جموں و کشمیر

خوشبو جان:سوکھے اور نا صاف چشموں کی عظمت رفتہ بحال کرنے والی شوپیاں کی جواں سال خاتون

Published

2 years ago

January 30, 2025

سری نگر، جنوبی کشمیر کے ضلع شوپیاں کے مست پورہ سے تعلق رکھنے والی خوشبو جان نامی ایک جوان سال خاتون نے محکمہ دیہی ترقی میں ٹھیکہ داری کا پیشہ اختیار کرکے جہاں روایتی طور پر مردوں کے زیر تسلط تعمیراتی میدان میں سر نو حدود متعین کئے ہیں وہیں یہ بھی ثابت کیا ہے کہ ہمت اور جذبہ کسی بھی دقیا نوسی تصور کو شکست دے سکتا ہے۔

گرچہ موصوفہ اپنے علاقے میں دیگر تعمیراتی کام بھی کرتی ہیں لیکن علاقے کے سوکھے اور گندے چشموں کی بحالی اس کا مشن ہے۔

خوشبو جان جس کو علاقے میں خوشی کھانڈے کے نام سے بھی یاد کیا جاتا ہے، نے یو این آئی کے ساتھ گفتگو کے دوران کہا: ‘تین برس قبل میں نے یہ کام شروع کیا اور محکمہ دیہی ترقی میں تمام لوازمات کی ادائیگی کے بعد بطور ٹھیکہ دار کام کرنا شروع کیا’۔انہوں نے کہا: ‘میں اس میدان میں نئی ہی نہیں بلکہ شاید پہلی خاتون تھیں، شروع شروع میں دقتوں کا سامنا کرنا پڑا لیکن وقت گذرنے کے ساتھ ساتھ سب کچھ ٹھیک ہوتا گیا اور میں آگے بڑھتی گئی’۔ان کا کہنا ہے: ‘آج میرے ساتھ کم سے کم 20 افراد وابستہ ہیں وہ بھی اپنبی روزی روٹی کما رہے ہیں اور میں بھی اپنے کام سے مطمئن ہوں’۔

خوشبو نے کہا: ‘اس میدان میں آنے کے میرے دو خاص مقصد تھے، ایک یہ کہ لڑکی کسی بھی میدان میں محنت، دیانتداری اور ایمانداری سے کام کرکے اپنی صلاحیتوں کا لوہا منوا سکتی ہے’۔انہوں نے کہا: ‘لڑکیوں کو ہر میدان میں آگے آنا چاہئے اور سماج کی خدمت کرنی چاہئے، اپنے والدین کا نام روشن کرنا چاہئے اور دوسروں کے لئے ایک ایسی مثال بننا چاہئے جس پر ان کے والدین کو فخر ہو’۔ان کا کہنا تھا: ‘دوسرا مقصد یہ تھا کہ میں اپنے علاقے کی تعمیر و ترقی میں اپنا رول ادا کر سکوں اور اس کو سنوارنے سجانے کے لئے جتنا ممکن ہوسکے اتنا کام کر سکوں’۔

23 سالہ خاتون ٹھیکہ دار گرچہ دیگر تعمیراتی کام جیسے ڈرین، لین وغیرہ بھی بناتی ہیں لیکن سوکھے اور گندے چشموں کی بحالی اس کا خاص مشن ہے۔انہوں نے کہا: ‘ہمارے علاقے میں چار چشمے ہیں جو گندے ہوئے ہیں، ان کا پانی نا قابل استعمال ہے بلکہ کچھ برس قبل ایک چشمے میں ایک لڑکا گر بھی گیا اور جانور بھی وہاں گھومتے پھرتے رہتے ہیں’۔ان کا کہنا تھا: ‘ان میں سے میں نے دو چشموں کو بحال کیا ہے اب ان کا پانی قابل استعمال ہے، ہمارے گائوں کے لوگ ان چشموں کے پانی کو اب پینے کے لئے استعمال کرتے ہیں اوردوسری ضروریات کے لئے بھی استعمال کرتے ہیں’۔

موصوفہ نے کہا: ‘باقی دو چشموں کو بھی میں بحال کروں گی اور ان کے پانی کو بھی قابل استعمال بنائوں گی’۔انہوں نے کہا: ‘پانی کے ذخائر کو بحال کرنے اور ان کو محفوظ رکھنے کی اشد ضرورت ہے دیہی علاقوں میں ان ذخائر کی بہتات ہوتی ہے ان کی دیکھ بھال ہم سب کا فرض ہے اور خاص طور پر سرکار کی بہت بڑی ذمہ داری ہے’۔ان کا کہنا تھا: ‘سرکار ایسے کام کرنے کے لئے ضرور مدد کرتی ہے اور سماجی سطح پر بھی اس کی حوصلہ افزائی ہونی چاہئے’۔

