ماسکو، امریکی صدر ڈونالڈ ٹرمپ نے کہا ہے کہ وہ روسی صدر ولادیمیر پوتن کے ساتھ روس اور یوکرین کے درمیان ممکنہ امن معاہدے کی شرائط پر بات چیت کررہے ہیں۔

اقوام متحدہ کی جنرل اسمبلی کے اجلاس سے الگ یوکرین کے صدر ولودیمیر زیلنسکی کے ساتھ ملاقات کے دوران مسٹر ٹرمپ نے کہا، ’’میرا خیال ہے کہ وہ کسی معاہدے پر پہنچنے والے ہیں اور میں یہ نہیں بتانا چاہتا کہ معاہدہ کیا ہوگا۔ ہم اس سلسلے میں کافی بات چیت کررہے ہیں، جس میں صدر پوتن کے ساتھ ہونے والی بات چیت بھی شامل ہے اور میرا خیال ہے کہ کچھ نہ کچھ ضرور ہونا چاہیے۔‘‘

مسٹر ٹرمپ نے کہا کہ یوکرین میں جاری تنازع کو حل کرنے کے لیے کسی معاہدے تک پہنچنا دونوں فریقوں کے مفاد میں ہے اور اس سے روس اور یوکرین دونوں کو فائدہ ہوگا۔

یو این آئی۔ ایم جے

نیویارک، امریکی صدر ڈونالڈ ٹرمپ اور نیویارک کے میئر زہران ممدانی نے پیر کو اپنی تیسری بالمشافہ ملاقات کے دوران غیر معمولی طور پر خوشگوار انداز میں بات چیت کی اور دونوں نے کوئنز میں ایک بڑے سستے رہائشی منصوبے کے بارے میں بات چیت تیز کرنے پر اتفاق کیا۔

دونوں نے ممدانی کی جانب سے کوئنز میں واقع سنی سائیڈ یارڈ کے وسیع ریلوے کمپلیکس کے اوپر تعمیر کیے جانے والے پلیٹ فارم پر 12 ہزار سستے مکانات بنانے کی تجویز پر بھی مذاکرات آگے بڑھانے پر اتفاق کیا۔

ملاقات کے بعد بریفنگ میں ٹرمپ نے کہا، ’’وہ 50 سال سے اس علاقے کو ترقی دینے کی بات کر رہے ہیں۔ تو شاید اب ان کے پاس اسے کرنے کا موقع ہے۔‘‘ یہ ملاقات اقوام متحدہ کی جنرل اسمبلی سے متعلق ٹرمپ کی مصروفیات سے قبل ہوئی۔

تاہم دونوں کے سیاسی اختلافات بھی نمایاں رہے۔ ممدانی نے کہا کہ انہوں نے ٹرمپ کے سامنے نیویارک کے شہریوں، بشمول تارکین وطن، کو محفوظ رکھنے کے حوالے سے اپنی ’’بہت مضبوط رائے‘‘ پیش کی۔

انہوں نے یہ بھی کہا کہ تمام صحافیوں کو وائٹ ہاؤس تک رسائی حاصل ہونی چاہیے۔ یہ بیان ٹرمپ کی جانب سے سی این این، ایم ایس ناو اور پولیٹیکو کو وائٹ ہاؤس کے احاطے میں داخلے سے روکنے کے اپنے فیصلے کا دفاع کرنے سے کچھ دیر قبل سامنے آیا۔ ان تینوں اداروں نے اس پابندی کو چیلنج کرتے ہوئے پہلی ترمیم کے تحت مقدمہ بھی دائر کیا ہے۔

اختلافات کے باوجود ٹرمپ نے کہا کہ وہ چاہتے ہیں کہ ممدانی ’’ایک عظیم میئر بنیں‘‘ اور ان میں ’’یقینی طور پر‘‘ بڑی صلاحیت موجود ہے۔

یہ ملاقات دونوں کے درمیان اس سے قبل ہونے والی دو ملاقاتوں کے بعد ہوئی، جو غیر متوقع طور پر خوشگوار رہی تھیں۔ ’ایکسِیوس‘ کے مطابق دونوں رہنماؤں کے درمیان ٹیکسٹ پیغامات کے ذریعے بھی رابطہ برقرار ہے۔

تاہم امیگریشن اور ٹیکس سمیت مختلف پالیسی معاملات پر دونوں کے اختلافات برقرار ہیں۔ نیویارک شہر ان شہروں اور کاؤنٹیوں کے اتحاد میں شامل ہو گیا ہے جو ٹرمپ انتظامیہ کے نئے ’’پبلک چارج‘‘ امیگریشن ضابطے کو چیلنج کر رہے ہیں۔

ٹرمپ نے غیر رہائشی افراد کی ملکیت والی لگژری جائیدادوں پر ممدانی کی مجوزہ ٹیکس عائد کرنے کی تجویز پر بھی تنقید کی ہے۔

یو این آئی۔ ع ا۔

واشنگٹن، امریکی وزیر خارجہ مارکو روبیو نے نیویارک میں کینیڈا، ڈنمارک، جزائر فارو، فن لینڈ، گرین لینڈ، آئس لینڈ، ناروے اور سویڈن کے وزرائے خارجہ سے ملاقات کی اور آرکٹک خطے کی سلامتی، سرمایہ کاری اور علاقائی تعاون پر تبادلہ خیال کیا۔

ملاقات میں آرکٹک کے مشترکہ چیلنجوں سے نمٹنے کے لیے اتحادی ممالک کی مسلسل سرمایہ کاری اور باہمی رابطہ کاری کی ’’تزویراتی ضرورت‘‘ پر زور دیا گیا۔

اتحادی ممالک نے اتفاق کیا کہ آرکٹک کی سلامتی کے لیے ’’اس اہم خطے کے تحفظ‘‘ اور تزویراتی حریفوں کو روکنے کی خاطر مسلسل سرمایہ کاری ضروری ہے۔

بات چیت میں ’’خودمختار فوجی اور اقتصادی صلاحیتوں‘‘ کی ترقی، سرمایہ کاری کے تحفظ اور لچکدار بنیادی ڈھانچے کی تعمیر کے ذریعے آرکٹک کی سلامتی کی زیادہ ذمہ داری اتحادی ممالک کی جانب سے اٹھانے پر توجہ مرکوز کی گئی، تاکہ قابل اعتماد رسائی یقینی بنائی جا سکے اور خطے میں مشترکہ قیادت کو تقویت ملے۔

روبیو نے امریکہ، کینیڈا اور فن لینڈ کے درمیان ’آئس بریکر کولیبوریشن ایفورٹ‘ (ٓئی سی ای) معاہدے کو ’’صنعتی تعاون اور ذمہ داریوں کی مشترکہ تقسیم‘‘ کے لیے ایک نمونہ قرار دیا۔

انہوں نے صدر ڈونالڈ ٹرمپ کے امریکی آئس بریکر بیڑے میں نمایاں توسیع کے عزم کی جانب بھی اشارہ کیا اور کہا کہ اس سے اس اقدام کو مزید مضبوط بنانے میں مدد ملے گی۔

یو این آئی۔ ع ا۔