کابل، پاکستانی فضائی حملوں میں کم از کم چار افراد ہلاک ہو گئے، افغان طالبان حکومت کے ترجمان نے یہ اطلاع دیتے ہوئے کہا ہے کہ افغانستان ’’مناسب جواب‘‘ دے گا۔

پاکستان نے جمعرات کو کہا کہ اس نے افغانستان میں ڈرونز کو ذخیرہ کرنے اور انہیں لانچ کرنے کے لیے استعمال ہونے والے 10 مقامات پر فضائی حملے کیے، جن میں سے بعض ڈرونز پاکستان کے خلاف سرحد پار حملوں میں استعمال کیے گئے تھے۔

افغان طالبان حکومت کے ترجمان ذبیح اللہ مجاہد نے کہا کہ فضائی حملے قندھار، پکتیا اور خوست صوبوں میں کیے گئے۔

خبر رساں ادارے اے ایف پی کے مطابق قندھار شہر کے ایک رہائشی نے بتایا کہ جنوبی افغانستان کے شہر میں فضائی حملہ ہوا۔ رہائشی کے مطابق انہوں نے پہلے ایک جنگی طیارے کی آواز سنی، اس کے بعد ایک زور دار دھماکہ ہوا اور پھر قندھار شہر کے وسط میں آگ بھڑک اٹھی۔

پاکستان کے وزیر اطلاعات عطا اللہ تارڑ نے کہا کہ فضائی حملے ’’جان بوجھ کر، درست، متوازن اور متناسب‘‘ تھے اور انہیں صرف ان نشاندہی شدہ فوجی اہداف تک محدود رکھا گیا جو براہ راست پاکستان کے خلاف کیے جانے والے حملوں سے منسلک تھے۔

انہوں نے بدھ کو پاکستان میں ڈرونز کے ذریعے ہونے والی ’’جان بوجھ کر اور غیر قانونی دراندازی‘‘ کی مذمت کی۔

انہوں نے کہا، ’’یہ پاکستان کی خودمختاری اور علاقائی سالمیت کی کھلی خلاف ورزی ہے اور جارحیت کا ایک سنگین اور ناقابل قبول اقدام ہے۔‘‘

طالبان حکام نے اس بات کی تردید کی کہ ان کی حکومت نے بدھ کو پاکستان کے خلاف ڈرون حملے کیے تھے۔

جمعرات کے فضائی حملے ایسے وقت میں کیے گئے جب پاکستان میں مسلح گروہوں کے حملوں پر سابق اتحادی ممالک کے درمیان کشیدگی بڑھ رہی ہے۔ ان حملوں کے نتیجے میں فروری میں دونوں ممالک کے درمیان کئی برسوں کی بدترین لڑائی شروع ہوئی تھی۔

اسلام آباد کا الزام ہے کہ کابل ایسے جنگجوؤں کو پناہ دے رہا ہے جو سرحد پار حملے کرتے ہیں، تاہم افغان طالبان حکومت پاکستان مخالف مسلح گروہوں کو پناہ دینے کی تردید کرتی ہے اور اس کا کہنا ہے کہ یہ حملے پاکستان کا داخلی مسئلہ ہیں۔

گزشتہ ہفتے شمال مغربی پاکستان میں ایک پولیس مرکز پر حملے میں کم از کم 21 افراد کی ہلاکت کے بعد تقریباً تین ماہ کی نسبتاً کشیدہ خاموشی کے بعد دونوں ممالک کے درمیان دوبارہ لڑائی شروع ہو گئی ہے۔ تحریک طالبان پاکستان کے ایک دھڑے نے دھماکے اور اس کے بعد ہونے والی فائرنگ کی ذمہ داری قبول کی تھی۔

پیر کو شمال مشرقی افغانستان میں تین مقامات کو نشانہ بنا کر کیے گئے فضائی حملوں میں کنڑ صوبے کے نرگل ضلع میں تین شہری ہلاک ہوئے تھے، افغان حکام نے بتایا تھا۔ اسلام آباد نے کہا تھا کہ اس کارروائی میں 28 ’’دہشت گرد‘‘ مارے گئے۔

اس تازہ کشیدگی سے چین، ترکی، قطر اور سعودی عرب کی جانب سے دونوں ہمسایہ ممالک کے درمیان دیرپا امن کے لیے جاری ثالثی کی کوششوں کو بھی خطرہ لاحق ہو گیا ہے۔

