خبراردو: عوامی مجلس عمل کا56واں یوم تاسیس جمعرات کو اس عزم اور تجدید عہد کے ساتھ منایا گیا کہ آج سے 56سال قبل جس عظیم مقصد اور نصب العین کے حصول کیلئے بانی تنظیم شہید ملت میرواعظ مولانا محمد فاروق نے اپنے رفقاءکے ہمراہ اس تنظیم کے داغ بیل ڈالی تھی اس مقصد اور نصب العین کے حصول تک مبنی برحق پر امن جدوجہد ہر سطح پر جاری و ساری رکھی جائیگی۔

یوم تاسیس کے سلسلے میں تنظیم کے مرکزی دفتر میرواعظ منزل راجوری کد ل سرینگر پر وادی بھر سے آئے ہوئے تنظیمی زعماﺅں ، کارکنوں، مرکزی عہدیداروں اور حلقہ صدور کا ایک پر وقار اجلاس منعقد ہوا جس کی صدارت سربراہ میرواعظ عمر فاروق نے انجام دی جبکہ اس موقعہ پر متعدد تنظیمی زعماءنے اپنے خیالات کا اظہار کرتے ہوئے تنظیم کی 56 سالہ کارکردگی کی حصولیابیوں قربانیوں اور حصول مقصد کے حوالے سے کی جارہی کاوشوں کا تفصیل کے ساتھ ذکر کیا۔اپنے صدارتی خطاب میں میرواعظ نے موجودہ سیاسی ، تحریکی اور تنظیمی صورتحال کے مختلف پہلوﺅں پر روشنی ڈالتے ہوئے کہا کہ یہ قوم گزشتہ سات دہائیوں سے اپنے جائز مقصد کے حصول کی راہ میں قربانیوں کی ایک تاریخ رقم کرتی جارہی ہے۔ انہوں نے کہا کہ ہماری موجودہ تحریک اُس جدوجہد کا تسلسل ہے جس کی بنیاد مہاجر ملت میرواعظ مولانا محمد یوسف شاہ ؒ نے اپنے دور میں اپنے رفقا کے ہمراہ مسلم کانفرنس کا قیام عمل میںلاکر ڈال تھی اور پھر 1964 ءمیں شہید ملت نے عوامی مجلس عمل کی بنیاد ڈال کر اس تحریک کو ایک نئی جہت اور سمت عطا کی۔ میرواعظ نے کہا عوامی مجلس عمل کی بنیاد یہاں کے عوام کی مسئلہ کشمیر کے حل کےلئے اٹھنے والی آواز کو دوام بخشنے کےلئے ڈالی گئی ہے تاکہ عوامی خواہشات کے مطابق اس دیرینہ مسئلہ کشمیر کو حل کیا جاسکے۔ انہوں نے کہا یہ بھارت اور پاکستان ہےں جنہوں1947 میںمسئلہ کشمیر کو اقوام متحدہ میںلیااور دونوں ممالک کے اقوام متحدہ کی قرارداتوں پرباضابطہ دستخط ہےں۔

