خبراردو:

26جنوری کی تقریب سے چند گھنٹے قبل سرینگر کے مضافاتی علاقے کھنموہ میں فوج اور جنگجوؤں کے درمیان علی الصبح ہوئی خونین معرکہ آرائی میں جیش محمد سے وابستہ 2جنگجو جاں بحق ہوئے جن کی تحویل سے فورسز نے دو AK-47 رائفلوں کے علاوہ دیگر گولہ بارودبھی ضبط کیا۔ادھر معلوم ہوا ہے کہ طرفین کی شدید گولہ باری کے نتیجے میں فوج، سی آر پی ایف اور ایس او جی کے 7اہلکار بھی گولیاں لگنے سے زخمی ہوئے ۔اس دوران مقامی بستیوں سے نوجوانوں کی مختلف ٹولیوں نے فورسز کارروائی میں رخنہ ڈالنے کی خاطر احتجاجی مظاہرے کئے تاہم مظاہرین کو منتشر کرنے کے لیے فورسز اہلکاروں نے آنسو گیس کے گولوں کے علاوہ پیلٹ فائرنگ کا بھی استعمال کیا۔ پولیس نے اس سلسلے میں کیس رجسٹر کرتے ہوئے مزید تحقیقات شروع کی ہیں۔ ادھر پولیس نے بتایا کہ جھڑپ میں مارے گئے جنگجوؤں کا مقصد 26جنوری کی تقریبات میں خلل ڈالنا تھا اسی لیے انہوں نے سرینگر تک اپنی رسائی ممکن بنائی تھی۔

شہر سرینگر کے مضافاتی علاقے کھنموہ میں 26جنوری کی تقریب منعقد ہونے سے چند گھنٹے قبل فوج اور جنگجوؤں کے درمیان خونین معرکہ آرائی ہوئی جس دوران طرفین کی گولہ باری سے پورا علاقہ لرز اُٹھا۔ معلوم ہوا ہے کہ فوج، سی آر پی ایف اور پولیس سے وابستہ اسپیشل آپریشن گورپ کی بھاری جمعیت نے جنگجوؤں سے متعلق اطلاع موصول ہونے کے بعد کھنموہ کے سرہندی کالونی کا صبح 3بجے ہی کڑا محاصرہ عمل میں لایا جس دوران فورسز اہلکاروں نے پورے علاقے کا محاصرہ عمل میں لاتے ہوئے یہاں چپے چپے پر چاک و چوبند فورسز اہلکاروں کی تعیناتی عمل میں لائی۔ معلوم ہوا ہے کہ فورسز اہلکاروں نے علاقے کی طرف آنے اور جانے والی تمام گلی کوچوں پرکڑے پہرے بٹھاتے ہوئے لوگوں کی نقل و حرکت ناممکن بنانے کی ہر ممکن کوشش کی۔ اسی دوران جونہی فورسز اہلکاروں نے سرہندی کالونی کھنمو میں داخل ہوکر یہاں تلاشی کی غرض سے فاروق احمد گوجری نامی شخص کے رہائشی مکان کی جانب پیش قدمی شروع کی تو یہاں یہاں چھپے بیٹھے جنگجوؤں نے تلاشی پارٹی پر اندھا دھند فائرنگ شروع کی جس کے بعد فورسز اہلکاروں نے مورچہ سنبھالتے ہوئے جوابی کارروائی کا باضاباطہ آغاز کیا ۔ مقامی لوگوں کا کہنا تھا کہ قریباً صبح 4بجے علاقے میں گولیوں کی آواز سنی گئی تاہم اندھیرا ہونے کے باعث لوگوں کو اصل حقائق معلوم نہیں چل پائے۔ انہوں نے بتایا کہ اسی دوران یہاں طرفین کے درمیان گولیوں کا شدید تبادلہ ہوا جس دوران علاقہ گولیوں کی گن گرج سے دہل اُٹھا جبکہ آبادی بھی گھروں میں سہم کر رہ گئی۔لوگوں کا کہنا تھا کہ اسی دوران فورسز نے یک منزہ مکان میں آگ لگادی جس کے بعد یہاں ہر طرف دھواں نظر آنے لگا۔

