خبراردو:

سری نگر: فخرموجودات،خاتم النبین ،رسول رحمت حضرت محمدمصطفےٰ احمدمجتبےٰ ﷺ کے یوم ولادت باسعادات کی مناسبت سے منائی جانے والی عیدمیلادالنبیﷺ کے موقعہ پرمنگل اوربدھ کی درمیانی رات تاریخی آثارشریف درگاہ حضرتبل سمیت وادی کے اطراف واکناف ،صوبہ جموں اورپاکستانی زیرانتظام کشمیرکے مختلف علاقوں میں واقع آستانوں ،زیارت گاہوں ،مساجد،دینی مدارس اوردیگرعبادتگاہوں میں شب خوانی کی بابرکت مجالس منعقد ہوئیں ،جن میں لاکھوں کی تعدادمیں فرزندان توحیدبشمول مردوزن اوربچوں وبزرگوں نے شامل ہوکرحضوراکرم ﷺ کے تئیں اپنی والہانہ عقیدت ومحبت کااظہارکیا۔بدھ کونمازفجرکے بعدسبھی آستانوں میں شب خوانی کیلئے جمع عقیدتمندموئے مقدس ﷺ کے دیدارسے فیضیاب ہوئے ۔اس دوران بدھ کے روزسری نگر،بارہمولہ اوردیگرکئی مقامات پرمیلادجلوس برآمدہوئے ،جن میں شامل مسلمان بشمول دینی مدارس میں زیرتعلیم وتربیت بچوں نے درودحضورﷺ کاوردکرکے فضاء کومعطر اورشرکاء جلوس کے ایمان کوزندہ کیا۔

منگل کو درگاہ شریف حضرت بل میں نماز عشاء لگ بھگ ساڑھے 10 بجے ادا کی گئی جس کے بعد نعت خوانی ، توبہ استغفار ، درود اذکاراور ختمات المعظمات کی رُوح پرور محفلوں کا اہتمام کیا گیا۔دماغوں کو روشن، دلوں کو منور اور طبعیتوں کو محصور کرنے والی ان مجالس میں ہزاروں فرزندان توحید اور عاشقانِ رسولﷺ کے پروانوں نے اللہ کے حبیب ﷺکے تئیں اپنی والہانہ عقیدت کا مظاہرہ کیا۔ کڑاکے کی ٹھنڈ نا کے باوجود آثار شریف حضرت بل میں بشمول مردوزن اور بچے صاف وپاک ملبوسات زیب تن کر کے توبہ استغفار اور درودو ازکار کی مجالس میں محو رہے۔ شب بیداروں کی کثیر تعداد نے ان مجالس میں شرکت کر کے اپنے کردہ اور ناکردہ گناہوں کی بخشش مانگی۔ شب خوانی کے موقعہ پرہر عقیدت مند کی آنکھ نم تھی اور وہ آہ زاری کے ساتھ ساتھ اپنے گناہوں کی بخشش کیلئے ہاتھ پھیلا پھیلا کردعائیں مانگ رہے تھے جس کے نتیجے میں رات بھر حضرتبل کے نزدیکی علاقوں کی فضائیں گونجتی رہیں۔درگاہ شریف میں علمائے کرام نے ریاست میں امن و آشتی اور ناگہانہ آفتوں سے نجات کیلئے خصوصی دعائیں مانگیں۔معلوم ہواکہ رات بھرشب خوانی کی مجلس میں شامل رہے عقیدتمندوں نے بدھ کوعلی الصبح نمازفجراداکی جبکہ اس دوران سخت ٹھنڈکے باوجودسری نگرکے مختلف علاقوں سے بڑی تعدادمیں فرزندان توحیددرگاہ حضرتبل میں نمازفجرکی ادائیگی کیلئے پہنچے۔نمازفجرکی ادائیگی کے اوردرودواذکارکے فوراًبعدآثارشریف درگاہ حضرتبل میں موئے مقدس ﷺ کے دیدارسے ہزاروں عقیدتمندفیضیاب ہوئے ،اوراس دوران یہاں کی فضاء درود حضور ﷺ سے گونج اُٹھی ۔

