خبراردو ڈیسک :

۱۹ مئی ۲۰۱۸ کو تب کی ریاست اور آج کی یوٹی جموں کشمیر کے بانڈی پورہ ضلع میں ۳۳۰ میگا واٹ کے کشن گنگا پاور پروجیکٹ کے افتتاح کے موقع پر وزیر اعظم مودی نے اپنے خطاب میں کہا تھا ۔”جموں کشمیر میں اپنی بجلی کی طلب کو پورا کرنے کے علاوہ پورے ملک کو بجلی مہیا کرنے کی صلاحیت موجود ہے“ ۔

لیکن دوسری جانب سے صورتحال یہ ہے کہ کئی دہائیوں کے بعد بھی جموں کشمیر اتنی صلاحیت ہونے کے باوجود بھی یہ اپنی بجلی کی طلب پورا نہیں کر پا رہی اور خاص طور پر تو سرما کے مہینوں میں گاﺅں میں بجلی غل تو ہونا عام بات ہے ہی لیکن اب قصبوں میں بھی اسکی عادت لوگوں ہونے لگی ہے ۔

اور ہر روز کسی نہ کسی علاقے سے بجلی محکمے کے خلاف احتجاج اور شکایات کی خبریں باقاعدہ طور موصول ہو رہی ہیں ۔

رواں سال کی اگر بات کی جائے تو جنوری سے اکتوبر کے درمیان دونوں صوبوں میں ہر ماہ کئی فیصد کی بجلی میں کمی دیکھی گئی ۔

محکمہ بجلی کی جانب سے تیار کردہ اعدادو شمار کے مطابق جنوری کے مہینے میں جموں کشمیر میں 2840 میگا واٹ بجلی کی طلب کے مقابلے میں 2143 میگا واٹ بجلی میہا کی گئی ۔یعنی اس ماہ میں ۷۰۰ میگا واٹ بجلی کی کمی رہی ہے ۔جس میں سے جموں میں۱۸۰ میگا واٹ اور کشمیر میں ۵۱۷ میگا واٹ سپلائی کی کمی رہی ۔

اسی طرح سے فروری کے مہینے میں کشمیر میں ۱۶۵۰ میگا واٹ طلب کے مقابلے میں ۴۶۴ میگا واٹ کی کمی پائی گئی ۔ جموں میں ۱۰۳۰ میگا واٹ کے مقابلے میں ۱۸۲ میگا واٹ کی کمی دیکھی گئی ۔

مارچ میں وادی میں ۱۵۷۰میگا واٹ کے مقابلے میں ۱۲۵۱ میگا وا ٹ مہیا کی گئی ، جموں میں ۹۶۰ کی طلب کے مقابلے میں۷۹۱ میگا واٹ ہی مہیا کی گئی ۔

اپریل میں وادی کو ۱۴۰۰ میگا واٹ کے مقابلے میں ۱۳۳۰ میگا واٹ کی بجلی میہا کی گئی ۔ جموں میں ۹۴۰ کے مقابلے میں ۷۶۳ میگا واٹ بجلی مہیا کی گئی ۔

مئی میں وادی کو بجلی کی ۱۴۱۰ میگا واٹ کی مانگ کے مقابلے میں ۱۱۴۲ میگا واٹ بجلی مہیا کی گئی ۔جموں میں ۱۱۱۰ کی مانگ کے مقابلے میں ۸۷۷ میگا واٹ بجلی مہیا کی گئی ۔

جون کے مہینے میں ۱۳۶۰ کی مانگ کے مقابلے میں وادی کو ۱۱۱۴ میگا واٹ بجلی دی گئی ، جموں میں اسی دوران ۱۲۶۰ کی طلب کے مقابلے میں ۹۵۱ میگا واٹ بجلی دی گئی ۔

جولائی کے مہینے میں ۱۳۵۰ میگا واٹ مانگ کے مقابلے میں ۱۱۰۷ میگا واٹ بجلی وادی کی عوام کو دی گئی ۔اسی طرح سے جموں میں ۱۰۵۰ میگا واٹ کی مانگ کے مقابلے میں ۷۹۱ میگا واٹ بجلی مہیا کی گئی ۔

اگست میں کشمیر کو ۱۳۲۰ میگا واٹ کی مانگ کے مقابلے میں ۱۰۵۴ میگا واٹ بجلی مہیا کی گئی ۔جبکہ جموں کو ۸۲۰ کے مقابلے میں ۶۶۶ میگاواٹ بجلی فراہم کی گئی ۔
ستمبر میں کشمیر کو ۱۲۳۰ میگا واٹ کے مقابلے میں ۹۴۴ میگا واٹ بجلی فراہم کی گئی جبکہ جموں کو ۱۰۲۰ میگا واٹ کے مقابلے میں ۸۲۰ میگا واٹ
بجلی مہیا کی گئی ۔

اکتوبر میں کشمیر کو ۱۵۵۰ میگا واٹ کے مقابلے میں ۱۱۴۲ میگا واٹ بجلی مہیا کی گئی ۔ اسی طرح سے جموں کو ۸۸۰ میگا واٹ کے مقابلے میں ۷۰۷ میگا واٹ بجلی مہیا کی گئی ۔ اگر اوسطا ََ دیکھا جائے تو کشمیر کو ۲۵ سے ۳۰ فیصد اور جموں کو ۱۵ سے ۲۰ فیصد بجلی کی کمی رہتی ہے ۔

