8روز تک جوڈیشل ریمانڈ میں بھیج دیا گیا
خبراردو:-

سرینگر:امشی پورہ شوپیان انکاؤنٹر معاملے میں گرفتار 2ملزمان کو پولیس نے منگلوار کے روزڈسٹرکٹ کورٹ شوپیان میں پیش کیا گیا،جہاں سے دونوں ملزمان کو 8روزہ کے لئے جوڈیشل ریمانڈ میں بھیج دیا گیا۔

کشمیر نیوز سروس کو ملی اطلاعات کے مطابق امشی پورہ انکاؤنٹر معاملے کی مزید پیش رفت ہوئی ہے۔پولیس نے اس مقابلے کے حوالے سے اپنی تفتیش آگے بڑھا تے ہوئے 2ملزمان کو گرفتار کیا۔دونوں ملزمان کو منگل کے روز پولیس نے ڈسٹرکٹ کورٹ شوپیان میں پیش کیا۔

عدالت نے اپنی کارروائی کے دوران دونوں ملزمان کو اگلی سماعت تک8روز کے لئے جوڈیشل ریمانڈ میں بھیج دیا۔دونوں ملزمان کو شوپیان پولیس نے ایف آئی آر42/2020کے تحت گرفتار کیا ہے۔پولیس معاملے کی مزید تفتیش کررہی ہے،تاکہ حقائق کو منظر پر عام پر لایا جاسکے۔یاد رہے کہ سوموار کو جموں کشمیر پولیس کے سر براہ، دلباغ سنگھ نے کہا تھا کہ جنوبی ضلع شوپیان کے امشی پورہ میں ہوئے انکاونٹر معاملے کی تحقیقات آخری مرحلے میں ہے۔

انہوں نے کہا تھاکہ ایس ایس پی شوپیان تحقیقات کی نگرانی کررہے ہیں اور عنقریب اس سلسلے میں ساری تفاصیل منظر عام پر لائی جائیں گی۔یاد رہے کہ یہ مبینہ فرضی انکاونٹراس سال18جولائی کو پیش آیا تھا۔دلباغ سنگھ کا کہنا تھا’ہماری تحقیقات آخری مرحلے میں ہیں‘۔فوج اور پولیس الگ الگ سے امشی پورہ انکاونٹر کی تحقیقات کررہی ہے جس میں راجوری ضلع کے تین نوجوان جاں بحق ہوگئے۔

مہلوکین کے ڈی این اے نمونے اْن کے والدین سے پہلے ہی مل گئے ہیں جنہوں نے اپنے بچوں کو مزدور قرار دیتے ہوئے اْنہیں فرضی معرکہ آرائی میں جاں بحق کرنے کا الزام عائد کیاہے۔ڈی این اے نمونے میل کھانے کے بعد انہوں نے مطالبہ کیا کہ اُنکے بچوں کے جسد خاکی واپس کئے جائیں،تاکہ وہ اُنکی تدفین آبائی قبرستانوں میں کی جاسکے۔گزشتہ جمعہ کو پولیس کنٹرول سرینگر میں جمعہ کو ایک پریس کانفرنس سے خطاب کرتے ہوئے انسپکٹر جنرل آف پولیس کشمیر زون،وجے کمار نے کہا تھاکہ شوپیاں واقعہ کی تحقیقات کے سلسلے میں لئے گئے ڈی این اے نمونے جاں بحق کئے گئے 3نوجوانوں اور راجوری کے دعویٰ کرنے والے لواحقین کے ڈی این اے نمونے یکساں ہیں۔

وجے کمار نے بتایا تھا’ہم نے راجوری کے تین گھرانوں کے ڈی این اے نمونوں کی جانچ رپورٹ حاصل کر لی ہے جو اْن تین نوجوانوں سے میل کھاتی ہے جو امشی پورہ شوپیان میں مارے گئے تھے۔ہم آگے کی کارروائی لوازمات پوری ہونے کے بعد ہی شروع کریں گے‘۔

یاد رہے کہ18جولائی کو امشی پورہ شوپیان میں فوج وفورسز نے دعویٰ کیا تھا کہ ایک جھڑپ میں 3عدم شناخت جنگجو جاں بحق کئے گئے۔تاہم جاں بحق کئے گئے تین نوجوانوں کی تصاویر سوشل میڈیا پر وائرل ہوئیں،جسکے بعد راجوری کے تین گھرانے سامنے آئے جنہوں نے دعویٰ کیا کہ جاں بحق نوجوان اُنکے لخت جگر ہیں۔