مقامی لوگوں نے بتایاکہ بدھ کوصبح سے ہی وادی کے اطراف واکناف ہزاروں عقیدت مند دوپہر کے بعد ہی وہاں پہنچنا شروع ہوگئے۔ ٹریفک پولیس نے حضرتبل پہنچنے والی اور وہاں سے واپس روانہ ہونے والی گاڑیوں کیلئے روٹ پلان پہلے ہی مرتب کیا جبکہ زائرین کو سہولیات بہم رکھنے کیلئے صوبائی وضلع انتظامیہ سی نگر انتظامیہ اور وقف بورڈ کیساتھ ساتھ کئی سرکاری محکموں اور نجی اداروں و تنظیموں نے بھی خصوصی انتظامات کئے تھے۔زائرین کو درگاہ شریف حضرت بل تک لانے اورلے جانے کیلئے ٹرانسپورٹ کے معقول انتظامات کئے گئے تھے جبکہ کئی رضاکار تنظیموں نے زائرین کیلئے جگہ جگہ لنگر اور مشروبات کا انتظام کیاتھا اور یہ سہولیات دستیاب رکھنے میں مسلم وقف بورڈ ،پولیس، ایس آر ٹی سی، محکمہ صحت اور محکمہ پی ایچ ای نے اہم رول اداکیا۔درگاہ شریف حضرتبل میں دن بھرعقیدتمندوں کاتانتابندھارہاجبکہ نمازظہراورنمازعصرکے وقت یہاں فرزندان کااژدھام موجودرہا۔اس دوران ہزاروں عقیدتمنددیدارموئے مقدس سے فیضیاب ہوئے ۔نمازمغرب اورنمازعشاء کے بعدبھی یہاں لوگ موئے مقدس ﷺ کے دیدارسے فیضیاب ہوئے ۔

درگاہ حضرتبل کی انتظامیہ کے ذرائع نے بتایاکہ عیدمیلادالنبیﷺ کی مناسبت سے درگاہ شریف میں بابرکت مجالس کاسلسلہ پورے ایک ہفتے تک جاری رہے گا،اورروزانہ ہرنمازکے بعدفرزندان توحیدیہاں موئے مقدسﷺ کے دیدارسے فیضیاب ہونگے ۔اس دوران شہری کلاش پورہ ، زیارت مخدوم صاحب سرینگر، خانقاہ معلی، جناب صاحب صورہ ، زیارت دستگر صاحب سرائے بل وخانیار سرینگر، کھرم سرہامہ ، آثار شریف پنجورہ شوپیان ، احم شریف بانڈی پورہ ، زیارت خواجہ ہلال نسبل سمبل اور درگاہ عالیہ بارہمولہ کے علاوہ ، اننت ناگ ، پلوامہ ، گاندربل ، بڈگام ، کپوارہ ، ہندوارہ اوروادی میں دیگرکئی مقامات پربھی اس شب خوانی کی بابرکت مجالس کاانعقادکیاگیا،جن میں ہزاروں کی تعدادمیں عقیدتمندوں نے شرکت کی ۔اس دوران کئی آستانوں اورمساجدمیں علمائے دین اورمقررین نے عیدمیلادالنبیﷺ پرروشنی ڈالی ۔وادی بھرمیں عیدمیلادالنبی ﷺ کی مناسبت سے منعقدہ شب خوانی مجالس اوردیگرتقاریب سے خطاب کرتے ہوئے علمائے دین نے کہاکہ حضرت محمد مصطفےٰ ﷺ تاریخ عالم کے سب سے بڑے منصف ،مدبراوررہنماء تھے،جنہوں نے تاریکیوں اورتوہمات میں گری انسانیت کواچھائی وسچائی کی روشنی دکھائی ۔

انہوں نے کہاکہ حضورپُرنور ﷺ کی نبوت ورسالت سے قبل ہی عادل ،امین و صادق کے طور پر مشہور تھے۔ انہوں نے کہاکہ معاشرہ اسلامی ہو یا غیر اسلامی عدل وانصاف کے بغیر اپنا وجود برقرار نہیں رکھ سکتا۔مقرین نے کہاکہ آج عالم اسلام نظام عدل کی کمزوریوں کی وجہ سے بحرانوں سے دو چار ہے،اوراُمت مسلمہ جن مصائب ومشکلات میں مبتلاء ہے ،وہ صرف دین اسلام سے دوری کانتیجہ ہے ،اسلئے بحیثیت اُمت محمدﷺ سبھی مسلمانوں کواپنااحتساب کرناچاہئے۔انہوں نے کہا کہ سیاسی، معاشی، سماجی عدم مساوات اور ناانصافی کی وجہ سے دنیابھرمیں امن تہ و بالا ہو چکا ہے۔علمائے دین کاکہناتھاکہ دین اسلام نے ہر قسم کے امتیازی اور استحصالی رویوں کا خاتمہ عدل کے بول بالا سے کیا، جہاں عدل ہوتا ہے وہاں ظلم پنپ نہیں سکتا۔ انہوں نے کہا کہ سرور دو عالم ﷺکو اللہ نے کائنات کیلئے کامل قابل تقلید نمونہ بنا کر مبعوث فرمایا اور اُنہیں عدل کی تلقین کی۔