خبراردو:
نیشنل کانفرنس صدر اور رکن پارلیمان ڈاکٹر فاروق عبداللہ نے بتایا کہ اگر پارٹی آنے والے اسمبلی انتخابات میں بھاری اکثریت کے ساتھ اقتدار میں آتی ہے تو کشمیر میں گزشتہ کئی برسوں کے دوران ہوئی ہلاکتوں سے متعلق ایک غیر جانبدارانہ کمیشن مقرر کیا جائے گا تو ہلاکتوں میں ملوث عناصر کو قرار واقعی سزا دی جائے۔ انہوں نے اس بات کا اعادہ کرتے ہوئے کہا کہ ریاست جموں و کشمیر میں امن کی بحالی کا خواب تب تک شرمندہ تعبیر نہیں ہوسکتا جب تک نہ کشمیریوں کی عزت و وقار کو بحال کیا جاتا ہے اور پاکستان کے ساتھ تمام تصفیہ طلب اُمور پر مذاکرات کا آغاز کیا جاتا ہے۔

نیشنل کانفرنس کے صدر اور رکن پارلیمان ڈاکٹر فاروق عبداللہ نے جنوبی ضلع اننت ناگ میں پارٹی کنونشن کے دوران میڈیا سے بات کرتے ہوئے کہا کہ اگر نیشنل کانفرنس آنے والے اسمبلی انتخابات میں بھاری اکثریت کے ساتھ کامیاب ہوتی ہے تو پارٹی کشمیر میں گزشتہ برسوں کے دوران ہوئی ہلاکتوں سے متعلق ایک غیر جانبدارانہ کمیشن کا قیام عمل میں لائے گا تاکہ ہلاکتوں میں ملوث عناصر کو قرار واقعی سزا دی جائے۔انہوں نے زور دے کر کہا کہ نیشنل کانفرنس عوام سے وعدہ کرتی ہے کہ جونہی پارٹی کو بھاری منڈیٹ حاصل ہوگا تو اگلے ہی روز ہم کشمیر میں ہوئی ہلاکتوں سے متعلق ایک کمیشن قائم کریں گے تاکہ ہلاکتوں میں ملوث عناصر کو کیفر کردار تک پہنچانے کے علاوہ متاثرین کو انصاف فراہم ہو۔سرینگر بڈگام پارلیمانی سیٹ کی نمائندگی کرنے والے ڈاکٹر فاروق عبداللہ نے اپنی تقریر میں بتایا کہ اُن کے بیٹے اور پارٹی کے نائب صدر عمر عبداللہ بھی ہلاکتوں سے متعلق کمیشن کے قیام کے حق میں ہے۔ انہوں نے بتایا کہ عمر عبداللہ نے بھی کشمیر میں گزشتہ کئی برسوں سے ہوئی ہلاکتوں سے متعلق تشویش کا اظہار کیا ہے اور اس کی اعلیٰ سطحی کمیشن کے ذریعے تحقیقات پر زور دیا ہے۔ڈاکٹر فاروق عبداللہ کا کہنا تھا کہ ہم پرامید ہیں کہ اللہ ہماری پارٹی کو بھاری منڈیٹ سے کامیاب کرے گا اور ہمیں دوسروں کے تعاون کی ضرورت درپیش نہیں رہے گی۔انہوں نے زور دے کر کہا کہ یہ ایک بہت بڑا قدم ہوگا کہ نیشنل کانفرنس اقتدار میں آنے کے بعد اگلے روز ہی گزشتہ برسوں کے دوران ہوئی ہلاکتوں سے متعلق کمیشن کا تقرر عمل میں لائے گی۔

این سی صدر ڈاکٹر فاروق عبداللہ کا کہنا تھا کہ اس طرح کے کمیشن کی کارکردگی دیکھنے کے لائق ہوگی جس کا مشاہدہ نہ صرف ریاستی عوام کریں گے بلکہ دنیا کے باقی لوگ بھی اس کی کارکردگی کو سراہیں گے۔ڈاکٹر فاروق کا کہنا تھا کہ نیشنل کانفرنس نے کبھی بھی آپریشن آل آؤٹ کی حمایت نہیں کی اور نہ اس کی حمایت مستقبل میں کرے گی۔انہوں نے سوالیہ اندازمیں کہا کہ نیشنل کانفرنس کس طرح اُن اقدامات کی حمایت کرسکتی ہے جب لوگوں کی طاقت، دھونس دباؤ اور جبر کے ذریعے دبایا جارہا ہو۔ہم یہ کیسے برداشت کریں گے کہ ہمارے لوگوں کو نہ صرف باہر بلکہ گھروں کے اندر بھی مارا پیٹا جارہا ہو۔اس طرح کی پالیسی نیشنل کانفرنس کا کبھی بھی حصہ نہیں رہی ہے۔ڈاکٹر فاروق عبداللہ کا کہنا تھا کہ نیشنل کانفرنس کبھی بھی انسانی حقوق کی پامالیوں میں ملوث اہلکاروں کی پیٹ تھپتھپائے گی۔ یہاں ہر کوئی آزاد ہے، ہم ایک آزاد ملک میں سکونت پذیر ہے لہٰذا بحیثیت حکومت ہمیں اپنے لوگوں کا ہر حال میں خاص خیال رکھا ہے کہیں ان کے حقوق کو پامال تو نہیں کیا جارہا ہے۔بات چیت اور افہام و تفہیم کو جموں وکشمیر میں مکمل امن و امان کی واحد ضمانت قرار دیتے ہوئے نیشنل کانفرنس صدر ڈاکٹر فاروق عبداللہ نے بتایا کہ نئی دلی کو کسی بھی صورت میں کشمیریوں اور پاکستان کیساتھ بات چیت کرنی ہے کیونکہ اسی صورتحال میں روشن اور تابناک مستقبل کی راہیں تلاش کی جاسکتی ہیں۔

