(بیس دسمبر برسی کے موقع پر)

ممبئی، بالی وڈ کی گزرے زمانے کی بے حد خوبصورت اداکارہ نلنی جینت کی پیدائش 18 فروری 1926 کو ممبئی کے ایک مراٹھی خاندان میں ہوئی۔ ان کے والد کسٹم آفیسر جبکہ والدہ گھریلو خاتون تھیں۔ ان کے دو بھائی بھی تھے۔ نلنی کو بچپن سے ہی رقص کا بے حد شوق تھا، جس میں ان کے والد نے ان کا ساتھ دیا۔ انہوں نے ہیرا بائی جویری سے کلاسیکی موسیقی کی تربیت بھی حاصل کی۔ وہ کاجول کی نانی شوبھنا سمرتھ کی خالہ زاد بہن تھیں۔

نلنی کو فلموں سے بے حد محبت تھی۔ ان کے گھر کے پاس ’سواستک‘ نامی سنیما ہال تھا، جہاں وہ اکثر فلمیں دیکھنے جایا کرتی تھیں۔ وہ فلموں میں کام کرنا چاہتی تھیں۔ اس کی دو وجوہات تھیں، ایک تو ان کی بہن شوبھنا پہلے ہی سے فلموں میں تھیں اور دوسرا انہیں خود فلموں سے گہری دلچسپی تھی۔ اس لئے وہ اس فیلڈ میں کیرئر بنانا چاہتی تھیں۔

اگرچہ انہوں نے اپنے گھر والوں سے کبھی یہ خواہش ظاہر نہیں کی کیونکہ ان کے والد فلموں میں کام کرنے کے سخت خلاف تھے۔ وہ اپنی بھانجی شوبھنا سمرتھ کو بھی فلمی دنیا میں کام کرنے کی وجہ سے ناپسند کرتے تھے، یہاں تک کہ کئی بار انہیں جان سے مارنے کی دھمکی بھی دی تھی۔ اسی وجہ سے شوبھنا کی والدہ نے ان سے تمام رشتے منقطع کرلیے تھے اور الگ رہنے لگی تھیں۔

ایک روز واقعہ ہے نلنی اپنی خالہ کے گھر شوبھنا کی سالگرہ پر گئی تھیں۔ پارٹی کے دوران فلم پروڈیوسر چمن لال دیسائی کی نظر 14 سالہ نلنی پر پڑی۔ وہ اپنی آنے والی فلم رادھیکا کے لیے ہیروئن کی تلاش میں تھے۔ نلنی کو دیکھتے ہی انہوں نے فیصلہ کر لیا کہ وہی ان کی فلم کی ہیروئن ہوں گی۔

جب یہ بات نلنی کے والد کو معلوم ہوئی تو انہوں نے واضح طور پر انکار کر دیا، لیکن چمن لال نے کافی سمجھایا کہ وقت بدل چکا ہے اور اب فلموں میں کام کرنا برا نہیں سمجھا جاتا۔ آخرکار ان کے الد کو راضی ہونا پڑا اور 1941 میں فلم رادھیکا سے نلنی نے اپنے فلمی کیریئر کا آغاز کیا۔

فلم رادھیکا میں نلنی نے اداکاری کے ساتھ کچھ گانے بھی گائے۔ انہوں نے تین سولو گانے اور چار گانے ہریش، نورجہاں اور ماروتی راؤ کے ساتھ گائے۔ دوسری فلم ‘بہن‘ میں بھی انہوں نے چار گانے گائے۔ بعد میں بھی کئی فلموں میں وہ اداکاری کے ساتھ ساتھ گلوکاری بھی کرتی رہیں۔

نلنی کی پہلی فلم کے ڈائریکٹر چمن لال کے بیٹے ویریندر دیسائی تھے۔ شوٹنگ کے دوران دونوں میں دوستی ہوئی اور پھر دوستی محبت میں بدل گئی۔ ویریندر پہلے سے شادی شدہ تھے اور ایک بچے کے باپ بھی تھے اور عمر میں نلنی سے کافی بڑے تھے۔ اس کے باوجود دونوں نے 1945 میں شادی کر لی۔ دونوں خاندان اس شادی کے خلاف تھے، حتیٰ کہ ویریندر کو ان کے والد نے گھر سے بے دخل کردیا تھا۔

گھر سے نکالے جانے کے بعد نلنی اور ویریندر فلمستان اسٹوڈیو میں دو ہزار روپے ماہانہ تنخواہ پر کام کرنے لگے اور وہیں قریب ہی ملاڈ میں ایک بنگلہ کرائے پر لے لیا۔ کافی عرصے تک دونوں کو فلموں میں کام نہیں ملا، تاہم اسٹوڈیو کے مالک ششدھر مکھرجی انہیں تنخواہ دیتے رہے۔

