نئی دہلی، بنگلہ دیش اندرونی عدم استحکام کےایک سنگین مرحلے میں داخل ہو رہا ہے جس میں ہجومی تشدد، ریاستی اختیارات کا خاتمہ اور انتہا پسند اسلامی گروپوں کا بڑھتا ہوا اثرو رسوخ شامل ہے، بھالوکہ، میمن سنگھ میں فیکٹری کے مزدور دیپو چندر داس کا قتل، جسے مذہبی جذبات مجروح کرنے کے الزام میں ہجوم نے تشدد کا نشانہ بنایا قانون اور عوامی نظم و نسق کے زوال کو ظاہر کرتا ہے۔ دیپو چندر داس کی لاش کو قومی شاہراہ پر جلانے کی کوشش اور اس کے بعد کی مفلوج صورتحال اس بات کی نشاندہی کرتی ہے کہ یہ ایک ایسا معاشرہ بن چکا ہے جہاں خوف اداروں پر حاوی ہے

یہ تشدد کوئی انوکھا واقعہ نہیں ہے۔ اس سال کے آغاز میں ایک طالب علم رہنما کے قتل کے بعد سڑکوں پر سیاسی سرگرمیاں تیز ہو گئی ہیں ۔ انتہا پسند گروہ، بنیاد پرست نیٹ ورک اور مفاد پرست سیاسی عناصر نے غیر یقینی صورتحال اور انتظامیہ کے ناکارہ پن کا فائدہ اٹھایا ہے۔ پولیس کا ردعمل غیر متوازن اور کمزور رہا ہے اور یہ الزامات بڑھ رہے ہیں کہ سیکیورٹی فورسز کو تشدد کا نشانہ بنے ہجوم کے خلاف کارروائی کرنے سے روکا گیا ہے۔

کئی مواقع پر قانون نافذ کرنے والے ادارے کھلے عام حملوں کے باوجود خاموش رہے۔

اقلیتی برادریوں بالخصوص ہندوؤں کو پھر سے دھمکی، تشدد اور سماجی دباؤ کے ذریعے نشانہ بنایا جا رہا ہے۔ ہندوستان مخالف نعرے اورمنظم دشمنی اس بات کی نشاندہی کرتے ہیں کہ یہ کسی قدرتی احتجاج کی بجائے نظریاتی طور پر منظم بدامنی ہے۔ انتہا پسند اسلامی تنظیموں کو عوام کا اعتماد حاصل ہوا ہے۔ کاروباری سرگرمیاں سست پڑ گئی ہیں اور کئی علاقوں میں صنعتی پیداوار متاثر ہوئی ہے۔ یہ رجحانات ڈھانچہ جاتی ابتری کا اشارہ دیتے ہیں

اب اس بحران کا ایک سنگین بین الاقوامی پہلو بھی ہے۔ چٹاگانگ میں ہندوستانی سفارتی مشن پر حملے اور ڈھاکہ، کھلنہ اور راجشاہی میں ہندوستانی مشنوں کی طرف مارچ کی کوششیں بین الاقوامی اصولوں کے لیے ایک براہ راست چیلنج ہیں۔ یہ کارروائیاں اس بات کی نشاندہی کرتی ہیں کہ کس طرح ہندوستان مخالف جذبات کو ایک وسیع حکمت عملی کے حصے کے طور پر ہتھیار بنایا جا رہا ہے تاکہ خطے میں بے چینی پیدا کی جا سکے اورہندوستان کے مشرقی محاذ کو کمزور کیا جاسکے۔

گزشتہ ایک سال کے دوران طویل عرصے تک غیر فعال رہنے کی وجہ سے ہندوستان کی پوزیشن مزید غیر یقینی ہوگئی ہے۔ ایک نازک موقع پر جب بنگلہ دیشی معاشرے کے بڑے طبقوں نے ہندوستان سے استحکام اور اصلاحی کردار ادا کرنے کی توقع کی تھی تو نئی دہلی نے خود کو احتیاط کی وجہ سے مشاہدے تک محدود رکھا۔ اس فیصلہ کن مداخلت کی کمی نے ایک خلا پیدا کر دیا جسے بنیاد پرست طاقتوں نے اپنے فائدے کے لئے فوراً پر کرلیا۔

تاہم بنگلہ دیش میں ناکامی کا الزام صرف سیاسی جماعتوں یا شہری اداروں پر نہیں لگایا جاسکتا۔ اس کی بنیادی ذمہ داری فوجی قیادت پر عائد ہوتی ہے۔ بنگلہ دیشی فوج نے ایسے وقت میں بار بارعدم مداخلت کا راستہ اختیار کیا جب آئینی نظم و نسق اور عوامی سلامتی براہ راست خطرے میں تھی۔ وہ اس وقت خاموش رہی جب ہجوم نے شیخ حسینہ کی رہائش گاہ پر حملہ کرنے کی کوشش کی جس کا واضح مقصد انہیں قتل کرنا تھا۔ وہ اس وقت بھی خاموش رہی جب پورے ملک میں تشدد پھوٹا، اقلیتی برادریوں پر حملے ہوئے اور جانی نقصان بڑھا۔ وہ اس وقت بھی غافل رہی جب انتہا پسند گروہ آہستہ آہستہ سڑکوں پر قابض ہوتے گئے اور جب بنگلہ دیش کی بیوروکریسی میں شدت پسندی کے اثرات بڑھتے گئے۔

