خبراردو:

26جنوری کی تقریب سے ایک روز قبل جنگجوؤں نے جنوبی کشمیر کے اننت ناگ ضلع میں پولیس اہلکاروں پر پے در پے 2ہتھ گولے داغے جو زور داردھماکوں کے ساتھ پھٹ گئے جس کے نتیجے میں پولیس کا ایک کانسٹیبل زخمی ہوا جسے علاج و معالجے کی خاطر نزدیکی ہسپتال منتقل کیا گیا۔ ادھر جنگجوؤں کی طرف سے حملوں کے فوراً بعد فوج، سی آر پی ایف اور پولیس کے سپیشل آپریشن گروپ نے اننت ضلع کے مختلف علاقوں میں حملہ آوروں کی تلاش بڑے پیمانے پر شروع کرتے ہوئے کئی علاقوں کا محاصرہ عمل میں لایا جس دوران یہاں راہ گیروں کی باریک بینی سے تلاشی لینے کے علاوہ اُن کے شناختی کارڈ چیک کئے گئے۔ادھر ڈائریکٹر جنرل آف پولیس دلباغ سنگھ نے 26جنوری کے حوالے سے بات کرتے ہوئے کہا کہ پولیس کسی بھی صورتحال سے نپٹنے کے لیے پوری طرح تیار ہے۔ انہوں نے کہا کہ 26جنوری کے موقعے پر پاکستان اور جنگجوؤں کی یہ روایت رہی ہے کہ وہ سرکاری تقریبات میں عوامی شرکت کو ناممکن بنانے کے لیے گڑ بڑھ پھیلائے۔

وادی کشمیر میں 26جنوری کی تقریب سے ایک روز قبل جمعہ کی سہ پہر کو نامعلوم جنگجوؤں نے اننت ناگ بس اسٹینڈ میں قائم پولیس پوسٹ ہتھ گولہ داغا جو زور دار دھماکے کے ساتھ پھٹ گیا جس کے نتیجے میں پولیس کا ایک کانسٹیبل سجاد احمد شدید زخمی ہوگیا جسے یہاں موجود اہلکاروں نے علاج و معالجے کی خاطر نزدیکی ہسپتال منتقل کیا۔ معلوم ہوا کہ جمعہ کی سہ پہر اننت ناگ کے بس اڈے میں قائم پولیس پوسٹ پر نامعلوم سمت سے جنگجوؤں نے ایک ہتھ گولہ داغا جو زاور دار دھماکے کے ساتھ پھٹ گیا۔ ذرائع نے بتایا کہ دھماکے کے نتیجے میں یہاں موجود پولیس اہلکار سجاد احمد زخمی ہوگیا جسے فوری طور پر نزدیکی ہسپتال منتقل کیا گیا۔ عینی شاہدین نے بتایا کہ جونہی بس اڈہ میں زور دار دھماکے کی آواز ہوئی تو اس اثنا میں یہاں موجود لوگ افرا تفری کے عالم میں محفوظ مقامات کی طرف بھاگنے لگے جبکہ یہاں موجود تجارتی اداروں اور دوکانات نے اپنی دوکانات کے شٹر گراکر محفوظ راہ لی۔ذرائع نے بتایا کہ بس اڈہ میں ہوئے گرنیڈ دھماکے سے چند منٹ قبل ہی جنگجوؤں نے ضلع کے سریگفوارہ میں قائم پولیس چوکی پر ہتھ گولہ داغا جو سماعت شکن آواز کے ساتھ پھٹ گیا جس کے نتیجے میں یہاں افرا تفری کا ماحول پیدا ہوا۔معلوم ہوا ہے کہ سریگفوارہ میں قائم پولیس چوکی پر جمعہ کی سہ پہر کو نامعلوم جنگجوؤں نے ایک ہتھ گولہ داغا جو سماعت شکن آواز کے ساتھ پھٹ گیا جس کے نتیجے میں یہاں بھاگم باگ کی کیفت رونما ہوئی۔

