جموں و کشمیر

سیاحوں کی متوقع تعداد میں کمی، ہر شعبے کو نقصانات کا سامنا :وزیر اعلیٰ عمر عبداللہ

Published

1 year ago

September 24, 2025

یہ احساس ہے کہ BJPکی انتخابی شکست ریاستی درجہ کی بحالی میں رکاﺅٹ بنی
جموں و کشمیر کا ریاست نہ ہونامنتخب حکومت کاسب سے بڑا چیلنج
سری نگر :جے کے این ایس : وزیر اعلیٰ عمر عبداللہ نے بدھ کے روز کہا کہ جموں و کشمیر کے لوگوں کو خطے میں بھارتیہ جنتا پارٹی کی انتخابی شکست کی سزا نہیں دی جا سکتی۔عمرعبداللہ نے کہاکہ یہاں لوگوںمیں یہ ایسا احساس ہے کہ جموں و کشمیر کو ریاست کا درجہ نہیں مل سکتا کیونکہ بی جے پی نے اسمبلی انتخابات نہیں جیتے۔ جے کے این ایس مطابق نامہ نگاروں سے بات کرتے ہوئے وزیر اعلیٰ عمر عبداللہ نے کہا کہ جموں و کشمیر کے لوگوں سے تین طرفہ عمل کا وعدہ کیا گیا تھا جس میں حد بندی، انتخاب اور ریاست کا درجہ شامل ہے۔انہوں نے کہا کہ ریاست کا درجہ بحال نہیں کیا گیا ہے، جس سے ظاہر ہوتا ہے کہ گزشتہ سال اسمبلی انتخابات میں بی جے پی کی شکست کی وجہ سے اسے بحال نہیں کیا جا سکتا۔وزیر اعلیٰ عمر عبداللہ نے کہا کہ مرکز کے زیر انتظام علاقے جموں وکشمیر میں یہ تاثر پیدا ہو رہا ہے کہ اس کی ریاست کا درجہ بحال نہیں ہو گا کیونکہ بی جے پی گزشتہ سال اسمبلی انتخابات نہیں جیت سکی تھی۔انہوں نے کہا کہ بی جے پی واحد پارٹی ہے جس نے ریاست کی بحالی کی مخالفت کی۔عمرعبداللہ نے یہاں اپنے نجی دفتر کے باہر میڈیا سے بات کرتے ہوئے کہاکہ کبھی کبھی ایسا لگتا ہے کہ جموں و کشمیر کے لوگوں کو ریاست کا درجہ نہیں ملے گا کیونکہ بی جے پی انتخابات میں ہار گئی ہے۔ انہوںنے کہاکہ یہ ایک ناانصافی ہے کیونکہ کہیں بھی یہ نہیں کہا گیا کہ ریاست کا درجہ تب ہی بحال ہوگا جب بی جے پی جیتے گی۔وزیر اعلیٰ عمر عبداللہ جونیشنل کانفرنس کے نائب صدر بھی ہیں، نے کہا کہ جموں و کشمیر کے لوگوں کو بی جے پی کی شکست کی سزا نہیں دی جا سکتی۔انہوں نے کہا کہ اس وقت منتخب حکومت کا سب سے بڑا چیلنج یہ ہے کہ جموں و کشمیر ایک ریاست نہیں ہے۔ عمر عبداللہ نے کہاکہ ہمیں امید تھی کہ عوام کے ساتھ کیے گئے وعدوں کے پیش نظر ریاست کی حیثیت بحال ہو جائے گی اور یہاں تک کہ سپریم کورٹ کو بھی سہ رخی عمل کے بعد اس کی بحالی کے بارے میں بتایا گیا تھا ۔انہوں نے کہا کہ اگر ریاست کی بحالی کی مخالفت ہے تو وہ صرف بی جے پی کی طرف سے آرہی ہے۔عمرعبداللہ نے کہا کہ ان کی11 ماہ کی حکومت کے سامنے سب سے بڑا چیلنج یہ ہے کہ جموں و کشمیر ایک ریاست نہیں ہے۔وزیر اعلیٰ نے کہا کہ جس طرح سے لوگوں سے وعدہ کیا گیا تھا اور سپریم کورٹ کو مطلع کیا گیا تھا، ہمیں توقع تھی کہ یہ تین مراحل پر مشتمل عمل ہوگا: پہلے حد بندی، پھر انتخابات، اس کے بعد ریاست کی بحالی۔انہوںنے کہاکہ حد بندی ہوئی، انتخابات ہوئے اور لوگوں نے جوش و خروش سے انتخابات میں حصہ لیا۔ یہ بی جے پی کی بدقسمتی تھی کہ وہ انتخابات نہیں جیت سکی، لیکن لوگوں کو اس کی سزا نہیں دی جا سکتی ۔

