مابعد5 اگست میڈیا کے تئیں اپنا یا گیا رویہ افسوسناک وقابل تشویش: ایوان صحافت کشمیر

سرینگر: ایوان صحافت کشمیر (کشمیرپریس کلب) کی جانب سے جاری کئے گئے بیان میں کہا گیا ہے کہ کشمیر ی صحافیوں کو جسمانی وذہنی طور ہراساں کرنے کے علاوہ پولیس کی جانب سے سمن جاری کئے جاتے ہیں،جس پر صحافیوں نے اپنی خاموشی توڑ دی۔

بیان حکومت پر زور دیا گیا ہے کہ جمہوریت کے چوتھے ستون کی حیثیت سے کشمیر میں آزادی صحافت و آزادی اظہار رائے کو یقینی بنایا جائے اور صحافیوں کو تنگ طلب کرنے کے عمل پر فوری طور پر روک لگائی جائے۔کشمیر نیوز سروس(کے این ایس) کو موصولہ ایک تحریری بیان کے مطابق ایوان صحافت کشمیر(کشمیرپریس کلب) میں سوموار کو ایک غیر معمولی میٹنگ طلب کی جس میں سبھی صحافی انجمنوں کے نمائندوں نے شرکت کی۔

ترجمان کے مطابق میٹنگ کا انعقاد کشمیر پریس کلب نے ہی کیا تھا۔ بیان میں کہا گیا ہے کہ اس میٹنگ میں جموں وکشمیر پولیس کی جانب سے کشمیر میں صحافیوں پر جسمانی حملے کرنے،ہراساں کرنے،خوف زدہ کرنے اور سمن جاری کرنے کے معاملات پر تبادلہ خیال کیا گیا۔اس میٹنگ میں صحافیوں نے اس بات پر تشویش کا اظہار کیا کہ کشمیر میں 5 اگست2019سے حکومت صحافیوں اور میڈیا کو آزادانہ طور پر اپنے پیشہ ورانہ فرائض انجام دینے کی اجازت نہیں دے رہی ہے۔بیان میں کہا گیا ہے کہ یہ واضح ہے کہ گذشتہ6ماہ سے کشمیر میں انٹر نیٹ کرفیو جاری ہے،جب یہ کافی نہیں ہوا،صحافیوں کو خوف زدہ کرنے کیلئے سیکیورٹی ایجنسیوں کی فزیکل حملے (جسمانی حملے)،ہراسانی اور سمن جاری کئے گئے۔

بیان میں کہا گیا ہے کہ در حقیقت ’شورش مخالف مرکز‘ (کارگو) سرینگر کی جانب سے صحافیوں کے نام سمن اور ہراساں کرنے کا عمل معمول بن چکا ہے۔ایوان صحافت کشمیر(کشمیر پریس کلب) کی جانب سے جاری کئے گئے بیان میں مزید کہا گیا ہے کہ غیر معمولی بنیاد پرجموں وکشمیر پولیس کی جانب سے صحافیوں کو طلب کرنا اور پوچھ تاچھ کرنے کا عمل در اصل صحافیوں کو جسمانی وذہنی طور ہراساں کرنا ہے۔بیان میں کہا گیا ہے کہ انٹر نیٹ بندش،میڈیا اداروں کو حلف نامے جمع کرانے،جسمانی حملے کرنے اور سمن جاری کرنے کا عمل صرف حکومتی نقطہ نظر کو ہی یقینی بنا نا ہے۔تاہم میٹنگ میں یہ واضح کیا گیا کہ کشمیر میں کام کرنے والے صحافی اپنے بنیادی حق کے تحت کشمیر میں جو بھی کچھ ہورہا ہے،اُسکی غیر جانبداری اور سچائی سے رپورٹ کریں۔ بیان میں کہا گیا ہے کہ ما بعد5اگست2019متعدد صحافیوں کو اپنے پیشہ ورانہ فرائض کی انجام دہی پر پولیس کی جانب سے سمن جاری کئے گئے اور ان سے پوچھ تاچھ کی گئی جبکہ صحافیوں کو ہرا ساں کرنے کا عمل مسلسل جاری ہے۔

