ریاض، یمن میں قانونی حکومت کی بحالی کے لیے قائم عرب اتحاد نے کہا ہے کہ حوثی ملیشیا کی جانب سے سعودی عرب کے جنوب مغربی شہر خمیس مشیط کی سمت داغے گئے تین بیلسٹک میزائلوں کو روک کر تباہ کردیا گیا ہے۔

اتحاد کے مطابق جمعہ کی صبح تقریباً تین بجے خمیس مشیط کی جانب داغے گئے ایک بیلسٹک میزائل کو راستے میں ہی ناکام بنا دیا گیا، جبکہ اس سے قبل شہر کی جانب داغے گئے دو دیگر میزائل بھی روک کر تباہ کیے گئے تھے۔

بیان کے مطابق حوثی ملیشیا کے چار ڈرونز کو بھی ناکام بنایا گیا۔ اتحاد نے کہا کہ یہ کارروائیاں شہری آبادی اور شہریوں کو نشانہ بنانے کی حوثی کوششوں کے تسلسل کے تناظر میں کی گئی ہیں۔

اتحاد نے اس عزم کا اظہار کیا کہ اس کی افواج حوثی ملیشیا کی کارروائیوں کو روکنے اور شہریوں و شہری تنصیبات کے تحفظ کے لیے ضروری عملی اقدامات جاری رکھیں گی۔

یو این آئی۔ م س

نیویارک، ایرانی وزیر خارجہ عباس عراقچی نے نیویارک میں ملاقاتوں کے دوران مبینہ طور پر پابندیوں میں نرمی کے بدلے جنگ کے دوران بمباری سے متاثر ہونے والی جوہری تنصیبات تک بین الاقوامی ایٹمی توانائی ایجنسی (آئی اے ای اے) کے معائنہ کاروں کی رسائی بحال کرنے کی تجویز پیش کی ہے۔ یہ دعویٰ بلومبرگ نے سفارتکاروں کے حوالے سے کیا ہے۔

رپورٹ کے مطابق عراقچی نے اقوام متحدہ کی جنرل اسمبلی کے اجلاس کے موقع پر یورپی اور مشرق وسطیٰ کے سفارتکاروں سے ملاقاتوں میں یہ تجویز پیش کی۔ تاہم ایران نے بعد میں اس رپورٹ کے بعض پہلوؤں کی تردید کی ہے۔

دوسری جانب امریکی صدر ڈونلڈ ٹرمپ نے مستقبل میں کسی ممکنہ معاہدے کے حوالے سے ایرانی قیادت پر اعتماد کا اظہار نہیں کیا اور کہا کہ جنگ کے خاتمے کے بعد تہران کو مناسب اور دانش مندانہ فیصلے کرنا ہوں گے۔ ٹرمپ نے آبنائے ہرمز کا حوالہ دیتے ہوئے کہا کہ امریکی بحریہ نے وہاں ناکہ بندی برقرار رکھی ہوئی ہے اور ایران کئی ماہ سے کوئی جہاز گزرنے نہیں دے سکا۔

ٹرمپ نے حال ہی میں کہا تھا کہ نومبر کے وسط مدتی انتخابات کے بعد ایران کے خلاف فوجی کارروائی میں شدت لائی جا سکتی ہے۔ بلومبرگ کے مطابق واشنگٹن اور تہران کے درمیان جنگ بندی اور آبنائے ہرمز دوبارہ کھولنے سے متعلق مذاکرات میں اب تک نمایاں پیش رفت نہیں ہوسکی ہے۔

دریں اثنا، ’وال اسٹریٹ جرنل‘ کے مطابق پینٹاگون مشرق وسطیٰ میں ایک تیسرا طیارہ بردار بحری بیڑا اور مزید فوجی بھیج رہا ہے۔ رپورٹ کے مطابق اس کمک کے نتیجے میں خطے میں 9 ہزار سے 10 ہزار اضافی فوجیوں کی تعیناتی متوقع ہے۔

یو این آئی۔ م س

صنعا، 2 یمن کی مسلح افواج نے جمعہ کو تعز صوبے میں ایران نواز حوثی فورسز کے خلاف کارروائیاں تیز کرتے ہوئے تین گھنٹے کے دوران حوثی جنگجوؤں، کمک اور فوجی تنصیبات پر 20 فضائی حملے کیے۔ اس دوران صوبے کے کئی محاذوں پر شدید لڑائی جاری رہی۔

یمنی فوج کے ترجمان نے بتایا کہ فضائیہ نے تعز میں حوثیوں کی نقل و حرکت، کمک، اجتماعات، گاڑیوں اور فوجی سازوسامان کو نشانہ بناتے ہوئے 20 ’’درست فضائی حملے‘‘ کیے۔ ان کے مطابق حملوں میں اہداف کو براہ راست نشانہ بنایا گیا اور حوثی جنگجوؤں، سازوسامان اور فوجی نقل و حرکت کو نقصان پہنچا۔

تعز میں حالیہ دنوں لڑائی میں نمایاں شدت آئی ہے۔ یمنی حکومتی فورسز حوثی ٹھکانوں اور ان کی سپلائی لائنوں کے خلاف زمینی و فضائی کارروائیاں کر رہی ہیں، جبکہ حوثیوں نے بھی کئی محاذوں پر حملے تیز کیے ہیں اور سمیعہ ضلع میں نیا محاذ کھولا ہے۔

یمنی فوج کے مطابق صنعا، صعدہ اور تعز میں بھی حوثی ٹھکانوں کے خلاف کارروائیاں کی گئی ہیں۔ فوج نے صنعا میں کارروائی کو ’’اعلیٰ اہمیت کے اہداف‘‘ کے خلاف آپریشن قرار دیتے ہوئے صعدہ میں 11 اہداف کو نشانہ بنانے اور تعز میں حوثیوں کے ایک ’’مکمل فوجی نظام‘‘ پر 27 فضائی حملوں کا دعویٰ کیا ہے۔

یمنی حکومت کے مطابق مشرقی محاذوں، البیضاء اور مغربی تعز کے الوازعیہ ضلع کے المنصورہ میں حوثی جنگجوؤں اور فوجی سازوسامان کے خلاف 468 حملے کیے گئے، جن میں سیکڑوں حوثی جنگجوؤں کے ہلاک یا زخمی ہونے اور فوجی سازوسامان کی تباہی کا دعویٰ کیا گیا ہے۔

دریں اثنا، تعز کے مختلف علاقوں میں شدید جھڑپوں کی اطلاعات ہیں۔ حکومتی فورسز نے تعز شہر کے شمال میں الاربعین میں حوثیوں کا بڑا حملہ پسپا کرنے اور شہر کے مشرقی مضافات میں دراندازی کی کوششیں ناکام بنانے کا بھی دعویٰ کیا ہے۔

یہ کشیدگی ایسے وقت بڑھی ہے جب چند روز قبل حوثیوں کے ڈرون حملے نے سعودی عرب کے مدینہ میں طیبہ بجلی تقسیم مرکز کو نشانہ بنایا تھا۔ سعودی عرب کے اتحادی افواج کے ترجمان میجر جنرل ترکی المالکی نے حملے کی ذمہ داری حوثیوں پر عائد کرتے ہوئے اسے ’’بزدلانہ دہشت گردانہ کارروائی‘‘ قرار دیا تھا۔

یو این آئی۔ ع ا ۔