حریت کانفرنس (ع) چیرمین میر واعظ عمر فاروق نے بی بی سی (ہندی) کے ساتھ خصوصی بات چیت کے دوران نئی دہلی پر الزام عائد کرتے ہوئے کہا کہ ریاست جموں وکشمیر میں جس کسی بھی ہندنواز سیاستی جماعت کی حکومت قائم ہو بہر حال راج نئی دہلی ہی کرتی ہے۔ انہوں نے گورنر ستیہ پال ملک کی طرف سے ریاستی اسمبلی کو تحلیل کئے جانے پر تبصرہ کرتے ہوئے کہا کہ کشمیری عوام کو اس بات سے کوئی بھی غرض نہیں ہے کہ حکومت نیشنل کانفرنس کی ہو یا پی ڈی پی کی کیوں کہ یہ بات روز روشن کی طرح عیاں ہے اور گورنر نے تو بذات خود اس بات کا اعتراف کیا کہ یہاں صرف نئی دہلی کا سکہ چلتا ہے۔ ریاست میں امن و امان کی بحالی میں رول ادا کرنے پر میر واعظ نے بتایا کہ اگر ہم نے اٹل بہاری واجپائی اور ڈاکٹر منموہن سنگھ کے ساتھ بات کی تو ہمیں مودی سرکار کے ساتھ مذاکرات کرنے میں کون سی ہچکچاہٹ ہوسکتی ہے۔ میر واعظ نے بتایا کہ بدقسمتی کی بات ہے کہ نئی دہلی میں براجمان مودی سرکار اصل میں حقیقت کو ماننے سے کترارہی ہے۔ وہ مسئلہ کشمیر کو حل طلب مانے سے انکار کررہے ہیں لہٰذا اس صورتحال میں مودی سرکار کے ساتھ بات چیت ناممکن ہے۔

انہوں نے بتایا کہ بی جے پی کی قیادت والی سرکار بات چیت کے لیے تیار نہیں ہے۔ ہمارا اصولی مؤقف ہے کہ مسئلہ کشمیر کے تین فریق ہے، ہندوستان ، پاکستان اور کشمیر ی عوام جو آر پار بٹے ہوئے ہیں اور جب تک نہ تینوں فریقین مل بیٹھ کر کوئی ایسا حل تلاش کریں گے جو لوگوں کی خواہشات کا آئنہ دار ہو ۔ میر واعظ نے بتایا کہ بی جے پی نے کبھی بھی نیک نیتی سے مذاکرات کی دعوت نہیں دی بلکہ انہوں نے فی الوقت ریاست جموں وکشمیر میں جبروزیادتیوں پرمبنی پالیسی کو جاری رکھا ہوا ہے اور انہیں لگتا ہے کہ وہ اپنی جارحانہ پالیسیوں کی وجہ سے کشمیری عوام کی جدوجہد کو دبانے میں کامیاب ہوں گے۔انہوں نے بتایا کہ بی جے پی کے طریق کار نے نوجوانوں کو سیاسی طور پر مایوس کیا ہو اہے اور وہ بیگانگی کی مزید گہرائیوں میں چلے گئے ہیں ۔ میر واعظ نے بتایا کہ وادی میں 1990میں جب کہی کریک ڈاؤن کیا جاتا تھا یا کہی گولیاں چلتی تھی تو لوگ اپنی جانوں کو بچانے کی خاطر علاقوں سے بھاگ جاتے تھے لیکن اب صورتحال مختلف ہے ، آج نوجوان اور عام لوگ انکاؤنٹر والے مقامات کی طرف دوڑکر اپنے بھائیوں کو بچانے کے لیے اپنی جانیں جوکھم میں ڈالتے ہیں۔ حکومت ہند کشمیریوں پر آج تک یہ الزامات عائد کرتا تھا کہ یہاں جاری عوامی تحریک کی پاکستان درپردہ حمایت کرتا ہے لیکن آج جو صورتحال ہمارے سامنے ہے اس سے صاف ظاہر ہوتا ہے کہ ایسا کچھ بھی نہیں بلکہ کشمیر یوں کی تحریک آزادی کا کوئی بیرونی معاون نہیں ہے بلکہ یہ سب کشمیریوں کی اپنی شروع کی ہوئی تحریک ہے۔وادی میں جاری قتل و غارت کے سلسلے پر بولتے ہوئے میر واعظ نے بتایا کہ سیکورٹی ایجنسیوں نے جو اعداد و شمار جاری کئے ہیں اُس کے مطابق رواں سال کے جنوری مہینے سے اب تک فورسز نے 400کشمیریوں کو جاں بحق کردیا جن میں 160عسکریت پسند شامل ہیں اور جن میں 155مقامی نوجوان شامل ہیں۔ حریت کانفرنس کے غیر متعلق ہونے پر ایک سوال کے جواب میں حریت (ع) چیرمین نے بتایا کہ آج کے دور میں اگر چہ اس طرح کا شوشہ پھیلانے کی بے حد کوشش کی جارہی ہے تاہم اصل حقیقت تب واضح ہوجاتی ہے جب آپ کی نظریں زمینی حقائق پر ہوں۔ انہوں نے بتایا کہ آج کی تاریخ میں حریت کانفرنس کی قیادت اور کارکنان کو اپنے گھروں سے باہر آنے کی اجازت نہیں دی جاتی ہے۔ میر واعظ نے بتایا کہ ہمیں نہ ہی اپنے گھروں سے باہر آنے کی اجازت ہیں، نہ ہمیں میڈیا کانفرنس بلانے اور نہ ہی کسی مذہبی پروگرام میں شامل ہونے دیا جارہا ہے لہٰذا ایسے میں حریت پر بلاوجہ الزامات عائد کرنا کہ ہم غیر متعلق ہوچکے ہیں ، صحیح نہیں ہوگا۔

انہوں نے بتایا نئی دہلی آپ کے ساتھ بات کرنے کے لیے تیار نہیں ہے لہٰذا تالی ایک ہاتھ سے بج نہیں سکتی۔کشمیرنیوز سروس کے مطابق حریت (ع) چیرمین میر واعظ عمر فاروق نے بتایا کہ حریت کانفرنس 1993میں وجود میں لائی گئی تاکہ مسئلہ کشمیر کا حل سیاسی طور اور پرامن ذرائع سے نکالا جائے لیکن نئی دہلی نے ہمیشہ ظلم و جبر اور فوجی قوت کے ذریعے کشمیریوں کو دبانے کی کوششیں کیں لہٰذا ہم سمجھتے ہیں نئی دہلی ان جابرانہ پالیسیوں سے ہم ناکام ہوگئے۔ نئی دہلی نے آج کشمیری نوجوانوں کو پشت بہ دیوار کیا ہوا ہے ، انہیں ہتھیار اُٹھانے پرمجبور کیا جارہا ہے جو کہ کشمیری قوم کے لیے ایک عظیم نقصان ہے۔انہوں نے بتایا کہ یہ نئی دہلی پر منحصر ہے کہ وہ ریاست جموں وکشمیر میں حالات کو پٹری پر لانے کا موقعہ فراہم کریں۔نئی دہلی کو چاہیے کہ یہاں فوجی قوت کے ذریعے کشمیریوں کو دبانے کا سلسلہ بند کرے۔ آئے روز نوجوانوں کو گرفتار کیا جاتا ہے، انہیں بدنام زمانہ قوانین کے تحت جیلوں میں ٹھونسا جارہا ہے اوراب آئے روز نوجوانوں کو جاں بحق کیا جارہا ہے۔ لہٰذا اس طرح کی غیر یقینی صورتحال میں امن کا قیام کیسے ممکن ہوگا؟ انہوں نے بتایا کہ جب تک نہ حکومت ہند کشمیر میں فوجی بربریت پر باندباندھے گی اور یہاں کے نوجوانوں پر ظلم و جبر کا سلسلہ روک دے گی تب تک امن کی باتیں کرنا زمینی حقائق کو جھٹلانے کے مترادف ہوگا۔انہوں نے بتایا کہ نئی دہلی نے کشمیریوں کو سزا دینے کا ایک نیا سلسلہ شروع کیا ہوا ہے۔ فی الوقت نہ ہی قیادت کو گھروں سے باہر آنے کی اجازت دی جارہی ہے اور ہمارے کارکنان کو بے بنیاد کیسوں میں ملوث دکھا کر بیرون ریاست کی جیلوں میں منتقل کیا گیا ہے۔ عوام پر بھی مصائب کا پہاڑ توڑ ا جارہا ہے ، آئے روز آبادیوں کا محاصرہ کرکے نوجوانوں پر بلاجواز تشدد روارکھا جارہا ہے۔

ریاست میں جاری پتھر بازی کی درپردہ معاونت پر بات کرتے ہوئے حریت (ع) چیرمین نے بتایا کہ یہ صرف اورصرف نئی دہلی کا پروپگنڈہ ہے جو لوگوں کو گمراہ کرنے کے لیے کیا جارہا ہے۔ انہوں نے بتایا کہ نئی دہلی نے متعدد بار آج تک سنگ باری کو ختم کرانے کے دعوے کئے ہیں لیکن آج جو پتھر بازی ہورہی ہے وہ کیسے دوبارہ شروع ہوگئی۔ انہوں نے بتایا کہ جنوبی کشمیر کے حالات نئی دہلی کے سامنے عیاں ہے ، وہاں نہ حریت کانفرنس نوجوانوں کو سنگ بازی کے لیے روپے فراہم کررہے ہیں اور نہ ہی پاکستان یہاں آکرنوجوانوں کو پتھر بازی کے لیے پیسے فراہم کرتا ہے۔