اس کے بعد سوشل میڈیا میں ایک بحث شروع ہوئی جسکے بعد فوج نے اس معاملے کی نسبت کورٹ آف انکوائری کا اعلان کیا۔ادھر پولیس نے اس معاملے کی اپنی سطح پر تحقیقات شروع کردی اور تین ہلاکتوں کے پس منظر میں راجوری کے تین گھرانوں کے دعوؤں کے بعد ڈی این اے نمونے حاصل کئے گئے۔

آج چالیس روز بعد ڈی این اے نمونوں کی جانچ رپورٹ حاصل ہونے کے بعد یہ بات ثابت ہوگئی ہے کہ راجوری کے تین گھرانوں کا دعویٰ صحیح ہے، جنہوں نے الزام عائد کیاہے کہ امشی پورہ شوپیان میں جاں بحق نوجوان اْن کے چشم و چراغ تھے جو بقول اْنکے مزدوری کیلئے جنوبی ضلع شوپیان گئے ہوئے تھے۔ یاد رہے کہ فوج نے بھی اس سے قبل اپنے ایک بیان میں اس بات کا اعتراف کیا تھا کہ فوجی اہلکاروں نے امشی پورہ آپریشن کے دوران ضوابط کی خلاف ورزی کی تھی۔یہ تینوں نوجوان مزدوری کے لیے17 جولائی کو راجوری سے شوپیاں پہنچے تھے، جہاں انہوں نے ایک کمرہ کرائے پر لیا تھا اور اسی شام اپنے گھر والوں کو فون پر مطلع کیا تھا کہ انہیں ایک مقامی باغ میں کام مل گیا ہے جسے وہ اگلے روز شروع کر رہے ہیں۔

اس کے بعد ان کا اپنے گھر والوں سے رابطہ منقطع ہو گیا تھا۔ ان کے اہل خانہ نے پولیس اور صحافیوں کو بتایا تھا کہ وہ یہ سمجھے تھے کہ کشمیر میں چوں کہ فون اور دوسری مواصلاتی سروسز اکثر بند ہو جاتی ہیں، اس لیے ان کے عزیز ان سے رابطہ نہیں کر پا رہے۔ فوج نے 18 جولائی کو شوپیاں کے امشی پورہ نامی علاقے میں ایک آپریشن کے دوران تین مبینہ عسکریت پسندوں کو ہلاک کرنے کا دعویٰ کیا تھا۔اس حوالے سے پولیس حکام نے بتایا تھا کہ ہلاک کیے گئے ’عسکریت پسندوں‘کی شناخت نہیں ہو سکی ہے اور ان کی لاشیں وصول کرنے کے لیے بھی کوئی سامنے نہیں آیا۔ تو انہیں بارہ مولا کے اس قبرستان میں دفن کر دیا گیا جہاں عمومی طور پر کشمیر میں سیکیورٹی فورسز کے ہاتھوں ہلاک ہونے والے غیر ملکی عسکریت پسندوں کو دفن کیا جاتا ہے۔

لاپتہ نوجوانوں کے والدین نے جموں و کشمیر کے لیفٹننٹ گورنر منوج سنہا کو خط ارسال کیا جس میں یہ شکایت کی گئی کہ فوج اور پولیس تحقیقات کو بلاوجہ طول دے رہے ہیں اور اس سلسلے میں جان بوجھ کر غیر سنجیدگی اور کوتاہی کا مظاہرہ بھی کیا جا رہا ہے۔

لاپتہ نوجوانوں کے والدین نے لیفٹیننٹ گورنر سے معاملے میں ذاتی مداخلت کی اپیل کی تھی۔لیفٹیننٹ گورنر سنہا نے سرینگر میں ایک پریس کانفرنس میں صحافیوں کے استفسار پر یقین دلایا تھا کہ متاثرہ خاندانوں کو ضرور انصاف ملے۔ اس دوران فوج کے ایک بیان میں کہا گیا کہ جھڑپ سے متعلق شروع کی گئی تحقیقات مکمل ہو گئی ہیں۔

بیان کے مطابق تحقیقات کے دوران معلوم ہوا ہے کہ آپریشن میں قواعد کی خلاف ورزی کی گئی اور آرمڈ فورسز اسپیشل پاورز ایکٹ 1990 سے تجاوز کیا گیا۔