اقوام متحدہ، بین الاقوامی ایٹمی توانائی ایجنسی (آئی اے ای اے) کے ڈائریکٹر جنرل رافیل گروسی نے کہا ہے کہ اگر انہیں اقوام متحدہ کا سکریٹری جنرل منتخب کیا جاتا ہے تو وہ آزادانہ طور پر کام کریں گے اور اقوام متحدہ کے چارٹر کے مطابق اپنی ذمہ داریاں نبھائیں گے۔

گروسی نے آر آئی اے نووستی کو خصوصی انٹرویو میں کہا، ’’میرے خیال میں اقوام متحدہ کے چارٹر کے مطابق کسی بھی بین الاقوامی تنظیم کے سربراہ کے لیے یہی سب سے اہم بات ہے۔ آزاد ہونا، اپنی الگ شناخت برقرار رکھنا اور اپنے مشن پر توجہ مرکوز رکھنا، خاص طور پر اقوام متحدہ کے چارٹر اور دنیا میں رونما ہونے والے واقعات کو مدنظر رکھتے ہوئے۔‘‘

گروسی نے کہا کہ آئی اے ای اے کے سربراہ کی حیثیت سے اپنے موجودہ کردار میں بھی وہ اسی اصول پر عمل کرتے ہیں اور ایجنسی کے ضوابط اور انہیں سونپی گئی ذمہ داریوں کے مطابق کام کرتے ہیں۔

آر آئی اے نووستی نے ایک ذریعے کے حوالے سے بتایا کہ اقوام متحدہ کی تجارت و ترقی کانفرنس کی سکریٹری جنرل رے بیکا گرین اسپین کو چوتھے غیر رسمی پول میں سب سے زیادہ حمایت ملی۔ اقوام متحدہ کے اس اعلیٰ عہدے کے لیے فی الحال سات امیدوار میدان میں ہیں۔ گرین اسپین اور گروسی کے علاوہ سینیگال کے سابق صدر مکی سال، ایکواڈور کی سابق وزیر خارجہ ماریا فرنانڈا اسپینوسا، ایکواڈور کی سفارت کار ایوون اے باکی، یوگنڈا کے سابق وزیر خارجہ اولارا اوتونو اور گیانا کی سابق وزیر خارجہ کیرولین روڈریگس برکٹ بھی امیدوار ہیں۔

موجودہ سکریٹری جنرل انتونیو گوتریس کی دوسری اور آخری مدت 31 دسمبر کو ختم ہوگی۔ اقوام متحدہ کے چارٹر کے مطابق سکریٹری جنرل کی تقرری جنرل اسمبلی، سلامتی کونسل کی سفارش پر کرتی ہے۔

یو این آئی۔ م س

جموں، جموں و کشمیر کے رام بن ضلع میں جمعہ کی صبح مغربی بنگال سے سیاحوں کو لے جارہی ایک بس حادثے کا شکار ہوگئی، جس میں کم از کم 37 مسافر زخمی ہوگئے، جبکہ ایک خاتون نے اسپتال میں دم توڑ دیا۔

پولیس کے مطابق مغربی بنگال نمبر کی یہ بس سری نگر سے جموں جارہی تھی کہ ماروگ کے قریب پہاڑی سے ٹکرا کر سڑک کنارے نالے میں جاگری۔ پولیس اہلکاروں، مقامی لوگوں اور نیم فوجی دستوں نے فوری طور پر امدادی کارروائی شروع کی اور زخمیوں کو ضلع اسپتال رام بن پہنچایا۔

پولیس نے بتایا کہ ایک زخمی خاتون کی علاج کے دوران موت ہوگئی، جبکہ چار شدید زخمی مسافروں کو بہتر علاج کے لیے گورنمنٹ میڈیکل کالج و اسپتال، جموں منتقل کیا گیا ہے۔ باقی زخمیوں کا ضلع اسپتال میں علاج جاری ہے۔

مرکزی وزیر ڈاکٹر جتیندر سنگھ نے کہا کہ انہوں نے حادثے کے بعد رام بن کے ڈپٹی کمشنر محمد الیاس خان سے بات کی ہے۔ انہوں نے بتایا کہ زخمیوں کو ہر ممکن مدد اور طبی سہولت فراہم کی جارہی ہے اور ان کا دفتر مقامی انتظامیہ کے مسلسل رابطے میں ہے۔

