ہندوستان میں مسلمان سخت آزمائش کے دور سے گزر رہے ہیں،تعلیم کے بغیر ترقی ممکن نہیں: بدرالدین اجمل

Published

4 years ago

December 11, 2022

ممبئی ،11دسمبر(یواین آئی) مشہور اور آسام سے آل انڈیایونائٹیڈ ڈیموکریٹک فرنٹ ( اے یوڈی ایف)کے صدر اور ایم پی بدرالدین اجمل نے ایسوسی ایشن آف مسلم پروفیشنل (اے ایم ایف) کی تشکیل کے پندرہ سال مکمل ہونے پر جنوبی ممبئی کے اسلام جمخانہ میں تعلیم پر منعقدہ اجلاس سے خطاب کرتے ہوئے کہاکہ ہندوستان میں مسلمان سخت آزمائش کے دور سے گزر رہے ہیں اور وطن‌کی حالت انتہائی تشویشناک ہےاورموجودہ حالات کو بیان کیا جائےتوانسان ہی نہیں بلکہ فرشتے میں جذباتی ہوجائیں گے۔
انہوں نے مزیدکہا کہ فی الحال ملک میں اقلیتی فرقے کی حالت سب سے زیادہ خستہ ہے،اس پُر آشوب دور میں ہر قدم کو پُھونک کر اٹھانا پڑرہا ہے، بلکہ مسلمان سخت آزمائش کے دور سے گزر رہے ہیں۔ان کا جسم چھلنی چھلنی ہوچکاہے اور اس کا پتہ لگا نا مشکل ہے کہ کہاں کتنی گہری چوٹ لگی ہے۔
بدرالدین اجمل نے انتہائی جذباتی انداز میں اظہار خیال کرتے ہوئے کہاکہ مسلمانوں پر آزمائش کا ایسا دور ہے کہ اس بارے میں پیشن گوئیاں حضور صلی اللّٰہ علیہ وآلہ وسلم نے 1400 سال قبل ہی کردی تھی۔ملک جس سمت میں جارہا ہے ،اس کا سبھی کو علم ہے ۔
انہوں نے کہاکہ ہمیں اس بات کا اعتراف کرنا ہوگا کہ ہم ترقی کے اس دور میں برادران وطن سے بہت پیچھے ہیں۔تعلیمی میدان میں پچھڑ جا نے کی وجہ سے ہم بہت پیچھے رہ گئے اور وقت کافی تیزی سے آگے بڑھ رہا ہے اور ہمیں اگر بہتر مستقبل کے بارے میں کچھ کرنا ہے تو بس علم کے زیور سے خود کو آراستہ کرنے کے لیے ہمیں جدوجہد کرناہوگااور اس رسی کو مضبوطی سے پکڑ لینا چاہئیے ۔
اجمل نے کہاکہ ہماری کچی بستیوں اور جھوپڑپٹیوں کی حالت بہت خراب ہے اور ہمارے نوجوان منشیات کے عادی ہوتے جارہے ہیں اور بے راہ راوی کے شکار ہوچکے ہیں اورحیرت انگیز طورسے اس طرف کوئی توجہ نہیں دی جارہی ہے۔مسلمان پہلے آسمان اور ستاروں کی باتیں کرتے تھے،لیکن آج برے دور سے گزر ہیں ،ہماری پسماندہ بستیوں میں تعلیم نام کی کوئی چیز نہیں ہے۔بہتر مستقبل کے لیے ہمیں ایک جامع وٹھوس منصوبہ سازی کرنا ہوگا ۔
ابتداء میں ایسوسی ایشن کے صدر عامر ادریسی نے پندرہ سال کی تفصیلات پیش کرتے ہوئے کہاکہ شروعات میں ہی نامور اور اہم شخصیات نے بڑھ چڑھ کر حصہ لیا اور ان پندرہ سال میں اے ایم پی نے بہتر پوزیشن حاصل کی ہے اور اس درمیان یہ احساس ہوا کہ ملک میں مسلمان تعلیم کی دوڑ میں شامل ہوگئے ہیں اور جلد ہی بہتر نتائج سامنے آئیں گے ۔
شاہین گروپس آف انسٹی ٹیوٹس بیدر کرناٹک کے چیئرمین عبدالقدیر نے واضح طور سے کہاکہ مسلمانوں کو موجودہ حالات میں جامع وٹھوس منصوبے کو اختیار کرنے کی کوشش کرنا چاہیئے ،غیرضروری اورخرافات سے بھری رسموں کو ختم کردیناہوگا،شادی بیاہ کے اخراجات کو کم کرنے سادگی سے ان کی ادائیگی کرنا چاہیئے جوکہ ان کے لیے بہتر مستقبل کی تعمیر کے لیے سودمند ثابت ہوگی ۔
اس موقع پر جودھپور مولانا آزاد یونیورسٹی کے عتیق احمد نے بھی یونیورسٹی کی تعلیمی ،سماجی اور ثقافتی کاردگی کو پیش کرتے ہوئے کہاکہ اگر آپ کے پیش مشن ہے تو کسی بھی طرح کی رکاوٹ پیش نہیں آتی ہے۔
انہوں نے کہا کہ نیک نیتی سے تعلیمی ادارے کی شروعات کی گئی تھی اور آج وہ تناور درخت بن گیا ہے ،انہوں نے کہاکہ ادارہ بلامذہب وملت سبھی کو ترجیح دیتا ہے اور اس میں تمام لوگوں کا تعاون حاصل رہا ہے ۔اس موقع پر مطلع کیا گیا کہ دہلی دربار کے روح رواں مرحوم جعفر بھائی نے مولانا آزاد یونیورسٹی جودھپور کے لیے کروڑوں روپے کا چندہ ممبئی شہر سے کروایا تھا ۔
اسلام۔جمخانہ کے صدر اورسابق ایم ایل اے ایڈوکیٹ یوسف ابراہانی نے بی خطاب کرتے ہوئے کہاکہ ہمیں معاشرے کے دوسرے شعبوں پر بھی توجہ دینا چاہئیے،ائمہ۔مساجد،موذن حضرات اور خدام کی تنخواہوں کی۔طرف بھی توجہ دینا چاہئیے تاکہ وہ بیہ بہتر زندگی گزاریں۔
پروفیسر قاسم امام نے اپنے انداز میں مہمانوں اور حاضرین میں موجود اہم۔شخصیات کا تعارف پیش کیا جبکہ سعید خان نے نظامت کی اور وقفہ وقفہ سے ملک بھر سے آئے بہترین کارکردگی پیش کرنے والے اداروں کے نمائندوں اور طلبہ وطالبات کا تعارف پیش کیا، حیدرآباد، دہلی ،بھوپال،کرناٹک ،تمل۔ناڈو، کیرالا، اترپردیش، راجستھان اور آسام کے بچے بھی شریک۔ہوئے۔

