خبراردو:

حریت (گ) چیرمین سید علی گیلانی نے 6؍جنوری 1993کے سانحہ سوپور کو یاد کرتے ہوئے کہا کہ 26سال پیش آیا ہوا یہ واقع کشمیر کی تاریخ میں یہ ایک دلدوز اور وحشت ناک سانحہ ہے جس کو کشمیر کے عوام ہی نہیں، بلکہ پوری عالم انسانیت بھلا نہیں سکتی ہے۔ انہوں نے عالمی برادری سے اپیل کی ہے کہ وہ سانحہ سوپور اور اس قسم کے دیگر قتل عام کے تمام واقعات کی اپنی سطح پر تحقیقات کرائے اور جنگی جرائم میں ملوث بھارتی فورسز اہلکاروں کو انصاف کے کٹہرے تک لانے کے لیے اپنے اثرورسوخ کو استعمال کرے۔

حریت (گ) چیرمین سید علی گیلانی نے 6؍جنوری 1993کے سانحہ سوپور کو یاد کرتے ہوئے کہا کہ اہنسا کے پجاری بدنصیب قوم کے ناعاقبت اندیش غداروں کے بلائے ہوئے طیراً ابابیل، طاقت کے نشے میں چور ہوکر پوری مارکیٹ میں گولیوں کی بوچھاڑ کرکے پاگل وحشیوں کی طرح ہر شخص کو تہہ تیغ کرتے چلے جارہے تھے۔ مکانوں اور دوکانوں کو گن پاؤڈر چھڑک کر ساری املاک کو آگ کی نذر کردیا۔ ان وردی پوش اہلکاروں نے دوکانوں کے شٹر گرا کر دوکانداروں کو باہر نکلنے کی اجازت نہ دیکر انہیں اندر ہی آگ میں زندہ جلادیا۔ گیلانی نے کہا کہ ایسی درندگی تاریخ نے شاید ہی دیکھی ہوگی کہ ماں کی گود سے اس کے شیرخوار بچے کو گھسیٹ کر آگ کے بھڑکتے شعلوں میں پھینک دیا۔ جب اس مجبور اور دکھیاری ماں نے چیخ وپکار اور آہ وزاری کی تو گولیوں سے اُس کو بھی ہمیشہ کے لیے خاموش کردیا گیا۔

انہوں نے کہا کہ اس طوفانِ بدتمیزی میں 55انسانی جانوں کو آگ میں بھسم کرکے انگاروں میں تبدیل کیا گیا اور اُن کے رشتہ دار ان کو پہچان بھی نہیں سکے۔ حریت راہنما نے کہا کہ وحشی فوجیوں کی اسی سے بھی تسلی نہیں ہوئی، بلکہ بانڈی پورہ جانے والی ایک بس کو سواریوں سمیت گولیوں سے چھلنی کرکے بس کو بھی آگ لگادی اور کسی کو بھی بس سے اترنے نہیں دیا گیا تاکہ سب مسافر اس جلتی ہوئی بس میں ہی دم توڑ دیں۔ اسی طرح ظلم وستم، بربریت اور سفاکیت کا ننگا ناچ کھیل کر انسانی جانوں کے ساتھ ساتھ 120مکانوں اور 350دوکانوں کو بھی کھنڈرات میں تبدیل کرکے ہماری قوم کے غداروں کے آقاؤں نے نئے سال کا انوکھا تحفہ پیش کیا۔

آزادی پسند راہنما نے کہا کہ سوپور کو یہ امتیاز حاصل ہے کہ وہاں کی اکثریت نے کبھی بھی غلامی کو قلب وذہن سے قبول نہیں کیا ہے۔ تاریخ کے ہر دور میں انہوں نے سودابازی اور اپنے بنیادی حقوق کی پامالی کے خلاف سینہ سپر ہوکر ایک جرأت مند اور قابل تحسین کردار ادا کیا ہے جس کی وجہ سے وہ غاصب طاقتوں اور اُن کے مقامی دم چھلوں کی نظروں میں ہمیشہ سے ایک کانٹے کی طرح کھٹک رہے ہیں اور جب بھی ظالموں کو موقع ملا انہوں نے اس ’’سرکش‘‘ خطے کو زیر کرنے کی ہر ممکن کوشش کی اور 6؍جنوری کا وحشیانہ سانحہ اُسی سلسلے کی ایک کڑی تھی۔ حریت چیرمین نے کہا کہ 26سال گزرنے کے بعد، تمام کمشنوں اور تحقیقاتی اداروں کے رپورٹوں کے باوجود انسانیت کے یہ بے رحم قاتل ہماری گلی کوچوں میں دھندناتے پھرتے ہیں اور ہماری آزادی، ہمارا کلچر، ہماری معیشت، ہماری پہچان اور ہمارا دین ہم سے چھیننے کی سازشوں میں لگے ہیں اور اُن کے مقامی بہروپئے اور اس خون کے انسان نما سوداگر ہر اُس اقدام کی صفائی پیش کرنے کے لیے آگے آتے ہیں جو ہمارے وجود اور ملی تشخص کو مٹانے کے لیے اُٹھائے جارہے ہیں۔ انہوں نے کہا کہ اگر ہم اب بھی کھرے اور کھوٹے میں تمیز نہیں کرپائے، اگر ہم اب بھی لالی پاپ سے خوش ہوجائیں گے، اگر ہم اب بھی نت نئے کھلونے سے بہل جائیں گے، اگر ہم اب بھی اپنے شہیدوں کا قرض ادا کرنے کے لیے یکسو اور یک رنگ نہ ہوجائیں گے تو بحیثیت قوم ہمیں صفحہ ہستی سے نیست ونابود ہونے سے کوئی بچا نہیں سکتا۔ پھر کوئی عیش پرست غدار بھی ہوں، ان کے جی حضوری کرنے والے سرکاری افسر ہوں، ووٹ دینے اور زندہ باد کرنے والے عوام ہوں یا پھرسیاست اور مذہب کو الگ سمجھنے والے علماء ہوں ۔

اُس وقت شاید ہماری یہ گزارشات یاد آئیں گی، لیکن وقت ہمارا ساتھ نہ دے۔ آزادی پسند راہنما نے کہا کہ اب بھی وقت ہے کہ ہم اپنے گریبان میں جھانک کر اپنا محاسبہ کرکے دیکھیں کہ ہمارے آلۂ قتل کی کلہاڑی کے دستے ہم میں سے ہی ہیں، ورنہ دشمن کی کیا مجال کہ ہماری طرف آنکھ اُٹھاکے بھی دیکھنے کی جرأت کرے۔ گیلانی نے سوپور سانحہ کے 26سال مکمل ہونے پر اس کی یاد تازہ کرنے کے لیے 6؍جنوری سنیچر کو قصبۂ سوپور میں مشترکہ مزاحمتی قیادت کی جانب سے دی گئی مکمل ہڑتال، جامع مسجد سوپور میں نماز ظہر کے بعد جلسہ عام منعقد کرنے اور بعد میں مزارِ شہداء تک ایک پُرامن جلوس نکالنے کی کال دہراتے ہوئے کہا کہ زندہ قومیں اپنے شہداء کی قربانیوں کو کسی بھی صورت میں فراموش کرنے کی متحمل نہیں ہوسکتی ہے۔