کشمیر اور انڈین یونین کے درمیان رشتہ بدل چکا ہے،جموں وکشمیر کی خصوصی آئینی حیثیت کی بحالی کیلئے متحد ہو کر لڑیں گے
خبراردو:-

سرینگر:جموں وکشمیر کی تقسیم وتنظیم نو کے بعد پہلی مرتبہ گپکار اعلامیہ کے دستخط کنندگان نے سنیچر کے روز ایک مشترکہ بیان جاری کرتے ہوئے واشگاف الفاظ میں اعلان کیا کہ وہ جموں وکشمیر کی خصوصی آئینی حیثیت کی بحالی کیلئے متحد د ہو کر لڑیں گے۔انہوں نے کہا کہ وہ گپکار اعلامیہ پر کار بند ہیں اور وہ یہ عہد پر دو ہرارہے ہیں کہ حصول انصاف تک وہ ڈٹے رہیں گے۔

اس دوران پیپلز کانفرنس کے چیئرمین سجاد غنی لون نے بیان کو اطمینان بخش قرار دیتے ہوئے کہا ’یہ اقتدار کامعاملہ نہیں بلکہ اپنے حقوق کی جدوجہد ہے جس کیلئے مشترکہ طریقہ کار ناگزیر ہے‘۔کشمیر نیوز سروس کے مطابق جموں وکشمیر کی سیاسیات میں سنیچر کے روز اُس وقت بڑی پیش رفت دیکھنے کو ملی جب جموں وکشمیر کی تقسیم وتنظیم نو کے بعد پہلی مرتبہ مین اسٹریم پارٹیوں نے پہلا مشترکہ بیان جاری کیا۔

یہ بیان گپکار اعلامیہ کے دستخط کنندگان کی جانب سے جاری کیا گیا۔گپکار اعلامیہ پرجن مین اسٹریم لیڈران نے دستخط کئے ہیں،اُن میں نیشنل کانفرنس (این سی)کے صدر ڈاکٹر فاروق عبداللہ،پیپلز ڈیموکریٹک پارٹی (پی ڈی پی)کی صدر محبوبہ مفتی،پر دیش کانگریس کمیٹی جموں وکشمیر (جے کے پی سی سی) کے صدر غلام احمد میر،سی پی آئی (ایم) کے سینئر لیڈر محمد یوسف تاریگامی،جموں وکشمیر پیپلز کانفرنس (جے کے پی سی) چیئرمین سجاد غنی لون اور عوامی نیشنل کانفرنس (اے این سی) کے سینئر نائب صدر مظفر احمد شاہ شامل ہیں۔

گپکار اعلامیہ کے دستخط کنندگان نے اپنے ایک مشترکہ بیان میں یہ عہد ایک بار پھر دہرایا ہے کہ وہ جموں وکشمیر کی خصوصی آئینی حیثیت کی بحالی کے لئے یک جٹ ہو کر لڑیں گے۔انہوں نے کہا ’ہم لوگوں کو یقین دلانا چاہتے ہیں کہ ہماری تمام سیاسی سرگرمیوں کا محور جموں و کشمیر کی خصوصی آئینی حیثیت کی بحالی ہوگا۔گپکار علامیہ کے دستخط کنندگان نے اپنے بیان میں کہا کہ 4اگست2019کو جس مشترکہ معاہدے پر دستخط کئے گئے،وہ اُن پر وعدہ بند ہیں اور جموں وکشمیر کی خصوصی آئینی حیثیت کی بحالی کیلئے متحدد طور پر لڑنے کے اپنے وعدے پر کار بند ہیں۔

ان کا کہناتھا کہ آئین ہند کے تحت جموں وکشمیر کو حاصل خصوصی حیثیت کی بحالی کیلئے وہ مؤثر طریقہ سے اجتماعی طور پر لڑیں گے۔ مشترکہ بیان میں کہا گیا ہے’5اگست2019کے فیصلہ جات سے بدقسمتی سے جموں وکشمیر اور نئی دہلی کے درمیان رشتے کو ہی بدل کر رکھ دیا، ایک انتہائی مختصر اور غیر آئینی اقدام کے تحت، دفعہ370 اور35(اے) کو منسوخ کردیا گیا اور ریاست کو دو مرکزی علاقوں میں تقسیم کیاگیا اور اس کے آئین کو نافذ کرنے کی کوشش کی گئی‘۔مشترکہ بیان میں کہا گیا ہے کہ 5 اگست 2019 کو کئے جانے والے اقدامات سراسر غیر آئینی اورحقیقی اقدامات کو غیر اختیار بنانے اور جموں وکشمیر کے عوام کی بنیادی شناخت کو چیلنج تھا۔