جموں و کشمیر

جموں و کشمیر اسمبلی کو پاکستان کے ایجنڈے کا پلیٹ فارم نہیں بننے دیں گے: سنیل شرما

Published

2 hours ago

September 28, 2026

Online Desk

سری نگر، جموں و کشمیر اسمبلی کی جانب سے ریاستی حیثیت کی بحالی کے مطالبے سے متعلق قرارداد منظور کیے جانے کے چند گھنٹے بعد اپوزیشن لیڈر سنیل شرما نے پیر کو کہا کہ بی جے پی اسمبلی کو ان کے بقول پاکستان کے ایجنڈے کے لیے پلیٹ فارم نہیں بننے دے گی۔

سینئر بی جے پی لیڈر نے کہا کہ پارٹی جموں و کشمیر کی ریاستی حیثیت بحال کرنے کی حمایت کرتی ہے، لیکن اسمبلی سے منظور قرارداد میں دفعہ 370، دفعہ 35 اے اور 1953 سے قبل کی آئینی پوزیشن کے حوالوں کی سخت مخالفت کرتی ہے۔

جموں و کشمیر اسمبلی نے پیر کو بی جے پی ارکان کے احتجاج کے درمیان ریاستی حیثیت کی بحالی کے لیے قرارداد منظور کی۔

