خبراردو:
وادی کشمیر میں آپریشن آل آؤٹ کو جاری رکھتے ہوئے فوج، پولیس اور سی آر پی ایف نے وسطی ضلع بڈگام کے ہاپت نار علاقے کو علی الصبح مصدقہ اطلاع موصول ہونے کے بعد محاصرے میں لیا جس کے بعد یہاں چھپے بیٹھے جنگجوؤں نے فورسز اہلکاروں پر جدید ہتھیاروں سے فائرنگ کی تاہم آخری اطلاعات موصول ہونے تک کسی بھی جانی نقصان کی کوئی اطلاع نہیں ہے۔ ڈی آئی جی وسطی کشمیر وی کے بھردی کا کہنا تھا کہ علاقے پہاڑی ہونے اور یہاں بھاری برف جمع ہونے کے نتیجے میں جنگجوؤں کی ہلاکتوں سے متعلق کچھ بھی کہا نہیں جاسکتا۔ ادھر جھڑپ شروع ہوتے ہی انتظامیہ نے ضلع بڈگام میں امن و قانون کی صورتحال کو برقرار رکھنے کے لیے موبائل انٹرنیٹ سروس کو معطل کردیا۔ادھر پلوامہ میں جھڑپ میں مقامی نوجوانوں کی ہلاکت کی خبر پھیلتے ہی یہاں نوجوانوں کی مختلف ٹولیوں نے سڑکوں پر نکل کر فورسز کارروائی کے خلاف احتجاج کیا جس کے بعد پولیس و فورسز نے احتجاجی مظاہرین کو منشتر کرنے کے لیے درجنوں آنسو گیس کے گولے داغے۔

فوج، پولیس اور سی آر پی ایف نے آپریشن آل آؤٹ کو جاری رکھتے ہوئے سوموار کی علی الصبح وسطی ضلع بڈگام کے ہاپت نار علاقے کو محاصرے میں لیتے ہوئے یہاں موجود جنگجوؤں کے خلاف کارروائی کا باضابطہ آغاز کیا۔ تفصیلات کے مطابق سوموار صبح کو فوج کی 53آر آر، ایس او جی اور سی آر پی ایف کی بھاری نفری نے جنگجوؤں سے متعلق مصدقہ اطلاع موصول ہونے کے بعد زنپاچال ہاپت نار نامی علاقے کا سخت محاصرے عمل میں لاتے ہوئے یہاں جگہ جگہ فورسز اہلکاروں کو رتعینات کردیا۔ معلوم ہوا ہے کہ فورسز اہلکاروں نے جنگجوؤں کی نقل و حمل کو محدود کرنے اور فرار کے ممکنہ راستوں پر فورسز اہلکاروں اور موبائل بنکروں کی تعیناتی یقینی بناتے ہوئے جنگجوؤں کو ڈھونڈ نکالنے کی خاطر بڑے پیمانے پر تلاشی آپریشن کا آغاز کیا۔معلوم ہوا ہے کہ فورسز کی تلاشی پارٹی نے جونہی مشتبہ مقام کی جانب پیش قدمی شروع کی تو یہاں موجود 2سے 3جنگجوؤں نے تلاشی پارٹی پر خودکار ہتھیاروں سے شدید فائرنگ کرتے ہوئے یہاں سے فرار ہونے کے کوشش کی تاہم فورسز اہلکاروں نے جنگجوؤں کی اس کوشش کو ناکام بناتے ہوئے علاقے کے ارد گرد کڑ امحاصرہ عمل میں لایا۔ ادھر معلوم ہوا ہے کہ سوموار کی سہ پہر کو طرفین کے درمیان گولیوں کا تبادلہ تھم گیا جس دوران پہاڑی علاقے میں موجود جنگجوؤں کی کمین گاہ کو فورسز نے بارودی مواد سے زمین بوس کردیا۔