مشترکہ بیان میں لکھا گیا ہے کہ ان تبدیلیوں کے ساتھ لوگوں کو خاموش کرنے اور انہیں مرکزی فیصلہ جات کو تسلیم کرنے پر مجبور کرنے کے لئے جابرانہ اقدامات اٹھائے گئے۔مشترکہ بیان میں یہ بھی کہا گیا ہے کہ ’یہ جموں وکشمیر کے امن پسند لوگوں کیلئے امتحان اور درد کا وقت ہے، ہم سب جموں و کشمیر کی خصوصی آئینی حیثیت کی بحالی کے لئے اجتماعی طور پر جدوجہد کرنے کے اپنے عہد کا اعادہ کرتے ہیں جیسا کہ آئین ہندکے تحت ضمانت دی گئی ہے اور وقتا فوقتا کئے گئے وعدوں کی بھی‘۔

بیان کے مطابق ’ہمارے درمیان اتفاق رائے موجود ہے کہ اجتماعی ادارہ اِن حقوق کے لئے لڑنے اور انتھک جدوجہد کرنے کا ایک موثر طریقہ ہے اورآئینی ضمانت کے تحت جموں وکشمیر کو حاصل خصوصی حیثیت کی بحالی کیلئے بھی جو ہم سے زبردستی چھینی گئی جبکہ 4اگست2019کے درجے کی بحالی ہمارا مقصد ہے‘۔یاد رہے کہ مرکزی حکومت کی جانب سے 5 اگست2019 کو جموں و کشمیر کی خصوصی آئینی حیثیت کی منسوخی سے ایک روز قبل بی جے پی کو چھوڑ کر باقی تمام جماعتوں کے رہنما ڈاکٹرفاروق عبداللہ کی گپکار رہائش گاہ پر جمع ہوئے تھے اور’گپکار اعلامیہ‘ جاری کیا تھا۔

4اگست2019کی شام کو مشترکہ پریس کانفرنس کے دوران نیشنل کانفرنس صدر ڈاکٹر فاروق عبداللہ نے کل جماعتی میٹنگ کا اعلامیہ پڑھ کر سنایا جسے ”گپکار اعلامیہ“ کے نام سے منسوب کیا گیا تھا۔ اعلامیہ میں کہا گیا تھا کہ کشمیر کی موجودہ صورتحال غیر یقینی ہے اور ریاست کی خصوصی پوزیشن کے خلاف کوئی بھی اقدام حملہ تصور کیا جائے گا۔اعلامیہ میں لوگوں سے پر امن رہنے کی اپیل کرتے ہوئے کہا گیا تھاکہ لوگوں کو چاہئے وہ صبروتحمل کا مظاہرہ کرتے ہوئے پر امن رہیں۔میٹنگ کے دوران ریاست کی مخصوص شناخت کے ساتھ چھیڑ چھاڑ، غیر آئینی حد بندی یا ریاست کی تقسیم کو جموں کشمیر اور لداخ کے خلاف حملہ تصور کیا جائے گا۔ میٹنگ میں صدر جمہوریہ ہند، وزیراعظم اور ملک کے دیگر سیاسی لیڈران سے اپیل کی گئی تھی کہ وہ بھارتی آئین میں ریاست کے لوگوں کو دی گئی ضمانتوں کو تحفظ فراہم کرنے کیلئے اپنا رول نبھائیں۔ ڈاکٹر فاروق عبداللہ کی رہائش گاہ پر ہوئی کل جماعتی میٹنگ میں نیشنل کانفرنس، پی ڈی پی، کانگریس، پیپپلز کانفرنس، عوامی نیشنل کانفرنس، عوامی اتحاد پارٹی، شاہ فیصل اور دیگر پارٹیوں نے شرکت کی۔

جو دیگر میٹنگ میں موجود تھے ان میں محبوبہ مفتی، مظفر حسین بیگ، عبدالرحمان ویری، عمر عبداللہ، سجاد غنی لون، عمران انصاری، محمد اکبر لون، شاہ فیصل، علی محمد ساگر، محمد یوسف تاریگامی وغیرہ شامل تھے۔دریں اثناء سجاد غنی لون نے بیان پر اطمینان کا اظہار کیا۔انہوں نے ٹوئیٹ کرتے ہوئے کہا ’آج کا دن اطمینان بخش ہے،مشترکہ طریقہ کار ہی آگے بڑھنے کا واحد راستہ ہے،یہ اقتدار کا معاملہ نہیں ہے،یہ اپنے حقوق کی واپسی کی جدوجہد ہے،شکریہ ڈاکٹر فاروق صاحب،محبوبہ مفتی جی اور تاریگامی صاحب‘۔