عمرعبداللہ نے کشمیر میں سیاحت پر کہا کہ اسٹیک ہولڈرز خوش نہیں ہیں۔انہوں نے کہا کہ ہم نے وادی میں سیاحت کے احیاءکے لیے کوششیں کیں۔ لیکن سیاح اس تعداد میں نہیں آئے جس طرح ہماری توقع تھی۔ لیکن ہم اپنی کوششیں جاری رکھیں گے۔وزیر اعلیٰ عمر عبداللہ نے مزید کہا کہ حالیہ یاتریوں کے بعد سیاحوں کی آمد میں اس طرح اضافہ نہیں ہوا جس کی ان کی توقع تھی۔ انہوں نے مزید کہا کہ سیاحوں کی متوقع تعداد میں کمی کی وجہ سے ہر شعبے کو نقصانات کا سامنا کرنا پڑ رہا ہے۔ تاہم سیاحوں کو جموں و کشمیر کی طرف راغب کرنے کے لیے ہماری کوششیں جاری ہیں۔ ’مجھے محمدﷺ سے پیار ہے‘مہم سے متعلق تنازعہ کے بارے میں پوچھے جانے پر، عمرعبداللہ نے کہا کہ صرف ایک ذہنی طور پر بیمار شخص ہی ان الفاظ کو لکھنے کا مقدمہ بنا سکتا ہے۔انہوں نے زور دے کر کہاکہ ان تین الفاظ سے کس کو کوئی مسئلہ ہو سکتا ہے میں یہ سمجھنے میں ناکام ہوں کہ یہ گرفتاری کی بنیاد کیسے بن سکتے ہیں۔انہوںنے کہاکہ میں چاہتا ہوں کہ عدالتیں اسے جلد از جلد درست کر دیں۔ مجھے محمدﷺ سے محبت ہے لکھنا کیسے غیر قانونی ہے۔عمرعبداللہ نے کہا کہ اگر اس مہم کو مسلمانوں سے جوڑا بھی گیا ہو تب بھی ’آئی لو محمدﷺ‘لکھنا غیر قانونی نہیں ہو سکتا۔

انہوںنے مزیدکہاکہ کیا دوسرے مذاہب کے لوگ اپنے مقدس ہستیوں اور رہنماو ¿ں کی تعریف نہیں کرتے جب آپ کشمیر سے باہر سفر کرتے ہیں تو شاید ہی کوئی ایسی گاڑی ہو جس میں دیوتا کی تصویر نہ ہو، اگر یہ غیر قانونی نہیں ہے تو یہ غیر قانونی کیسے ہو جاتا ہے ۔

جموں و کشمیر

دہلی میں مودی کے حامی کشمیری نوجوان پر حملے کے خلاف سری نگر میں احتجاج

Published

2 hours ago

October 9, 2026

Online Desk

سری نگر، نئی دہلی کے کناٹ پلیس میں کانگریس کے احتجاج کے دوران سری نگر کے رہائشی فہیم نذیر شاہ پر مبینہ حملے کے خلاف جمعہ کو کشمیری نوجوانوں کے ایک گروپ نے سری نگر میں احتجاج کیا اور اس واقعے میں ملوث افراد کے خلاف سخت قانونی کارروائی کا مطالبہ کیا۔

