خبراردو:

وزیر اعظم نریندر مودی نے ریاست جموں وکشمیر کا کڑے سیکورٹی کے بیچ یک روزہ دورہ کرتے ہوئے یہاں مختلف النوع تعمیراتی پروجیکٹوں کا سنگ بنیاد رکھنے کے علاوہ کئی اہم مکمل ہوچکے پروجیکٹوں کابھی افتتاح بھی کیا۔ اس موقعے پر الگ الگ اجتماعات سے نریندر مودی نے خطابات کرتے ہوئے کہا کہ کئی اہم اور حساس معاملات پر اظہار خیال کیا ۔انہوں نے عوامی اجتماع سے خطاب کرتے ہوئے کہا کہ لائن آف کنٹرول پر پاکستانی جارحیت کا منہ توڑ جواب دیا جارہا ہے اور آنے والے دنوں میں سرحد پر رہائش پذیر عوام کی حفاظت کو یقینی بنانے کے لیے 14ہزار بنکر تعمیر کئے جائیں گے۔ کشمیری پنڈتوں سے متعلق لب کشائی کرتے ہوئے وزیر اعظم کا کہنا تھا کہ ملک کشمیری پنڈتوں کی قربانیوں کو فراموش نہیں کرسکتا۔

وزیر اعظم نریندر مودی نے خطہ جموں میں6ہزار کروڑ مالیت کے مختلف پروجیکٹوں کا سنگ بنیاد رکھنے کے علاوہ یہاں کئی تعمیراتی پروجیکٹوں کا افتتاح بھی کیا۔ جموں کے وجے پور علاقے میں وزیر اعظم نے 750بستروں پرمشتمل ایمز ہسپتال، انجینئر نگ کالج،انڈین انسٹی چوٹ آف ماس کمونی کیشن، سجوال جوریاں میں دریائے چناب پر پل کی سنگ بنیاد، دیوکا اور توی دریاؤں پر ماحولیاتی آلودگی کو زائل کرنے کے لیے کئی اہم پروجیکٹوں کا سنگ بنیاد، 624میگاواٹ کیروپن بجلی پروجیکٹ ، جنگلوت کٹھوعہ میں یونیورسٹی انسٹی چوٹ انجینئرنگ اینڈ ٹیکنالوجی کالج کا افتتاح کیا۔ وزیر اعظم نریندر نے وجے پور میں بھاری عوامی ریلی سے خطاب کرتے ہوئے کہا کہ میں جموں میں زمینی سطح پر ترقی کو ممکن بنانے اور یہاں کے لوگوں کی زندگی میں ایک نیا انقلاب بپا کرنے کے لیے آیا ہوا ہوں۔انہوں نے کہا کہ جموی عوام کو بہتر طبی سہولیات کی فراہمی کے لیے آج وجے پور میں 750بستروں پر مشتمل ایمز ہسپتال کا سنگ بنیاد رکھا جارہا ہے۔ وزیرا عظم نے بتایا کہ ان پروجیکٹوں کی تعمیر سے جموی نوجوانوں کے لیے روزگار کے مواقع بھی میسر ہوں گے۔ وزیر اعظم کا کہنا تھا ایمز کی سنگ بنیاد رکھنے کے ساتھ ساتھ وادی کشمیرکے اننت ناگ، بارہمولہ، ڈوڈہ، کٹھوعہ اورراجوری میں 5میڈیکل کالجوں پر شدومد سے کام جاری ہے جس کے لیے مرکزی سرکار نے ان کی فوری تعمیر کے لیے 750کروڑ روپے سے زائد فنڈس واگزار کئے ہیں۔

