خبراردو:

لوک سبھا انتخابات کے دوسرے مرحلے میں آج ریاست کی دو پارلیمانی نشستوں جن میں سرینگر اور اُدھم پور شامل ہیں ، میں ووٹران اپنی حق رائے دہی کا استعمال کریں گے۔ معلوم ہوا ہے کہ دونوں پارلیمانی نشستوں میں 29لاکھ 81ہزار سے زائد رائے دہندگان اپنی حق رائے دہی سے مختلف سیاسی پارٹیوں سے وابستہ 24سیاسی اُمیدواروں کی قسمت کا فیصلہ کریں گے۔ اس دوران معلوم ہوا ہے کہ سرینگر پارلیمانی نشست جو15اسمبلی حلقہ ہائے انتخابات پر مشتمل ہیں ، میں بی جے پی، کانگریس، این سی، پی ڈی پی، اے آئی پی سمیت درجنوں سیاسی پارٹیوں سے وابستہ نمائندے میدان میں اپنی سیاسی قسمت آزمائی کرنے جارہے ہیں۔ بتایا جارہا ہے کہ سرینگر پارلیمانی نشست میں این سی اور پی سی کے درمیان کانٹے کا مقابلہ ہونے جارہا ہے۔

ادھر ریاستی انتظامیہ نے مائیگرنٹ ووٹروان کے لیے اندرون و بیرون ریاست حق رائے دہی کے استعمال کے لیے ٹھوس انتظامات عمل میں لائے ہیں۔ معلوم ہوا کہ انتظامیہ نے الیکشن کمیشن آف انڈیا کی طرف سے جاری قواعد و ضوابط کے تحت مائیگرنٹ ووٹران کے لیے 26پولنگ مراکز قائم کئے ہیں جہاں مائیگرینٹ ووٹران اپنے آئینی حق کا استعمال کریں گے۔ادھر انتظامیہ نے سرینگر اور اُدھم پور نشستوں کے تحت آنے والے علاقوں میں قائم پولنگ مراکز کے ارد گرد سیکورٹی کے کڑے انتظامات اُٹھائے ہیں۔ ذرائع نے بتایا کہ 4426 میں سے نامزد حساس ترین پولنگ مراکزکے ارد گرد پولیس اور دیگر نیم فوجی دستوں کی بھاری کمک کو تعینات کرلیا گیا ہے جہاں شرپسند عناصر پر کڑی نگاہ رکھی جارہی ہے۔

ادھر ریاستی پولیس کے سربراہ دلباغ سنگھ نے لوک سبھا انتخابات کے دوسرے مرحلے کے پیش نظر سرینگر اور اُدھم پور کی نشستوں میں سیکورٹی کے غیر معمولی انتظامات کی تصدیق کرتے ہوئے بتایا کہ پوسٹرز کے ذریعے رائے دہندگان کے اندر خوف و ہراس کا ماحول پیدا کرنے والے عناصر کیخلاف سخت کارروائی عمل میں لائی جائیگی۔ انہوں نے ووٹران سے اپیل کرتے ہوئے کہا کہ وہ بلاخوف دوسرے مرحلے کے دوران پولنگ مراکز کا رخ کرکے اپنی حق رائے دہی کا استعمال کریں۔ ریاستی پولیس کے سربراہ دلباغ سنگھ کا کہنا ہے کہ لوک سبھا انتخابات کے دوسرے مرحلے کے پیش نظر سرینگر اور اُدھم پور کی پارلیمانی نشستوں پر ووٹنگ عمل کو خوشگوار ماحول میں منعقد کرانے کے لئے سیکورٹی کے غیر معمولی انتظامات اُٹھائے گئے ہیں۔

دلباغ سنگھ کا کہنا تھا کہ الیکشن عمل کو پرامن اور خوشگوار ماحول میں منعقد کرانے کے لئے فورسز کی جتنی کمک درکار تھی انہیں پہلے ہی متعلقہ پولنگ مراکز پر بھیجا جاچکا ہے۔ انہوں نے بتایا کہ لوک انتخابات کے دوسرے مرحلے کے دوران سرینگر اور اُدھم پور کی پارلیمانی نشستوں کو آج ووٹ ڈالے جارہے ہیں تاہم یہاں الیکشن عمل کو پرامن اور افرا تفری سے پاک ماحول میں منعقد کرانے کے حوالے سے سیکورٹی کے کڑے انتظامات عمل میں لائے گئے ہیں۔دلباغ سنگھ کا کہنا تھا کہ اُدھم پور حلقہ انتخابات کے تحت آنے والے حساس علاقوں بشمول اُدھم پور، مڑواہ، دچھن اور کشتوارجیسے علاقوں میں سیکورٹی کے سخت انتظامات کئے گئے ہیں۔ انہوں نے کہا کہ یہاں پولنگ مراکز پر پولنگ عملے کو پہلے ہی روانہ کیا گیا ہے جن کی حفاطت کو یقینی بنانے کے لیے فورسز اہلکاروں کو تعینات کردیا گیا ہے۔ڈی جی پی کے مطابق سرینگر پارلیمانی نشست پر بھی سیکورٹی کے کڑے انتظامات عمل میں لائے گئے ہیں۔انتخابات کے دوران شرپسندوں کی جانب سے رائے دہندگان کو دھمکیوں سے مرعوب کرنے سے متعلق ڈی جی پی کا کہنا تھا کہ سرینگر پارلیمانی نشست کے تحت آنے والے چند علاقوں میں اگر چہ شرپسند عناصر کی جانب سے دیواروں اور عمارتوں پر الیکشن بائیکاٹ کے پوسٹرس چسپاں کئے گئے تھے تاہم ان ملک دشمن سرگرمیوں میں جن افراد بھی ملوث ہوں گے ان کے خلاف سخت کارروائی عمل میں لائی جائیگی۔اس موقعے پر انہوں نے رائے دہندگان سے اپیل کرتے ہوئے کہا کہ وہ آج پولنگ مراکز کارخ کرکے اپنی حق رائے دہی کا بھر پوراستعمال کریں۔
شاہراہ پر پابندی کے نتیجے میں سیب صنعت زوال کے دہانے پر