وادی کشمیر میں کورونا وئرس کے پھیلا وکو روکنے اور لوگوں کو محفوظ رکھنے کے لیے انتظامیہ کی جانب سے اٹھائے گئے احتیاطی اقدام کے طور پر کشمیر میں جمعہ کو مسلسل9ویں روز بھی مکمل لاک ڈاون رہا اور سری نگر سے لے کر تمام ضلعی و تحصیل صدر مقامات میں کرفیو جیسی سخت ترین پابندیاں عائد کی گئیں،جس دوران مساجد میں اجتماعی طور پر نماز جمعہ ادا نہیں کی گئی اور کم وبیش سبھی مقامات پر جمعہ اجتماعات معطل کئے گئے۔یاد رہے کہ جمعرات کو کورونا وائرس میں مبتلاء ایک مریض کی موت ہونے کے بعد انتظامیہ نے لاک ڈاؤن کو مزید سخت کردیا۔کشمیر نیوز سروس کے مطابق کشمیر میں کرونا وائرس سے پہلی ہلاکت کے بعد حکام نے جواہر ٹنل کے آرپار مساجد، مزارات، مندروں اور دیگر مذہبی مقامات بند کرنے کا فیصلہ کیا۔انتظامی افسر ڈاکٹر شاہد اقبال چوہدری نے بتایا کہ عبادت گاہوں کو کووڈ۔19 کے بڑھتے ہوئے خطرے کے پیشِ نظر بند کرنا ناگزیر ہے۔ تاہم انہوں نے یہ بھی کہا کہ ایسا ان عبادت گاہوں کی انتظامیہ کو اعتماد میں لینے اور ان کا تعاون حاصل کرنے کے بعد ہی کیا جائے گا۔
ان ہی احکامات اور احتیاطی اقدامات کے تحت جمعہ کو وادی کشمیر کی کم وبیش سبھی چوٹھی بڑی مساجد بند رہیں،جن میں مر کزی جامع مسجد سرینگر،آثار شریف حضرتبل،جناب صاحب صورہ، خانقاہِ نقشبندیہ وغیرہ شامل ہیں۔کووڈ۔19کے پھیلنے کے خطرات کے پیش نظر علمائے دین کی جانب سے جاری کئے گئے فتو یٰ اور احکامات کے تحت مسلم اکثریتی خطہ جموں وکشمیر میں لوگوں نے جمعہ نماز گھروں پر ہی ادا کی۔اس کے علاوہ ہندوؤں اور دیگر مذاہب کے لوگوں نے بھی اپنے گھروں میں ہی عبادت کرنے کو ترجیح دی،کیونکہ مندروں کے شہر جموں کے قریب ترکوٹا پہاڑیوں میں واقع ہندوؤں کی اہم عبادت گاہ ویشنو دیوی مندر کو پچھلے ہفتے زائرین کے لیے بند کر دیا گیا تھا۔۔کشمیر کے مفتی ناصرالاسلام نے جمعرات کے روز کہا تھاکہ وادی کشمیر میں کسی بھی مسجد میں نماز جمعہ کی ادائیگی کی اجازت نہیں ہوگی۔ مفتی ناصرالاسلام نے تین افراد پر مشتمل نماز جمعہ ادا کرنے کا کہا تھا۔ کشمیر میں ضلعی انتظامیہ پلوامہ نے جمعرات کے روز تبلیغی جماعت کی واپسی کے بعد علاقے کی متعدد مساجد میں ان کے اراکین کے قیام پر ضلع انتظامیہ گہری نظر رکھے ہوئے ہے اور انہیں وہاں جمع نہ ہونے کی ہدایت دی ہے۔ڈپٹی کمشنر پلوامہ، ڈاکٹر راگھو لانگر، جو ڈسٹرکٹ ڈیزاسٹر مینجمنٹ اتھارٹی (ڈی ڈی ایم اے)کے سربراہ بھی ہیں، نے ایک حکم جاری کیا جس میں لکھا ہے کہ تبلیغی جماعت کے لوگ مختلف علاقوں سے ضلع کا رخ کررہے ہیں جس کی وجہ سے اس علاقے میں انفیکشن پھیلنے کے خدشات بڑھ گئے ہیں۔ اب ایسی مساجد کو قرنطینہ بنا دیا جائے گاجہاں تبلیغی جماعت کے اراکین رہ رہے ہیں یا پناہ لے رہے ہیں۔