فروری میں ہونے والی لڑائی کے بعد سے، جو کئی برسوں میں دونوں ممالک کے درمیان بدترین لڑائی تھی، سابق اتحادیوں کے تعلقات مسلسل کشیدہ ہیں۔

یو این آئی۔ ع ا۔

تہران، ایران نے خبردار کیا ہے کہ امریکہ یا اسرائیل کی جانب سے کسی بھی نئے حملے کی صورت میں جاری مشرق وسطیٰ کی جنگ بحر ہند تک پھیل سکتی ہے، جبکہ خلیج فارس اور بحیرہ احمر میں کشیدگی بدستور برقرار ہے۔

ایران کے سپریم لیڈر مجتبیٰ خامنہ ای کے سینئر فوجی مشیر میجر جنرل یحییٰ رحیم صفوی نے کہا ہے کہ ایرانی افواج نے مختلف ممکنہ حالات کے لیے تیاری کر رکھی ہے، جن میں ملک کی تنصیبات یا قومی مفادات پر مزید حملوں کا امکان بھی شامل ہے۔

ایران کی خبر رساں ایجنسی فارس کے مطابق صفوی نے کہا، ’’ہم نہیں جانتے کہ (امریکی صدر) ٹرمپ اور (اسرائیلی وزیر اعظم) نیتن یاہو کے ذہنوں میں کیا چل رہا ہے۔‘‘

انہوں نے کہا کہ ایرانی مسلح افواج بدترین حالات سمیت تمام ممکنہ صورت حال کے لیے ہر وقت تیار ہیں اور خبردار کیا کہ مزید کشیدگی سے جنگ کا جغرافیائی دائرہ نمایاں طور پر وسیع ہوسکتا ہے۔

انہوں نے کہا، ’’اب جبکہ جنگ خلیج اور آبنائے ہرمز سے بحیرہ احمر تک پھیل چکی ہے، یہ ممکن ہے کہ امریکہ کے ساتھ ممکنہ جنگ کے اگلے مرحلے میں یہ محاذ مزید وسیع ہوکر بحر ہند یا کسی اور علاقے تک پہنچ جائے۔‘‘

صفوی کا یہ انتباہ ایسے وقت سامنے آیا ہے جب تنازع پہلے ہی خلیج کے فوری جنگی محاذ سے آگے بڑھ چکا ہے اور بحیرہ احمر اور تزویراتی آبنائے باب المندب کے اطراف کشیدگی میں اضافہ ہوا ہے۔ باب المندب ایک اہم بحری راستہ ہے جو بحیرہ احمر کو خلیج عدن اور وسیع تر بحر ہند سے ملاتا ہے۔

یمن کے حوثی، جو سعودی عرب کی حمایت یافتہ حکومتی فورسز کے خلاف لڑ رہے ہیں، نے حالیہ دنوں میں یمن کے بحیرہ احمر کے ساحلی علاقوں کے بعض حصوں پر اپنا کنٹرول مزید مضبوط کیا ہے، جس سے اس تزویراتی آبی گزرگاہ کے اطراف دباؤ میں اضافہ ہوا ہے۔

اسلامی جمہوریہ ایران نے فروری کے آخر میں امریکہ اور اسرائیل کے حملوں کے بعد، جن سے مشرق وسطیٰ کی جنگ کے تازہ مرحلے کا آغاز ہوا، اپنی جنوبی ساحلی حدود کے قریب آبنائے ہرمز سے بحری آمدورفت بھی محدود کردی ہے۔

آبنائے ہرمز دنیا کی اہم ترین توانائی کی گزرگاہوں میں سے ایک ہے، جہاں سے عالمی تیل اور گیس کی بڑی مقدار گزرتی ہے۔ آبنائے میں کسی بھی طویل رکاوٹ سے بین الاقوامی توانائی کی منڈیوں اور بحری تجارت پر اثر پڑنے کا خدشہ ہے۔

صفوی کے بیان سے اشارہ ملتا ہے کہ اگر ایران کو ایک اور حملے کا سامنا کرنا پڑا تو تہران خلیج اور بحیرہ احمر سے باہر تنازع کو وسیع کرنے پر غور کرسکتا ہے، تاہم انہوں نے یہ نہیں بتایا کہ ایران کون سے فوجی اقدامات کرسکتا ہے یا بحر ہند میں کسی مخصوص ہدف کی نشاندہی کی۔

