خبراردو:

یوم جمہوری کی آمد سے قبل جنگجوؤں نے اپنی کارروائیاں تیز کرتے ہوئے شہر سرینگر اور جنوبی ضلع شوپیان میں پولیس و فورسز اہلکاروں پر دو الگ الگ ہتھ گولے داغے جو زار دار دھماکوں کے ساتھ پھٹ گئے تاہم دھماکوں میں کسی جانی نقصان کی کوئی اطلاع نہیں ہے۔ ادھر شہر کے گھنٹہ گھر کے قریب گرنیڈ حملے میں 4دکانوں اور ایک آلٹو گاڑی کے شیشے چکنا چور ہوگئے۔ دونوں حملوں کے فوراً بعد فوج، پولیس، سی آر پی ایف اور دیگر سیکورٹی ایجنسیوں کے افسران نے جائے حادثات کا دورہ کرتے ہوئے یہاں حالات کا گہرائی سے جائزہ لیا۔

فورسز اہلکاروں نے گرنیڈ حملوں کے فوراً بعد شہر کے ریذیڈنسی روڑ، ایم اے روڑ، کوکر بازار، بنڈ، گونی کھن، مہارج بازار، بتہ مالو سمیت کئی علاقوں میں فورسز کی اضافی کمک طلب کرتے ہوئے ہائی الرٹ جاری کردیا۔ ادھر فورسز اہلکاروں نے حملہ آور جنگجوؤں کو ڈھونڈ نکالنے کے لیے شہر میں جگہ جگہ جامہ تلاشی کا سلسلہ تیز کردیا جبکہ حساس اور اہم تنصیبات کے ارد گرد سیکورٹی فورسز کو الرٹ کردیا گیا۔ادھر 26جنوری کے پیش نظر جنگجوؤں کی طرف سے ممکنہ حملوں کو مدنظر رکھتے ہوئے ریاستی پولیس نے محکمہ کے افسران اور اہلکاروں کو ہمہ وقت چوکس رہنے کی ہدایت کی ہے۔پولیس نے ایڈوائزری جاری کرتے ہوئے تعلیمی اداروں، عام لوگوں ، ڈیفینس کمیٹی ممبران، لمبرداروں اور چوکیداروں کو یوم جمہوریہ کی تقریب پرامن طور پر منعقد کرنے کے حوالے سے بھر پور تعاون کی اپیل کی ہے۔

یوم جمہوریہ کی آمد سے ایک ہفتہ قبل وادی کشمیر میں جنگجوؤں نے اپنی کارروائیاں تیز کرتے ہوئے جمعہ دوپہر کو سرینگر اور شوپیان میں پولیس و سی آر پی ایف کو نشانہ بناتے ہوئے دو الگ الگ گرنیڈ داغے جس کے نتیجے میں دونوں مقامات پر افرا تفری کا ماحول پیدا ہوا۔ تفصیلات کے مطابق نامعلوم جنگجوؤں نے جمعہ دوپہر 01:40پر گھنٹہ گھر کے قریب سی آر پی ایف کے موبائل بنکر کو نشانہ بناتے ہوئے ایک ہتھ گولہ داغا جو سڑک پر گر کر زور دار دھماکے کے ساتھ پھٹ گیا۔معلوم ہوا ہے کہ جمعہ کو جونہی لوگ نماز کی تیاریوں میں مصروف تھے تو اسی اثنا میں گھنٹہ گھر کے بالکل سامنے واقع سی آر پی ایف کے موبائل بنکر پر نامعلوم سمت سے جنگجوؤں نے گرنیڈ داغا جو زور دار دھماکے کے ساتھ پھٹ گیا۔ معلوم ہوا کہ دھماکہ اس قدر شدید تھا کہ آس پاس موجود گاڑیوں تجارتی ادارے لرز گئے اور یہاں موجود کئی دوکانات کے شیشے چکنا چور ہوئے۔ پولیس نے واقعے کی تفصیلات فراہم کرتے ہوئے بتایا کہ بعد دوپہر جنگجوؤں نے یہاں موجود سی آر پی ایف اہلکاروں پر گرنیڈ داغا جو سڑک پر زور دار دھماکے کے ساتھ پھٹ گیا تاہم دھماکے میں کسی بھی جانی نقصان کی کوئی اطلاع نہیں ہے۔ انہوں نے بتایا کہ گرنیڈ حملے میں یہاں چار دوکانات کے شیشے چکنا چور ہونے کے علاوہ ایک آلو گاڑی زیر نمبر JK01AH-0279کے معمولی نقصان ہوا۔

