خبراردو:

نیشنل کانفرنس کے نائب صدر اور ریاست کے سابق وزیرا علیٰ عمر عبداللہ نے سوموار کو دمہال ہانجی پورہ میں ایک عوامی جلسے سے خطاب کے دوران جماعت اسلامی پر پابندی کو پی ڈی پی اور بی جے پی کے درمیان فکسڈ میچ قرار دیا۔ عمر عبداللہ نے کہا ہے کہ ایسا محسوس ہوتا ہے کہ جماعت اسلامی پر پابندی دونوں پارٹیوں کی ملی بھگت ہے تاکہ بھاجپا والے ملک میں اس کا ڈھنڈورا پیٹ سکیں جبکہ دوسری جانب قلم دوات جماعت والے وادی میں اس پر وایلا کرسکیں اور دونوں جماعتیں اس سے فائدہ حاصل کرسکیں۔عمر عبداللہ نے کہا کہ ’’نیشنل کانفرنس کو کمزور کرنے کیلئے آج بھی تمام حربے استعمال ہونگے اور تمام کوششیں کی جائینگی کیونکہ حقیقت یہ ہے کہ ہماری شناخت اور پہچان کو نقصان تب ہوتا ہے جب یہ لوگ نیشنل کانفرنس کو اقتدار سے باہر رکھنے میں کامیاب ہوتے ہیں، جب بھی یہاں مرکز کا کوئی قانون لاگو ہوا تب یہاں نیشنل کانفرنس کی حکومت نہیں تھی،زیادہ پیچھے جانے کی ضرورت نہیں ، یہاں جی ایس ٹی ، سرفیسی ایکٹ اور فوڈ ایکٹ لگا کیونکہ نیشنل کانفرنس کی حکومت نہیں تھی، NIAکے مقدمے چل رہے ہیں کیونکہ نیشنل کانفرنس کی حکومت نہیں تھی، میں یہاں تک کہوں گا کہ جماعت اسلامی پر پابندی لگی کیونکہ نیشنل کانفرنس کی حکومت نہیں تھی‘‘۔ انہوں نے کہا کہ میں بھی 6سال تک اس ریاست کا وزیر اعلیٰ رہا، میں نے بھی ایک مشکل دور سے اس ریاست کو نکالا ہے، اگر جماعت اسلامی پر پابندی لگانا ہی اس ریاست کو مشکل سے نکالنے کا راستہ تھا تو مجھے وہ راستہ اپنانے کی ضرورت کیوں نہیں پڑی۔

جب 2010میں حالات خراب ہوئے، ہم نے حالات کو دوبارہ حالات کو پٹری پر لایا لیکن ہم نے جماعت پر کوئی روک نہیں لگائی، اُن کے سکول چلے، تمام ادارے چلے اور اُن کے لیڈر بھی میدان میں سرگرم رہے۔ نیشنل کانفرنس کے نائب صدر نے کہا کہ پی ڈی پی صدر نے ایک نیا ڈرامہ شروع کیا ہے کہ ’میرے خلاف FIRدرج کرکے مجھے گرفتار کیا جائے ‘، ’’محبوبہ جی یہ بھی بتادیں کہ کس بات کی گرفتاری؟ آپ کو کس الزام میں گرفتار کیا جائیگا؟ یا تو اندر اندر سے کوئی فکسڈ میچ چل رہا ہے، مجھے تو لگتا ہے کہ جماعت اسلامی پر پابندی بھی اندر اندر سے میچ فکسنگ ہی ہے، جماعت پر شائد اس لئے پابندی لگائی ہے تاکہ بھاجپا والی ملک میں کہیں کہ ہم نے کتنے مضبوط ہیں ، ہم نے جماعت پر پابندی لگادی اور ہم کتنی سختی کررہے ہیں جبکہ پی ڈی پی والے وادی میں اس اقدام کو زیادتی قرار دے، اس کیخلاف احتجاج کرے، جلوس نکالے اور گرفتاریاں دیں تاکہ لوگوں کے ذہن سے حکمرانی کے دوران اپنے کالے کارناموں کو مٹاسکیں۔‘‘