ریاستی حیثیت کی بحالی سے متعلق قرارداد منظور ہونے کے بعد پریس کانفرنس سے خطاب کرتے ہوئے اپوزیشن لیڈر شرما نے کہا کہ اگر قرارداد صرف ریاستی حیثیت کی بحالی کے مطالبے تک محدود رہتی تو بی جے پی اس کا خیرمقدم کرتی۔

انہوں نے کہاکہ ’’بی جے پی محض مخالفت برائے مخالفت نہیں کرتی۔ ہم ریاستی حیثیت کی بحالی کے حق میں ہیں۔ اگر قرارداد صرف ریاستی حیثیت کے نام پر پیش کی جاتی تو ہم اس کا خیرمقدم کرتے۔‘‘

شرما نے کہا کہ جموں و کشمیر ایک حساس خطہ ہے اور اپوزیشن کے لیے حکومت کی ہر تجویز کی مخالفت کرنا ضروری نہیں ہے۔

انہوں نے کہاکہ ’’اس ایوان سے غریب عوام کو بہت سی توقعات ہیں۔ اسمبلی کا یہ پانچواں دن ہے اور کئی ایسے مسائل ہیں جن پر اتفاق رائے ہونا چاہیے۔ یہ ضروری نہیں کہ اپوزیشن ہر معاملے کی مخالفت کرے۔‘‘

تاہم، انہوں نے نیشنل کانفرنس کی قیادت والی حکومت پر ان کے بقول ایسے مسائل دوبارہ اٹھانے کی کوشش کا
الزام لگایا جو پہلے ہی طے ہوچکے ہیں۔

یواین آئی۔ ظ ا

جموں و کشمیر

اچن میں 361 کروڑ روپے کا سالڈ ویسٹ مینجمنٹ پروجیکٹ ٹینڈر کے مرحلے میں

Published

4 hours ago

September 28, 2026

Online Desk

سری نگر، جموں و کشمیر حکومت نے پیر کو قانون ساز اسمبلی کو بتایا کہ سری نگر کے اچن میں مجوزہ 800 ٹن یومیہ (ٹی پی ڈی) مربوط سالڈ ویسٹ مینجمنٹ (آئی ایس ڈبلیو ایم) پروجیکٹ، جس کی تخمینی لاگت 361 کروڑ روپے ہے، فی الحال ٹینڈر کے مرحلے میں ہے۔

وزیر اعلیٰ عمر عبداللہ، جو ہاؤسنگ و اربن ڈیولپمنٹ کا قلمدان بھی سنبھالتے ہیں، نے جاری خزاں اجلاس کے دوران وقفۂ سوالات میں رکن اسمبلی مبارک گل کے سوال کے جواب میں یہ اطلاع دی۔

وزیر اعلیٰ نے ایوان کو بتایا کہ ابھی تک کسی ایجنسی یا ٹھیکیدار کو یہ پروجیکٹ الاٹ نہیں کیا گیا ہے، کیونکہ یہ فی الحال ٹینڈر کے عمل سے گزر رہا ہے۔

انہوں نے بتایا کہ مجوزہ پروجیکٹ میں روزانہ 800 ٹن کچرے کو پروسیس کرنے کی صلاحیت ہوگی اور اس کی مدت 25 سال مقرر کی گئی ہے، جس میں تعمیراتی کام کے لیے 24 ماہ شامل ہیں۔

مجوزہ مربوط پروجیکٹ میں کمپوسٹنگ سہولیات، بایو-سی بی جی پلانٹ، میٹریل ریکوری فیسیلٹیز (ایم آر ایف)، ریفیوز ڈیریوڈ فیول (آر ڈی ایف) سہولت، سائنسی سینیٹری لینڈ فل، ٹرانسفر اسٹیشنز، لیچیٹ مینجمنٹ انفراسٹرکچر اور دیگر ماحولیاتی بنیادی سہولیات شامل ہوں گی۔

دریں اثنا، ایوان کو بتایا گیا کہ نئے مربوط پروجیکٹ کے شروع ہونے تک سری نگر میونسپل کارپوریشن (ایس ایم سی) کی جانب سے اچن میں میونسپل کچرے کے سائنسی انتظام، ماحولیات کے تحفظ اور پرانے جمع شدہ کچرے کی صفائی کے لیے متعدد اقدامات کیے جا رہے ہیں۔