کشمیر پریس کلب نے حکومت پر زور دیا ہے کہ وہ صحافیوں کو سمن جاری کرنے کے عمل کو فوری طور پر بند کرے۔بیان میں کہا گیا ہے کہ صحافت جمہوریت کا چوتھا ستون ہے اور چوتھے ستون کی حیثیت سے آزادی اظہار رائے کو حکومت یقینی بنائے،جسکی ضمانت آئین نے دی ہے بجائے صحافت کو خاموش کیا جائے۔بیان میں کہا گیا ہے کہ میڈیا کو کشمیر میں ہر معاملے کیلئے ذمہ دار ٹھہرا نا اور صحافیوں کو غلط ٹھہرانا صحیح نہیں ہے۔بیان میں کئی واقعات کا حوالہ بھی دیا گیا۔

بیان میں کہا گیا ہے کہ14اگست2019کو صحافی عرفان امین ملک ساکنہ ترال کو اپنی رہائش گاہ سے اٹھایا گیا اور بغیر کسی وجہ کے دوسرے دن چھوڑا گیا۔یکم ستمبر2019کو ’دی ہندو‘ سے وابستہ سینئر صحافی پیر زادہ عاشق کو کوٹھی باغ پولیس اسٹیشن کی جانب سے طلب کیا گیا،جہاں اُن سے ’اسٹوری‘ سے متعلق ذرائع ظاہر کرنے کیلئے کہا گیا۔پیر زادہ عاشق نے کہا ’مجھ سے کہا گیا کہ آپ اپنے ذرائع کو ظاہر کریں،جس نے آپ کو گرفتاریوں سے متعلق سرکاری اعداد وشمار فراہم کئے‘۔ ماہ نومبر 2019کو زبیر ڈار،جوکہ وائس آف امریکا سے وابستہ ہیں اور فری لانسرمزمل متو کو شہر خاص میں ’خوجہ دگر‘ کی کوریج کرنے کے دوران تشدد کو نشانہ بنایا گیا۔17دسمبر2019کو مزید صحافیوں ازان جاوید (دی پرنٹ) اور انیس زرگر (نیوز کلک) کو سرینگر میں پولیس نے مظاہرہ کور کرنے کے دوران تشدد کو نشانہ بنایا۔

بیان میں کہا گیا کہ پولیس حکام کی جانب سے یقین دہانی کرانے کے با وجود ملوث اہلکاروں کے خلاف کارروائی نہیں کی گئی۔بیان کے مطابق30نومبرکو صحافی بشارت مسعود(انڈین ایکسپر یس) اور حکیم عرفان (اکنامک ٹائمز) کے نام کار گو کی جانب سے سمن جاری کیا گیا،جہاں پولیس افسران نے اُن سے اپنے اپنے اداروں کیلئے کی گئی رپوتاژ کے بارے میں پوچھا گیا۔ صحافیوں نے بتایا کہ اُن سے کہا گیا کہ ذرائع کا نام بتائیں اور آپ نے کہاں سے دستا ویز ات حاصل کئے۔ 23دسمبر کوبشارت مسعود (انڈین ایکسپریس) اور شفاعت زرگر (سکرال)کو ہندوارہ میں پیشہ ورانہ فرائض انجام دہی کے دوران روکا گیا۔دونوں صحافیوں کو ایس پی ہندوارہ کے دفتر پہنچایا،جہاں سے اُن سے سوال جواب کئے گئے۔’

اؤٹ لُک میگزین‘ سے وابستہ سینئر صحافی نصیر گنائی اور صحافی ہارون نبی کو کار گو کی جانب سے8فروری2020کو سمن کرکے بلایا جاتا ہے،جہاں اُن سے حکومت کی جانب سے کا لعدم قرار دی گئی تنظیم جموں وکشمیر لبریشن فرنٹ کے بیان پر خبر بنانے سے متعلق سوال جواب کئے گئے۔نصیر گنائی نے کہا ’مجھ سے کہا گیا کہ آپ وہ ای۔میل ایڈریس‘ دکھائیں،جہاں سے یہ بیان آپ نے لیا‘۔(کے این ایس)