تیانجن/نئی دہلی وزیر اعظم نریندر مودی نے شنگھائی تعاون تنظیم (ایس سی او) کے اجلاس میں رکن ممالک کے درمیان سیکورٹی، رابطے اور باہمی تعاون کے مواقع پر زور دیتے ہوئے دہشت گردی کے خلاف مشترکہ طور پر لڑنےاور اقوام متحدہ میں اصلاحات اورعالمی خطۂ جنوب کی آوازکو پرزور طریقے سے اٹھایا۔

انہوں نے رکن ممالک سے ہندوستان کی ترقی کے سفر میں شامل ہونے کی اپیل کی اور ہندوستان میں مختلف سطحوں پر اصلاحات کے لئے کئے جا رہے کاموں کا ذکر کیا۔

مسٹر مودی نے رکن ممالک کے لوگوں کے درمیان رابطے کو فروغ دینے کے لیے ایس سی او کے تحت ایک ’ثقافتی ڈائیلاگ فورم‘ کے قیام کی تجویز بھی دی۔

مسٹر مودی، جو سات سال بعد چین کے اپنے پہلے دورے پر ہیں، پیر کے روز یہاں ایس سی او کے سربراہان مملکت کے 25ویں سربراہی اجلاس سے خطاب کیا۔ اپنے خطاب کے آغاز میں انہوں نے ازبکستان کی یوم آزادی اور کرغزستان کے قومی دن پر دونوں ممالک کے رہنماؤں کو مبارکباد دی۔

انہوں نے کہا کہ گزشتہ چوبیس برسوں میں ایس سی او نے پورے یوریشین خطے کے ’توسیع شدہ کنبے‘ کو جوڑنے میں اہم کردار ادا کیا ہے۔ انہوں نے کہا کہ ہندوستان نے ایک فعال رکن کے طور پر تنظیم میں ہمیشہ تعمیری اور مثبت کردار ادا کیا ہے۔

وزیر اعظم نے کہا کہ سیکورٹی، رابطہ اور ایس سی او کے ساتھ تعاون کے مواقع ہندوستان کی سوچ اور پالیسی کے تین اہم ستون ہیں۔

سلامتی کے پہلے ستون کے بارے میں بات کرتے ہوئے انہوں نے کہا کہ سلامتی، امن اور استحکام کسی بھی ملک کی ترقی کی بنیاد ہوتے ہیں لیکن اس راستے میں دہشت گردی، علیحدگی پسندی اور انتہا پسندی بڑے چیلنجز ہیں۔

انہوں نے کہا کہ دہشت گردی صرف ایک ملک کی سلامتی کے لیے چیلنج نہیں بلکہ پوری انسانیت کے لیے مشترکہ چیلنج ہے۔ اسی لیے ہندوستان نے ہمیشہ دہشت گردی کے خلاف جنگ میں اتحاد پر زور دیا ہے۔

مسٹر مودی نے کہا کہ ہندوستان گزشتہ چار دہائیوں سے دہشت گردی کا شکار ہے۔ انہوں نے کہا ’حال ہی میں ہم نے پہلگام میں دہشت گردی کی سب سے گھناؤنی شکل دیکھی۔ یہ حملہ نہ صرف ہندوستان کی روح پرکاری ضرب تھی، بلکہ یہ ہر ملک، ہر اس شخص کے لیے کھلا چیلنج تھا جو انسانیت پر یقین رکھتا ہے۔‘

انہوں نے دہشت گردی کی حمایت کرنے والے ممالک کا نام لیے بغیر ان ممالک کو کٹہرے میں کھڑا کرتے ہوئے کہا کہ ایسی صورتحال میں یہ سوال اٹھنا فطری ہے کہ کیا کچھ ممالک کی جانب سے دہشت گردی کی کھلی حمایت ہمارے لیے قابل قبول ہوسکتی ہے

اس موقع پر مسٹر مودی نے ان ممالک کو بھی نشانہ بنایا جو دہشت گردی کے معاملے پر دوہرا معیار اپنا رہے ہیں۔ انہوں نے کہا دہشت گردی کی مخالفت کرنا سب کی ذمہ داری ہے اور اس معاملے پر دوہرا معیار برداشت نہیں کیا جائے گا۔

انہوں نے کہا کہ ہمیں واضح طور پر اور ایک آواز میں کہنا ہے کہ دہشت گردی پر کوئی دوہرا معیار قبول نہیں کیا جائے گا، ہمیں دہشت گردی کے ہر رنگ و روپ کی مل کر مخالفت کرنی ہے، یہ انسانیت کے تئیں ہماری ذمہ داری ہے۔

دہشت گردی کی مالی معاونت کے خلاف ہندوستان کی مہم کا حوالہ دیتے ہوئے انہوں نے کہا، ’ہندوستان نے دہشت گردی کے خلاف جنگ میں اتحاد پر زور دیا ہے۔ ہندوستان نے ایک مشترکہ معلوماتی مہم کی قیادت کرتے ہوئے القاعدہ اور اس سے وابستہ دہشت گرد تنظیموں سے لڑنے کے لیے پہل کی۔ ہم نے ہم آہنگی بڑھانے اور بنیاد پرستی کے خلاف مشترکہ اقدامات کرنے کی تجویز بھی رکھی ۔ ہم نے دہشت گردی کی مالی معاونت کے خلاف آواز اٹھائی۔‘

