خبراردو:

1993میں شمالی قصبہ سوپور میں سیکورٹی فورسز کی طرف سے عام شہریوں کے قتل عام کے خلاف مکمل ہڑتال رہی جس دوران عوام کی ایک بڑی تعداد نے سانحہ میں جاں بحق ہوئے افراد کے حق میں دعائیہ و تعزیتی مجالس منعقد کیں۔ اس موقعے پر مقررین نے بشری حقوق کی انجمنوں پر زور دیتے ہوئے کہا کہ سانحہ میں ملوث فورسز اہلکار وں کو جلد از جلد کیفر کردار تک پہنچایا جائے تاکہ متاثرین کو انصاف فراہم ہوسکے۔ اس دوران تعزیتی ہڑتال کے بیچ قصبہ میں عوامی، تجارتی و کاروباری سرگرمیاں مفلوج رہیں جبکہ سڑکوں سے ٹریفک کی نقل و حرکت بھی متاثر تھی۔

6جنوری1993کوسوپور کے مین قصبہ میں ایک المناک سانحہ رونما ہوا جس کے نتیجے میں درجنوں کنبوں کے آشیانے ویران ہوگئے جبکہ سینکڑوں کی تعداد میں لوگوں کے مال و جائیداد کو بھی بھاری نقصان سے دوچار ہونا پڑا۔ خیال رہے 6جنوری 1993کو قصبہ کے بس اڈے کے باہر جنگجوؤں نے فائرنگ کی جس کے بعد چند جائے حادثے سے کافی دور قصبہ کی دوسری جانب بی ایس ایف اہلکاروں نے عام شہریوں پر بندوقوں کے دہانے کھول دئے جس کے نتیجے میں فورسز اہلکاروں نے قصبہ میں خونین رقص کھیلا۔ درج اعداد و شمار کے مطابق بی ایس ایف اہلکاروں نے عام شہریوں کو نزلہ گراتے ہوئے آو دیکھا نہ تاؤ بلکہ ہر سو لاشوں کی ڈھیر بکھیر دئے۔

عینی شاہدین نے بتایا کہ اس موقعے پر بی ایس ایف اہلکاروں کی کاررروائی میں 57عام اور نہتے شہریوں کو گولیوں سے بھون ڈالا گیا جبکہ فورسز اہلکاروں نے اسی پر بس نہیں کیا بلکہ کمیکل پاؤڈر کا استعمال کرتے ہوئے 400دوکانات سمیت 75رہائشی مکانات کو پھونک ڈالا۔ واقعے کے عینی شاہدین جو اس وقت ادھیڑ عمر کو پہنچ چکے ہیں اور اُس وقت معجزاتی طور بچ نکلنے میں کامیاب ہوئے نے کشمیر نیوز سروس کو بتایا کہ جس طرح بی ایس ایف اہلکاروں نے قصبہ میں خونین رقص کھیلا اُس سے صاف واضح ہوتا ہے کہ انہیں کشمیریوں کو مارنے کی کھلی اجازت دی گئی ہے۔ انہوں نے بتایا کہ بی ایس ایف اہلکاروں نے اُس وقت دوکانوں میں پناہ لئے گئے عام شہریوں کو ایک ایک کرکے باہر نکالا اور ان کے جسم میں سینکڑوں گولیاں پیوست کی اور بعد میں قصبہ کے مین بازار میں سبھی دوکانات کے اندر گن پاؤڈر چھڑک کر آگ لگادی۔انہوں نے بتایا کہ آج 26سال کا عرصہ گزرنے کے باوجود بھی سانحہ میں ملوث فورسز اہلکاروں کو انصاف کے کٹہرے میں کھڑا نہیں کیا گیا اور نہ ہی متاثرین کو انصاف فراہم کرنے کی کوشش کی گئی۔

ادھر سانحہ کے خلاف سوپور قصبہ اور مضافات میں اتوار کو مکمل احتجاجی و تعزیتی ہڑتال رہی جس دوران یہاں عوامی، تجارتی اور کاروباری سرگرمیاں مکمل طو رپر مفلوج رہی جبکہ قصبہ کی سڑکوں پر اتوار کو الو بولتے ہوئے نظر آئے۔ سانحہ میں مارے گئے افراد کے حق میں اتوار کو صبح سے ہی مختلف مقامات پر تعزیتی و دعائیہ مجالس کا اہتمام جاری رہا جس دوران دور دور سے لوگوں کی بڑی تعداد نے مارے گئے افراد کے لواحقین کے ساتھ اظہار یکجہتی کے لیے اُن کے گھروں کا رخ کیا اور یہاں دعائیہ مجالس میں شرکت کی۔یہاں تعزیت پر آئے ایک عمر رسیدہ بزرگ نے ماضی کی یاد کو تازہ کرتے ہوئے بتایا کہ سال 1993میں آج ہی کے روز جنگجو کی فائرنگ سے ایک بی ایس ایف اہلکار مارا گیا تاہم فورسز نے اس کا بدلہ لینے کے لیے سوپور میں قیامت صغریٰ بپا کی۔ انہوں نے کہا کہ فورسز اہلکاروں نے بے تحاشا عام شہریوں پر بندوقوں کے دہانے کھلوتے ہوئے یہاں خون کی ندیاں بہادیں جس کے نتیجے میں قصبہ میں ہر سو لاشوں کے ڈھیر بکھیرتے ہوئے نظر آئے۔اس دوران اتوار کو قصبہ کی مساجد میں سانحہ میں مارے گئے افراد کے حق میں خصوصی دعاؤں کا اہتمام ہوا جس میں لوگوں کی بڑی تعداد نے شرکت کی ۔ ادھر سوپور کی سیول سوسائٹی سے وابستہ ممبران اور تاجر انجمنوں نے بھی مزار شہدا جاکر جاں بحق افراد کے حق میں خصوصی دعائیں کیں۔