نئی دہلی، کانگریس کے سابق صدر اور لوک سبھا میں اپوزیشن لیڈر راہل گاندھی نے کہا ہے کہ ووٹ چوری کے خلاف ان کی عوامی تحریک رکنے والی نہیں ہے اور اپوزیشن جماعتیں مل کر اس معاملے میں لڑائی لڑیں گی اور سپریم کورٹ میں مشترکہ طور پر عرضی دائر کریں گی۔

مسٹر گاندھی نے پیر کے روز یہاں کانگریس ہیڈ کوارٹر میں منعقدہ ایک خصوصی پریس کانفرنس میں کہا کہ دہلی میں گزشتہ پانچ چھ دنوں سے انصاف کی لڑائی لڑی جا رہی ہے اور ووٹ چوری کے خلاف عوامی تحریک چلائی جا رہی ہے۔ اس تحریک کو روکنے کی کوشش کی جا رہی ہے اور لوگوں کو آنے جانے سے روکا جا رہا ہے۔ چاروں طرف پولیس تعینات کر کے دہلی کو چھاؤنی میں تبدیل کر دیا گیا ہے۔ اسی کی مخالفت میں ‘انڈیا’ اتحاد کے رہنما مارچ کر رہے ہیں۔

انہوں نے کہا کہ یہ تحریک ملک کی روح پر حملہ کرنے والوں کے خلاف ہے اور اس تحریک کے ذریعے نوجوانوں پر ظلم و ستم کیا جا رہا ہے۔ انہوں نے کہا کہ اس تحریک میں شامل نوجوانوں کو مارا پیٹا جا رہا ہے، خواتین کے ساتھ بدسلوکی کی جا رہی ہے۔ انہوں نے نوجوانوں سے اپیل کی کہ وہ انصاف ملنے تک تحریک جاری رکھیں اور آئین اور جمہوریت کی حفاظت کے لیے متحد ہو کر سب کی آواز اٹھائیں۔

مسٹر گاندھی نے الزام لگایا کہ پولیس نوجوانوں کو پٹواری ہے اور آر ایس ایس کے لوگوں کو کھلے عام گھومنے کی اجازت دی جا رہی ہے۔ انہوں نے کہا کہ حکومت کے خلاف کھڑے ہونے اور آئین کے تحفظ کی لڑائی لڑنے والوں کو روکا جا رہا ہے لیکن اپوزیشن پیچھے ہٹنے والی نہیں ہے۔

کانگریس رہنما نے الزام لگایا کہ وزیراعظم نریندر مودی، وزیر داخلہ امت شاہ اور چیف الیکشن کمشنر گیانیش کمار ووٹ چوری کروا رہے ہیں۔ انہوں نے سوال کیا کہ گیانیش کمار استعفیٰ کیوں نہیں دے رہے ہیں۔ اپوزیشن الیکشن کمیشن سے اور حکومت سے سوال کر رہی ہے اور اسی وجہ سے سوال کرنے والوں کو نشانہ بنایا جا رہا ہے۔ انہوں نے کہا کہ آئین اور جمہوریت کی حفاظت کرنا ہی ان کا دھرم ہے۔

مسٹر گاندھی نے کہا کہ یہ تحریک طویل ہو سکتی ہے اور اس میں کئی دن یا مہینے لگ سکتے ہیں لیکن اسے روکا نہیں جائے گا۔ انہوں نے کہا، “ہماری تحریک کے سامنے حکومت جھک جائے گی، اس کے افسران تھک جائیں گے اور اس کی پولیس بھی تھک جائے گی، لیکن ہماری تحریک نہیں رکے گی۔ ”

انہوں نے کہا کہ ملک کی روح اور آئین پر حملہ ہو رہا ہے اور تمام اپوزیشن جماعتیں متحد ہو کر اس کی مخالفت کریں گی۔ انہوں نے دعویٰ کیا کہ حکومت کے تقریباً 200 افسران ان کے رابطے میں ہیں اور آئین کو بچانے کی لڑائی میں ان کے ساتھ کھڑے ہیں۔