معلوم ہوا کہ دھماکے کے ساتھ ہی یہاں موجود لوگ محفوظ مقامات کی طرف بھاگنے لگے جبکہ سڑکوں سے ٹریفک کی نقل و حمل بھی کچھ وقفے کے لیے متاثر ہوئی تاہم دھماکے میں کسی جانی نقصان کی کوئی اطلاع نہیں ہے۔ادھر دونوں حملوں کے ساتھ ہی فوج، سی آر پی ایف اور پولیس کے اعلیٰ افسران نے جائے واردات کادورہ کرتے ہوئے حالات کا جائزہ لیا۔ اس دوران فوج اور پولیس کی بھاری جمعیت نے حملہ آوروں کو ڈھونڈ نکالنے کی خاطر ملحقہ علاقوں میں بڑے پیمانے پر تلاشی کارروائیوں کا آغازکیا جس دوران یہاں گاڑیوں کی باریک بینی سے تلاشی عمل میں لانے کے ساتھ ساتھ راہ گیروں کی جامہ تلاشی لی گئی۔ عینی شاہدین نے بتایا کہ حملے کے فوراً بعد فورسز اہلکاروں نے یہاں مزید کمک طلب کرتے ہوئے آس پڑوس کے علاقوں میں بھاری تعداد میں اپنی نفری کو تعینات کرتے ہوئے یہاں سے گزر رہے لوگوں سے پوچھ تاچھ کا سلسلہ شروع کیا۔

انہوں نے بتایا کہ فورسز اہلکاروں نے کاس دوران راہ گیروں کی جامہ تلاشی لینے کے ساتھ ساتھ اُن کے شناختی کارڈ چیک کئے تاہم کسی بھی شخص کی گرفتاری عمل میں نہیں لائی گئی۔ خیال رہے 26جنوری سے ایک ہفتہ قبل شہر سرینگر کے راجباغ، پلیڈیم گلی اور گھنٹہ گھر کے نزدیک فورسز اہلکاروں کو نشانہ بناتے ہوئے جنگجوؤں نے 3ہتھ گولے داغے جس دوران 3پولیس اہلکار گرنیڈ کے آہنی ریزے لگنے سے زخمی ہوگئے تاہم گزشتہ دنوں ڈائریکٹر جنرل آف پولیس نے کشمیرنیوز سروس کے ساتھ بات چیت کرتے ہوئے اس بات کا خلاصہ کرتے ہوئے کہا کہ پولیس نے شہر سرینگر میں ہوئے گرنیڈ حملوں میں ملوث6نوجوانوں کو گرفتار کیا ہے جنہوں نے پوچھ تاچھ کے دوران اس بات کا سنسنی خیز انکشاف کیا کہ انہیں مختلف مقامات پر افرا تفری پھیلانے کے لیے مزید حملے کرنے کے لیے متعین کیا گیا تھا۔ادھر وادی میں جنگجوؤں کی طرف سے گرنیڈ حملوں کے پیش نظر عوام میں خوف و ڈر کا ماحول پایا جارہا ہے جبکہ سیکورٹی ایجنسیوں نے بھی شہر سرینگر سمیت دیگر قصبہ جات میں لوگوں سے پوچھ تاچھ کا سلسلہ تیز کردیا ہے۔ فورسز اہلکاروں نے 26جنوری کی تقریب کو پرامن طور پر منعقد کرنے کے لیے شہر سرینگر سمیت وادی کے سبھی اضلاع میں فورسز اہلکاروں کو الرٹ کردیا ہے جبکہ کسی بھی ممکنہ حمکے سے نپٹنے کے لیے فورسز نے کڑے انتظامات کئے جانے کا دعویٰ کیا ہے۔

ادھر ڈائریکٹر جنرل آف پولیس دلباغ سنگھ نے کشمیرنیوز سروس کے ساتھ بات کرتے ہوئے کہا کہ 26جنوری کی تقریبات کو پرامن طور پر منعقد کرانے کے لیے پولیس پوری طرح سے تیار ہے۔ انہوں نے بتایا کہ جنگجوؤں کی طرف سے ممکنہ حملوں کو ناممکن بنانے کے لیے پولیس اور دیگر فورسز ایجنسیوں نے کڑے انتظامات عمل میں لائے ہیں۔ ڈی جی پی کا کہنا تھا کہ 26جنوری کی تقریبات کے موقعے پر پاکستان اور جنگجوؤں کی یہ روایت رہی ہے کہ وہ سرکاری تقریبات میں عوامی شرکت کو ناممکن بنانے کے لیے افراتفری کا ماحول پیدا کرتا ہے۔ پاکستان اور جنگجوؤں نے ہمیشہ سے کشمیر میں 26جنوری کی تقریبات میں عوام کی شرکت کو روکنے کے لیے مذموم حربے استعمال کئے ہیں تاکہ خوف و دہشت کا ماحول پیدا کرکے عوام کو دور رکھا جائے۔انہوں نے بتایا کہ سیکورٹی فورسزنے 26جنوری کی تقریبات کو احسن طور پر منعقد کرانے کے لیے کڑے انتظامات اُٹھائے ہیں اور فورسز کسی بھی صورتحال سے نبرد آزما ہونے کے لیے پوری طرح سے تیار ہے۔