خبراردو:

Mohd Yousuf

رواں سال کے ابتدائی مہینے میں صوبہ جموں کے کٹھوعہ ضلع میں پیش آئے انسانیت سوز واقعے جس میں آٹھ سالہ بچی کی مبینہ عصمت ریزی اور قتل کا سانحہ پیش آیا تھا کے کیس کی پیروی کررہی خاتون وکیل دیپکا راوت کو متاثرہ خاندان نے کیس سے فارغ کردیا ہے۔ متاثرہ خاندان نے ایک درخواست جمع کرائی ہے جس میں خاتون وکیل سے پاور آف اٹارنی کے اختیارات واپس لینے کی خواہش ظاہر کی گئی ہے۔معلوم ہوا ہے کہ ڈسٹرکٹ اینڈ سیشن جج پٹھانکوٹ ڈاکٹر تجویندر سنگھ نے محمد یوسف کی طرف سے دائر درخواست کو منظور دی ہے اور اس طرح پرائیویٹ کونسل دیپکا راجاوت کو کیس کی پیروی سے الگ کردیا گیا ہے۔ فی الوقت استغاثہ کی طرف سے کیس کی پیروی دو اسپیشل پبلک پراسیکیوٹرس سنتوک سنگھ بسر اور جگ دیش کمار چوپڑا کررہے ہیں جبکہ اس کے علاوہ بھی متعدد وکلا ان کی معاونت انجام دے رہے ہیں۔ ادھر کیس کی پیروی کرچکی خاتون وکیل دیپکا راجاوت نے متاثرہ خاندان کی جانب سے فیصلے پر ردعمل ظاہر کرتے ہوئے بتایا کہ ان کے لیے پٹھانکوٹ عدالت میں ہر روز حاضر رہنا انتہائی مشکل تھا۔

انہوں نے بتایا کہ کیس کی بھاگ ڈور سینئر وکلا کے محفوظ ہاتھوں میں ہے تاہم دیپکا راجاوت کے برعکس ملزمان کے وکلا عدلات میں مسلسل پیش ہوتے رہے ہیں۔متاثرہ بچی کے والد محمد یوسف نے ڈسٹرکٹ اینڈ سیشن جج پٹھانکوٹ ڈاکٹر تجویندر سنگھ کی عدالت میں پیش کی گئی درخواست میں کہا ہے کہ میں نے دیپکا راجاوت کو اپنا وکیل مقرر کیا تھا اور انہیں کیس کے سلسلے میں پاور آف اٹارنی کے اختیار ات دئے تھے۔ استغاثہ کی طرف سے سے اسپیشل پبلک پراسیکیوٹر ایس ایس بسرا اور جگدیشور کمار چوپڑا کیس کی پیروی کررہے ہیں اور انہیں کے کے پوری، ہربجن سنگھ، مبین فاروقی اور دیگر وکلا معاونت کررہے ہیں۔محمد یوسف کی طرف سے دائر کی گئی درخواست کے مطابق دیپکا گزشتہ پانچ ماہ کے دوران صرف دو مرتبہ عدالت میں حاضر ہوئیں اور اس دوران انہوں نے اس بات کا دعویٰ کیا کہ اُن کی جان کو شدید خطرہ لاحق ہے۔ درخواست میں مزید کہا گیا ہے کہ سپریم کورٹ کے حکم پر پٹھان کوٹ عدالت میں کیس کی سماعت گزشتہ پانچ ماہ سے روزانہ بنیادوں پر ہورہی ہے تاہم خاتون وکیل اس دوران صرف دو مرتبہ عدالت میں حاضر ہوپائی۔ محمد یوسف نے پٹھان کوٹ عدالت میں بتایا کہ ‘میں آج پٹھان کوٹ اس لئے آیا تھا کیونکہ دیپکا جی کو کیس سے ہٹانا تھا۔ میری طرف سے (استغاثہ کی طرف سے) اس وقت کیس کی پیروی مبین فاروقی، بسرا ، چوپڑا اور دوسرے کئی وکلا کررہے ہیں۔ کیس صحیح سمت میں آگے بڑھ رہا ہے۔ وہ کہتی ہیں کہ ان کی جان کو خطرہ ہے۔ وہ یہ سب میڈیا میں کہتی ہیں۔ ہم اس کو کیوں خطرے میں ڈالیں گے۔ یہی وجہ ہے کہ ہم نے اسے کیس سے ہٹا دیا ہے۔ سپریم کورٹ میں اندرا جی اور ان کی ٹیم کیس کو صحیح سے آگے بڑھا رہی ہیں‘۔

