نئی دہلی وزیرِ دفاع راج ناتھ سنگھ اور چیف آف آرمی اسٹاف جنرل دھیرج سیٹھ نے اسکاٹ لینڈ کے گلاسگو میں حال ہی میں اختتام پذیرہوئے دولت مشترکہ کھیلوں میں 16 تمغے (08 سونا، 07 چاندی اور ایک کانسہ) جیتنے والی فوج کی ٹیم کے اراکین کے ساتھ بات چیت کیوزارتِ دفاع نے جمعہ کے روز بتایا کہ ان کھیلوں میں ہندستان نے کل 39 تمغے جیتے ہیں جن میں سے 18 تمغے (16 فوج اور دو بحریہ) ہندستانی دفاعی افواج کے جوانوں نے جیتے ہیں۔

وزیرِ دفاع نے جسمانی اور ذہنی دباؤ سے ابھر کر بین الاقوامی کھیل کی تقریب میں ملک کا وقار بڑھانے کے لیے ہندستانی دفاعی افواج کے مضبوط عزم اور پختہ ارادے کی تعریف کی۔ اس کامیابی کو “غیر معمولی” قرار دیتے ہوئے انہوں نے کہا کہ یہ کھلاڑی لوگوں، خاص طور پر نوجوانوں کے لیے باعثِ تقلید ہیں، کیونکہ وہ “ایک سپاہی اور ایک چیمپئن کا بہترین امتزاج” ہیں۔

مکے بازی (باکسنگ) میں چھ سونے کے تمغوں میں سے چار خاتون باکسروں کے ذریعہ جیتے جانے پر مسٹر سنگھ نے کہا کہ یہ کامیابی ہندستان کی بڑھتی ہوئی ‘ناری شکتی’ کا ثبوت ہے۔ انہوں نے کہا کہ یہ کامیابی مزید لڑکیوں کو کھیلوں میں حصہ لینے اور دفاعی افواج میں شامل ہونے کے لیے ترغیب دے گی۔

مسٹر سنگھ نے کہا کہ ملک کے ہر کونے سے ہندستانی چیمپئن ابھر رہے ہیں۔ انہوں نے ایشیائی کھیلوں اور اولمپکس جیسے آنے والے مقابلوں کے لیے ایتھلیٹوں کو مبارکباد اور نیک خواہشات پیش کیں۔

جنرل سیٹھ نے بھی جوانوں کو ان کی شاندار کارکردگی نیز کامیابی کے لیے مبارکباد اور نیک خواہشات پیش کیں۔

یو این آئی ایف اے

نئی دہلی، لوک سبھا میں اپوزیشن لیڈر راہل گاندھی نے دعویٰ کیا ہے کہ چین نے اروناچل پردیش کے کچھ سرحدی علاقوں میں ہندستانی فوج کو گشت کرنے سے روک دیا ہے انہوں نے اس صورتحال کو انتہائی تشویش ناک قرار دیتے ہوئے مرکزی حکومت اور وزیر اعظم نریندر مودی کی خاموشی پر شدید سوالات اٹھائے ہیں سوشل میڈیا پوسٹ کے ذریعے مسٹر گاندھی نے دعویٰ کیا کہ اروناچل پردیش میں متعدد مقامات پر چین نے ہندستانی فوج کو پیٹرولنگ کرنے سے روک دیا ہے۔ انہوں نے اسے انتہائی تشویش ناک صورتحال قرار دیا۔ کانگریس رہنما نے کہا کہ اس سے بھی زیادہ تشویش ناک بات یہ ہے کہ وزیر اعظم نریندر مودی، وزیرِ دفاع راج ناتھ سنگھ اور مرکزی وزیرِ داخلہ امت شاہ نے اس معاملے پر خاموشی اختیار کر رکھی ہے۔

انہوں نے الزام لگایا کہ مودی حکومت چین کو روکنے کے بجائے اس خبر کو دبانے کے لیے میڈیا پر دباؤ بنا رہی ہے۔

اپوزیشن لیڈر نے گلوان وادی کے واقعے کے بعد وزیر اعظم مودی کے اس بیان کا بھی حوالہ دیا، جس میں انہوں نے کہا تھا کہ چین نے ہندستان کی زمین کے ایک انچ پر بھی قبضہ نہیں کیا۔ مسٹر گاندھی نے الزام لگایا کہ اس بیان سے ملک کو بھاری نقصان پہنچا تھا۔ انہوں نے کہا کہ آج بھی وزیر اعظم کی شبیہ بچانے کا وہی ‘آپریشن’ جاری ہے۔ مسٹر گاندھی نے الزام لگایا کہ ملک کی سلامتی سے اوپر اپنی شبیہ کو ترجیح دینے والا وزیر اعظم ملک کے لیے انتہائی خطرناک ہے۔