انہوں نے بتایا کہ نئی دہلی کو یہ بات سمجھنی چاہیے کہ کوئی بھی نوجوان اپنی آنکھیں یا جان 100یا 500روپے کے عوض جوکھم میں نہیں ڈال سکتا۔انہوں نے بتایا کہ کشمیری عوام کے اندر ایک جذبہ ہے اور وہ چاہتے ہیں کہ مسئلہ کشمیر کا حل تلاش کیا جائے لیکن نئی دہلی کشمیریوں کے جذبے کی قدر کرنے میں بری طرح سے ناکام ہوچکی ہے۔انہوں نے بتایا بدقسمتی سے جب ریاست میں حالات کشیدہ ہوجاتے ہیں تو نئی دہلی کو بات چیت کی یاد آجاتی ہے اور جب یہاں حالات پرامن ہوتے ہیں تو بھارت مسئلہ کو اپنے ذہن سے نکال لیتا ہے۔ کشمیرنیو زسروس کے مطابق میر واعظ نے بتایا کہ بندوق مسئلہ کشمیر کا حل نہیں ہے لیکن یہاں یہ بات بھی سمجھنے کی ضرورت ہے کہ ریاست میں بھارت کے لاکھوں بندوقیں راج کررہی ہے لہٰذابھارت کو اس حوالے سے کوئی ٹھوس قدم اُٹھانا چاہیے اور ہمیں اُمید ہے کہ اس کے مثبت نتائج برآمد ہوں گے۔ میر واعظ نے بتایا کہ پاکستان نے بار ہا مسئلہ کشمیر کے حل کے لیے پیش کش کی لیکن بھارت نے ہمیشہ ضد اور ہٹ دھرمی کی راہ اختیار کرتے ہوئے زمینی حالات سے نظریں چرائی ہیں۔میرواعظ نے بتایا کہ نئی دہلی نے گزشتہ دس برسوں سے حریت کانفرنس کی تمام سرگرمیوں پر قدغن عائد کی ہوئی ہے، ہمیں میڈیا کے ساتھ بات کرنے کی بھی اجازت نہیں دی جاتی ہے۔ ہم حکومت ہند سے مطالبہ کرتے ہیں کہ ہماری سیاسی زمین کو تنگ کرنے سے پرہیز کیا جائے اور ہمیں سیاسی اسپیس دے کر عوام کے پاس جانے کا موقعہ دیا جائے۔ ہمیں پرامن طریقے سے عوام کے درمیان اپنی بات رکھنے کا موقعہ دیا جائے۔

ایک سوال کے جواب میں میر واعظ نے بتایا کہ مسئلہ کشمیر اور انتخابات الگ الگ معاملے ہیں اور دونوں کو خلط ملط نہیں کیا جاسکتا۔انہوں نے بتایا کہ یہاں پر درجنوں مرتبہ اسمبلی کے لیے انتخابا ت ہوئے ، یہاں نیشنل کانفرنس اور پی ڈی پی نے الیکشن میں حصہ لیا ، لیکن مسئلہ کشمیر وہیں پر ہے جہاں پہلے تھا۔ انہوں نے بتایا کہ این سی اور پی ڈی پی والے جنہوں نے متعدد بار یہاں انتخابات میں حصہ لیا ، آج نئی دہلی انہیں پاکستانی ایجنٹ قرار دے رہی ہے۔ میرواعظ نے بتایا کہ ہمارا مطالبہ ہے کہ کشمیری عوام کو اپنے سیاسی مستقبل کا فیصلہ کرنے کا موقعہ دیا جائے اور یہاں ریفرنڈم کرایا جائے ، اس کے بعد ہی الیکشن کوئی معنی رکھتے ہیں۔ انہوں نے صاف کردیا کہ انتخابات ریفرنڈم کا متبادل نہیں ہوسکتے کیوں کہ آج تک ہندوستان نے یہاں 10مرتبہ الیکشن کروائے لیکن مسئلہ کشمیر ہنوز حل طلب ہے۔ ہم چاہتے ہیں کہ مسئلہ کشمیر کا حل اقوام متحدہ کی قرار دادوں کے عین مطابق تلاش کیا جائے یا پھر تینوں فریق مل بیٹھ کر اس کا ایک ایسا حل تلاش کریں جو کشمیریوں کے لیے قابل قبول ہو۔انہوں نے بتایا کہ انتخابات کے دوران اگر لوگوں نے کسی موقعے پر شرکت بھی کی ، ووٹ بھی ڈالے لیکن وہ صرف بنیادی ضروریات کے حصول کی خاطر تھا تاہم درجنوں الیکشن کرانے کے بعد بھی مسئلہ کشمیر کی پوزیشن جوں کی توں ہے۔