جمعہ کو ہی مغربی بنگال سے آنے والی ایک اور بس بھی رام بن میں حادثے کا شکار ہوئی تھی، جس میں 33 مسافر زخمی ہوئے تھے۔

یو این آئی۔ م س

نئی دہلی، کانگریس کے سابق صدر اور لوک سبھا میں اپوزیشن رہنما راہل گاندھی نے ’ستیہ گرہ‘ کے نام سے ایک نیا ڈیجیٹل پلیٹ فارم لانچ کیا ہے، جس کے ذریعے ملک بھر کے لوگ ناانصافی کے خلاف اپنی جدوجہد اور مسائل ان کے ساتھ شیئر کرسکیں گے۔

مسٹر گاندھی نے ہفتہ کو سوشل میڈیا پلیٹ فارم ’ایکس‘ پر کہا کہ ملک بھر میں لوگ اپنے حقوق کے لیے لڑ رہے ہیں اور اکثر اکیلے ہی جدوجہد کررہے ہیں۔ ’ستیہ گرہ‘ انہی آوازوں کو ایک نقشے پر یکجا کرنے کی ایک پہل ہے، تاکہ مقامی سطح پر جاری جدوجہد کو قومی پلیٹ فارم مل سکے۔

پارٹی نے ہفتہ کو یہ اطلاع دیتے ہوئے کہا کہ مسٹر گاندھی نے جمعہ کو گاندھی جینتی کے موقع پر اس سوشل میڈیا پلیٹ فارم کو لانچ کیا تھا۔

مسٹر گاندھی نے آج اس پلیٹ فارم کے بارے میں کہا، ’’ملک بھر میں لوگ ناانصافی کے خلاف آواز اٹھا رہے ہیں۔ اپوزیشن رہنما کی حیثیت سے آپ کی لڑائی میری لڑائی ہے۔ اب نئے ستیہ گرہ کا وقت ہے۔ آپ کن مسائل کے لیے جدوجہد کر رہے ہیں، مجھے بتائیے۔ میں آپ کی بات سن رہا ہوں۔‘‘

انہوں نے کہا کہ ملک کے مختلف حصوں میں زمین، خواتین کے حقوق، دلتوں اور دیگر پسماندہ طبقات کے حقوق، تعلیم اور امتحانات سمیت مختلف مسائل کو لے کر احتجاج ہورہے ہیں۔ ’ستیہ گرہ‘ کے ذریعے ان تحریکوں کو منظم کرنے اور انہیں ایک نقشے پر یکجا کرنے کی کوشش کی جائے گی۔

کانگریس رہنما نے کہا کہ اس پلیٹ فارم کے ذریعے شہری اپوزیشن رہنما کو بتاسکتے ہیں کہ وہ کون ہیں، ان کے لیے کیا اہم ہے اور ان کے حقوق کی راہ میں کون رکاوٹ بن رہا ہے۔ لوگوں کی جانب سے شیئر کیا گیا ہر مسئلہ ’ستیہ گرہ میپ‘ پر ایک پن کی شکل میں نظر آئے گا۔

مسٹرگاندھی نے کہا کہ مسئلے کی سنگینی اور ترجیح کی بنیاد پر ضروری اقدامات کیے جائیں گے، تاکہ لوگوں کی آواز سڑک سے لے کر پارلیمنٹ تک سنی جاسکے۔ انہوں نے کہا، ’’جہاں سچ کو دبایا جارہا ہے، وہاں لوگوں کو اس کی مخالفت کرنے میں مدد کرنا اپوزیشن رہنما کی حیثیت سے میری ذمہ داری ہے۔‘‘

’ستیہ گرہ‘ پلیٹ فارم پر لوگ اپنی جدوجہد کی کہانی شیئر کرسکتے ہیں۔مسٹر گاندھی نے کہا کہ وہ پارلیمنٹ، سڑک، خط لکھ کر یا جہاں بھی ان کی ضرورت ہوگی، لوگوں کے ساتھ کھڑے ہوکر مدد کرنے کی کوشش کریں گے۔

یو این آئی۔ م س