خبراردو:

گزشتہ برس 44آر آر کیمپ سے وابستہ اہلکار اورنگ زیب کی ہلاکت میں مبینہ طور پر ملوث 3اہلکاروں کو فوج نے حراست میں لیتے ہوئے بڑے پیمانے پر پوچھ تاچھ کا آغاز کیا ہے۔ معلوم ہوا ہے تینوں اہلکاروں کا جنگجوؤں کے ساتھ رابطہ ہونے کاانکشاف ہوا ہے جس کے بعد فوج نے واقعے سے متعلق کورٹ آف انکوائر کے احکامات صادر کرتے ہوئے بڑے پیمانے پر تحقیقات شروع کردی ہے۔

جون 2018میں 44آر آر کیمپ سے وابستہ اہلکار اورنگ زیب ساکن پونچھ کو جنگجوؤں نے عید سے قبل ایک روز اغوا کیا تھا جس کے بعد انہیں نامعلوم مقام پر گولیوں سے بھون ڈالا گیا ۔ جنگجوؤں نے اس واقعے کا ویڈیو عکس بند کرتے ہوئے سوشل میڈیاپر ڈال دیا تھا جس کے بعد ویڈیو وائرل ہوا۔معلوم ہو اہے کہ فوج نے معاملے کی تحقیقات بڑے پیمانے پر شروع کی تھی تاہم چند ماہ گزرنے کے بعد فوج نے مذکورہ کیمپ سے وابستہ 3اہلکاروں کو حراست میں لیتے ہوئے پوچھ تاچھ کا سلسلہ شروع کردیا ہے۔ ذرائع نے بتایا کہ اورنگ زیب نامی فوجی اہلکار کی نقل و حرکت سے متعلق اُن کے ساتھی اہلکاروں نے جنگجوؤں کو مکمل تفصیلات فراہم کی تھی جس کے بعد جونہی اورنگ زیب چھٹی کی غرض سے اپنے کیمپ سے باہر نکلا تو انہیں گاڑی چڑھنے کے دوران ہی بندوق برداروں نے اغوا کیا۔

واضح رہے مذکورہ اہلکار کی ہلاکت کے بعد ریاست کے ساتھ ساتھ ملک بھر میں لوگوں نے غم و غصے کا اظہار کرتے ہوئے ملوث جنگجوؤں کے خلاف سخت کارروائی کرنے کا مطالبہ کیا۔ مارے گئے فوجی اہلکار کو گزشتہ برس یوم آزادی کے موقعے پر شوریا چکر سے بھی نوازا گیا تھا۔ ادھر معلوم ہوا ہے کہ دو روز قبل اورنگ زیب کے والد نے وجے پور جموں میں وزیر اعظم نریندر مودی کی موجودگی میں بی جے پی میں باضابطہ طور پر شمولیت اختیار کی ہے۔ادھر یہ بات بھی سامنے آرہی ہے کہ گزشتہ روز شادی مرگ پلوامہ میں جس نوجوان کو فوج نے حراست کے دوران تشدد کا نشانہ بنایا تھا اُس کے تار بھی اسی واقعے سے جڑے ہوئے ہیں۔ خیال رہے 4فروری 2019سوموار کو فوج نے نامعلوم وجوہات کی بنا پر 20سالہ نوجوان توصیف احمد ولد غلام احمد ساکن اچھگوزہ پلوامہ کو گرفتار کیا تھا جس کے بعد بقول نوجوان ، انہیں زیر حراست رکھتے ہوئے انتہائی شدید ٹارچر سے گزارا گیا جس کے بعد نوجوان کو انتہائی نازک حالت میں سرینگر کے ایس ایم ایچ ایس ہسپتال منتقل کیا گیا ۔معلوم ہوا کہ 44آر آر شادی مرگ پلوامہ کیمپ سے وابستہ فوجی اہلکاروں نے سوموار کو علاقے سے تعلق رکھنے والے 20سالہ نوجوان توصیف احمد ولد غلام احمد ساکن اچھگوزہ پلوامہ کو گرفتار کرتے ہوئے انہیں زیر حراست سخت اذیت ناک مراحل سے گزارا ہے۔ معلوم ہوا کہ 44آر آر کے میجر شکلا کی قیادت میں فوجی اہلکاروں نے توصیف احمد کو گزشتہ دنوں نامعلوم وجوہات کی بنا پر حراست میں لیا تھاجس کے بعد توصیف کو سیدھے شادی مرک کیمپ منتقل کیا گیا جہاں اسے اذیت ناک مراحل سے دوچار کرایا گیا۔