رواں سال جون میں مرکزی محکمہ بجلی کی جانب سے مرتب کردہ اعداوشمار میں یہ پایا گیا کہ ملک کے دیہی علاقوں میں ہر دن اوسطاََ سب سے کم بجلی جموں کشمیر کو ہی ملتی ہے ۔ اعدادو شما ر کے مطابق اپریل ۲۰۱۹ میں جموں کشمیر کو سب سے کم ۱۴ گھنٹوں سے زائد پاور سپلائی فراہم کی گئی ۔

دوسری طرف مرکز کی جانب سے تمام ریاستوں اور یو ٹیز کو یکم اپریل ۲۰۱۹ تک ۲۴ گھنٹے بجلی فراہم کرنے کا منصوبہ تھا لیکن یہ پورا نہیں ہو پایا ۔

جموں کشمیر میں بجلی کی کمی کیوں؟
جموں کشمیر میں ہائیڈرو پاور کی صلاحیت ہونے کے باوجود بھی یوٹی کو دوسری ریاستوں اور مختلف کمپنیوں سے بجلی خریدنا پڑتی ہے ۔جموں کشمیر میں اگر چہ ۲۰ ہزار میگا واٹ بجلی پیدا کرنے کی صلاحیت ہے لیکن ابھی تک اس میں صرف ۱۰ فیصد کے قریب ہی پیدا کی گئی ہے ۔

جموں کشمیر میں بہتے دریاووں سے اب تک ۳۲۱۰ میگا واٹ بجلی پیدا کی جاتی ہے ۔ اور اسے ۲۸۰۰میگا واٹ کے قریب بجلی ہی درکار ہے ۔ یعنی جموں کشمیر کی عوام اگرچہ ۲۴ گھنٹے بجلی کا فائدہ اٹھا سکتی تھی لیکن اس میں ایک رکاوٹ یہ ہے کہ جموں کشمیر حکومت کے پاس اس میں جے اینڈ کے پاور ڈیولپمنٹ کارپوریشن کے تحت چلائے جانےو الے ۲۱ پاور پروجیکٹ موجود ہیں ، جن سے ۱۲۱۱میگا واٹ بجلی فراہم کی جاتی ہے ۔

جبکہ باقی ۲۰۱۰ میگاواٹ بجلی نیشنل ہائیڈرو پاور کارپوریشن کے پاس ہے اور اس میں صرف ۱۳ فیصد بجلی ہی یو ٹی کو دی جاتی ہے ۔ جبکہ کم پڑ رہی بجلی سرکار کو شمالی گرڈ سے خریدنا پڑتی ہے ۔ اس شمالی گرڈ میں این ایچ پی سی کے پاس ۷ پروجیکٹوں کی بجلی ہرییانہ ،پنجاب ، دلی ، ہماچل پردیش کو بھی دی جا تی ہے ۔
این ایچ پی سی کے پاس ان ۷ پروجیکٹوں کی واپسی کے لئے ماضی میں تمام سیاسی پارٹیوں کی مانگ رہی ہے ۔

۲۰۱۵ میں جموں کشمیر میں وجود میں آئی بھاجپا اور پی ڈی پی سرکار کے ”ایجنڈا آف الائنس “ میں دُل ہستی (۳۹۰ میگا واٹ ) اور اوڑی ٹو(۲۹۰ میگا واٹ) کے پاور پروجیکٹوں کو ریاست کے حوالے کرنا بھی شامل تھا ، لیکن سرکار کے ٹوٹنے تک اس پر کوئی بھی حتمی فیصلہ نہیں آٰیا ۔

۲۰۱۷ میں جموں کشمیر میں جہاں بجلی کی مانگ ۲۱۰۰ میگا واٹ تھی وہیں یہ آج ۲۸۰۰ میگا واٹ تک پہنچ گئی ہے اور اگلے دو سالوں میں یہ مانگ ۴ ہزار میگا واٹ تک پہنچنے کا امکان ہے ۔

دوسری جانب سے این ایچ پی سی اور جے کے پی ڈی سی کے مابین مشترکہ معاہدے کے تحت ۶ ہزار سے زائد میگا واٹ کے ۱۵ نئے پاور پروجیکٹوں پر کام ہو رہا ہے جو کہ ۸ سے ۱۰ سال میں مکمل ہونگے ۔ ان میں سے معاہدے کے تحت جموں کشمیر کو ۴۹ فیصد بجلی مل پائے گی ۔

جموں کشمیر حکومت کی جانب سے پیش کئے گئے اعدادوشمار کے مطابق ۲۰۱۴ ، ۲۰۱۵ اور ۲۰۱۶ میں 40027 ملین یونٹ بجلی صارفین کو مہیا کی گئی تھی، جس میں سے حکومت کوتب 31,409 ملین یونٹ یعنی کل ۷۲ فیصد باہر سے خریدنا پڑی تھی ۔

حکومت کے ۲۰۱۶ اکنامک سروے کے مطابق ۲۰۱۱ سے ۲۰۱۵ تک حکومت نے باہر سے ۲۰ ہزار کروڑ کی بجلی خریدی تھی ۔

اب جب کہ مرکز کی جانب سے خصوصی پوزیشن کی منسوخی کے بعد یوٹی کو ترقی کی منزلوں پر لانے کا وعدہ کیا گیا ہے ،لیکن سب سے پہلے کئی دہائیوں سے چلے آرہے اس بجلی کے مسلے کو ترجیحی بنیادوں پر حل کیا جا نا چاہیے۔ٓ