جموں و کشمیر پولیس کی (سائبر کرائم برانچ) نے خاتون فوٹو جرنلسٹ مسرت زہرہ کے خلاف ’یو اے پی اے ایکٹ‘ (غیرقانونی سرگرمیوں کی روک تھام کے ترمیم شدہ ایکٹ)کے تحت سوشل میڈیا پر ملک مخالف مواد شائع کرنے کے خلاف مقدمہ درج کیا ہے جبکہ دی ہندو کے نامہ نگار پیر زادہ عاشق کے خلاف پولیس تھانہ اننت ناگ میں شوپیان جھڑپ سے متعلق غیر تصدیق شدہ خبر شائع کرنے کے الزام میں مقدمہ درج کیا گیا۔ادھر ایوان صحافت کشمیر (پریس کلب کشمیر) نے خاتون کے صحافی پر مقدمہ درج کرنے کی کارروائی کی مذمت کی۔

اس دوران انسپکٹر جنرل آف پولیس کشمیر زون،وجے کمار نے صحافتی برادری سے اپیل کی ہے کہ وہ خبریں شائع کرنے سے قبل حقائق کو چیک کریں۔کے این ایس کے مطابق سرینگر سے تعلق رکھنے والی نوجوان فوٹو جرنلسٹ مسرت زہرہ کو سائبر پولیس نے سوشل نیٹ ورکنگ ویب سائٹ فیس بک پر ملک مخالف اور غیر قانونی مواد پوسٹ کرنے کے خلاف یو اے پی اے ایکٹ کے تحت مقدمہ درج کیا ہے۔سائبر پولیس نے پریس بیان جاری کرتے ہوئے اس بات کا دعویٰ کیا ہے کہ مسرت زہرہ نوجوانوں کو اپنے فیس بک پوسٹس کے ذریعے ملک مخالف سرگرمیاں انجام دینے کے لیے اکسا رہی تھیں جس کی وجہ سے امن و قانون میں خلل واقع ہونے کا امکان تھا۔پولیس کا کہنا ہے کہ مذکورہ فیس بک صارف ایسا مواد بھی اپ لوڈ کررہی ہیں جو ملک دشمن عناصر کی سرگرمیوں کو بڑھاوا دیتے ہیں اور قانون نافذ کرنے والی ایجنسیوں کی شبیہہ بگاڑنے کے مترادف ہے۔

اس ضمن میں سائبر پولیس نے ایک ایف آئی آر زیر نمبر10/2020زیر سیکشن(یو اے پی اے ایکٹ)کے تحت ان پر مقدمہ درج کیا ہے۔مسرت زہرہ سرینگر کے علمگری بازار سے تعلق رکھنے والی ایک خاتون فوٹو جرنلسٹ ہیں جو قومی و بین الاقوامی سطح پر مختلف میڈیا اداروں کے ساتھ فری لانس فوٹو گرافر کے طورپر وابستہ ہیں اور ان کا کام ملکی سطح پر کافی سراہا گیا ہے۔مسرت زہرہ نے کہا کہ انہیں اس بارے میں صبح تک کوئی علم نہیں تھا،تاہم انہوں نے سوشل میڈیا پر ہی پولیس کا پریس ریلیز دیکھا،جس میں ان کے خلاف مقدمہ دائر کرنے کی تفصیلات درج تھیں۔واضح رہے سائبر پولیس نے اس سلسلے میں جاری پریس ریلیز میں انہیں صرف ایک عام فیس بک صارف کے طور پر ظاہر کیا ہے۔

تاہم اس میں انہیں فوٹو جرنلسٹ نہیں لکھا گیا ہے۔ادھر بیان کے مطابق 19فروری کوانگریزی روزنامہ(دی ہندو) کے نامہ نگارپیر زادہ عاشق کی بائی لائن سے شائع ایک فرضی خبر کی اطلاع ملی،جوکہ شوپیان کے انکوانٹر سے متعلق تھی۔بیان کے مطابق خبر کامتن سیاق وسباق سے ہٹ کر پیش کیا گیا تھا اور خبر کی تفاصیل مکمل طور غلط ہیں جسکی وجہ سے عام لوگوں کے ذہنوں پر خوف طاری ہوا جبکہ ضلع انتظامیہ سے خبر سے متعلق تصدیق نہیں کی گئی۔اس ضمن میں ایک ایف آئی آر81/2020پولیس تھانہ اننت ناگ میں مذکورہ صحافی کے خلاف درج کی گئی اور پوچھ تاچھ کیلئے صحافی کو طلب کیا گیا۔ بیان میں کہا گیا ہے کہ سی آر پی سی کے تحت پولیس پاچھ تاچھ کا حق رکھتی ہے جبکہ دونوں معاملات کی تحقیقات جاری ہے۔

اس دوران انسپکٹر جنرل آف پولیس وجے کمار نے صحافی برادری سے اپیل کی ہے کہ وہ غلط خبروں کو شائع نہ کریں،جسکی وجہ سے امن وقانون میں خلل پڑ نے کا خطرہ رہنے کے ساتھ ساتھ ملکی سلامتی کیلئے بھی خطرہ ہے۔انہوں نے خبریں شائع کرنے سے قبل انتظامیہ سے تصدیق کرنے کا مشورہ دیا۔اس دوران ایوان صحافت کشمیر (پریس کلب کشمیر) نے بھی ایک بیان جاری کیا،جس میں ترجمان نے بتایا کہ پریس کلب حالیہ دنوں صحافیوں کو ہراساں کرنے کی کارروائیوں اور مقدمہ مات درج کرنے پر مذمت کرتا ہے۔ان کا کہناتھا کہ وادی کشمیر میں صحافت آسان نہیں،یہاں ہر وقت صحافیوں کو طرح طرح کے چیلنجز کا سامنا رہا جبکہ5اگست2019کے بعد اس میں مزید اضافہ ہوا۔

ترجمان نے بتایا کہ عالمی وبا کورونا وائرس کے دوران بھی صحافیوں کو پولیس تھانوں میں طلب کیا جاتا ہے اور اُنہیں اپنی اسٹوریز(نیوز رپورٹ) کے بارے میں تفصیل دینے کیلئے کہا جاتا ہے۔ترجمان کا کہنا تھا کہ اسکی ایک مثال خاتون فوٹو جرنلسٹ مسرت زہرہ کو ’یو اے پی اے ایکٹ پر مقدمہ درج کرنا ہے۔موصوفہ کو 18اپریل کو سائبر پولیس اسٹیشن ائر کار گو طلب کیا گیا،تاہم پریس کلب اور ڈائریکٹر انفار میشن کی مداخلت کے بعد معاملہ ٹل کیا۔