یو این آئی ایف اے

نئی دہلی، وزیراعظم نریندر مودی نے جمعہ کے دن تقسیم کے متاثرین اور بچ جانے والوں کو یاد کیا اور ملک کی تقسیم سے پیدا ہوئے عظیم انسانی دکھوں کو یاد کرتے ہوئے ان لوگوں کی تعریف کی جنہوں نے اس صدمے پر قابو پایا اور اپنی زندگیوں کو ازسرنو شروع کیا۔

تقسیم کے مظالم کے یادگاری دن کے موقع پر مسٹر مودی نے کہا کہ تقسیم نے “کئی زندگیوں کو تباہ کر دیا”، خاندانوں کو بے گھر کر دیا، اپنوں کو جدا کر دیا اور سرحد کے دونوں طرف کے لوگوں کو بے پناہ تکلیف پہنچائی۔

سوشل میڈیا پلیٹ فارم ایکس پر ایک پوسٹ میں وزیراعظم نے کہا کہ “آج ہم #PartitionHorrorsRemembranceDay منا رہے ہیں۔ ہم ان تمام لوگوں کی ہمت کو یاد کرتے ہیں جو تقسیم سے متاثر ہوئے تھے۔”

مسٹر مودی نے کہا کہ “یہ تاریخ کا ایک ایسا لمحہ تھا جس نے کئی زندگیوں کو تباہ کر دیا… خاندان بے گھر ہوئے، اپنے پیارے کھو دیاگیا اور بے پناہ تکلیفیں برداشت کی گئیں۔”

اس کے ساتھ ہی انہوں نے تباہی کے باوجود تقسیم کے بعد بچ جانے والوں کی اپنی زندگیوں کو ازسرنو شروع کرنے کے عزم کو اجاگر کیا۔ انہوں نے کہا کہ “اس پر قابو پاتے ہوئے، لوگوں نے صفر سے اپنی زندگیوں کو دوبارہ شروع کیا، مصیبت کو کامیابی میں بدلا اور ہمارے ملک کی ترقی میں بے پناہ تعاون دیا۔”

مسٹر مودی نے کہا کہ تقسیم کا سامنا کرنے والوں کے سفر انسانی استحکام کے ثبوت کے طور پر قائم ہیں۔ انہوں نے کہا کہ “ان کی زندگی کے سفر ہمیں انسانی جذبے کی طاقت کی یاد دلاتے ہیں۔”

وزیراعظم نے اس موقع پر ملک کی باہمی ہم آہنگی، بھائی چارے اور قومی اتحاد کے عزم کو مزید مضبوط کرنے کی بھی اپیل کی۔ انہوں نے کہا کہ “یہ دن ہمارے ملک میں ہم آہنگی اور بھائی چارے کو برقرار رکھنے اور اجتماعی طور پر ایک وکست بھارت کی تعمیر کے لیے کام کرنے کے ہمارے عزم کو مزید گہرا کرے۔”

تقسیم کے مظالم کا یادگاری دن 14 اگست کو 1947 میں ہندوستان کی تقسیم سے جڑے دکھ، نقل مکانی اور جانی نقصان کی یاد میں منایا جاتا ہے۔ اس تقسیم کے نتیجے میں جدید تاریخ کی سب سے بڑی اجتماعی نقل مکانی ہوئی، کیونکہ شدید فرقہ وارانہ تشدد کے درمیان لاکھوں لوگوں نے ہندوستان اور پاکستان کے درمیان نئی کھینچی گئی سرحدوں کو پار کیا۔

مودی حکومت نے 2021 میں اس دن کو منانے کا اعلان کیا تھا اور کہا تھا کہ اس کا مقصد تقسیم کے دوران لوگوں کی برداشت کردہ تکلیفوں کو یاد کرنا اور سماجی ہم آہنگی کی حفاظت اور تقسیم اور نفرت کو دوبارہ پنپنے سے روکنے کی اہمیت کو اجاگر کرنا ہے۔

یو این آئی۔این یو۔