اس دوران جمعہ کو دن بھر سرینگر سمیت وادی بھرمیں بارشیں ہوئیں اور یہ سلسلہ دن بھر جاری رہا۔جمعہ کو سختی کیساتھ لاک ڈاؤن رہا اور جموں وکشمیر میں چپے چپے پر فورسز اہلکار تعینات رہے جبکہ لوگوں کی آزاد نقل وحرکت کو مکمل طور پرگھروں کی چار دیواری تک محدود کرکے رکھ دیا گیا تھا۔جمعہ کو مسلسل9ویں روز بھی وادی کشمیر کے طول وارض میں ہو کا علم رہا۔چہار سو اضطراب اور خوف ودہشت کا ما حول ہے۔لوگ گھروں میں وبا کے جانے کا انتظار کررہے ہیں۔جمعہ اجتماعات کو روکنے کیلئے سخت ترین بندشیں عائد رہیں اور اس مقصد کیلئے سڑکوں اور شاہروں کیساتھ ساتھ گلی کوچوں کو بھی خار دار تاروں سے سیل کردیا گیا تھا۔ یاد رہے جمعرات کی صبح سرینگر کے ایک سرکاری اسپتال میں 65 سالہ شخص کی ہلاکت کرونا وائرس سے ہوئی۔مذکورہ شخص تبلیغی جماعت کا ایک رکن تھا اور اس نے حال ہی میں نئی دہلی، اتر پردیش اور جموں میں منعقد ہونے والے کئی اجتماعات میں شرکت کی تھی۔ اور اس دوراں ملائیشیا اور انڈونیشیا سے تعلق رکھنے والے مندوبین سے ملاقاتیں بھی کی تھیں۔ڈاکٹروں کا کہنا ہے کہ فوت ہونے والا شخص پہلے ہی شوگر اور بلڈ پریشر کے عارضوں میں مبتلا تھا۔ اطلاعات کے مطابق اس شخص کو پہلے گھر جانے کی اجازت دے دی گئی، جس سے یہ وائرس تیزی سے دوسروں لوگوں میں منتقل ہوا۔
اسپتال انتظامیہ پر بھی مبینہ لاپرواہی کا الزام لگایا جا رہا ہے۔ کشمیر میں کرونا وائرس کے مریضوں کی تعداد میں اضافے کے پیشِ نظر علاقے میں گزشتہ ایک ہفتے سے جاری لاک ڈاؤن کو جمعہ کو مزید سخت کر دیا گیا ہے۔لوگوں کے گھروں سے باہر آنے پر مکمل پابندی لگا دی گئی ہے اور ایمبولینسز کے علاوہ صرف ان گاڑیوں کو سڑکوں پر چلنے کی اجازت دی جا رہی ہے جن میں کووڈ۔19 سے نمٹنے کے کام پر مامور افراد اور لازمی سروسز کا عملہ سوار ہو۔پولیس نے دفعہ 144 اور ڈیزاسٹر منیجمنٹ ایکٹ2005 کے تحت نافذ کی جانے والی کرفیو یا کرفیو جیسی پابندیوں کی خلاف ورزی کرنے پر300 سے زائد افراد کو حراست میں لیا ہے یا ان کے خلاف مقدمات درج کیے ہیں۔علاوہ ازیں درجنوں دْکانوں اور ہوٹلوں کو مبینہ طور پر قانون توڑنے پر سیل کر دیا گیا ہے۔