فلموں میں کام نہ ملنے کی ایک وجہ یہ رہی کہ نلنی نے فلموں کے لئے یہ شرط رکھی تھی کہ وہ صرف اسی فلم میں کام کریں گی جس کی ہدایتکاری ان کے شوہر کریں گے۔ اس بات پر ششدھر مکھرجی ان سے ناراض ہو گئے۔ فلموں میں نظر نہ آنے کی وجہ سے ناظرین انہیں فراموش کرنے لگے، جس کا اثر ان کی ازدواجی زندگی پر بھی پڑا۔ روز کے جھگڑوں کے بعد تین برس میں ہی ان دونوں میں طلاق ہو گئی۔ اس دوران ان کی صرف ایک فلم ’پھر بھی اپنا ہے‘ ریلیز ہوئی۔

طلاق کے بعد نلنی کا کیریئر دوبارہ چل پڑا۔ 1948 میں ان کی دو فلمیں انوکھا پیار اور گنجن ریلیز ہوئیں۔ انوکھا پیار میں وہ دلیپ کمار کے ساتھ نظر آئیں اور دونوں کی جوڑی کافی پسند کی گئی۔

نلنی نے اشوک کمار کے ساتھ بھی کئی فلمیں کیں۔ فلم بینوں کو بھی ان کی جوڑی کافی پسند تھی ۔ میڈیا رپورٹس کے مطابق دونوں کے درمیان افیئر بھی رہا۔ سال 1953 کی فلم سمادھی کی شوٹنگ کے دوران دونوں قریب آگئے، لیکن سات سال بعد دونوں الگ ہو گئے۔ فلم سمادھی کا گانا ’گورے گورے او بانکے چھورے‘ اور فلم ’نوجوان‘ کا ’ٹھنڈی ہوائیں لہراکے آئیں‘ آج بھی سامعین کو مسحور کردیتے ہیں۔

نلنی 40 اور 50 کی دہائی میں خوبصورتی میں مدھوبالا کو ٹکر دیتی تھیں۔ سال 1952 میں فلم فیئر میگزین نے ایک پول کیا تھا جس میں وہ خوبصورتی کے لحاظ سے پہلے نمبر پر رہی تھیں۔ سال 1951 میں انہوں نے ایک میگزین کے لیے بولڈ فوٹو شوٹ بھی کروایا جو کافی سرخیوں میں رہا۔ نلنی کی دیگر فلموں میں بہن، انوکھا پیار، پھر بھی اپنا، راہی، باپ بیٹی، نیلمنی اور کالا پانی اہم ہیں۔

فلم منیم جی میں نلنی اور اداکار پربھو دیال لیڈ رول میں نظر آئے۔ شوٹنگ کے دوران دونوں کو محبت ہو گئی اور فلم امر رہے کی شوٹنگ کے دوران ہی دنوں نے شادی کر لی۔ سال 1965 میں فلم بمبئی ریس کورس کے بعد انہیں لیڈ رول آفر نہ ملنے کے باعث انہوں نے فلموں سے کنارہ کر لیا۔

اگرچہ 18 سال بعد وہ فلم ناستک میں نظر آئیں، جس میں انہوں نے امیتابھ بچن کی ماں کا کردار ادا کیا، لیکن اس کے بعد انہوں نے مکمل طور پر فلمی دنیا کو خیرباد کہہ دیا۔تقریباً دو دہائیوں پر محیط فلمی کیریئر میں نلنی جینت نے 60 فلموں میں چھوٹے بڑے کردار ادا کیے۔ان کی ذاتی زندگی بھی جدوجہد سے بھری رہی۔

نلنی شوہر پربھو دیال کے سال2001 میں انتقال کے بعد پوری طرح ٹوٹ کر رہ گئیں۔ انہوں نے باہر آنا جانا چھوڑ دیا اور چیمبور کے یونین پارک میں واقع اپنے گھر میں تنہائی کی زندگی گزارنے لگیں۔ رشتہ داروں سے بھی رابطہ منقطع ہو گیا۔

تنہائی میں ہی 20 دسمبر 2010 چیمبور میں کاجول کی نانی شوبھنا سمرتھ کی بہن اور اداکارہ نلنی جینت کا انتقال ہوا۔ ان کے گھر میں لاش تین دن تک پڑی رہی۔ پڑوسیوں کو بھی اس کی کوئی خبر نہیں تھی۔ موت کے تین دن بعد ایک نوجوان ایمبولینس لے کر آیا، خود کو نلنی جینت کا رشتہ دار بتا کر ان کی لاش لے گیا۔

زندگی کے آخری وقت ان کے پاس کوئی نہیں تھا۔ ان کی حالت اتنی خراب تھی کہ گھر کا خرچ چلانے کے لیے بھی پیسے نہیں تھے۔ پڑوسیوں کے مطابق وہ بالکل تنہا رہتی تھیں۔ ان کے انتقال کے بعد نہ کوئی پولیس کارروائی ہوئی اور نہ ہی کوئی ان کے گھر گیا۔ موت کے بعد سے ہی گھر پر تالا لگا رہا۔

یو این آئی۔ این یو۔