شناخت کا عمل 7 اکتوبر تک مکمل ہونے کی توقع تھی، جس کے بعد لاش کو پولیس کی تحویل سے حوالے کرنے اور اسے ہندوستان واپس لانے کے لیے ضروری کارروائی شروع کی جا سکتی تھی۔

بتایا گیا ہے کہ سندیش سنگھ تقریباً چھ ماہ سے نیوزی لینڈ میں مقیم تھے اور حادثے کے وقت تین دیگر افراد کے ساتھ ایک گاڑی میں سفر کر رہے تھے۔ یہ حادثہ اسٹیٹ ہائی وے 6 پر کاواراؤ فالس کے مقام پر پیش آیا۔

دریں اثنا، سندیش سنگھ کے ایک قریبی دوست نے لاش ہندوستان واپس لانے، دستاویزات اور آخری رسومات سے متعلق اخراجات پورے کرنے کے لیے چندہ جمع کرنے کی اپیل شروع کی ہے۔

یو این آئی۔ م ع

سری نگر، جموں و کشمیر کے وزیراعلیٰ عمر عبداللہ نے بدھ کو مرکز کے زیر انتظام علاقے میں ووٹر فہرستوں کی مجوزہ خصوصی جامع نظرثانی (ایس آئی آر) پر تشویش کا اظہار کیا۔ انہوں نے الزام لگایا کہ جس طرح ایس آئی آر کو دیگر مقامات پر انتخابات میں ہیرا پھیری کے لیے استعمال کیا جا رہا ہے، اسی طرح جموں و کشمیر میں بھی اس کے اثرات مرتب ہوسکتے ہیں۔

عمر عبداللہ نے کہا کہ جموں و کشمیر پہلے ہی ان کے بقول ”انتخابی ہیرا پھیری کے کھیل” کا شکار ہوچکا ہے۔ سری نگر میں ایک تقریب کے موقع پر صحافیوں سے بات کرتے ہوئے انہوں نے کہاکہ ”ہم اب تک کی گئی حلقہ بندی کو نہیں بھولے ہیں۔ اس حلقہ بندی کا مقصد بی جے پی کو فائدہ پہنچانا تھا۔”

حلقہ بندی کی یہ مشق 2019 میں سابق ریاست جموں و کشمیر کی تنظیم نو کے بعد کی گئی تھی۔ اس وقت ریاست کا خصوصی درجہ ختم کرکے اسے دو مرکز کے زیر انتظام علاقوں، جموں و کشمیر اور لداخ، میں تقسیم کیا گیا تھا۔ اس کے بعد جموں و کشمیر کی 90 اسمبلی نشستوں کی حدود ازسرنو مقرر کی گئی تھیں۔
اپوزیشن جماعتوں اور دیگر ناقدین نے الزام لگایا تھا کہ اس مشق سے سیاسی نمائندگی متاثر ہوسکتی ہے اور حلقہ بندیوں کی ازسرنو تشکیل کے نتیجے میں کئی علاقوں میں آبادی کی اکثریت سیاسی اقلیت میں تبدیل ہوسکتی ہے۔

عمر عبداللہ نے خدشہ ظاہر کیا کہ ایس آئی آر کے بھی جموں و کشمیر میں اسی طرح کے سیاسی اثرات ہوسکتے ہیں۔

تاہم، انہوں نے امید ظاہر کی کہ سپریم کورٹ میں جاری کارروائی، خاص طور پر فارم 6 سے متعلق معاملہ، اہل ووٹروں کے نام ووٹر فہرست سے حذف کرنا مشکل بنا دے گا۔

انہوں نے کہاکہ ”لیکن اس وقت تک، جب ایس آئی آر کی مشق شروع ہوگی، مجھے امید ہے کہ سپریم کورٹ میں کارروائی جاری رہے گی، خاص طور پر فارم 6 کے بارے میں۔ میرے خیال میں یہاں لوگوں کے نام ووٹر فہرست سے ہٹانا ان کے لیے قدرے مشکل ہوگا۔”

عمر عبداللہ نے انتخابی کمیشن کے خلاف الزامات کو من گھڑت قرار دیے جانے کے دعوے کو بھی مسترد کیا۔

انہوں نے سوال اٹھایا کہ اگر رپورٹس میں شائع کیے گئے مواد مکمل طور پر غلط تھے تو ان رپورٹس کو شائع کرنے والے اخبار کے خلاف کارروائی کیوں نہیں کی گئی۔

جاری۔ یو این آئی۔ م ع

سری نگر، سکیورٹی فورسز نے شمالی کشمیر کے کپواڑہ ضلع کے ہندواڑہ کے ناگدانار جنگلاتی علاقے میں مشترکہ تلاشی مہم کے دوران ایک پرانے دہشت گردانہ ٹھکانے کا سراغ لگا کر اسے تباہ کیا اور وہاں سے بڑی تعداد میں اسلحہ اور گولہ بارود برآمد کیا۔

خصوصی خفیہ اطلاع کی بنیاد پر ہندواڑہ پولیس نے فوج کی 21 راشٹریہ رائفلز اور مرکزی ریزرو پولیس فورس (سی آر پی ایف) کی 92ویں بٹالین کے ساتھ مل کر یہ کارروائی کی۔

پولیس نے بتایا کہ تلاشی کے دوران مشترکہ ٹیم نے ایک پرانے دہشت گردانہ ٹھکانے کا سراغ لگایا اور وہاں سے ایک اے کے-47 رائفل، تین دستی بم، اے کے کے 857 کارتوس، پی آئی کے اے کے 192 کارتوس، اے کے کی آٹھ میگزین، ایک سائلنسر اور پستول کے 83 کارتوس کے علاوہ دیگر قابل اعتراض مواد برآمد کیا۔

انہوں نے بتایا کہ ہندواڑہ تھانے میں قانون کی متعلقہ دفعات کے تحت مقدمہ درج کر لیا گیا ہے اور مزید تفتیش شروع کردی گئی ہے۔

یو این آئی۔ م ع