انہوں نے کہا کہ تعمیر ہورہے کالجوں میں جلد ہی درس و تدریس کا عمل شروع کیا جائے جس کے نتیجے میں ریاست میں موجود ایم بی بی ایس کوٹا میں دوگنا اضافہ ہوگا۔ ان کالجوں کے نتیجے میں مزید 500ایم بی بی ایس سیٹیں وجود میں آئی گے اور یہ سب تب ہی ممکن ہوا جب بھاجپا حکومت نے ریاستی عوام کو ترقی پذیر بنانے کا عہد کیا۔انہوں نے اس موقعے پرکشمیر ی پنڈتوں کا ذکر چھیڑتے ہوئے کہا کہ میں آج کے اس موقعے پر اہم اور انتہائی اہمیت کا حامل موضوع کشمیری پنڈتوں کی فلاح اور بازآبادکاری پر بھی بات کروں گا۔ نریندر مودی کا کہنا تھا کہ مرکزی سرکار کشمیری پنڈتوں کے وقار اور عزت کو بحال کرنے کے لیے وعدہ بند ہے۔وزیرا عظم کا کہنا تھا کہ کشمیری پنڈتوں کے آدھیکار کو واپس دلانا بھاجپا وعدہ بند ہے۔ انہوں نے بتایا کہ کشمیری پنڈت وادی میں جس کربناک دور سے گزرے ہیں اور جس پرتناؤ اور کشیدہ حالات میں انہوں نے وادی کشمیر میں اپنے گھر بار چھوڑ ے ہیں ، ملک اس صورتحال کو کبھی بھی فراموش نہیں کرسکتا۔ انہوں نے بتایا کہ اگر چہ میں کشمیری پنڈتوں سے متعلق ہر منچ پر چلاتا نہیں ہوں تاہم میرے دل میں اُن کی فکر ہمیشہ سے موجود ہے۔انہوں نے بتایا کہ بھاجپا کشمیری پنڈتوں کی بازآبادی اور اُن کی فلاح و بہبود کے لیے فکر مند ہے۔ ہم نے تین سال قبل جب ریاست جموں وکشمیر کے لیے مالی پیکیج کا اعلان کیا تو ہماری حکومت نے کشمیری پنڈتوں کے لیے اُس میں الگ مد قائم کیا اور آج بھی جب میں ریاست کا دورہ کررہا ہوں تو اس دوران کشمیری پنڈتوں کے لیے بانڈی پورہ اور اونتی پورہ میں الگ الگ رہائشی کالونیوں کا سنگ بنیاد رکھنے جارہا ہے جس سے یہ عیاں ہوتا ہے کہ ہم اپنے پنڈتوں بھائی بہنوں کی مشکلات سے بے خبر نہیں ہے۔انہوں نے بتایا کہ وزیر اعظم مالی پیکج کے تحت کشمیری پنڈتوں کے لیے جو تین ہزار اسامیاں مختص رکھی گئی تھی ہماری حکومت نے اُس کو یقینی بنانے کے لیے کام شروع کردیا ہے۔

ریاست میں پی ڈی پی کے ساتھ اتحاد پر بات کرتے ہوئے وزیر اعظم نریندر مودی کاکہنا تھا کہ جب ہم ریاست جموں وکشمیر میں مشترکہ حکومت میں تھے تو ہم بہت سارے اُمور کو حتمی مراحل تک پہنچانے میں کامیاب نہ ہوسکے ۔ہم نے پنچایتی انتخابات کو بہت پہلے منقعد کرانے پر زور دیا تاہم مخلوط حکومت میں رہ کر ایسا ممکن نہ ہوسکا البتہ گزشتہ برس کے آخر پرپنچایتی انتخابات منعقد ہوئے جس میں لوگوں نے بڑے جوش و خروش کے ساتھ حصہ لیا جبکہ اس دوارن کوئی بھی تشدد واقع نہیں ہوا۔ نریندر مودی کا کہنا تھا کہ پنچایتی انتخابات کے دوران 70فیصد رائے دہندگان نے اپنی رائی دہی کا استعمال کرتے ہوئے تشدد کو رد کردیا۔پنچایتی انتخابات کو پرامن اور خوشگوار ماحول میں منعقد ہونے پر ریاستی عوام اور انتظامیہ کو مبارک باد پیش کرتے ہوئے وزیر اعظم نریندر مودی نے بتایا کہ اب ریاست میں جاری دہشت گردانہ کارروائیوں سے نمٹنے کے لیے بھی بڑے پیمانے فورسز ایجنسیاں متحرک ہوچکی ہیں۔انہوں نے بتایا کہ ریاست میں جمہوریت کی مضبوطی اور زمینی سطح پر ترقی کو ممکن بنانے کے لیے مرکزی سرکار کوئی دقیقہ فروگزاشت نہیں کرے گی۔ فوج، پولیس، سی آرپی ایف اور دیگر نیم فوجی دستوں کے رول کی سراہنا کرتے ہوئے نریندر مودی کا کہنا تھا کہ ریاست جموں وکشمیر میں امن کو بحال رکھنے اور امن دشمن عناصر کو منہ توڑ جواب دینے کے لیے ہمارے جوان حوصلہ افزا کام انجام دے رہے ہیں۔انہوں نے گزشتہ مہینوں کے دوران فوج میں کام کررہے جاں بحق کشمیری نوجوانوں بشمول نذیر احمد، اورنگ زیب اور امتیاز احمد کو خراج عقیدت پیش کرتے ہوئے ان کے اہلخانہ سے دلی ہمدردی کا بھی اظہار کیا۔ وزیر اعظم کا کہنا تھا شہید ہوچکے فوجی جوانوں کے اہلخانہ کے ساتھ پورا ملک کھڑا ہے اور وہ خود کو تن تنہا محسوس نہ کریں۔انہوں نے بتایا کہ سرحد پر رہائش پذیر عوام آئے روز سرحد پار گولہ باری کے نتیجے میں انتہائی تکلیف دہ حالات کا سامنا کررہے ہیں۔