ڈاکٹر فاروق عبداللہ نے کہا کہ کشمیریوں کے دل جیتنا اور کشمیریوں کی عزت اور وقار بحال کرنا وقت کی اہم ضروری ہے۔ اگر فوجی سربراہ طالبان کیساتھ غیر مشروط مذاکرات کی حمایت کرتے ہیں تو پھر کشمیر میں بات چیت کا راستہ اپنانے سے کیوں گریز کیا جارہا ہے؟ انہوں نے کہا کہ چھاپہ مار کارروائیوں، مار دھارڈ اور ظلم ڈھانے سے حالات ٹھیک نہیں ہوسکتے۔ کشمیر ایک سیاسی مسئلہ ہے اور مرکز کو ایسی کوشش کرنی چاہئے جس سے امن بحال ہو اور لوگوں میں اطمینان آئے تاکہ ریاست کے عوام امن اور چین کی زندگی گزار سکیں۔ انہوں نے کہا کہ نیشنل کانفرنس کسی بھی سخت گیری پالیسی کی حمایت نہیں کرتی ، مرکز کو لوگوں کا غم و غصہ کم کرنے کیلئے اُن کے دکھ کو دیکھنا پڑیگا۔ انہوں نے کہاکہ اگر نیشنل کانفرنس کی حکومت آئی تو ہم یہاں سخت گیر پالیسیوں کی اجازت نہیں دیں گے لیکن یہ تب ہی ممکن ہے جب ہمیں مضبوط مینڈیٹ ملے گا، ٹوٹی پھوٹی حکومت میں ایسا کر پانا مشکل ہے۔ 1996میں جب ہم واضح اکثریت کیساتھ آئے تو ہم نے یہاں سب کچھ نئے سرے سے شروع کیا اور ہمیں اس میں کافی حد تک کامیابی ملی۔ یہاں کے سکول، کالج اور دیگر دانشگاہیں مفلوج تھیں، نقل کی وبا عام تھی، ورک کلچر ختم ہوگیا تھا، ہسپتال میں ڈاکٹرموجود نہیں تھے، پل نذر آتش کئے گئے تھے، سرکاری دفاتر میں کام نہیں ہوتا تھا نیز ہر ایک شعبے کو ہم نے نئی جہت بخشی۔ اس کے علاوہ ہم نے اٹانومی کا مسودہ تیار کیا اور اسے اسمبلی سے پاس کروایا اور مرکز کے سامنے رکھ دیا۔ لیکن افسوس کیساتھ کہنا پڑتا ہے کہ اُس وقت کے وزیر اعظم اٹل بہاری واجپائی کی حکومت نے اٹانومی کو منظور نہیں کیا۔

ڈاکٹر فاروق عبداللہ نے کہا کہ میں نے تب بھی مرکز سے کہا اور آج بھی کہتا ہوں کہ آپ کو جموں وکشمیر کی اٹانومی بحال کرنی ہی ہوگی کیونکہ اسی صورت میں ریاست میں دیرپا اور مکمل امن و امان آسکتا ہے۔ انہوں نے کہا کہ کشمیریوں کے دل صرف اور صرف ریاست کی اندرونی خودمختاری کی بحالی سے ہی جیتے جاسکتے ہیں۔ لوگ کو آر ایس ایس اور بھاجپا کے ایجنٹوں سے ہوشیار رہنے کی تاکید کرتے ہوئے ڈاکٹر فاروق عبداللہ نے کہا کہ میں نے 2014میں بھی لوگوں سے کہا تھا کہ آپ پی ڈی پی کو ووٹ مت دیں، کیونکہ یہ آر ایس ایس اور بھاجپا کے آلہ کار ہیں، لیکن اُس وقت میری باتوں پر کسی نے یقین نہیں کیا اور پھر 2015میں لوگوں نے خود دیکھا کہ کسی طرح سے پی ڈی پی والے آر ایس ایس کی گودھ میں بیٹھ گئے۔