وزیر اعظم ہند نریندر مودی نے منگل کی صبح ملک گیر تالہ بندی(لاک ڈاؤن) کی مدت میں 3 مئی تک توسیع کا اعلان کرنے کے ساتھ ساتھ یہ بھی کہا کہ لاک ڈاؤن پر سختی کے ساتھ عمل کر کے کورونا انفیکشن پر کنٹرول کیا جا سکتا ہے۔

انہوں نے کہا کہ ایسی ریاستیں یا مقامات جہاں آئندہ ایک ہفتے میں ماحول سازگار ہوا، یعنی وائرس انفیکشن کے معاملے سامنے نہیں آئے، انھیں 20 اپریل سے کچھ چھوٹ دی جا سکتی ہے،تاہم دوسرے مرحلے کے لاک ڈاؤن کو کامیاب بنانے کیلئے نریندر مودی نے عوام سے7وعدے بھی مانگے۔کشمیر نیوز سروس مانیٹر نگ ڈیسک کے مطابق منگل کے روز عوام سے خطاب کے دوران پی ایم مودی نے کہا کہ ’سبھی مشوروں کو دھیان میں رکھتے ہوئے یہ طے کی گیا ہے کہ ہندوستان میں لاک ڈاؤن کو اب3مئی تک اور بڑھانا پڑے گا۔

یعنی 3 مئی تک ہم سبھی کو ہر ملکی باشندے کو لاک ڈاؤن میں ہی رہنا ہوگا۔ اس دوران ہمیں ڈسپلن پر اسی طرح سے عمل کرنا ہے جیسے ہم کرتے آ رہے ہیں۔ میری سبھی باشندوں سے گزارش ہے کہ اب کورونا کو ہمیں کسی بھی قیمت پر نئے علاقوں میں پھیلنے نہیں دینا ہے۔‘انہوں نے مزید کہا ’مقامی سطح پر اب ایک بھی مریض بڑھتا ہے تو یہ ہمارے لیے فکر کا باعث ہونا چاہیے۔ کہیں پر بھی کورونا سے ایک بھی مریض کی موت ہوتی ہے تو ہماری فکر مزید بڑھنی چاہیے۔ اور اس لیے ہمیں ہاٹ اسپاٹ کو نشان زد کر کے پہلے سے بھی زیادہ، بہت زیادہ احتیاط رکھنا ہوگا۔

جن جگہوں کو ہاٹ اسپاٹ میں بدلنے کا اندیشہ ہے اس پر بھی ہمیں سخت نظر رکھنی ہوگی، سخت قدم اٹھانے ہوں گے۔ نئے ہاٹ اسپاٹ کا بننا ہماری محنت اور کاوشوں کو مزید چیلنج پیش کرے گا۔ نئے بحران پیدا کرے گا۔ اس لیے اگلے ایک ہفتہ میں کورونا کے خلاف لڑائی میں سختی مزید بڑھائی جائے گی‘۔انہوں نے آئندہ ایک ہفتہ کے دوران ملک میں ہر ریاست اور ہر قصبہ پر باریکی سے نظر رکھے جانے کی بات کہتے ہوئے عوام کو بتایا ’20 اپریل تک ہر قصبے، ہر تھانہ، ہر ضلع، ہر ریاست کوبہت باریکی سے پرکھا جائے گا کہ وہاں لاک ڈاؤن پر کتنا عمل ہو رہا ہے۔

اس علاقہ نے کورونا سے خود کو کتنا بچایا ہے، اس کا لگاتار جائزہ ہوگا۔ جو علاقے اس امتحان میں کامیاب ہوں گے، جو اپنے یہاں ہاٹ اسپاٹ نہیں بننے دیں گے اور جن کے ہاٹ اسپاٹ میں بدلنے کا اندیشہ بھی کم ہوگا، وہاں پر20 اپریل سے کچھ ضروری سرگرمیوں کی اجازت دی جا سکتی ہے‘۔انہوں نے 20 اپریل سے چھوٹ دیے جانے کی بات بتاتے ہوئے یہ بھی واضح کیا کہ’یاد رکھیے، یہ اجازت شرائط پر مبنی ہوگی۔ باہر نکلنے کی اجازت بہت سخت ہوں گے۔