خوشبو جان نے کہا: ‘خواتین کے لئے پانی کے ذخائر کی قدر کرنا سب سے زیادہ ضروری ہے انہیں چاہئے کہ وہ پانی کو صاف رکھنے اور اس کے ذخائر کو محفوظ رکھنے کے لئے نمایاں رول ادا کریں’۔انہوں نے کہا: ‘جو لڑکیاں سماجی کاموں کے لئے آگے آتی ہیں ان کی سماجی و سرکاری سطح پر حوصلہ افزائی ہونی چاہئے اور ان کی ہر قدم پر مدد کی جانی چاہئے’۔ان کا کہنا تھا: ‘مجھے اہلخانہ خاص طور پر والدین سے بھی بھر پور سپورٹ ملا اور فیلڈ میں لوگوں نے بھی مجھے دست تعاون پیش رکھا’۔

تعلیم یافتہ لڑکوں اور لڑکیوں کے لئے اپنے پیغام میں خوشبو نے کہا: ‘میں کم پڑھی لکھی ہوں جب میں سماج کے لئے اتنا کر سکتی ہوں تو جو اعلیٰ تعلیم یافتہ لڑکے لڑکیاں ہیں وہ مجھ سے زیادہ کر سکتے ہیں’انہوں نے کہا: ‘وہ نہ صرف سماج کی بھر پور خدمت کرسکتے ہیں بلکہ اپنا روز گار بھی کما سکتے ہیں اور دوسروں کو بھی روزگار کا موقع فراہم کرسکتے ہیں’۔ان کا کہنا تھا: ‘بس صرف ضرورت اس بات کی ہے کہ ہمیں گھروں سے نکل کر باہر اپنی صلاحیتوں کو بروئے کار لاکر سماج کی خدمت کرنی ہے’۔

و این آئی ایم افضل، ارشید بٹ

جموں و کشمیر

اننت ناگ میں آسمانی بجلی گرنے سے دو افراد ہلاک

Published

1 hour ago

August 13, 2026

Online Desk

سرینگر، حکام نے بتایا کہ جمعرات کے روز جنوبی کشمیر کے ضلع اننت ناگ کے علاقے لرنو کے گوڑن علاقے میں آسمانی بجلی گرنے سے دو نوجوان ہلاک اور دو دیگر زخمی ہو گئے۔

متوفین کی شناخت بلال احمد بتانا اور فیضان احمد چاڈ کے طور پر ہوئی ہے، جو دونوں میتھنڈو کے باشندے تھے۔

زخمیوں شریف احمد بتانا اور سجاد احمد بتانا کو پی ایچ سی لرنو منتقل کیا گیا، جہاں ان کی حالت مستحکم بتائی جاتی ہے۔

رپورٹس کے مطابق یہ چاروں نوجوان لہوان سے گوڑن کی طرف جا رہے تھے جب علاقے میں آسمانی بجلی گری۔

یو این آئی۔ م س۔ م الف

جموں و کشمیر

جموں و کشمیر میں یومِ آزادی سے پہلے ڈائریکٹر جنرل آف پولیس نے سیکورٹی تیاریوں کا جائزہ لیا

Published

4 hours ago

August 13, 2026

Online Desk

سرینگر، جموں و کشمیر کے ڈائریکٹر جنرل آف پولیس نلن پربھات نے جمعرات کو مرکز کے زیرِ انتظام علاقے میں یومِ آزادی کی تقاریب سے پہلے سیکورٹی تیاریوں کا جائزہ لیتے ہوئے سیکورٹی ایجنسیوں کو مکمل طور پر الرٹ رہنے اور انٹیلی جنس پر مبنی آپریشنز کو مضبوط کرنے کی ہدایت دی۔

میٹنگ میں جموں و کشمیر پولیس، بارڈر سیکورٹی فورس (بی ایس ایف)، سینٹرل ریزرو پولیس فورس (سی آر پی ایف) اور سشستر سیما بل (ایس ایس بی) کے سینیئر حکام شامل ہوئے۔ ان میں اسپیشل ڈی جی پی (ہم آہنگی)، اے ڈی جی پی (سی آئی ڈی)، کشمیر اور جموں زون کے انسپکٹر جنرل آف پولیس (آئی جی پی)، رینج ڈی آئی جی، اضلاع کے ایس ایس پی اور دیگر حکام شامل تھے۔

مسٹر پربھات نے میٹنگ میں 15 اگست کی تقاریب کے لیے سیکورٹی انتظامات اور آپریشنل تیاریوں کا جائزہ لیا۔ انہوں نے حکام کو ہدایت دی کہ وہ الرٹ رہیں تاکہ یہ قومی تقریب بغیر کسی رکاوٹ کے مکمل ہو سکے۔ انہوں نے مرکز کے زیرِ انتظام علاقے میں سیکورٹی نظام کو مزید مضبوط کرنے کے لیے فورسیز کی موثر تعیناتی، علاقے میں بہتر نگرانی اور مختلف سیکورٹی ایجنسیوں کے درمیان بہتر ہم آہنگی پر بھی زور دیا۔

