سری نگر،(یو این آئی): اپنے اندر پوشیدہ ہنر اور صلاحیتوں کو بروئے کار لانے سے نہ صرف بے وقعت چیزوں کو بھی کو گوہر بنایا جاسکتا ہے بلکہ اپنی روزی روٹی کی سبیل بھی کی جاسکتی ہے۔یہ باتیں سری نگر کے گلاب باغ سے تعلق رکھنے والے 22 سالہ عزیزالرحمان نے صحیح ثابت کرکے دکھائی ہیں جو جانوروں کی ہڈیوں پر نقش و نگاری کرکے مختلف النوع آرائشی چیزیں بناتا ہے۔

اس طرح وہ نہ صرف اپنے اندر پوشیدہ ہنر کی جلوہ نمائی کرکے اپنے شوق کو پورا کر رہے ہیں بلکہ اپنے ذاتی خرچے کی بھی سبیل کر رہے ہیں۔موصوف نوجوان آرٹ کا طالب علم ہے نہ کسی آرٹ اسکول میں زیر تربیت ہے بلکہ شیر کشمیر یونیورسٹی آف ایگریکلچر سائنس اینڈ ٹیکنالوجی کشمیر میں شعبہ فشریز میں گریجویشن کرر ہا ہے۔

تصویریو این آئی

عزیزالرحمان نے اپنے اس انوکھے شوق کے بارے میں یو این آئی اردو کے ساتھ گفتگو کرتے ہوئے کہا کہ بچپن سے ہی مجھے جانوروں کی ہڈیوں کو ضائع ہونے کے بجائے ان کو آرائشی ساز و سامان میں تبدیل کرنے کا شوق تھا۔انہوں نے کہا:‘کچھ نیا اور انوکھا کرنے کا مجھے ہمیشہ سے ہی ذوق و شوق رہتا ہے، ہمیں گھر سے باہر جانے کی اجازت نہیں تھی تو میں گھر میں ہی کچھ نہ کچھ کرتا رہتا تھا’۔

ان کا کہنا تھا:‘آرٹ سے مجھے جنون کی حد تک لگاؤ ہے اور معمولی چیزوں کو کسی فنی شاہکار میں تبدیل کرنا میرا شوق یے ’۔موصوف نوجوان نے کہا کہ میں نے سال2020 میں جب کورونا وبا کی وجہ سے سب بند ہوگیا، باقاعدگی سے ہڈیوں پر مختلف قسم کی نقش و نگاری کرکے ان کو فن پاروں میں بدلنے کا کام شروع کیا۔انہوں نے کہا:‘میں جانوروں کی ہڈیوں کو لا کر ان کو پانی میں ابالتا ہوں اور پھر ان کو سکھانے کے بعد ضروری کاٹ تراش کرکے ان پر سائز نقش و نگاری کرتا ہوں ان مختلف آرائشی ساز وسامان کی شکل دیتا ہوں ’۔

ان کا کہنا تھا:‘میں ہڈیوں، کھوپڑیوں کی کارونگ کرکے ان کو مختلف آرائشی چیزیں جیسے چاقو کے ہینڈل،زیورات وغیرہ بناتا ہوں ’۔عزیز الرحمان نے کہا کہ میرے ہاتھوں سے بنی ہڈیوں کی آرائشی چیزوں کی سوشل میڈیا پر کافی پذیرائی ہوتی ہے اور ان کے شوقین مجھ سے رابطہ کرکے ان کو خریدتے بھی ہیں۔

تصویریو این آئی

انہوں نے کہا کہ میں اپنے انسٹاگرام اکاؤنٹ پر اپنے ان فن پاروں کو ڈالتا ہوں اور اس وقت میرے پاس مختلف قسموں کی کم سے کم تیس چیزیں موجود ہیں۔موصوف نوجوان نے کہا کہ میں تعلیم مکمل کرنے کے بعد اپنے اس آرٹ کے ساتھ زیادہ سے زیادہ وقت صرف کروں گا اور اس کو مزید وسعت دوں گا۔انہوں نے کہا:‘میں شاید اس فن کے ساتھ وابستہ پہلا کشمیری نوجوان ہوں تاہم کشمیر میں لوگ ابھی اس فن کی طرف متوجہ نہیں ہیں ’۔

ان کا کہنا تھا کہ یہ فن جو یہاں فی الوقت منفرد بھی ہے اور انوکھا بھی ہے، کو روزگار کا ایک موثر ذریعہ بنایا جا سکتا ہے۔انہوں دعویٰ کیا کہ یہ فن نہ صرف اپنے روزگار کا ذریعہ بن سکتا ہے بلکہ اس کے ساتھ بھی سینکڑوں نوجوان جڑ کر اپنی روزی روٹی کی سبیل کر کے اپنے پاؤں پر کھڑے ہوسکتے ہیں۔

عزیزالرحمان نے کا ماننا ہے کہ ہر کسی نوجوان میں کوئی نہ کوئی ہنر پوشیدہ ہوتا ہے جس کو بروئے کار لانے سے وہ اپنا روز گار ہی نہیں بلکہ بلکہ اپنا نام بھی روشن کر سکتا ہے۔انہوں نے کہا کہ کشمیر کے نوجوانوں میں صلاحیتوں کی کوئی کمی نہیں ہے لیکن ان کو بروئے کار لانے کی ضرورت ہے۔نوجوانوں کے نام اپنے پیغام میں ان کا کہنا تھا کہ سرکاری نوکری ہی صرف روز گار کا ذریعہ نہیں ہے بلکہ ہمیں تحصیل تعلیم کے ساتھ ساتھ اپنے اندر چھپی صلاحیتوں کو نکھارنا چاہئے اور اپنے لئے روزگار کے وسائل خود پیدا کرنے چاہئے۔

عزیزالرحمان نے کہا کہ نوجوانوں کو چاہئے کہ وہ تعلیم مکمل کرنے کے بعد گھروں میں بے کار بیٹھنے کے بجائے اپنی اپنی صلاحیتوں کے مطابق کام کریں۔انہوں نے کہا کہ محنت،شوق اور جدوجہد جاری رکھنے سے ہی ہم اپنے خوابوں کی دنیا کو تعمیر کرکے اپنے آپ اور اپنے وطن کا نام روشن کر سکتے ہیں۔