فوج کی عدم مداخلت کو حکومتی اختیار کا احترام قرار نہیں دیا جا سکتا۔ کسی بھی ملکی میں سیاسی بحران کے وقت یا حکومت میں تعطل پیدا ہونے پر اس کی غیر جانبداری دراصل ذمہ داری کی عدم ادائیگی ہے۔ مداخلت نہ کر کے فوج نے نہ صرف جمہوریت، آئینی نظم و ضبط اور قومی یکجہتی کا تحفظ نہیں کیا بلکہ شیخ حسینہ کو ناکام بنایا سڑکوں پر تشدد کو روکنے میں ناکامی کا سامنا کیا اور سب سے بڑھ کر بنگلہ دیش کے عوام کو مایوس کیا۔

یہ خاموشی اس وقت بھی جاری رہی جب شدت پسندی میں اضافہ ہوا، عوامی ادارے کمزور ہوئے اور غیر ملکی انتہا پسند نیٹ ورکوں کا اثر بڑھا۔ ایسی غیر مداخلت نے پاکستان کے سکیورٹی اداروں سے وابستہ قوتوں کو اس صورتحال کا فائدہ اٹھانے، عدم استحکام میں اضافہ کرنے اور بنگلہ دیش کو ایک زیادہ جارحیت پسند اور مذہبی ریاست کی طرف دھکیلنے کا آراستہ آسان کیا۔

بنگلہ دیش کے عدم استحکام کے اثرات اس کی سرحدوں سےکہیں آگے تک پہنچتے ہیں۔ اس کی جغرافیائی حیثیت اسے جنوبی اور جنوب مشرقی ایشیا کی سپلائی چین، سرحدی تحفظ اوربحری رسائی کے لیے مرکزی حیثیت عطا کرتی ہے۔ طویل مدت تک جاری رہنے والا انتشار ہندوستان کی شمال مشرقی ریاستوں پراثر انداز ہوسکتا ہے، ہندوستان-میانمار سرحد کے ساتھ سیکورٹی کے چیلنجوں کو مزید بڑھا سکتا ہے اورعلاقائی اقتصادی سرگر میوں میں خلل ڈال سکتا ہے۔ بنگلہ دیش کی گھنی آبادی اور اس کی اسٹریٹجک حیثیت کے پیش نظر یہاں بنیاد پرستی بہت سے دوسرے تنازعات سےزیادہ تباہ کن ثابت ہوسکتی ہے۔

اس کی فوری ذمہ داری اب بنگلہ دیشی فوج پر عائد ہوتی ہے۔ یہ فوجی حکمرانی کا مطالبہ نہیں بلکہ عارضی آئینی ذمہ داری ہے۔ فوج کو امن و امان کی بحالی، ہجوم کے کنٹرول کو ختم کرنے، اقلیتوں کے تحفظ اور آزادانہ اور منصفانہ انتخابات کے لیے حالات سازگار کرنے کے لیے قدم بڑھانا چاہیے۔ الیکشن کمیشن کی اعلان کردہ ٹائم لائن ایک محفوظ ماحول کی ضرورت ہے، جو موجودہ حالات میں ممکن نہیں ہو سکتی۔ ایک قلیل مدتی فوجی حمایت یافتہ استحکام کا فریم ورک، جو سختی سے سیکورٹی کے انتظام اور انتخابی سہولت تک محدود ہے، اب ناگزیر ہے

ہندوستان کے لیے سبق واضح ہے کہ اسٹریٹجک صبر کو اسٹریٹجک غفلت میں نہیں بدلنا چاہیے۔ نئی دہلی کو بنگلہ دیش کے اداروں، شہری معاشرہ اور علاقائی شراکت داروں کے ساتھ مزید پُرعزم انداز میں رابطہ کرنا چاہیے۔ تشدد، اقلیتوں کے تحفظ اور سفارتی سکیورٹی پر واضح سرخ لکیرون کو سفارتی، اقتصادی اور سکیورٹی ذرائع سے نافذ کیا جانا چاہیے۔

سرحدی انتظام اور انٹیلی جنس کی ہم آہنگی کو فوری طور پر مضبوط بنانے کی ضرورت ہے۔

عالمی اسٹیک ہولڈرز، خاص طور پر مغربی حکومتوں کو اپنے نقطہ نظر کا از سر نو جائزہ لینا چاہیے۔ سیکورٹی کے حقائق سے الگ تھلگ رہ کر سیاسی تبدیلیوں کی حمایت نہیں کی جاسکتی۔ قانون کی حکمرانی، اقلیتوں کے تحفظ اور معتبر انتخابات سے مشروط شمولیت ضروری ہے۔ مسلسل خاموشی صرف بنیاد پرست قوتوں کو حوصلہ دے گی۔

نگلہ دیش کے پاس اب بھی پرامن صورت حال کی بحالی کے لیے سماجی بنیادیں موجود ہیں لیکن اصلاح کا موقع تیزی سے ختم ہو رہا ہے۔ ابھی کارروائی نہ کی گئی تو یہ نہ صرف بنگلہ دیش کو غیر مستحکم کرسکتا ہے بلکہ جنوبی اور جنوب مشرقی ایشیا کے سکیورٹی منظرنامے کو ایسی تبدیلیوں سے دوچار کرسکتا ہے جو واپسی کے قابل نہیں ہوں گی۔

(مضمون نگار سابق سفارت کار ہیں اور یہ ان کے ذاتی خیالات ہیں)

یو این آئی۔ ایس وائی۔