انہوں نے بتایا کہ حملے کے فوراً بعد فورسز افسران نے یہاں دورہ کرکے حالات کا جائزہ لیا جبکہ اس دوران حملہ آور جنگجوؤں کو ڈھونڈ نکالنے کی خاطر بڑے پیمانے پر تلاشی کارروائی شروع کی گئی۔ پولیس کے مطابق شہر سرینگر میں گزشتہ دنوں کے دوران ہوئے پے در پے گرنیڈ حملوں کے نتیجے میں ہائی الرٹ جاری کیا گیا ہے جبکہ اہم اور حساس تنصیبات کے ارد گرد سیکورٹی گرڈ کو مزید مضبوط کرنے کی فورسز کو ہدایت جاری کی گئی ہے۔ادھر گھنٹہ گھر کے قریب ہوئے حملے کے فوراً بعد یہاں یہاں موجود لوگوں نے اپنی سلامتی کویقینی بنانے کی غرض سے محفوظ مقامات کی راہ لی تاہم دوکانات اور دیگر تجارتی اداروں نے شٹر گرائے جس کے ساتھ یہاں افرا تفری کا ماحول پیدا ہوا۔ معلوم ہوا کہ گرنیڈ حملے کے فوراً بعد یہاں کچھ وقفے کے لیے ٹریفک کی نقل وحمل بند ہوگئی ۔

ادھر شہر کے ریذیڈنسی روڑ، ایم اے روڑ، پولو ویو، ڈلگیٹ، ریگل چوک، پرتاپ پارک، مہاراجہ بازار، گونی کھن، امیر کدل،کورٹ روڑ اور مضافاتی علاقوں میں فورسز نے اضافی نفری تعینات کرتے ہوئے حملہ آوروں کو ڈھونڈ نکالنے کی خاطر تلاشی راہ گیروں کی جامہ تلاشی لینے کے ساتھ ساتھ ان کے شناختی کارڈ چیک کئے تاہم آخری اطلاعات ملنے تک کسی بھی شخص کی گرفتاری کی کوئی اطلاع نہیں ہے۔ دریں اثنا سرینگر کے بعد نامعلوم جنگجوؤں نے جنوبی کشمیر کے پہاڑی ضلع شوپیان میں پولیس پوسٹ گاگرن کو نشانہ بناتے ہوئے ہتھ گولہ داغا جو زور دار دھماکے کے ساتھ پھٹ گیا۔ پولیس کے مطابق جمعہ دوپہر کو نامعلوم سمت سے جنگجوؤں نے پولیس پوسٹ گاگرن کو نشانہ بناتے ہوئے ایک ہتھ گولہ داغا جو زور دار دھماکے کے ساتھ پھٹ گیا تاہم واقعے میں کسی بھی جانی یا مالی نقصان کی کوئی اطلاع نہیں ہے۔ادھر معلوم ہوا ہے کہ جنگجوؤں کی طرف سے داغے گئے ہتھ گولے کے بعد یہاں افرا تفری کا ماحول پیدا ہوا جس دوران فوج، پولیس، سی آر پی ایف اور دیگر سیکورٹی ایجنسیوں کے اعلیٰ افسران نے گاگرن پولیس پوسٹ کا دورہ کرتے ہوئے زمینی صورتحال کا جائزہ لیا ۔ معلوم ہوا ہے کہ ادھر فورسز اہلکاروں نے حملہ آور جنگجوؤں کو ڈھونڈ نکالنے کی خاطر بڑے پیمانے پر تلاشی آپریشن شروع کردیا ہے۔ ذرائع نے بتایا کہ حملے کے فوراً بعد فورسز اہلکاروں نے گاگرن کی کئی بستیوں میں گھر گھر تلاشی کارروائی شروع کی تاہم اس دوران کسی بھی شخص کی گرفتاری عمل میں نہیں لائی گئی۔

