خبراردو:

فوج و فورسز نے جمعرات کو جنگجو مخالف آپریشنوں کو شمالی کشمیر میں جاری رکھتے ہوئے کلنترہ بارہمولہ، وارپورہ سوپور اور میر محلہ حاجن کا مصدقہ اطلاع موصول ہونے کے بعد کڑا محاصرہ عمل میں لاتے ہوئے یہاں گھر گھر تلاشیوں کا آغاز کیا۔ معلوم ہو اکہ فوج کی29آر آر، جموں وکشمیر پولیس کے اسپیشل آپریشن گروپ اور سی آر پی ایف کی بھاری نفری نے بدھوار شام کو کلنترہ کنڈی بارہمولہ کا محاصرہ عمل میں لاتے ہوئے یہاں چھپے بیٹھے جنگجوؤں کی تلاش شروع کی۔ اس دوران اگر چہ فورسز نے شام دیرگئے تک کئی رہائشی مکانات کی تلاشی مکمل کرلی تاہم موسم کی خراب صورتحال اور رات کی تاریکی کے پیش نظر جنگجو مخالف آپریشن کو جمعرات کی صبح تک ملتوی کیا گیا۔ پولیس ذرائع نے بتایا کہ فوج ، ایس او جی اور سی آر پی ایف کی بھاری جمعیت نے کنڈی کلنترہ علاقے کا کڑا محاصرہ عمل میں لایا جس دوران یہاں تلاشی کا سلسلہ شروع کیا۔ انہوں نے بتایا کہ فورسز نے علاقے میں جونہی تلاشی کارروائی میں تیزی لائی تو یہاں موجود جنگجوؤں نے تلاشی پارٹی پر جدید ہتھیاروں سے فائرنگ شروع کی۔ادھر سوپور کے وارپورہ علاقے میں جمعرات کی دوپہر فوج کی 22آر آر، ایس او جی اور سی آر پی ایف کی مشترکہ پارٹی نے علاقے کا کڑا محاصرہ عمل میں لاتے ہوئے یہاں جنگجوؤں کی تلاش شروع کی۔

پولیس کا کہنا ہے کہ فورسز اہلکارں نے جونہی علاقے میں تلاشی کارروائی کا سلسلہ شروع کیا تو مشتبہ مکان میں چھپے بیٹھے جنگجوؤں نے فورسز اہلکاروں پر شدید فائرنگ کی جس کے بعد علاقے میں جھڑپ کا باضابطہ آغاز ہوا۔پولیس نے بتایا کہ ممکنہ طور پر علاقے میں 1سے 2جنگجو چھپے بیٹھے ہیں جنہیں ڈھونڈ نکالنے کی خاطر ہی وسیع پیمانے پر آپریشن شروع کردیا گیا ہے۔ انہوں نے کہا کہ چھپے بیٹھے جنگجوؤں میں سے چوٹی کا کمانڈر بھی بتایا جاتا ہے۔اس دوران یہاں چھپے بیٹھے جنگجوؤں نے فورسز پارٹی کی جانب ایک ہتھ گولہ داغا جو زور دار دھماکے کے ساتھ پھٹ گیا جس کے نتیجے میں جائے جھڑپ کے نزدیک پولیس افسر سمیت اُن کا ذاتی محافظ زخمی ہوگیا ۔ معلوم ہوا ہے کہ زخمی پولیس افسر ایس ایچ او ڈنگی وچھ مدثر گیلانی اور اُن کے ذاتی محافظ جاوید احمد کو علاج و معالجے کی خاطر سرینگر منتقل کیا گیا ہے۔ادھر سوپور کے مین ٹاؤن میں قائم سی آر پی ایف کیمپ پر جمعرات کو نامعلوم جنگجوؤں نے ہتھ گولہ داغا جو زور دار دھماکے کے ساتھ پھٹ گیا۔ عینی شاہدین کا کہنا ہے کہ جمعرات کی دوپہر یہاں قائم سی آر پی ایف کیمپ پر نامعلوم سمت سے ایک ہتھ گولہ داغا گیا جو زور دار دھماکے کے ساتھ پھٹ گیا ۔ انہوں نے بتایا کہ ہتھ گولہ پھٹ جانے کے نتیجے میں قصبہ میں افرا تفری کا ماحول پیدا ہوا جس دوران یہاں موجود لوگوں نے محفوظ مقامات کی راہ لی۔

