اگرچہ مرکزی حکومت نے ابھی تک ملک گیر لاک داؤن میں توسیع کا کوئی اعلان نہیں کیا،تاہم مرکزی وزارت داخلہ نے تیسرے مرحلے کے واضح اشارے دیتے ہوئے کہا ہے کہ لاک ڈاؤن سے متعلق نئے رہنما خطوط 4مئی سے نافذ ہوں گے جبکہ کئی اضلاع میں نرمی بھی کی جائے گی۔کشمیر نیوز سروس کے مطابق مرکزی وزارت داخلہ نے کل لاک ڈاون سے متعلق ایک جامع جائزہ میٹنگ کی،جس میں ملک گیر لاک ڈاؤن میں توسیع اور نرمی کے سبھی امور پر تبادلہ خیا ل کیا گیا۔میٹنگ میں بتایا گیا کہ ابھی تک لاک ڈاون کی وجہ سے پیدا ہونے والی صورتحال میں کافی بہتری آئی ہے۔وزارت داخلہ کے ترجمان نے کہا کہ یہ یقینی بنانے کیلئے کہ ابھی تک حاصل ہونے والی کامیابی ضائع نہ ہو، تین مئی تک لاک ڈاون کے رہنما اصولوں پر سختی سے عمل درآمد کیا جانا چاہئے۔ کووڈ-

اْنیس سے لڑنے کیلئے نئے رہنما اصول کا نفاذ چار مئی سے ہوگا، جس کے تحت کئی ضلعوں میں خاطر خواہ مہلت دی جائے گی۔ ترجمان نے کہا کہ اس سے متعلق تفصیلات بعد میں فراہم کی جائیں گی۔مرکزی حکومت نے ریاستوں اور مرکز کے زیرانتظام علاقوں میں پھنسے ہوئے لوگوں اور مزدوروں کو اپنی اپنی ریاست میں پہنچانے سے متعلق حکم جاری کیا ہے۔ اپنے حکم نامے میں وزارتِ داخلہ نے کہا ہے کہ تمام افرادکی جس جگہ وہ موجود ہیں، وہاں اور منزل پر پہنچنے کے بعد دونوں مرتبہ طبی جانچ کی جانی چاہئے اور گھر پہنچنے کے بعد گھر پر ہی یا قرنطینہ مراکز میں وزارتِ صحت کے رہنما خطوط کے مطابق الگ تھلگ رہنا ہوگا۔وزارت کے اعلان کو اس اشارے کے طور پر دیکھا جارہا ہے کہ کئی رعایات کے ساتھ لاک ڈاؤن کی مدت کو 3 مئی سے آگے بڑھایا جاسکتا ہے۔

مرکزی وزارت داخلہ نے ملک میں مختلف مقامات پر پھنسے ہوئے لوگوں کو راحت دیتے ہوئے ریاستوں کے درمیان آمد و رفت کھولنے کی اجازت دی تھی۔واضح رہے کہ ملک بھر میں 3 مئی تک لاک ڈاؤن نافذ ہے اور حکومت کو اس کے بعد کی حکمت عملی تیار کرنی ہے۔ وزیراعظم نریندر مودی نے گزشتہ پیر کو سبھی ریاستوں کے وزرائے اعلی کے ساتھ ویڈیو کانفرنسنگ کے ذریعہ اس سلسلے میں میٹنگ بھی کی تھی۔ادھر مختلف ریاستوں میں پھنسے ہوئے مزدوروں کی واپسی جاری ہے۔ مدھیہ پردیش میں اب تک دوسری ریاستوں میں پھنسے بیس ہزار سے زیادہ مزدور واپس لائے گئے ہیں۔ ان تمام مزدوروں کی طبی جانچ کے بعد اْنہیں اْن کے آبائی اضلاع بھیجا جارہا ہے۔ مدھیہ پردیش کے تقریباً ایک لاکھ مزدور دوسری ریاستوں میں کام کرتے ہیں۔ اْن میں سے کچھ پہلے ہی واپس آچکے ہیں۔جموں وکشمیر انتظامیہ نے لاک ڈاون کے بعد سے اب تک ملک کے مختلف حصوں میں پھنسے تقریباً 17ہزار مزدوروں، طلبا اور دیگر لوگوں کو اپنے آبائی وطن واپس آنے میں مدد کی ہے۔ واپس آئے اِن مزدوروں کو پروٹوکول کے مطابق قرنطینہ میں رکھا گیا ہے، جس کے بعد اِنہیں اْن کے آبائی علاقوں کو بھیجا جارہا ہے۔

اس دورا ن جموں کشمیر حکومت نے اعلان کیا کہ عنقریب درماندہ افراد کو واپس لانے کا تفصیلی منصوبہ ترتیب دیا گیا ہے۔سرکاری ترجمان روہت کنسل نے ٹویٹ کرتے ہوئے کہا”مرکزی زیر انتظام جموں کشمیر کی سرکار بہت جلد ایس او پی جاری کرے گی جس کے تحت مزدوروں اور طالب علموں کی نقل و حمل کو منظم طریقہ سے انجام دیا جائے گا“۔انہوں نے وضاحت کرتے ہوئے بتایا کہ ہر کسی کو ایڈوائزری کا انتظار کرنا چاہئے اور کسی کو بھی نوڈل آفیسر کے ساتھ کارڈی نیشن کے بغیر چلنا نہیں چاہئے۔

انہوں نے لکھا”ہم ہر ایک کے پاس پہنچیں گے، ابھی صبر سے کام لینے کا وقت ہے“۔انہوں نے مزید کہا کہ جو بھی لوگ بنا اجازت نکلیں گے اْنہیں 21دن کے قرنطین کیلئے بھیجا جائے گا۔کنسل نے لکھا”مہربانی کرکے انتظامیہ کی اجازت کے بغیر نہ نکلیں،غیر منظم طریقے سے آنے والوں کو لکھنپور میں ہی 21دن کے قرنطین کیلئے بھیجا جائے گا“۔