نوجوان کے مطابق فوجی اہلکاروں نے اس موقعے پر مجھے ٹھرڈ ڈگری ٹارچر کیا جس کے بعد اسے سرینگر کے ایس ایم ایچ ایس ہسپتال منتقل کرنا پڑا جہاں اُس کی حالت نازک بنی ہوئی ہے۔توصیف کا کہنا تھا کہ میجر شکلا کی قیادت میں فوجی اہلکاروں نے جہاں مجھے جسمانی تشدد کیا وہیں انہوں نے مجھے ذہنی تکلیف بھی پہنچائی۔ ہسپتال میں زیر علاج توصیف کا کہنا تھا کہ میجر شکلا اور دیگر اہلکاروں نے مجھے ٹارچر کے دوران میری بہن کی تصویر فراہم کرنے کو کہا اور مجھ پر انتہائی دباؤ ڈالا گیا کہ میں آنے والے دنوں میں ہتھیار اُٹھاکر جنگجوؤں کی صفوں میں شامل ہوجاؤں۔زخمی توصیف نے بتایا کہ میجر شکلا نے مجھے دھمکی دیتے ہوئے کہا کہ اگر اُس نے اپنی بہن کی تصویر فوج کو فراہم نہیں کی تو وہ اس کی بہن کو اغوا کریں گے۔ادھر فوج کے ترجمان کرنل راجیش کالیا نے بتایا کہ ہم واقعے سے متعلق تفصیلات جمع کررہے ہیں ۔ خیال رہے کہ توصیف احمد کو پہلے ضلع ہسپتال پلوامہ لے جایا گیا جہاں ڈاکٹروں نے اس کی نازک حالت کو دیکھ کر انہیں سرینگر منتقل کردیا۔اس دوران واقعے نے منگلوار کی شام اُس وقت نیا موڑ لیا جب پی ڈی پی صدر اور سابق وزیر اعلیٰ محبوبہ مفتی نے ایس ایم ایچ ایس ہسپتال جاکر توصیف سے متعلق جانکاری حاصل کی۔محبوبہ مفتی نے بتایا کہ وہ اس معاملے پر فوجی کمانڈر سے بات کریں گی اور میں پرامید ہوں کہ گورنر ستیہ پال ملک اس معاملے کو سنجیدہ نوٹس لیں گے۔

محبوبہ مفتی کا کہنا تھا کہ توصیف کا بھائی بھی لاپتہ ہے اور اس کے متعلق بھی کوئی معلومات دستیاب نہیں ہے۔ذرائع سے معلوم ہوا ہے کہ اورنگ زیب نامی فوجی اہلکار کی ہلاکت میں مبینہ طور پر ملوث 3اہلکاروں میں عابد وانی، تجمل احمد اور عادل وانی شامل ہیں جن کے خلاف فوج نے باضابطہ طور پر انکوائری شروع کردی ہے ۔ انکوائری کے دوران مبینہ طور پر ملوث اہلکاروں سے اپنے ساتھی اہلکار کی تفصیلات جنگجوؤں کو فراہم کرنے کے حوالے سے باریک بینی سے پوچھ تاچھ کی جائے گی۔معلوم ہوا ہے کہ تینوں اہلکار جنوبی کشمیر سے تعلق رکھتے ہیں جن میں سے دو ضلع پلوامہ اور ایک ضلع کولگام کا رہنے والا ہے۔خفیہ ذرائع سے معلوم ہوا ہے کہ اورنگ زیب قتل کیس کے حوالے سے شروع کی گئی تحقیقات کے دوران ہی تینوں اہلکاروں کے نام سامنے آئے جس کے بعد فوج نے انکوائری کے احکامات صادر کرتے ہوئے تینوں کو گرفتار کرلیا ہے۔