اس دوران یہاں تجارتی اداروں کے ساتھ ساتھ دوکانات نے اپنے شٹر گرائے جبکہ سڑکوں سے ٹریفک کی نقل و حمل بھی کچھ دیر تک معطل رہی۔ معلوم ہوا کہ فورسز اہلکاروں نے دھماکے کے فوراً بعد علاقے کا وسیع پیمانے پر محاصرہ کرتے ہوئے حملہ آوروں کی تلاش شروع کی۔ اس دوران دھماکے کے بعد یہاں نوجوانوں کی مختلف ٹولیوں نے فورسز اہلکاروں پر خشت باری کا سلسلہ شروع کیا جس کے نتیجے میں یہاں تناؤ کی کیفیت چھائی رہی۔ معلوم ہوا کہ فورسز اہلکاروں نے اس موقعے پر احتجاج کررہے مظاہرین کو منشتر کرنے کی غرض سے آنسو گیس کے کئی گولے داغنے کے ساتھ ساتھ فائرنگ بھی کی جسکے نتیجے میں ایک نوجوان ارشاد احمد ساکن فروٹ منڈی سوپور ہاتھ میں گولی لگنے کے نتیجے میں زخمی ہوا۔ عینی شاہدین نے بتایا کہ زخمی نوجوان کو اس موقعے پر سب ڈسٹرکٹ ہسپتال سوپور لے جایا گیا جہاں اُس کا علاج و معالجہ شروع کیا گیا۔ادھر شمالی کشمیر کے ہی حاجن بانڈی پورہ میں فوج و فورسز نے جنگجوؤں سے متعلق اطلاع موصول ہونے کے بعد میر محلہ بستی کا سخت محاصرہ کرتے ہوئے یہاں گھر گھر تلاشی کا آغاز کیا۔ معلوم ہوا کہ فورسز اہلکاروں نے میر محلہ نامی بستی کے تمام اندرونی و بیرونی راستوں کو اپنی تحویل میں لیتے ہوئے یہاں جگہ جگہ فورسز کے اضافی دستوں کوتعینات کیا۔

اس دوران مشتبہ مکان کے نزدیک پیش قدمی کرنے کے ساتھ ہی یہاں چھپے بیٹھے جنگجوؤں نے تلاشی پارٹی پر خود کار ہتھیاروں سے شدید فائرنگ شروع کی جس کے بعد علاقے میں گن گرج کا سلسلہ شروع ہوا۔ پولیس ذرائع نے بتایا کہ علاقے میں اب تک ایک جنگجو کو جاں بحق کردیا گیا ہے جبکہ مہلوک جنگجو کا دوسرا ساتھی فورسز پر وقفے وقفے سے فائرنگ جاری رکھے ہوئے ہیں۔ انہوں نے بتایا کہ جائے جھڑپ کے نزدیک مقامی آبادی کو فورسز نے محفوظ مقامات کی جانب منتقل کردیا تاہم ابھی بھی نزدیکی مکان میں 12برس کا کمسن لڑکا پھنسا ہوا ہے۔ علاقے میں آخری اطلاعات موصول ہونے تک طرفین کے درمیان گولیوں کا تبادلہ جاری تھا۔ ادھر انتظامیہ نے تینوں مقامات پر امن و قانون کی صورتحال کو برقرار رکھنے اور بے لگام افواہ بازی پر روک لگانے کے لیے موبائل انٹرنیٹ خدمات کو معطل کردیا ہے۔ نمائندوں کے مطابق تینوں مقامات پر پرتناؤ اور کشیدہ صورتحال کے نتیجے میں معمول کی سرگرمیاں ٹھپ رہیں جبکہ سڑکوں پر سے ٹریفک کی نقل و حمل بھی بند تھی۔