خبراردو:

جنگجوؤں کی اونتی پورہ میں سی آر پی ایف کانوائے کو نشانہ بنائے جانے جس میں 50کے قریب اہلکار ہلاک جبکہ درجنوں زخمی ہوگئے کے بعد ریاست کے سرمائی دارالحکومت جموں میں بڑے پیمانے پر تشدد بھڑک اُٹھا ہے۔ معلوم ہوا کہ جمعہ کو جموں بند کال کے دوران فرقہ پرست سیاسی جماعتوں بشمول بی جے پی، اے بی وی پی، وی ایچ پی سمیت دیگر سیاسی پارٹیوں نے یہاں رہائش پذیر کشمیریوں پر بے تحاشہ حملے کئے جس دوران جموں اور مضافاتی علاقوں میں خوف و دہشت کی لہر دوڑ گئی۔

نمائندے کے مطابق جموں کے گجر نگر، توفشیر خان، جانی پورہ سمیت دیگر مسلم آبادی والے علاقوں میں فرقہ پرستوں اور بلوائیوں نے جمعہ کے روز ادھم مچاتے ہوئے کوارٹروں اور گاڑیوں کو بڑے پیمانے پر نقصان پہنچایا۔ معلوم ہوا کہ گجر نگر میں بلوائیوں نے جنگجوؤں اور پاکستان کے خلاف نعرے بازی کرتے ہوئے یہاں موجود کشمیری مسلمانوں کے رہائشی کوارٹروں پر سخت سنگ باری کی اور سینکڑوں کشمیریوں کو تختہ مشق بنایا۔فرقہ پرستوں اور بلوائیوں نے گجر نگر، توفشیر خان، جانی پور اور دیگر علاقوں میں جہاں کشمیری مسلم ملازمین اپنے اہلخانہ سمیت رہائش پذیر ہیں میں 200کے قریب گاڑیوں کو زبردست نقصان پہنچانے کے علاوہ درجنوں گاڑیوں کو پھونک ڈالا۔ اس دوران یہاں بھڑک اُٹھے تشدد کے نتیجے میں کشمیر سے تعلق رکھنے والے ملازمین اور طلبا سمیت دیگر لوگ انتہائی خوف و دہشت میں مبتلا ہوئے ہیں ۔معلوم ہوا کہ جانی پورہ، گجر نگر اور توفشیر خان علاقوں میں کشمیر سے تعلق رکھنے والی مسلمان خواتین اور بچیاں روتے بلکتے ہوئی دیکھی گئیں جس کے نتیجے میں یہاں انتہائی خوف و دہشت کا ماحول پھیل گیا۔

معلوم ہوا کہ کشمیر سے تعلق رکھنے والے ملازمین جو سیول سیکرٹریٹ کے ساتھ وابستہ ہیں حالات کی سنگینی کو مدنظر رکھتے ہوئے یہاں سے واپس وادی آنے کا سوچ رہے ہیں ۔ سیول سیکرٹریٹ ائمپلائز یونین کے صدر غلام رسول میر نے کشمیرنیوز سروس کے ساتھ بات کرتے ہوئے کہا کہ ہم نے گزشتہ روز سے ہی یہاں کے حالات و واقعات کو بھانپتے ہوئے صوبائی کمشنرجموں، ڈپٹی کمشنر جموں اور پولیس کے اعلیٰ افسران کو گزارش کی کہ وہ کشمیر سے تعلق رکھنے والے ملازمین کو سیکورٹی فراہم کریں تاہم ابھی تک انہوں نے اس حوالے سے انتہائی غیر سنجیدگی کا مظاہرہ کرتے ہوئے کشمیری ملازمین اور اُن کے اہلخانہ کو فرقہ پرستوں کے رحم و کرم پر چھوڑدیا۔میر کا کہنا تھا کہ گزشتہ شام سے یہاں قیامت کا سا سماں غالب ہے جس دوران فرقہ پرست عناصر ہمارے رہائشی کوارٹروں کے اندر گھسنے کی مسلسل کوششیں کررہے ہیں۔ انہوں نے بتایا کہ صوبائی انتظامیہ کو ملازمین کی سیکورٹی کو یقینی بنانے کی خاطر یہاں پولیس تعینات کردینی چاہیے تھی تاہم ابھی تک اس حوالے سے کوئی سنجیدہ کوشش نہیں کی گئی۔

غلام رسول میر کا کہنا تھا کہ سیول سیکرٹریٹ سے وابستہ ملازمین اس وقت جموں میں مکمل طور پر غیر محفوظ ہیں۔ ہمارے ساتھ ہمارے گھر والے، خواتین اور بیٹیاں ہیں جن کی سلامتی سے معلق فکر ہمیں اند رہی اندر کھائے جارہی ہیں۔ انہوں نے کہا کہ انتظامیہ کی جانب سے سرد مہری کے نتیجے میں ہمارے مال وجان اور عزت کو انتہائی خطرات لاحق ہیں اور اگر صورتحال جوں کی توں رہی تو سیول سیکرٹریٹ سے وابستہ ملازمین اجتماعی طور پر سنیچر کو جموں چھوڑنے کا فیصلہ کریں گے۔ انہوں نے بتایا کہ جب ہماری زندگیاں ہی محفوظ نہیں تو ہمیں نوکریوں کو کیا کرنا ہے۔ میر کا کہنا تھا کہ ہم اپنی نوکریوں سے اجتماعی طور پر مستعفی ہوکر جموں کو چھوڑ کر کشمیر واپس آجائیں گے۔غلام رسول نے مزید بتایا کہ ہم نے تمام ملازمین کو ہدایت کی ہے کہ وہ اپنی جانوں کی سلامتی کو یقینی بنانے کے لیے اپنے رہائشی کوارٹروں سے باہر نہ آئیں۔انہوں نے بتایا کہ فرقہ پرستوں نے ملازمین کی درجنوں گاڑیوں کو پھونک ڈالا اور متعدد کوارٹروں پر حملے بھی کئے۔

انہوں نے بتایا کہ بلوائیوں نے جمعہ کو مسلم آبادی والے علاقوں میں کشمیر سے تعلق رکھنے والی درجنوں گاڑیوں کو شدید نقصان پہنچایا ۔انہوں نے بتایا کہ بلوائی کشمیر ی مسلمانوں پر حملہ انجام دینے کی تاک میں ہے اور وہ ہماری کالونیوں کے باہر الرٹ ہیں ، اگر چہ ہم نے سیول و پولیس انتظامیہ کو اپیل کی تھی کہ وہ یہاں پولیس پہرے کا بندوبست کریں تاہم ابھی تک اس حوالے سے کوئی ٹھوس قدم نہیں اُٹھایا گیا۔انہوں نے بتایا کہ گورنر ستیہ پال ملک کی قیادت والی انتظامیہ جموں میں مقیم کشمیری ملازمین کو سیکورٹی فراہم کرنے میں بری طرح سے ناکام ہوئی ہے اور اگر ایسا ہی چلتا رہا تو ہم اجتماعی طور پر سنیچر کو جموں سے ہجرت کریں گے۔