جموں،مرکزی وزیر برائے زراعت و کسان بہبود، شیو راج سنگھ چوہان نے جموں کے سیلاب متاثرہ علاقوں کا دورہ کر کے زراعت اور مکانات کو پہنچنے والے نقصانات کا جائزہ لیا اور کسانوں کو بھرپور مالی اور تکنیکی مدد فراہم کرنے کا یقین دلایا۔

چوہان نے بدایال برہمنہ (آر ایس پورہ حلقہ) کے سرحدی گاؤں کا دورہ کیا جہاں کھیتوں کو شدید نقصان پہنچا تھا۔ انہوں نے کسانوں سے براہِ راست ملاقات کی، کھڑی فصلوں کی تباہی دیکھی اور متاثرین کی مشکلات سنی۔ انہوں نے کہا کہ وزیرِ اعظم نریندر مودی اور مرکزی حکومت اس بحران کی گھڑی میں جموں و کشمیر کے عوام کے شانہ بشانہ ہیں، اور امداد کی تمام ممکنہ راہیں کھولی جائیں گی۔

شیو راج سنگھ نے اعلان کیا کہ مرکزی حکومت جلد ہی ایک پیکج کی منظوری دے گی جس کے تحت 5,000 سے زائد دیہی مکانات کی دوبارہ تعمیر کی جائے گی۔ ان مکانات کے مرمت یا دوبارہ تعمیر کے لیے ’پردھان منتری آواس یوجنا‘کے تحت ہر گھر کو 1,30,000 روپے فراہم کیے جائیں گے، جس میں بیت الخلا بنوانے کی سہولت بھی شامل ہوگی، اور مزدوری کے حق کے 40,000 روپے بھی دیئے جائیں گے۔

زرعی نقصان کا ذکر کرتے ہوئے، چوہان نے بتایا کہ تقریباً 7,000 کسانوں نے فصل بیمہ کے تحت دعوے کیے ہیں، اور انہیں مکمل معاوضہ دیا جائے گا۔ انہوں نے بیمہ کمپنیوں کے ساتھ مل کر کام جاری رکھنے اور کسی بھی دوسرے قسم کی شکایات یا بدعنوانی کا خاتمہ یقینی بنانے کی بھی بات کی۔

انہوں نے کہا کہ متاثرہ علاقوں کی رپورٹ بننے کے بعد مرکز و ریاست مل کر طے کریں گے کہ امداد کس طرح تقسیم کی جائے۔ بیچ کی ضرورت کو پورا کرنے کے لیے بیج اور زرعی آلات مفت فراہم کیے جائیں گے، اور کسانوں کے بینک کھاتوں میں مرکزی اسکیموں کی مد سے براہِ راست رقوم بھیجی جائیں گی۔

مزید برآں، جن گھروں کو نقصان پہنچا ہے، ان کے متاثرین کو امداد کی منظوری دی جائے گی۔ 5,101 مکانات کے ابتدائی فہرست سامنے آئی ہے، اور چوہان نے کہا کہ وہ جلد ہی ان کی منظوری دیں گے تاکہ لوگ دوبارہ اپنا گھر ٹھیک کر سکیں۔

وزیر نے کہا کہ اگر دودھ دینے والی مویشی (گائے، بھینس) سیلاب کی نذر ہو چکی ہیں، تو فی جانور معاوضہ ملے گا (مثلاً 37,000 روپے)، اور اگر گھوڑے یا بیل جانور ہیں، تو ان کی بھی مناسب معاوضہ کی جائے گی۔

اس کے علاوہ، مزدوروں کی انفرادی مدد کے لیے ایم جی این آر ای جی اے پروگرام کے تحت کام کے دنوں کی تعداد 100 سے بڑھا کر 150 کی جائے گی تاکہ متاثرہ دیہی علاقوں کے لوگوں کو روزگار کے مواقع ملیں۔

سیلاب متاثرہ علاقوں کا دورہ کرنے کے بعد نامہ نگاروں سے بات چیت کے دوران مرکزی وزیر نے کہا کہ انہوں نے خود اپنی آنکھوں سے دیکھا کہ فصلوں کو بڑے پیمانے پر نقصان پہنچا ہے۔ ان کے مطابق یہ صرف کھیتوں یا فصلوں کا نقصان نہیں بلکہ کسانوں کی زندگیوں اور ان کے بچوں کے مستقبل پر بھی گہرا اثر ہے۔ تاہم انہوں نے کسانوں کو یقین دلایا کہ مرکزی حکومت ان کے ساتھ ہے اور ان کے تمام مسائل ترجیحی بنیادوں پر حل کیے جائیں گے۔

انہوں نے مزید بتایا کہ مرکزی ٹیم نے حال ہی میں متاثرہ علاقوں کا دورہ کر کے نقصانات کا جائزہ لیا ہے جبکہ جموں و کشمیر حکومت بھی اپنی رپورٹ تیار کر رہی ہے۔ جیسے ہی یہ رپورٹ موصول ہوگی، مرکزی حکومت باضابطہ طور پر امدادی پیکج کا اعلان کرے گی۔
مرکزی وزیر نے کہا کہ اب تک کی ابتدائی رپورٹوں کے مطابق پانچ ہزار سے زائد مکانات کو نقصان پہنچا ہے۔ مرکزی حکومت ان گھروں کی دوبارہ تعمیر کے لیے مالی امداد فراہم کرے گی۔ انہوں نے کہا کہ متاثرہ کسانوں کو فصل بیمہ یوجنا کے تحت بھی سہولتیں دی جائیں گی تاکہ وہ دوبارہ اپنے کھیتوں کو آباد کر سکیں۔ اس کے ساتھ ہی کسانوں کو بیج کی ضرورت پوری کرنے کے لئے جموں و کشمیر حکومت کو ہدایت دی گئی ہے کہ وہ فوری طور پر پرپوزل تیار کرے تاکہ مفت بیج تقسیم کیے جا سکیں۔

مزید برآں، مرکزی اسکیموں کے تحت کسانوں کے کھاتوں میں براہِ راست رقم منتقل کی جائے گی تاکہ انہیں فوری مالی سہارا فراہم ہو۔

صحافیوں کے ایک سوال کے جواب میں شیو راج سنگھ چوہان نے کہا کہ سری نگر-جموں قومی شاہراہ اب معمول کے مطابق آمد و رفت کے لئے کھلی ہے اور اس سلسلے میں کسی قسم کی رکاوٹ باقی نہیں۔ جی ایس ٹی پر بات کرتے ہوئے انہوں نے حالیہ فیصلے کو تاریخی قرار دیا اور کہا کہ اس کے فوائد سبھی طبقات کو حاصل ہوں گے۔

یو این آئی، ارشید بٹ