احتجاجی نوجوان ہاتھوں میں پلے کارڈز اٹھائے ہوئے تھے اور کانگریس کے خلاف نعرے لگا رہے تھے۔ انہوں نے شہر کے مرکزی علاقے کی جانب مارچ کرنے کی کوشش کی، تاہم پولیس نے انہیں روک دیا۔

وزیراعظم نریندر مودی کے حامی فہیم نذیر شاہ پر مبینہ طور پر جمعرات کو اس وقت حملہ کیا گیا، جب وہ ایک پلے کارڈ لے کر کانگریس کے احتجاجی مقام پر پہنچے۔ پلے کارڈ پر ”وزیراعظم اور وزیر داخلہ سے معافی مانگو” درج تھا۔ وہاں انہوں نے نعرے بھی لگائے۔ اس واقعے کے بعد، بالخصوص بھارتیہ جنتا پارٹی (بی جے پی) کی جانب سے شدید مذمت کی گئی۔

سری نگر میں احتجاج کرنے والوں نے سوال کیا کہ سیاسی خیالات کا اظہار کرنے پر فہیم شاہ کو نشانہ کیوں بنایا گیا؟ انہوں نے کہا کہ ہر شہری کو تشدد کے خوف کے بغیر اپنی رائے ظاہر کرنے کا حق حاصل ہے۔

ایک احتجاجی نے سوال کیاکہ ”کیا ان کا قصور یہ تھا کہ وہ کشمیری یا مسلمان ہیں، یا انہوں نے وزیراعظم کی حمایت میں بینر اٹھایا تھا؟” انہوں نے مطالبہ کیا کہ کشمیریوں کا احترام کیا جائے اور وہ جہاں بھی جائیں، ان کے تحفظ کو یقینی بنایا جائے۔

ایک دوسرے احتجاجی نے کہا کہ فہیم شاہ کے ساتھ اظہارِ یکجہتی اور انہیں انصاف دلانے کے مطالبے کے لیے یہ مظاہرہ منعقد کیا گیا۔ انہوں نے مرکزی وزیر داخلہ اور دہلی انتظامیہ سے اپیل کی کہ اس واقعے کے ذمہ دار افراد کے خلاف سخت قانونی کارروائی کی جائے۔

یواین آئی۔ ظ ا

جموں و کشمیر

مشتبہ افراد اور دہشت گردانہ سرگرمیوں کی فوری اطلاع دیں: جموں و کشمیر پولیس کی عوام سے اپیل

Published

8 hours ago

October 9, 2026

Online Desk

جموں، جموں و کشمیر پولیس نے پونچھ ضلع کے بفلیاز میں پولیس-عوام شراکت داری گروپ (پی سی پی جی) کے اجلاس کے دوران شہریوں سے اپیل کی کہ وہ کسی بھی مشتبہ شخص یا دہشت گردانہ سرگرمی کے بارے میں فوری طور پر پولیس کو اطلاع دیں۔

یہ اجلاس ایڈیشنل ایس پی پونچھ ڈاکٹر اجے شرما کی صدارت میں منعقد ہوا، جس میں دیگر پولیس افسران بھی موجود تھے۔

اجلاس میں عوامی نمائندوں، سماجی کارکنوں، سابق فوجیوں، مذہبی نمائندوں اور مقامی باشندوں نے شرکت کی۔ اس کا مقصد پولیس اور عوام کے درمیان تال میل کو مضبوط بنانا اور منشیات، دہشت گردی کے خلاف کارروائی، خواتین و بچوں کی حفاظت، سائبر جرائم اور عوامی مسائل سے متعلق امور پر تبادلۂ خیال کرنا تھا۔

اجتماع سے خطاب کرتے ہوئے ایڈیشنل ایس پی پونچھ ڈاکٹر اجے شرما نے عوام کی فعال شرکت کو سراہا اور کہا کہ امن و سلامتی برقرار رکھنے کے لیے شہریوں کی جانب سے بروقت اور قابل اعتماد معلومات فراہم کرنا انتہائی اہم ہے۔