مرکزی حکومت سرحدی عوام کی فلاح و بہبود اور اُن کی حفاظت کو یقینی بنانے کے لیے آنے والے وقت میں 14ہزار بنکر تعمیر کرے گی۔ وزیراعظم نے بتایا کہ ایک طرف جہاں ہم سرحد پر پاکستانی کی طرف سے جاری گولہ باری کا منہ توڑ جواب دے رہے ہیں وہیں ہم سرحدی عوام کی حفاظت کو یقینی بنانے کے لئے 14ہزار بنکر تعمیر کریں گے۔ادھر سرینگر کے شیر کشمیر انٹرنیشنل کنونشن سنٹر واقع بیلوارڈ روڑ پر وزیر اعظم نریندر مودی نے کئی اہم پروجیکٹوں کا سنگ بنیاد رکھتے ہوئے یہاں مرکزی سرکار کی کوششوں اور اہم ترقیاتی پروجیکٹوں سے متعلق جانکار فراہم کی۔

وزیر اعظم نے یہاں جن اہم تعمیراتی پروجیکٹوں کا سنگ بنیاد رکھا اُن میں جنوبی کشمیر اونتی پورہ میں ایمز ہسپتال، اونتی پورہ میں کشمیری پنڈتوں ملازمین کے لیے عارضی رہائشی سہولیات، جالندھر، سانبہ، راجوری، شوپیان امرگڑھ (سوپور) 1000میگاواٹ ترسیلی لائن، 400کے وی ڈی، سوبھاگیہ اسکیم کے تحت 100فیصد گھروں تک بجلی کی فراہمی کو یقینی بنانے سے متعلق اعلان، دیہی بی پی او بانڈی پورہ کے لیے مختلف سہولیات، گاندربل میں کثیر المقاصد والا انڈور اسپورٹس کمپلکس، آر یو ایس اے کالجوں، انٹرپرینورشپ، انوویشن اینڈ کیرئر کے علاوہ خواتین کے لیے علیحدہ یونی ورسٹی کا قیام شامل ہیں۔اپنے یک روزہ دورے کے دوران وزیر اعظم نریندر مودی نے لداخ پہنچ کر یہاں کے روایتی کوٹ (گاؤن) زیب تن کرتے ہوئے شرکاسے خطاب کیا۔ مودی کا کہا تھا کہ لداخی عوام انتہائی بہادر ثابت ہوئے ہیں چاہے وہ 1947ہو، 1962ہو یاکرگل جنگ ہو، لداخی عوام نے ہر ہمیشہ ملک کی سالمیت کو ترجیح دیتے ہوئے دشمن کے دانت کھٹے کئے۔

انہوں نے لوگوں کاتہ دل سے شکریہ ادا کرتے ہوئے کہا کہ جس والہانہ استقبال سے لداخی عوام نے میری حوصلہ افزائی کی میں یقین دلاتا ہوں کہ میں آپ کے جذبے کی قدر کرتے ہوئے خطہ میں ترقی کو چار چاند لگاؤں گا۔انہوں نے بتایا کہ رواں گزشتہ برس کے دوران ملک بھر اور بیرون ممالک سے قریباً 3لاکھ سیاحوں نے لداخ کی سیر کی جبکہ آنے والے دنوں میں مزید ایک لاکھ سیاح یہاں وار د ہورہے ہیں جو کہ وادی کشمیر کی سیر پر گئے سیاحوں کا نصف حصہ ہے۔انہوں نے بتایا کہ لداخ خطے میں سیاحت کے ڈھانے کو مزید فروغ دیا جائے گا اور اس حوالے سے لداخ آنے والے برسوں میں مزید ترقی کرے گا۔انہوں نے بتایا کہ لداح خطے کی کل آبادی کا 40فیصد حصہ طلبا برادری پر مشتل ہے اور یہاں کے عوام کی دیرینہ مانگ تھی کہ طلبا و طالبات کے لیے الگ سے ایک نونیورسٹی قائم کی جائے۔ میں آج یہاں اسی لیے وارد ہوا ہوں کہ آپ کے لیے یونیو رسٹی کے قیام کو یقینی بناؤ۔ وزیراعظم نے اس موقعے پر 35ہزار کروڑ مالیت کے مختلف پروجیکٹوں کا سنگ بنیاد بھی رکھا۔