لاک ڈاؤن کا ضابطہ اگر ٹوٹتا ہے اور کورونا کا پیر ہمارے علاقے میں پڑتا ہے تو سبھی اجازت فوراً واپس لے لیے جائیں گے۔ اور اس لیے نہ خود کوئی لاپروائی کرنی ہے اور نہ ہی کسی اور کو لاپروائی کرنے دینی ہے‘۔20 اپریل تک سبھی مقامات کا جائزہ لینے کے بعد جو چھوٹ دی جائے گی، اس کے بارے میں تفصیلی گائیڈ لائن(رہنما خطوط) جاری کیے جانے کی بات بھی پی ایم مودی نے کی۔انہوں نے کہا کہ’کل (بدھ) اس بارے میں حکومت کی طرف سے ایک تفصیلی گائیڈ لائن(رہنما خطوط) جاری کیا جائے گا۔

20 اپریل سے جن علاقوں میں محدود چھوٹ کا انتظام ہمارے غریب بھائی کی روزی روٹی کو دھیان میں رکھتے ہوئے کیا گیا ہے، جو روز کماتے ہیں اور اس سے اپنی ضرورتیں پوری کرتے ہیں وہی میری فیملی ہے، میری اہم ترجیحات میں سے ایک ان کی زندگی میں آئی مشکل کو کم کرنا ہے۔پردھان منتری غریب کلیان یوجنا کے ذریعہ حکومت نے ان کی مدد کرنے کی ہر ممکن کوشش کی ہے۔ اب نئی گائیڈ لائن بناتے وقت ان کے مفادات کا پورا دھیان رکھا گیا ہے۔

عوام سے مانگے7 وعدے:وزیر اعظم نے7 وعدوں میں سے ایک وعدہ کاروبار اور صنعت چلانے والے لوگوں سے لیا، جس میں انہوں نے گزارش کی کہ وہ اپنے یہاں کام کرنے والے لوگوں کو ملازمت سے نہ نکالیں۔1:اپنے گھر کے بزرگوں کا خاص خیال رکھیں۔ خصوصی طور پر ایسے شخص جنھیں پرانی بیماری ہو، ان کی ہمیں زیادہ حفاظت کرنی ہوگی۔ انھیں کورونا سے بہت بچا کر رکھنا ہوگا۔2:لاک ڈاؤن اور سوشل ڈسٹنسنگ (سماجی فاصلہ) کے ضابطوں کا پورا عمل کریں۔ گھر میں بنے فیس کور (چہرے کو چھپانے کی چیز) یا ماسک کا لازمی طور پر استعمال کریں۔3:اپنی قوت مدافعت بڑھانے کے لیے آیوش وزارت کے ذریعہ جو ہدایات دی گئی ہیں، اس پر عمل کریں۔ گرم پانی ہے، غلغلہ ہے، ان کا مستقل استعمال کریں۔4:کورونا انفیکشن کا پھیلاؤ روکنے میں مدد کرنے کے لیے آروگیہ سیتو موبائل ایپ ضرور ڈاؤن لوڈ کریں۔

دوسروں کو بھی اس ایپ کو ڈاؤن لوڈ کرنے کے لیے ترغیب دیں۔5:جتنا ہو سکے اتنا غریب فیملی کی دیکھ ریکھ کریں، ان کے کھانے کی ضرورتیں پوری کریں۔6:آپ اپنے کاروبار، اپنی صنعتوں میں کام کر رہے لوگوں کے تئیں ہمدردی رکھیں۔ کسی کو ملازمت سے نہ نکالیں۔7:ملک کے کورونا جنگجوؤں، یعنی ہمارے ڈاکٹر، نرس، صفائی اہلکار، پولس اہلکار، ایسے سبھی لوگوں کی ہم عزت کریں، انھیں فخر کا موقع دیں۔

عوام سے مذکورہ سات باتوں پر عمل کرنے کا وعدہ لینے کے بعد نریندر مودی نے کہا’ساتھیو، ان سات باتوں میں آپ کا ساتھ چاہیے۔ یہ باتیں فتح حاصل کرنے کے لیے راستہ ہموار کریں گی۔ فتحیابی کے لیے خلوص کے ساتھ یہ کام کیا جانا چاہیے۔ پوری ایمانداری کے ساتھ3 مئی تک لاک ڈاؤن پر عمل کریں،جہاں ہیں وہیں رہیں، محفوظ رہیں۔ آپ سبھی ملک کو زندہ اور بیدار بنائے رکھیں‘۔