منشیات کی لعنت کے حوالے سے انہوں نے زور دیا کہ اس کاروبار میں ملوث اصل سپلائرز اور منشیات فروخت کرنے والوں کی شناخت کرکے انہیں گرفتار کیا جائے۔ اس کے ساتھ ہی نشے کی لت سے چھٹکارا دلانے، بحالی اور کونسلنگ کے اقدامات کو بھی فروغ دیا جائے، تاکہ اصلاح کے خواہش مند افراد کو مدد فراہم کی جاسکے۔

دہشت گردی کے خلاف کارروائی کے موضوع پر ایڈیشنل ایس پی نے خبردار کیا کہ ملک دشمن عناصر نوجوانوں کو گمراہ کرنے کے لیے منشیات، ہتھیاروں، دہشت گردی، مذہب اور دیگر جذباتی معاملات کا استحصال کرسکتے ہیں۔

انہوں نے شہریوں سے اپیل کی کہ وہ کسی بھی مشتبہ شخص، نقل و حرکت، آمد و رفت یا دہشت گردانہ سرگرمی کی فوری اطلاع پولیس کو دیں۔ انہوں نے واضح طور پر کہا کہ دہشت گردوں کو پناہ، حمایت یا کسی بھی قسم کی مدد فراہم نہ کی جائے۔

انہوں نے ماضی میں دہشت گردی کے خلاف کارروائیوں، بشمول آپریشن سرپ وناش، میں مقامی باشندوں کے اہم کردار کو بھی تسلیم کیا۔

ایڈیشنل سپرنٹنڈنٹ آف پولیس نے پہاڑی اور دشوار گزار علاقوں میں درپیش سلامتی کے چیلنجوں کے پیش نظر نگرانی مزید سخت کرنے، مؤثر معلومات جمع کرنے اور انہیں بروقت متعلقہ حکام تک پہنچانے کی ضرورت پر بھی زور دیا۔

انہوں نے عوام سے غیر قانونی کان کنی، درختوں کی غیر مجاز کٹائی، تجاوزات اور جنگلاتی یا پہاڑی زمین کو غیر قانونی طور پر صاف کرنے کے واقعات کی اطلاع دینے کی اپیل کی۔

مویشیوں کی اسمگلنگ پر گہری تشویش ظاہر کرتے ہوئے انہوں نے متعلقہ افسران کو ہدایت دی کہ اس معاملے میں کسی قسم کی نرمی نہ برتی جائے اور خلاف ورزی کرنے والوں کے خلاف سخت قانونی کارروائی یقینی بنائی جائے۔

مقامی تنازعات کے حوالے سے انہوں نے باشندوں کو مشورہ دیا کہ وہ ایف آئی آر اور جوابی ایف آئی آر درج کرانے کے ذریعے معمولی معاملات کو بلاوجہ طول دینے سے گریز کریں اور جہاں ممکن ہو، چھوٹے تنازعات کو پُرامن طریقے سے حل کریں۔

یواین آئی۔ ظ ا

جموں و کشمیر

جموں و کشمیر میں سی جی ڈی پالیسی نافذ، تمام 20 اضلاع میں گیس کنکٹیویٹی اور سنگل ونڈو منظوری

Published

1 day ago

October 8, 2026

Online Desk

سری نگر، جموں و کشمیر حکومت نے جموں و کشمیر سٹی گیس ڈسٹری بیوشن (سی جی ڈی) پالیسی 2026 کو نافذ کردیا ہے، جس کے تحت تمام 20 اضلاع میں مرحلہ وار سی جی ڈی نیٹ ورک کی توسیع، مقررہ مدت میں سنگل ونڈو منظوری اور بڑے صنعتی علاقوں کو ترجیحی بنیاد پر گیس کنکٹیویٹی فراہم کرنے کا انتظام کیا گیا ہے۔