ادھر حملے کے فوراً بعد جموں کشمیر اسلامک فرنٹ نامی عسکری جماعت کے ترجمان نے کشمیر نیوز سروس کو فون کرکے گھنٹہ گھر کے پاس ہوئے حملے کی ذمہ داری قبول کی تاہم دیگر میڈیائی ذرائع کے مطابق شوپیان حملے کی ذمہ داری جیش محمد نے قبول کی۔ جیش ترجمان نے دعویٰ کرتے ہوئے کہا کہ شوپیان حملے میں کئی فورسز اہلکار زخمی ہوئے۔خیال رہے 26جنوری کی تقریب نزدیک آنے کے ساتھ ہی وادی کشمیر میں جنگجو کارروائیوں میں اضافہ دیکھنے کو مل رہا ہے۔ادھر 17جنوری جمعرات کو نامعلوم جنگجوؤں نے شہر کے راجباغ زیروبرج کے نزدیک پولیس پوسٹ پر ہتھ گولہ داغا جس کے نتیجے میں اے ایس آئی سمیت پولیس کے 3اہلکاروں بری طرح زخمی ہوئے۔ اس سے قبل 11جنوری 2019جمعہ کی شام دیر گئے جنگجوؤں نے لعل چوک میں واقع پلیڈیم گلی پر قائم 132بٹالین کے سی آر پی ایف بنکر پر ایک ہتھ گولہ داغا تاہم اس میں کوئی جانی نقصان نہیں ہوا۔واضح رہے دونوں حملوں کی ذمہ داری جیش محمد نامی عسکری تنظیم نے قبول کی تھی۔

ادھر 26جنوری کے پیش نظر جنگجوؤں کی طرف سے ممکنہ حملوں کو مدنظر رکھتے ہوئے ریاستی پولیس نے محکمہ کے افسران اور اہلکاروں کو ہمہ وقت چوکس رہنے کی ہدایت کی ہے۔پولیس نے ایڈوائزری جاری کرتے ہوئے بتایا کہ جنگجوؤں کی طرف سے کسی بھی حملے کو ناکام بنانے کی خاطر محکمہ کے افسران اور اہلکار چوبیسوں گھنٹے الرٹ رہیں۔ پولیس نے جاری ایڈوائزری میں عوام سے ناکوں پر تلاشیوں کے دوران بھر پور تعاون کی اپیل کی ہے۔ایڈوائزری میں تعلیمی اداروں کو بھی واضح ہدایت دیتے ہوئے کہا گیا ہے کہ وہ کسی اجنبی شخص کو ادارے میں داخل نہ ہونے دیں اور اس حوالے سے طلبا کو خصوصی ہدایات دیں۔پولیس نے لوگوں سے اپیل کرتے ہوئے کہا ہے کہ وہ اجنبی اور لاوارث چیزوں کو ہاتھ نہ لگائیں اور کسی بھی مشکوک چیز یا شخص کو دیکھنے پر پولیس کو اطلاع فراہم کریں۔پولیس نے مسافر گاڑیوں میں سفر کرنے والوں سمیت جملہ لوگوں کو بازار،شاپنگ مالوں، ریلوے سٹیشنوں، بس اسٹینڈوں اور دیگر عوامی مقامات پر چوکسی برتنے کی ہدایت دی ہے۔پولیس نے تمام پولیس تھانوں کے سٹیشن ہاؤس افسران اورپوسٹ انچارجوں کو چوبیسوں گھنٹے ڈیوٹی پر حاضر رہنے کی ہدایت جاری کی ہے۔پولیس نے ولیج ڈیفینس کمیٹی ممبران، لمبرداروں، چوکیداروں کو بھی ہدایت کرتے ہوئے کہا ہے کہ وہ پولیس کے ساتھ تعاون کریں تاکہ آنے والے یوم جمہوریہ کے سلسلے میں لوگوں کی حفاظت یقینی بنائی جاسکے۔