ادھر پولیس نے جھڑپ سے متعلق تفصیلات فراہم کرتے ہوئے بتایا کہ سنیچر کی علی الصبح فوج، سی آر پی ایف اور ایس او جی کی مشترکہ پارٹی نے سرہندی کالونی کھنموہ کا مصدقہ اطلاع ملنے کے بعدکڑا محاصرہ عمل میں لاتے ہوئے یہاں چھپے بیٹھے جنگجوؤں کی تلاش کے لیے بڑے پیمانے پر آپریشن شروع کیا۔ انہوں نے بتایا کہ جونہی تلاشی پارٹی مشتبہ مکان کے نزدیک پہنچی تو مکان کے اندر چھپے بیٹھے جنگجوؤں نے فورسز اہلکاروں پر شدید فائرنگ کا سلسلہ شروع کیا جس کا فورسز اہلکاروں نے بھی معقول جواب دیا۔ پولیس نے بتایا کہ اسی اثنا میں طرفین کے گولی بھاری سے یہاں جھڑپ شروع ہوئی ۔پولیس کا کہنا تھا کہ دوران جھڑپ فورسز کارروائی کے نتیجے میں جیس محمد سے وابستہ 2عدم جنگجو جاں بحق ہوئے جن میں ایک غیر ملکی بتایا جاتا ہے۔پولیس نے مارے گئے جنگجوؤں میں سے ایک کی شناخت محمد شفیع ڈار ساکن آری ہل پلوامہ کے بطور کی تاہم دوسرا جنگجو غیرپولیس کے مطابق غیر ملکی بتایا جارہا ہے جن کی تحویل سے 2اے کے سنتالین رائفلیں اور دیگر قسم کا گولہ بارود ضبط کیاگیاہے۔انہوں نے بتایا کہ مارئے گئے جنگجوؤں کا منصوبہ 26جنوری کی تقریبات میں خلل ڈالنا تھا جس کے لیے انہوں نے سرینگر تک رسائی حاصل کی تھی۔ پولیس نے بتایا کہ جنگجوؤں کی ہمیشہ سے روایت رہی ہے کہ وہ 26جنوری کی تقریبات کے دوران عام لوگوں کے قلب و ذہن میں خوف و ڈر کا ماحول پیدا کرکے اپنی کاررائیاں کریں ۔

انہوں نے بتایا کہ پولیس نے بروقت کارروائی کرتے ہوئے مارے گئے جنگجوؤں کو ناکام بنادیا۔انہوں نے بتایا کہ پولیس نے اس حوالے سے ایک کیس درج کرتے ہوئے مزید تحقیقات کا آغاز شروع کردیا ہے۔ادھر معلوم ہوا ہے کہ طرفین کی شدید فائرنگ کے نیتجے میں 7فورسز اہلکار بھی زخمی ہوئے ہیں جنہیں فوری علاج و معالجہ کی خاطر مختلف ہسپتالوں کو منتقل کردیا گیا ۔ معلوم ہو اکہ جنگجوؤں کی فائرنگ سے فوج کے 2، سی آر پی ایف کے 2اور پولیس اور ایس او جی کے 3اہلکار گولیاں لگنے سے زخمی ہوئے ہیں۔ادھر پولیس نے جائے جھڑپ پر عام شہریوں کی ہلاکت سے بچنے کے لئے عوام کے نام ایڈوائزری جاری کرتے ہوئے لوگوں سے اپیل کی کہ وہ جائے جھڑپ کی جانب پیش قدمی نہ کریں۔ پولیس کا کہنا تھا کہ جب تک جائے جھڑپ کو گولہ بارود جیسے مواد سے پاک و صاف نہیں کیا جاتا ہے تب تک عوام یہاں آنے سے گریز کرے۔

اس حوالے سے پولیس نے امن وقانون کی صورتحال کو برقرار رکھنے کے لیے عوام سے تعاون طلب کیا ہے۔ادھر مقامی لوگوں نے بتایا کہ آپریشن کے دوران فورسز نے یک منزلہ مکان کو آگ لگادی جس کے کچھ وقفے بعد ہی آپریشن کو ختم کیا گیا۔ انہوں نے بتایا کہ مکان میں آگ نمودار ہونے کے بعد یہاں فائر اینڈ ایمرجنسی کی ٹیم وارد ہوئی جنہوں نے مکان میں لگی آگ کو بجھانے کی کوشش کی۔ مقامی لوگوں کا کہنا کہ آگ بجھانے پر مامور عملے نے یہاں مکان کے ایک کمرے سے موٹر سائیل بھی برآمد کی جو جنگجوؤں کی بتائی جارہی ہے۔ ادھر جھڑپ شروع ہونے کے بعد ہی جونہی آس پاس کے علاقوں میں اس کی خبر پھیل گئی تو یہاں نوجوانوں کی مختلف ٹولیوں نے سڑکوں پر آگر فورسز کارروائی کے خلاف جم کر نعرے بازی کی۔ معلوم ہوا ہے کہ احتجاج کررہے نوجوانوں نے جائے جھڑپ کی جانب پیش قدمی کرنے کی کوشش کی تاہم یہاں موجود فورسز اہلکاروں نے ان کی یہ کوشش ناکام بناتے ہوئے مظاہرین پر کئی آنسو گیس کے گولے داغنے کے ساتھ ساتھ پیلٹ فائرنگ کی۔ ادھر انتظامیہ نے 26جنوری کے پیش نظر اور علاقے میں جھڑپ شروع ہونے کے ساتھ ہی علاقے میں موبائل انٹرنیٹ سروس کو بھی معطل رہی.