سرینگر:خشک موسم اور دن میں دھوپ نکلنے کی وجہ سے وادی کشمیر میں شدید سردی کی لہر جاری ہے جبکہ منگل اور بدھ کی درمیانی رات کا درجہ حرارت نقطہ منجمند سے کچھ ڈگری نیچے ریکاڈ کیا گیا اور سرینگر میں رواں موسم کی سرد ترین رات ریکارڈ کی گئی۔

ادھر لداخ میں بھی شدید ٹھنڈ جاری ہے جس کے باعث لوگوں کو سخت ترین مشکلات کا سامنا ہے۔ ادھر محکمہ موسمیات کے مطابق آنے والے دنوں میں موسم میں خشک رہنے کی پیشگوئی کرتے ہوئے 05دسمبر کے بعد بارشوں اور برفباری ہونے کا امکان ظاہر کیا ہے۔

اسی دوران جموں میں سردی کی شدید لہرکے بیچ گہری دْھند جاری رہی۔سی این آئی کے مطابق وادی کشمیر اور صوبائی علاقے لہہہ اور کرگل کوسردی کی شدید لہر نے پوری وادی کو اپنی لپیٹ میں لیا ہے اور یخ بستہ ہواؤں کی وجہ سے شدید سردی کی لہر جاری ہے۔ محکمہ موسمیات کے حکام نے اس کی تصدیق کرتے ہوئے بتایا کہ گزشتہ شب سرینگر شہر میں سرد ترین رات رہی کیونکہ درجہ حرارت منفی ریکارڈ کیا گیا۔

محکمہ کے مطابق درجہ حرارت میں کمی ہونے کے ساتھ ہی پوری وادی سخت ترین سردی کے لپیٹ میں آچکی ہے۔ انہوں نے بتایا کہ وادی کے ساتھ ساتھ لداخ خطہ بھی شدید سردی کی لپیٹ میں ہے۔ ترجمان کے مطابق جموں خطہ میں بھی درجہ حرارت میں کافی گرآٹ آئی ہے۔ بدھ کی صبح درجنوں علاقوں میں اس قدر گہرے کہرے کی صورتحال رہی کہ سڑکوں پر گاڑیاں نظر نہیں آئیں۔دیگر علاقوں کی سڑکوں پر گاڑیاں دھیمی رفتار میں چلتی رہیں اور روشنی کم ہونے کی وجہ سے ان کی ہیڈ لائٹس بھی چالو رہیں۔

شہر کے باہر بھی کئی علاقوں میں کہرا دیکھنے کو ملا جب ملا۔ادھر محکمہ موسمیات نے بتایا کہ درجہ حرارت میں اچانک کمی اوراس کے نتیجے میں فضاء میں پانی کے قطرے منجمد ہوجانے کی وجہ سے سرینگر اور وادی کے دیگر علاقوں میں صبح کے وقت دھند چھائی رہی۔تاہم ان کا کہنا تھا کہ اس موسم میں دھند چھاجانا کوئی غیر معمولی بات نہیں ہے بلکہ ملک کی شمالی حصوں میں پایا جانے والا ایک معمول کا عمل ہے۔ انہوں نے پیشگوئی کرتے ہوئے بتایاجموں میں مزید کچھ دنوں تک کہرا چھا جانے کا امکان ہے اور بارشیں ہونے کے بعد ہی اس میں کمی واقع ہو سکتی ہے۔

ادھر محکمہ موسمیات نے جموں و کشمیر میں رواں موسم سرما کے دوران شدید سردی رہنے کی پیش گوئی کی ہے۔متعلقہ محکمہ کی ایک پیشگوئی کے مطابق وادی کشمیر میں 3 دسمبر تک موسم مجموعی طور پر خشک رہ سکتا ہے تاہم اس کے بعد برف و باراں کا ایک اور سلسلہ متوقع ہے۔محکمہ موسمیات کے ایک عہدیدار نے بتایا کہ دونوں مرکزی علاقوں میں کم سے کم درجہ حرارت انجماد سے نیچے درج ہوا جس سے لوگوں کو کافی پرشانیوں کا سامنا کرنا پڑا۔محکمہ موسمیات کے مطابق سرینگر میں گزشتہ رات کے منفی 1.5 ڈگری سینٹی گریڈ کے مقابلے منفی 2.5 ڈگری سینٹی گریڈ ریکارڈ کیا گیا۔

جبکہ قاضی گنڈ میں کم از کم درجہ حرارت منفی 3.3 ڈگری سینٹی گریڈ ریکارڈ کیا گیا جو گزشتہ رات منفی 1.4 ڈگری سینٹی گریڈ تھا۔ پہلگام میں کم سے کم درجہ حرارت منفی 5.2 ڈگری سینٹی گریڈ ریکارڈ کیا گیا جو گزشتہ رات منفی 3.3 ڈگری سینٹی گریڈ تھا۔اسی طرح سے کوکرناگ میں کم سے کم درجہ حرارت منفی 1.8 ڈگری سینٹی گریڈ ریکارڈ کیا گیا جب کہ گزشتہ رات منفی 0.9 ڈگری سینٹی گریڈ اور معمول کا درجہ حرارت 1.4 ڈگری سینٹی گریڈ تھا۔کپوارہ قصبے میں گزشتہ رات منفی 2.4 ڈگری سینٹی گریڈ کے مقابلے میں کم سے کم 3.5 ڈگری سینٹی گریڈ ریکارڈ کیا گیا۔

محکمہ موسمیات کے مطابق گلمرگ میں گزشتہ رات کم سے کم درجہ حرارت منفی 1.6 ڈگری سینٹی گریڈ کے مقابلے میں منفی 1.7 ڈگری سینٹی گریڈ ریکارڈ کیا گیا۔لداخ کے لیہہ میں کم سے کم درجہ حرارت منفی 8.6 ڈگری سینٹی گریڈ ریکارڈ کیا گیا جو گزشتہ رات کے منفی 8.0 ڈگری سینٹی گریڈ کے مقابلے میں تھا جبکہ کرگل شہر میں منفی 4.4 ڈگری سینٹی گریڈ ریکارڈ کیا گیا۔