عمر عبداللہ نے کہا کہ محبوبہ مفتی کی نئی لن ترانیاں اور بات بات پر آنسو بہانا محض الیکشن کا ایک نیا ڈرامہ ہے ، لوگ ان کی اصلیت 2015اور 2018کے درمیان دیکھ چکے ہیں۔کشمیرنیوز سروس کے مطابق جنوبی کشمیر کے حالات کیلئے نیشنل کانفرنس کو ذمہ دار ٹھہرانے کے محبوبہ مفتی کے الزام کو یکسر مسترد کرتے ہوئے عمر عبداللہ نے پی ڈی پی سے مخاطب ہوتے ہوئے کہا کہ ’’دوسروں پر الزام عائد کرنے پہلے آپ اپنے گریباں میں جانکیں، جنوبی کشمیر کو خون کا اکھاڑا پی ڈی پی کی حکومت نے بنایا، 2014تک نیشنل کانفرنس کی حکومت کے دوران جنوبی کشمیر میں خوف و دہشت کا ماحول نہیں تھا، یہاں تو حالات بالکل ٹھیک تھے، یہاں ملی ٹنسی کا کوئی رجحان نہیں تھا، یہاں آئے روز انکاؤنٹر اور جنگجو نہیں مارے جاتے تھے، یہاں آپریشن آل آؤٹ، کریک ڈاؤن، گرفتاریاں اور CASO کا کہیں نام و نشان نہیں تھا ، یہ سب تو محبوبہ جی کی حکمرانی میں یہاں کے لوگوں کو دیکھنے کو ملا۔ آپ آج آنسو بہا کر کس کو دھوکے میں رکھنا چاہتی ہو؟‘‘۔ انہوں نے کہا کہ پی ڈی پی صدر آج کہتی ہیں کہ فورسز کی طرف سے سختی نہیں ہونی چاہئے، جب بیروہ میں ایک نوجوان ووٹر کو فوج کی جیپ کے ساتھ باندھ کو درجن بھر گاؤں سے گمایا گیا، تب محبوبہ جی کو سختی نظر کیوں نہیں آئی؟ تب محبوبہ جی کی ہمدردیاں کہاں تھیں؟حد تو یہ ہے کہ اس نوجوانوں کے حق میں جب انسانی حقوق کمیشن نے 10لاکھ روپے معاوضے کا اعلان کیا تو محبوبہ مفتی جی نے وہ بھی رکوا دیئے اور آج محبوبہ مفتی پھر سے کہتی ہے کہ اُن پر بھروسہ کیا جائے۔پارٹی ورکروں اور عہدیداروں کو کمر بستہ ہونے کی ہدایت کرتے ہوئے عمر عبداللہ نے کہا کہ پہلے چھوٹا امتحان آئے گا اور انشاء اللہ اُس کے ساتھ ہی بڑا امتحان آئے گا، ان دونوں امتحانوں میں سرخ رو ہونے کیلئے ہمیں محنت کرنی ہے۔

اس موقعے پر ریاست جموں کشمیر کے سابق سپیکر شہید خواجہ ولی محمد ایتو (ایڈوکیٹ)کی 25ویں برسی پر زبردست خراج عقیدت پیش کیا گیا۔اُن کے مقبرہ پر صبح سویرے ہی قرآن خوانی، فاتحہ خوانی اور گل باری کی گئی۔اس موقعے پر جلسے سے پارٹی کے جنرل سیکرٹری علی محمد ساگر، پارٹی کے سینئر لیڈر مبارک گل، سکینہ ایتو، نذیر احمد خان گریزی، ڈاکٹر بشیر احمد ویری، الطاف احمد کلو، پیر محم دحسین، شیخ محمد رفیع، عمران نبی ڈار، ایڈوکیٹ ریاض احمد خان اور صفدر علی خان نے بھی تقاریر کیں۔