مسٹر گاندھی نے کہا کہ انہوں نے چیف جسٹس سے ملنے کا وقت مانگا تھا لیکن چیف جسٹس نے انہیں عرضی دائر کرنے کے لیے کہا ہے اور اپوزیشن جماعتیں مل کر سپریم کورٹ جائیں گی۔ انہوں نے کہا کہ یہ لڑائی ملک کے مستقبل اور آنے والی نسلوں کے لیے ہے، وہ نوجوانوں سے اپیل کرتے ہیں کہ وہ ملک میں ہونے والے واقعات کے خلاف اپنی آواز بلند کریں اور جمہوریت کے تحفظ کے لیے آگے آئیں۔ ان کا کہنا تھا کہ نوجوان انصاف ملنے تک پیچھے نہیں ہٹیں گے اور آئین کو بچانے کی لڑائی جاری رکھیں گے۔

مسٹر گاندھی نے کہا کہ ملک کے عوام کی آواز بیریکیڈ لگا کر روکی نہیں جا سکتی۔ انہوں نے کہا کہ سچائی ہی ملک کی بنیاد ہے اور اپوزیشن کی لڑائی جمہوریت اور آئین کو بچانے کے لیے ہے۔
یواین آئی ایف اے

نئی دہلی، محکمہ موسمیات (آئی ایم ڈی) نے اگلے چار دنوں میں ہریانہ، دہلی، چندی گڑھ اور پنجاب میں آندھی- طوفان، بجلی گرنے اور تیز ہوائیں چلنے کی وارننگ جاری کی ہے۔ شمال مغربی ہندوستان میں موسمیاتی ہلچل کا اثر بنا ہوا ہے، جس کی وجہ سے کچھ جگہوں پر ہوا کی رفتار 50 سے 60 کلومیٹر فی گھنٹہ تک پہنچ سکتی ہے۔

آئی ایم ڈی نے پیر کی صبح جاری کردہ بلیٹن میں آج سے 18 اکتوبر کے درمیان کئی شمالی ریاستوں میں بارش کا امکان ظاہر کیا ہے۔ طے شدہ دنوں میں جموں و کشمیر، ہماچل پردیش اور پنجاب میں بھاری بارش یا شدید بارش ہونے کا امکان ظاہر کیا گیا ہے۔ محکمہ کے مطابق ہریانہ، دہلی، چندی گڑھ، اور مغربی اتر پردیش میں آج کچھ جگہوں پر 50-60 کلومیٹر فی گھنٹہ کی رفتار سے آندھی-طوفان آ سکتا ہے۔ پنجاب میں بھی کچھ جگہوں پر بجلی گرنے اور 40-50 کلومیٹر فی گھنٹہ کی تیز ہواؤں کے ساتھ آندھی-طوفان کے آثار ہیں۔

محکمہ موسمیات نے بتایا ہے کہ ہریانہ، چندی گڑھ، دہلی اور پنجاب میں 15 اکتوبر تک بجلی گرنے اور تیز ہواؤں کے ساتھ آندھی-طوفان کا سلسلہ جاری رہے گا۔ آئی ایم ڈی کے اندازے کے مطابق 13 اور 14 اکتوبر کو بھی ان علاقوں میں کچھ جگہوں پر بجلی کڑکنے اور تیز ہواؤں کے ساتھ بارش اور طوفان آنے کا امکان ہے۔

اس کے علاوہ آج سے 15 اکتوبر کے درمیانی عرصے میں ہریانہ، چندی گڑھ اور دہلی میں کچھ مقامات پر بارش کا امکان ہے، جبکہ پنجاب میں آج سے 14 اکتوبر تک اور 15 اکتوبر کو کافی زیادہ علاقوں میں بارش ہونے کی پیشگوئی کی گئی ہے۔

محکمہ کے سات روزہ بارش کی پیش گوئی سے معلوم ہوتا ہے کہ 16 سے 18 اکتوبر تک ہریانہ، چندی گڑھ، دہلی اور پنجاب میں موسم بنیادی طور پر خشک رہے گا۔