وزیر اعلیٰ عمر عبداللہ نے جمعرات کو پالیسی کے نوٹیفکیشن کو جموں و کشمیر میں صاف ایندھن تک رسائی بڑھانے، صنعتی مسابقت کو مضبوط بنانے اور توانائی کے بنیادی ڈھانچے کو جدید بنانے کی سمت ایک اہم قدم قرار دیا۔

ایک سرکاری ترجمان نے بتایا کہ وزرا کی کونسل کی منظوری کے بعد جاری کی گئی اس پالیسی میں گھریلو صارفین، تجارتی اداروں، صنعتوں اور ٹرانسپورٹ شعبے میں پائپڈ نیچرل گیس (پی این جی) اور کمپریسڈ نیچرل گیس (سی این جی) کے استعمال کو فروغ دینے کے لیے واضح، سرمایہ کار دوست اور مقررہ مدت پر مبنی فریم ورک قائم کیا گیا ہے۔

پالیسی کے تحت جموں و کشمیر کے تمام 20 اضلاع میں سٹی گیس ڈسٹری بیوشن نیٹ ورک کو مرحلہ وار توسیع دی جائے گی، جس سے صارفین تک زیادہ صاف اور قابل اعتماد قدرتی گیس پہنچے گی اور روایتی ایندھن سے منتقلی میں مدد ملے گی۔

پالیسی کا ایک اہم مقصد سنگل ونڈو اور مقررہ مدت میں منظوری کے نظام کے ذریعے منصوبوں کے نفاذ کو آسان اور تیز بنانا، سی این جی اسٹیشن قائم کرنے کے طریقہ کار کو ہموار کرنا اور رائٹ آف وے کے معیارات کو یکساں بنانا ہے۔ اس کے علاوہ بڑے صنعتی علاقوں، جن میں کٹھوعہ، سانبہ اور پلوامہ کے صنعتی علاقے شامل ہیں، کو ترجیحی بنیاد پر گیس کنکٹیویٹی فراہم کی جائے گی، تاکہ صنعتی ترقی کو فروغ ملے اور قابل اعتماد توانائی تک رسائی بہتر ہو۔

پی این جی اور سی این جی کے بنیادی ڈھانچے کی توسیع سے محفوظ، صاف اور زیادہ سستی توانائی کے متبادل دستیاب ہونے، ایندھن کی لاگت کم کرنے، صنعتی کارکردگی اور مسابقت بہتر بنانے اور ابھرتے ہوئے صاف توانائی کے شعبے میں سرمایہ کاری کی حوصلہ افزائی کی توقع ہے۔

پالیسی میں مقامی روزگار، اپرنٹس شپ اور ہنرمندی کی ترقی کو بھی فروغ دینے کا انتظام کیا گیا ہے، جس سے گیس ڈسٹری بیوشن کے بنیادی ڈھانچے اور متعلقہ خدمات کی تعمیر، آپریشن اور دیکھ بھال کے شعبوں میں روزگار کے نئے مواقع پیدا ہوں گے۔

وزیر اعلیٰ عمر عبداللہ نے وزیر برائے خوراک، شہری رسد و امور صارفین ستیش شرما اور متعلقہ محکمہ کو پالیسی کے نوٹیفکیشن پر مبارکباد دیتے ہوئے اسے جموں و کشمیر میں صاف ستھری ترقی، پائیدار ترقی اور جدید توانائی کے نظام کی جانب ایک اہم قدم قرار دیا۔

وزیر اعلیٰ نے کہاکہ ”سٹی گیس ڈسٹری بیوشن پالیسی سے صاف اور قابل اعتماد توانائی تک رسائی کو وسعت دینے میں مدد ملے گی، جبکہ صنعت اور سرمایہ کاری کے لیے سازگار ماحول بھی پیدا ہوگا۔ یہ جموں و کشمیر کے لیے زیادہ صاف، مؤثر اور پائیدار توانائی کے مستقبل کی تعمیر کی جانب ایک اہم قدم ہے۔”

یواین آئی۔ ط ا