یہ انتباہ ایسے وقت سامنے آیا ہے جب امریکی صدر ڈونالڈ ٹرمپ نے اقوام متحدہ کی جنرل اسمبلی میں ایران کو ’’دہشت گردی کا سب سے بڑا سرپرست‘‘ قرار دیا۔ صدر نے اپنی تقریر کا بڑا حصہ اسلامی جمہوریہ ایران کے لیے مختص کرتے ہوئے کہا کہ ان کی انتظامیہ نے اس خطرے کا سامنا کیا ہے جس سے امریکہ اور بیرون ملک سابق رہنما نمٹنے میں ناکام رہے تھے۔

سالانہ عام بحث کے لیے جنرل اسمبلی ہال میں جمع عالمی رہنماؤں سے خطاب کرتے ہوئے ٹرمپ نے کہا کہ 51 برس سے ’’انتہا پسند ایرانی حکومت‘‘ پورے مشرق وسطیٰ اور اس سے باہر ’’قتل و غارت اور افراتفری‘‘ پھیلا رہی ہے۔

انہوں نے کہا، ’’میں ایران کو کبھی جوہری ہتھیار حاصل کرنے کی اجازت نہیں دوں گا۔‘‘

ٹرمپ نے کہا کہ ان کی انتظامیہ نے ایران کو اپنے جوہری پروگرام اور دہشت گردی کی حمایت ختم کرنے کے بدلے اقتصادی تعاون کی پیشکش کی تھی، تاہم تہران نے یہ تجویز مسترد کردی۔

یو این آئی۔ ع ا۔

تہران، ایران کی سپریم نیشنل سیکورٹی کونسل کے سکریٹری محسن رضائی نے کہا ہے کہ جب تک تہران کی شرائط پوری نہیں ہو جاتی، ایران امریکہ کے ساتھ کوئی بات چیت نہیں کرے گا۔

قبل ازیں ایران کی وزارت خارجہ نے کہا تھا کہ ملک کے نمائندوں نے اقوام متحدہ کی جنرل اسمبلی کے دوران قطر کے راستے امریکی فریق سے رابطہ کیا تھا۔ ایران نے آبنائے ہرمز سے متعلق اپنی شرائط امریکہ کے سامنے پیش کیں۔ ان شرائط میں تمام محاذوں پر دشمنی کا خاتمہ، امریکی جارحیت کو روکنا، بحری ناکہ بندی اور اقتصادی جنگ، اور منجمد ایرانی اثاثوں کی رہائی شامل تھی۔

مسٹر رضائی نے بدھ کے روز ایرانی ٹیلی ویژن پر نشر ہونے والے ایک بیان میں کہا، “جب تک ایران کی شرائط پوری نہیں ہو جاتی، آبنائے ہرمز کو دوبارہ نہیں کھولا جائے گا اور نہ ہی کوئی بات چیت ہوگی۔”

انہوں نے کہا کہ ایران نہ تو جون میں اسلام آباد کی دونوں ممالک کے درمیان مفاہمت کی یادداشت کے ذریعے قائم کی گئی صورت حال پر واپس آئے گا اور نہ ہی اس سے پہلے کی صورتحال کی طرف۔ مسٹر رضائی نے کہا کہ ایران مذاکرات میں جلدی نہیں کرے گا کیونکہ امریکہ کو ایران کا اعتماد حاصل کرنا ہوگا۔

اس سے قبل ایران کی سلامتی کونسل کے سیکریٹری نے کہا تھا کہ ایران نے آبنائے ہرمز کو دوبارہ کھولنے کے لیے امریکا کے سامنے سات شرائط رکھی تھیں۔

قابل ذکر ہے کہ 28 فروری کو امریکا اور اسرائیل نے ایران میں اہداف پر حملے کیے تھے جس کے بعد ایران نے جوابی حملہ کیا تھا۔ جون کے وسط میں، دونوں ممالک نے دشمنی ختم کرنے کے لیے مفاہمت کی ایک یادداشت پر دستخط کیے، لیکن جلد ہی لڑائی دوبارہ شروع ہو گئی۔ یہ تنازع ابھی تک حل طلب ہے۔

کشیدگی میں اضافے نے آبنائے ہرمز کے ذریعے جہاز رانی کو عملی طور پر روک دیا ہے، جس سے تیل، پیٹرولیم مصنوعات اور مائع قدرتی گیس کی سپلائی متاثر ہوئی ہے اور دنیا بھر میں ایندھن کی قیمتوں میں اضافہ ہوا ہے۔

یو این آئی۔ ع ا۔