پولیس ڈائریکٹر جنرل نے اہم مقامات، بالخصوص سرینگر کے بخشے اسٹیڈیم میں انتظامات کا جائزہ لیتے ہوئے تقریب کے مقام کے اندر اور آس پاس ٹریفک کنٹرول اور پارکنگ مینجمنٹ کو موثر طریقے سے کرنے پر زور دیا۔ انہوں نے متعلقہ حکام کو ہدایت دی کہ وہ باہمی ہم آہنگی کو بہتر رکھیں تاکہ تقریب میں شرکت کرنے والے لوگوں کو کم سے کم پریشانی ہو اور انہیں تمام ضروری سہولیات آسانی سے مل سکیں۔ سیکورٹی تیاریوں، جوانوں کی تعیناتی، انٹیلی جنس معلومات، ٹریفک مینجمنٹ اور دیگر انتظامات پر تفصیل سے تبادلہ خیال کیا گیا۔

یو این آئی۔ ظ ا۔ م الف

جموں و کشمیر

یومِ آزادی کی تقریبات سے قبل پورے کشمیر میں سکیورٹی مزید سخت

Published

7 hours ago

August 13, 2026

Online Desk

سری نگر، یومِ آزادی کی تقریبات کے پیش نظر پورے کشمیر میں سکیورٹی انتظامات میں نمایاں اضافہ کیا گیا ہے۔ حکام نے 15 اگست کی تقریبات کو پرامن اور بلارکاوٹ یقینی بنانے کے لیے وادی کے مختلف علاقوں میں فل ڈریس ریہرسل بھی کی۔

جمعرات کو یہاں بخشی اسٹیڈیم میں فل ڈریس ریہرسل کے بعد صحافیوں سے بات کرتے ہوئے کشمیر کے انسپکٹر جنرل آف پولیس (آئی جی پی) ودھی کمار بردی نے کہا کہ قومی تقریب کی تیاریوں کے سلسلے میں وادی کے تمام اضلاع میں سکیورٹی ریہرسل کی گئی ہے۔

بردی نے کہاکہ ’’وادی کے تمام اضلاع میں فل ڈریس ریہرسل کی گئی ہے۔ اس کے ساتھ سکیورٹی انتظامات کی بھی مکمل ریہرسل کی گئی ہے، تاکہ 15 اگست کو ہم مرکزی تقریب کو بلارکاوٹ منعقد کر سکیں۔‘‘

گزشتہ ماہ جنوبی کشمیر میں ہونے والے دو دہشت گردانہ حملوں کے بارے میں پوچھے جانے پر آئی جی پی نے کہا کہ وادی بھر میں سکیورٹی مزید سخت کر دی گئی ہے۔

انہوں نے کہاکہ ’’ان معاملات میں تحقیقات جاری ہیں۔ اس کے علاوہ متعلقہ اضلاع کی جانب سے تمام مضبوط سکیورٹی انتظامات کیے جا رہے ہیں۔ سکیورٹی کا نظام مزید سخت کیا گیا ہے۔‘‘

بردی نے لوگوں سے بھی اپیل کی کہ وہ بڑی تعداد میں یومِ آزادی کی تقریبات میں شرکت کریں اور 15 اگست کو ایک قومی تقریب قرار دیا۔

انہوں نے کہا کہ ضلعی سطح کے ساتھ ساتھ انتظامی اور مرکز کے زیرِ انتظام علاقے کے دارالحکومت میں بھی تقریبات منعقد کی جائیں گی۔ انہوں نے عوام سے ان تقریبات کو کامیاب بنانے کی اپیل کی۔

دہلی کے لال قلعہ میں 25 نومبر کو ہونے والے دھماکے، جس میں 11 افراد ہلاک ہوئے تھے، کو مبینہ طور پر القاعدہ برصغیر (اے کیو آئی ایس) کی ایک ذیلی تنظیم سے باضابطہ طور پر جوڑے جانے سے متعلق رپورٹس کے بارے میں پوچھے جانے پر آئی جی پی نے کہا کہ پولیس کے پاس ایسی کوئی معلومات نہیں ہے اور اگر ضرورت ہوئی تو تفصیلات الگ سے شیئر کی جائیں گی۔

آئی جی پی نے کہاکہ ’’ابھی ہماری معلومات میں ایسی کوئی بات نہیں ہے۔‘‘

انہوں نے سوشل میڈیا پر گردش کرنے والی کشمیری پنڈتوں کو مبینہ دھمکیوں کی رپورٹس پر تبصرہ کرنے سے بھی انکار کیا اور کہا کہ وہ اپنے بیان کو یومِ آزادی اور اس سے متعلق سکیورٹی انتظامات تک محدود رکھیں گے۔

حکام نے سوشل میڈیا پر گردش کرنے والے ایک دھمکی آمیز خط میں چھ کشمیری پنڈتوں کے نام درج ہونے کے بعد سرکاری محکموں میں کام کرنے والے کشمیری پنڈت ملازمین کو زبانی طور پر مشورہ دیا ہے کہ وہ 20 اگست تک اپنے دفاتر میں حاضر نہ ہوں۔

وادی میں تقریباً 6,000 مہاجر ملازمین کام کر رہے ہیں۔ کشمیری پنڈتوں اور اقلیتی ملازمین کی رہائش والے کیمپوں اور دیگر مقامات پر بھی سکیورٹی بڑھا دی گئی ہے۔

یواین آئی۔ ظ ا