موجودہ موسمی صورتحال کو دیکھتے ہوئے آئی ایم ڈی نے کسانوں کو زرعی صلاح جاری کی ہے تاکہ کھڑی فصلوں اور کٹی ہوئی پیداوار کو ہونے والے نقصان کو کم کیا جا سکے۔ محکمہ نے دونوں ریاستوں کے کسانوں کو مشورہ دیا ہے کہ وہ کھڑی فصلوں میں آبپاشی نہ کریں اور کھیتوں سے اضافی بارش کے پانی کو نکالنے کا انتظام کریں۔ کسانوں کو یہ بھی صلاح دی گئی ہے کہ وہ کٹی ہوئی پیداوار کو محفوظ جگہوں پر لے جائیں یا تیز ہواؤں اور بارش سے بچانے کے لیے اسے ترپال سے ڈھک دیں۔

ادھر، شمال مغربی ہندوستان میں آندھی اور تیز ہواؤں کے ساتھ ساتھ آئی ایم ڈی نے 16 سے 18 اکتوبر کے درمیان کیرالہ، ماہے، تمل ناڈو، پڈوچیری اور کرائیکل میں کچھ مقامات پر بھاری بارش کا امکان ظاہرکیا ہے۔ 15 اکتوبر سے کیرالہ اور ماہے میں بارش کے تیز ہونے کے آثار ہیں اور 18 اکتوبر تک یہاں کافی زیادہ بارش کا امکان ہے۔

یواین آئی ایف اے

نئی دہلی، ملک کے چیف جسٹس، جسٹس سوریہ کانت نے ‘انڈیا’ اتحاد کے اراکینِ پارلیمنٹ سے ملاقات کرنے سے انکار کرتے ہوئے پیر کے روز کہا کہ سپریم کورٹ کے دروازے سب کے لیے کھلے ہیں اور ہرہندوستانی شہری کو عدالت سے رجوع کرنے کا حق حاصل ہے۔

جسٹس سوریہ کانت نے صحافیوں سے بات کرتے ہوئے کہا کہ کسی بھی عام شہری یا منتخب باڈی کے رکن کی عرضی کا خیرمقدم کیا جائے گا اور قانون کے تحت مناسب کارروائی کی جائے گی۔

چیف جسٹس نے کہا کہ انہیں اتوار کے روز ‘انڈیا’ اتحاد کے رہنماؤں کی جانب سے ملاقات کی درخواست کرنے والا ایک خط موصول ہوا تھا۔ انہوں نے کل خط کا جواب دیتے ہوئے ملاقات نہ کر پانے کی وجہ بھی واضح کر دی تھی۔ انہوں نے کہا کہ یہ معاملہ امن و قانون سے جڑا ہوا ہے اور اسی وجہ سے انہوں نے رہنماؤں سے ذاتی طور پر ملاقات کرنے سے معذوری ظاہر کی۔

جسٹس سوریہ کانت نے واضح کیا کہ کسی بھی شخص یا عوامی نمائندے کو اپنا موقف رکھنے کے لیے اعلیٰ ترین عدالت آنے سے روکا نہیں جا سکتا۔ انہوں نے کہا کہ عدالت کے سامنے آنے والی عرضیوں پر قانون کے مطابق غور کیا جائے گا۔ انہوں نے مزید کہا کہ عدلیہ تمام شہریوں کے لیے یکساں طور پر دستیاب ہے اور کسی بھی جائز عرضی پر مناسب قانونی عمل کے تحت سماعت کی جائے گی۔

انہوں نے کہا کہ سپریم کورٹ کے دروازے سب کے لیے کھلے ہیں۔ کسی بھی عام شہری یا منتخب ادارے کے رکن کی عرضی کا خیرمقدم ہے۔ ہر ہندوستانی شہری کو عدالت جانے کا حق ہے اور ہم ان کی بات سنیں گے نیز قانون کے تحت جو بھی مناسب ہوگا، وہ کریں گے۔

یواین آئی ایف اے