وہیں، دیپکا راجاوت نے اپنی ایک فیس بک ویڈیو میں کہا کہ ان کے لئے پٹھان کوٹ عدالت میں ہر روز حاضر ہونا مشکل تھا،خاتون وکیل نے اس دوران کہا کہ میرے لئے پٹھان کوٹ عدالت میں ہر روز حاضر ہونا مشکل تھا۔ مجھے جموں میں بھی متعدد کیسوں کی پیروی کے لیے حاضر رہنا پڑتا ہے۔ متاثرہ کمسن بچی کا کیس پٹھان کوٹ عدالت میں سینئر وکلاکے محفوظ ہاتھوں میں ہے۔ سب سے بڑھ کر مجھے عدالت کے انصاف پر پورا بھروسہ ہے۔ مجھے باوقار بقا کے لئے ہر روز کام کرنا ہے۔ اگر میں جموں میں (اپنے دوسرے کیسوں) کی پیروی نہیں کروں گی تو میرے اور میری بیٹی کے لئے مشکل بھرے دن آسکتے ہیں۔ میں نے کٹھوعہ کیس میں اپنی طرف سے بھرپور کوشش کی ہے۔ اب اگر وہ (متاثرہ بچی کے والدین) میری خدمات نہیں چاہتے ہیں تو میں اپنی خدمات تھوپ نہیں سکتی۔ کیس کا سخت مرحلہ گذر چکا ہے۔ کیس اب پٹھان کوٹ عدالت میں پرامن ماحول میں آگے بڑھ رہا ہے۔ مجھے پورا بھروسہ ہے کہ ملزمان کو سزائیں سنائی جائیں گی۔انہوں نے بتایا کہ دو تین چیزیں بہت ضروری ہیں۔ کیس کی پیروی دو سینئر پبلک پراسیکیوٹر بسرا اور چوپڑا کررہے ہیں۔ یہ وہ وکلاہیں جو کرمنل کیسوں سے نمٹنے کے ماہر ہیں۔ استغاثہ کی طرف سے یہ وکلا ٹرائل کو آگے بڑھا رہے ہیں۔ کیس محفوظ ہاتھوں میں ہیں۔ میں اس بات کا اعتراف کرتی ہوں کہ میں پٹھان کوٹ صرف دو بار گئی ہوں۔ جب مجھے لگا کہ ٹرائل پرامن ماحول میں جاری ہے، وکلابہت اچھا کام کررہے ہیں، 100 گواہوں کے بیانات ریکارڈ کئے جاچکے ہیں، تو مجھے لگا کہ میں اب تھوڑا آرام کرسکتی ہوں۔ مجھے لگا کہ میں اب جموں میں اپنا کام دیکھ سکتی ہوں۔

یاد رہے ضلع کٹھوعہ ہیرا نگر تحصیل کے رسانہ نامی گاؤں میں آٹھ سالہ بچی 10جنوری کو اچانک لاپتہ ہوئی تھی جس کے بعد 17جنوری 2018کو اُس کی لاش نزدیکی جنگلات سے برآمد کی گئی جس کے بعداندرون و بیرون ریاست اس انسانیت سوز واقعے پر سخت ماتم کیا گیا جس کے بعد ہی ریاستی پولیس نے حرکت میں آکر کیس کی بڑے پیمانے پر تحقیقات کا آغازکردیا۔ بعد میں کیس کو کرائم برانچ کو سپرد کیاگیا جس کے بعد انہوں نے مئی کے مہینے میں واقعے سے متعلق سبھی 8 ملزمان کے خلاف چالان عدالت میں پیش کیا۔ کرائم برانچ نے اپنی تحقیقات میں کہا ہے کہ آٹھ سالہ بچی کو رسانہ اور اس سے ملحقہ گاؤں کے کچھ افراد نے عصمت ریزی کے بعد قتل کیا۔ تحقیقات کے مطابق متاثرہ بچی کے اغوا، عصمت دری اور سفاکانہ قتل کا مقصد علاقہ میں رہائش پذیر چند گوجر بکروال کنبوں کو ڈرانا دھمکانا اور ہجرت پر مجبور کرانا تھا۔ تحقیقات میں انکشاف ہوا ہے کہ کمسن بچی کو اغوا کرنے کے بعد ایک مقامی مندر میں قید رکھا گیا تھا جہاں اسے نشہ آور ادویات کھلائی گئیں اور قتل کرنے سے پہلے اسے مسلسل درندگی کا نشانہ بنایا گیا۔