کنیکٹیویٹی کے بارے میں انہوں نے کہا کہ مضبوط رابطہ نہ صرف تجارت بلکہ اعتماد اور ترقی کے دروازے بھی کھولتا ہے۔ انہوں نے کہا، ’اس سوچ کے ساتھ، ہم چابہار پورٹ اور انٹرنیشنل نارتھ ساؤتھ ٹرانسپورٹ کوریڈور جیسے اقدامات پر کام کر رہے ہیں۔ ان کے ذریعے ہم افغانستان اور وسطی ایشیا کے ساتھ روابط بڑھا سکتے ہیں۔ ہم سمجھتے ہیں کہ رابطے کی ہر کوشش میں خود مختاری اور علاقائی سالمیت کا احترام کیا جانا چاہیے۔ یہ ایس سی او چارٹر کے بنیادی اصولوں میں بھی شامل ہے۔‘

وزیر اعظم نے کہا کہ خودمختاری کی خلاف ورزی کرنے والا رابطہ اعتماد اور اہمیت کو ختم کرتا ہے۔

تعاون کے تیسرے ستون اور بہتری کے مواقع کے بارے میں انہوں نے کہا، ’2023 میں ہندوستان کی صدارت کے دوران، نئی توانائی اور خیالات کی آمیزش تھی، ہمارے تعاون میں نئے موضوعات جیسے اسٹارٹ اپس اور اختراع، روایتی ادویات، نوجوانوں کو بااختیار بنانا، ڈیجیٹل شمولیت اور مشترکہ بدھ وراثت شامل کیے گئے تھے۔‘

انہوں نے کہا کہ ہندوستان ،حکومتوں سے بڑھ کر عام لوگوں، نوجوان سائنسدانوں، اسکالرس اور اسٹارٹ اپس کو شامل کرنا چاہتا ہے۔

مسٹر مودی نے لوگوں کے درمیان رابطے بڑھانے کے لیے ایس سی او کے تحت ایک ’ثقافتی ڈائیلاگ پلیٹ فارم‘ بنانے کا بھی مشورہ دیا۔ انہوں نے کہا کہ اس کے ذریعے ہم اپنی قدیم تہذیبوں، فن، ادب اور روایات کو عالمی پلیٹ فارم پر شیئر کر سکتے ہیں۔

ملک میں مختلف سطحوں پر کی جا رہی اصلاحات کا ذکر کرتے ہوئے وزیر اعظم نے کہا کہ ملک نے ہر چیلنج کو مواقع میں تبدیل کرنے کی کوشش کی ہے۔ اس سے ملک میں ترقی کے ساتھ ساتھ بین الاقوامی تعاون کے نئے مواقع بھی کھل رہے ہیں۔ انہوں نے کہا کہ وہ سبھی کو ہندوستان کی ترقی کے سفر میں شامل ہونے کی دعوت دیتے ہیں۔

انہوں نے منظم جرائم، منشیات کی اسمگلنگ اور سائبر سیکورٹی جیسے عصری چیلنجوں سے نمٹنے کے لیے چار نئے مراکز کے قیام کا خیر مقدم کیا۔ اقوام متحدہ جیسے اداروں میں اصلاحات کا مطالبہ کرتے ہوئے مسٹر مودی نے کہا، ’ایس سی او کے رکن عالمی اداروں کی اصلاح کے لیے باہمی تعاون کو بڑھا سکتے ہیں۔ اقوام متحدہ کی 80ویں سالگرہ کے موقع پر ہم متفقہ طور پر اقوام متحدہ میں اصلاحات کا مطالبہ کر سکتے ہیں۔‘

مسٹر مودی نے ترقی پذیر ممالک کی آواز سننے پر زور دیتے ہوئے کہا، ’عالمی خطۂ جنوب کی امنگوں کو پرانے فریم ورک میں قید رکھنا آنے والی نسلوں کے ساتھ بہت بڑی ناانصافی ہے۔ ہم نئی نسل کے کئی رنگوں کے خواب پرانے زمانے کی بلیک اینڈ وائٹ اسکرین پر نہیں دکھا سکتے۔ اسکرین کو تبدیل کرنا ہوگا۔‘

انہوں نے اس سمت میں ایس سی او کی اہمیت کا ذکر کیا اور کہا، ایس سی او کثیرجہتی اور جامع عالمی نظام کے لیے رہنما بن سکتا ہے۔

اس موقع پر انہوں نے ایس سی او کے اگلے صدر، کرغزستان کے صدر جپارو کے لیے نیک خواہشات کا اظہار بھی کیا۔

یو این آئی۔ اے ایم۔ایس وائی۔