یواین آئی۔ طا۔

جموں و کشمیر

کپواڑہ میں اسکارپیو کھائی میں جا گری، پانچ افراد ہلاک، سات زخمی

Published

4 hours ago

September 28, 2026

Online Desk

سری نگر، شمالی کشمیر کے کپواڑہ ضلع کے ٹنگڈھر علاقے میں پیر کو ایک اسکارپیو گاڑی سڑک سے پھسل کر دریا میں جا گری، جس کے نتیجے میں نو ماہ کے شیر خوار بچے سمیت پانچ افراد ہلاک اور سات دیگر زخمی ہوگئے۔

حکام نے بتایا کہ حادثہ لائن آف کنٹرول کے قریب اس وقت پیش آیا جب اسکارپیو گاڑی ٹیٹوال سے سمیری کی جانب جارہی تھی۔ راستے میں گاڑی سڑک سے پھسل گئی اور نیچے جا کر کشن گنگا دریا میں جا گری۔

حادثے میں ہلاک ہونے والوں کی شناخت محمد ادریس (30)، حمزہ (نو ماہ)، سعیدہ بیگم (28)، شبیر احمد (50)، سمیری کے تمام رہائشی، اور ٹیٹوال کے رہائشی راجہ ارشد (30) کے طور پر ہوئی ہے۔

حادثے میں ڈرائیور سمیت چھ دیگر مسافر زخمی ہوئے۔ زخمیوں کو سب ڈسٹرکٹ اسپتال (ایس ڈی ایچ) ٹنگڈھر منتقل کیا گیا، جہاں سے پانچ زخمیوں کو مزید بہتر علاج کے لیے اعلیٰ طبی مرکز منتقل کرنے کی سفارش کی گئی۔

پولیس کے ایک افسر نے بتایا کہ بھارتیہ نیائے سنہتا (بی این ایس) کی دفعات 281 اور 125(a) کے تحت مقدمہ درج کرکے تحقیقات شروع کردی گئی ہیں۔

لیفٹیننٹ گورنر منوج سنہا نے حادثے میں انسانی جانوں کے ضیاع پر گہرے رنج و غم کا اظہار کیا۔

لیفٹیننٹ گورنر نے ایکس پر اپنی پوسٹ میں کہا کہ وہ حادثے میں لوگوں کی جان جانے سے ’’شدید رنجیدہ‘‘ ہیں اور سوگوار خاندانوں سے تعزیت کا اظہار کیا۔ انہوں نے زخمیوں کی جلد صحت یابی کے لیے دعا کی اور ضلعی انتظامیہ کو انہیں بہترین ممکنہ علاج فراہم کرنے کی ہدایت دی۔

وزیر اعلیٰ عمر عبداللہ نے بھی حادثے پر گہرے دکھ کا اظہار کرتے ہوئے اسے کرناہ-ٹنگڈھر علاقے میں پیش آنے والا ایک المناک واقعہ قرار دیا۔

وزیر اعلیٰ نے جاں بحق افراد کے اہل خانہ سے تعزیت کی اور مرحومین کی روح کے سکون اور غم زدہ خاندانوں کو یہ صدمہ برداشت کرنے کی قوت عطا ہونے کے لیے دعا کی۔

عمر عبداللہ نے ضلعی انتظامیہ اور طبی حکام کو زخمیوں کو بہترین ممکنہ علاج اور تمام ضروری طبی سہولیات فراہم کرنے کی ہدایت دی۔ انہوں نے حکام سے متاثرہ خاندانوں کو ہر ممکن مدد فراہم کرنے کو بھی کہا۔

جیل میں قید رکن پارلیمنٹ اور عوامی اتحاد پارٹی (اے آئی پی) کے رہنما انجینئر رشید نے بھی اس المناک سڑک حادثے پر گہرے رنج و غم کا اظہار کیا۔

پارٹی کے ترجمان انعام النبی نے حکام سے اپیل کی کہ جاں بحق افراد کے خاندانوں کو ہر ضروری مدد فراہم کی جائے اور اس بات کو یقینی بنایا جائے کہ حادثے کے بعد کسی بھی متاثرہ خاندان کو مزید مشکلات کا سامنا نہ کرنا پڑے۔

یواین آئی۔ ط ا