انہوں نے کہا اب تک دونوں ملکوں کے درمیان مسئلہ کشمیر کے حوالے سے کئی خونریز جنگیں بھی ہوچکی ہیں اور تاشقند، شملہ اور آگرہ جیسے معاہدوں کے علاوہ بات چیت بھی ہوئی۔ میرواعظ نے کہا یہ شہید ملت میرواعظ مولوی فاروق تھے جنہوں نے روایت سے ہٹ کر مسئلہ کشمیر سے تینوں فریقوں کے مابین مذاکراتی عمل سے اس مسئلہ کاپُر امن حل نکالنے کا نعرہ دیا۔ انہوں نے کہا شہید ملت امن و امان کے ایک عظیم داعی تھے جو ہمیشہ ہندو پاک کے مابین دوستی کے خواہاں تھے۔ انہوں نے کہا شہید ملت کشمیر کو ہند پاک کے درمیان دوستی کے ایک پُل کی حیثیت سے دیکھنا چاہتے تھے جبکہ اس کے برعکس کہ دونوں ممالک آج بھی ہتھیاروں کی دوڑ میں اپنے قیمتی وسائل ضائع کررہے ہیں۔میرواعظ نے کہا عوامی مجلس عمل کی بنیاد سیاسی اقتدار اور مراعات و مفادات کیلئے نہیں ڈالی گئی بلکہ تنظیم دونوں ہمسایہ ملکوں سے اس مسئلے کی تاریخی حیثیت اور یہاں کے عوام کی امنگوں کے مطابق ایک پُر امن حل چاہتی ہے۔انہوں نے کہا کشمیری عوام مصنوعی سرحدکی لکیر کھینچنے کے سبب اپنے عزیز و اقارب کے درمیان منقسم کئے گئے ہیں اسی لئے ہم نے ہمیشہ امن اور مفاہمت کی بات کی ہے۔ انہوں نے کہا کشمیری قوم کسی ملک، مذہب یا تہذیب کےخلاف نہیں ہےں ہم فقط کشمیرتنازعہ کا پر امن اور جامع مذاکرات کے ذریعے ایک ایسا حل چاہتے ہیں جو کشمیری عوام کی خواہشات کے مطابق ہو۔انہوںنے کہا طاقت و تشدد نے نہ تو ماضی میں اس مسئلے کو حل کیا اور نہ آئندہ کیا جاسکتا ہے ۔ انہوں نے کہا ہم ہند وپاک کی قیادت ،وزرائے اعظم نریند ر مودی اور عمران خان سے شری اٹل بہاری واجپائی کے طرز پر’انسانیت کے دائرے‘ میں بات چیت کے متمنی ہیں جس کےلئے ہماری تنظیم اورعوام کا بھر پور تعاون دینے کیلئے تیار ہے۔میرواعظ نے بھارتی تفتیشی ایجنسی این آئی اے کی جانب سے محبوس جموں کشمیر لبریشن فرنٹ کے چیئرمین محمد یاسین ملک پر کشمیری عوام اور قیادت کے مابین بین الاقوامی سطح پر تسلیم شدہ تنازعہ کشمیر کے حل کے ضمن میں اتحاد و یکجہتی کو عملانے کا الزام عائد کرنے پر حیرت کا اظہار کرتے ہوئے کہا کہ اتحاد و یکجہتی قائم کرنا کوئی جرم نہیں ہے جبکہ 2008 سے اب تک متعدد بار عوامی تحریکوں کے ذریعے اس تنازعہ کو حل کرنے کےلئے اجتماعی طور آوایں اٹھائی گئیں۔

جناب میرواعظ نے کہا کہ طاقت اور تشدد کے بل پر یہاں کے نوجوانوں کو پشت بہ دیوار کرنے کا عمل انتہائی منفی نتائج کا حامل ثابت ہو سکتا ہے اور حکومت ہندوستان نے کشمیری عوام کی جائز جدوجہد کو دبانے کیلئے جس طرح طاقت اور تشدد کی پالیسی اپنائی ہے اور کشمیر جیسے انسانی اور سیاسی مسئلے کو مذاکرات کے ذریعہ حل کرنے کے بجائے فوجی قوت سے عبارت پالیسی اختیار کی ہے وہ اس پورے خطے کے امن کو پہلے سے لاحق خطرات میں اضافے کا موجب بن رہی ہے۔انہوں نے کہا کہ مزاحمتی قیادت کو آئے روز گھروں یا تھانوںمیں محصور کرنے، لوگوں کیخلا ف طاقت اور تشدد کی پالیسی پیلٹ اور بلٹ کا وحشیانہ استعمال اور حقوق انسانی کی سنگین پامالیاں یہ سب بھارتی حکمرانوں کی سرکاری پالیسی بن گئی ہے تاہم عالمی برادری اب زیادہ دیر تک کشمیری عوام پر ہو رہے مظالم کے تئیں چشم پوشی کی متحمل نہیں ہوسکتی اور کشمیر کے حالات کے حوالے سے اقوام متحدہ کے حقوق انسانی کمیشن کی حالیہ رپورٹ حکومت ہندوستان کیلئے چشم کشا ہے ۔