پولیس ذرائع نے تصدیق کرتے ہوئے بتایا کہ سوموار کو جاری آپریشن میں طرفین کی گولہ باری سہ پہر کو بند ہوئی جس دوران فورسز اہلکاروں نے پہاڑی علاقے میں موجود جنگجوؤں کی کمین گاہ کو تباہ کردیا۔ انہوں نے بتایا کہ فورسز اہلکاروں نے تلاشی آپریشن کے دوران جنگجوؤں کی ایک کمین گاہ کا پتہ لگایا جسے بعد میں بارود مواد سے زمین بوس کردیا گیا۔انہوں نے بتایا کہ فورسز اہلکار پہاڑی علاقے میں ہنوزجنگجوؤں کی تلاش کے لیے موجود ہے جس دوران وہ تلاشی کارروائی کو جاری رکھے ہوئے ہیں۔اس دوران پولیس کے ڈی آئی جی برائے وسطی کشمیروی کے بھردی نے جھڑپ سے متعلق تفصیلات فراہم کرتے ہوئے کہا کہ ہاپت نار علاقے میں ہوئی جھڑپ سے متعلق ابھی کچھ بھی کہنا قبل از وقت ہوگا۔ انہوں نے بتایا کہ اگر چہ طرفین کے درمیان فائرنگ کا سلسلہ رک گیا ہے تاہم علاقے میں بھاری برف موجود ہونے اور پہاڑی راستے کو مدنظر رکھتے ہوئے کچھ بھی کہا نہیں جاسکتا۔انہوں نے بتایا کہ علاقے میں برف کی موٹی تہہ جمع ہونے کے بعد فورسز اہلکاروں کو آگے بڑھنے میں دشواریوں کا سامنا کرنا پڑرہا ہے اور جھڑپ سے متعلق پوری تصویر پر تبصرہ کرنا قبل از وقت کہلائے گا۔انہوں نے بتایا کہ جنگجوؤں کی ہلاکت سے متعلق ابھی کچھ نہیں کہا جاسکتا تاہم فورسز اہلکاروں علاقے میں تلاشی آپریشن کو جاری رکھے ہوئے ہیں۔ تاہم اطلاعات کے مطابق جھڑپ میں ابھی تک ایک جنگجو جاںبحق ہوا ہے . جس کی لاش کو لینے کے لئے جب فورسز کی پارٹی کمین گاہ کی طرف بڑھی تو جنگجوئوں نے فورسز پر فائرنگ کر دی .

ادھر علاقے میں جھڑپ شروع ہوتے ہی علی الصبح انتظامیہ نے ضلع بھر میں موبائل انٹرنیٹ سہولیات کو معطل کرنے کا فیصلہ کیا۔ معلوم ہوا ہے کہ ضلعی انتظامیہ نے کسی بھی امکانی گڑ بڑ سے نمٹنے اور امن و قانون کی صورتحال کو برقرار رکھنے کے لیے ضلع بھر کے حدود میں اگلے احکامات تک موبائل انٹرنیٹ سروس کو معطل رکھنے کا فیصلہ لیا۔ ادھر پلوامہ کے راجپورہ، مورن اور کاکہ پورہ علاقوں میں سوموار کی دو پہر کو اُس وقت پرتشدد احتجاج بھڑک اُٹھا جب یہاں یہ خبر پھیل گئی کہ وسطی ضلع بڈگام کے ہاپت نار علاقے میں ہوئی جھڑپ کے دوران پلوامہ سے تعلق رکھنے والے 2مقامی نوجوان جاں بحق ہوگئے ہیں۔ معلوم ہوا کہ پلوامہ کے راجپورہ ، مورن اور کاکہ پورہ میں نوجوانوں کی مختلف ٹولیوں نے سڑکوں پر نکل کر فورسز کارروائی کے خلاف سخت احتجاج کیا۔ مظاہرین نے اسلام، آزادی اور جنگجوؤں کے حق میں زور دار نعرے لگاتے ہوئے یہاں موجود فورسز اہلکاروں پر سنگ باری کی جس کے نتیجے میں یہاں افرا تفری کا ماحول پیدا ہوا۔عینی شاہدین کے مطابق ضلع میں جونہی نوجوانوں کی ہلاکت سے متعلق خبر پھیل گئی تو یہاں مکمل ہڑتال کی گئی جس دوران دوکانات اور تجارتی اداروں نے اپنے دوکانات کے شٹر گراکر گھروں کی راہ لی۔ انہوں نے بتایا کہ ہڑتال کی وجہ سے سڑکوں پر گاڑیوں کی آمدورفت پر بھی اثر پڑا ۔ اس دوران فورسز نے احتجاج کررہے نوجوانوں کو منتشر کرنے کے لیے آنسو گیس کے درجنوں گولے داغے جبکہ مظاہرین نے بھی چہار سو فورسز پر کچھ دیر کے لیے پتھراؤ کو جاری رکھا تاہم شام دیر گئے حالات معمول پر آگئے۔