جموں و کشمیر کے سابق وزیر اعلی اور نیشنل کانفرنس کے نائب صدر،عمر عبداللہ کو 8ماہ بعد رہا کر دیا گیا۔موصوف5اگست سے نظر بندتھے۔ ان کی رہائی سے قبل ان کے والد و جموں و کشمیر کے سابق وزیراعلی فاروق عبداللہ کو بھی رہا کیا جا چکا ہے۔ فی الوقت پی ڈی پی کی سربراہ محبوبہ مفتی اور دیگر متعدد سیاسی رہنما نظربند ہیں۔کشمیر نیوز سروس کے مطابق 5اگست 2019کی تاریخ کو مرکزی حکومت نے آئینی دفعات370و35(اے)کی تنسیخ اور ریاست جموں وکشمیرکو دو مرکزی حصوں میں منقسم کرنے کے فیصلوں کے ساتھ ہی عمر عبداللہ کی سیاسی سرگرمیاں مفلوج ہوکر جیل کی سرگرمیوں میں تبدیل ہوگئی تھیں۔
عمر عبداللہ گزشتہ 8 ماہ سے جیل میں تھے اور ان پر بائیکاٹ کے باوجود لوگوں کو ووٹ ڈالنے پر راغب کرنے اور سوشل میڈیا پر لوگوں کو مشتعل کرنے کے پاداش میں ماہ فروری کے پہلے ہفتے میں پبلک سیفٹی ایکٹ عائد کیا گیا۔ اس معاملے میں عمر عبداللہ کی بہن سارہ عبداللہ نے سپریم کورٹ میں عرضی بھی داخل کی تھی۔ گزشتہ چند ماہ کے دوران عمر عبداللہ کی دوران حراست لی گئی لمبی اور سفید داڑھی والی تصویریں وائرل ہوگئیں جو سوشل میڈیا پر عوامی حلقوں میں بالعموم اور سیاسی حلقوں میں بالخصوص گرم مباحثے کا باعث بن گئی تھیں۔اپنی والدہ کی خواہش کے برعکس لیکن اپنے خاندانی روایات کے عین مطابق عمر عبداللہ نے سال1998میں اپنی سیاسی زندگی کا باقاعدہ آغاز کیا اور این ڈی اے حکومت کے دوران23جولائی 2001 سے 23دسمبر2002تک مرکزی وزیر مملکت برائے امور خارجہ کے عہدے پر فائز رہے۔
سیاسی کیرئر کے روز اول سے ہی عمر عبداللہ کا اپنے بیانات اور تقاریر کے باعث پارٹی میں بھی اور باقی سیاسی حلقوں میں بھی طوطی بولنے لگا اور لوگ انہیں اپنے والد ڈاکٹر فاروق عبداللہ کے نسبت سنجیدگی سے لینے لگے۔ سیاسی میدان میں کئی نشیب وفراز دیکھنے کے بعد عمر عبداللہ سال2009میں جموں کشمیر کے عمر کے لحاظ سے سب سے چھوٹے وزیر اعلیٰ کے طور پر اقتدار کی کرسی پر بیٹھے۔ اس دوران انہیں جموں کشمیر بالخصوص وادی کشمیر میں خاصی عوامی مقبولیت حاصل ہوئی۔عمر عبداللہ نے سیاسی زندگی کے آغاز سے قبل سال1994میں ایک فوجی افسر کی صاحبزادی پائل عبداللہ سے نکاح کرکے اپنی ازدواجی زندگی بھی شروع کی تھی لیکن وہ شادی بعد ازاں طلاق پر منتج ہوئی۔
تختہ اقتدار سے محرومی کے بعد عمر عبداللہ اپوزیشن میں رہ کر سوشل میڈیا پر بھی کافی سر گرم رہے۔ حزب اقتدار جس میں بی جے پی بھی ایک شرکت دار تھی، کے خلاف تیکھے وار کرنے میں کوئی کسر باقی نہیں چھوڑی اور سوشل میڈیا پر بھی کسی بھی مسئلے پر اظہار خیال کرنے کے کسی بھی موقعے کو ہاتھ سے نہیں جانے دیا جس بنا پر وہ ٹویٹر ٹائیگر کے نام سے بھی مشہور ہوگئے۔
8ماہ بعد جموں و کشمیر کے سابق وزیر اعلیٰ اور نیشنل کانفرنس لیڈر عمر عبداللہ کی نظربندی ختم کرنے کا اعلان کر دیا گیا ہے۔ جموں و کشمیر انتظامیہ نے منگل کے روز یہ حکم نامہ جاری کیا۔ اس سے قبل عمر عبداللہ کے والد اور سابق وزیر اعلیٰ فاروق عبداللہ کی نظربندی کو بھی گزشتہ دنوں ختم کیا گیا تھا جس کے بعد میڈیا کے سامنے انہوں نے بیان دیا تھا کہ جب تک سبھی نظر بند لوگوں کو آزاد نہیں کیا جاتا، ان کی آزادی بے معنی ہے۔بہر حال، عمر عبداللہ کی نظربندی ختم کیے جانے کے بعد پی ڈی پی (پیپلز ڈیموکریٹک پارٹی) کا رد عمل سامنے آیا ہے۔ پی ڈی پی نے حکومت کے ذریعہ عمر عبداللہ کی نظر بندی ختم کرنے کا استقبال کیا ہے اور ساتھ ہی یہ مطالبہ کیا ہے کہ حکومت جلد از جلد محبوبہ مفتی اور ان کے دیگر سبھی سیاسی قیدیوں کو آزاد کرے۔ فی الوقت پی ڈی پی کی سربراہ محبوبہ مفتی اور دیگر متعدد سیاسی رہنما نظربند ہیں،جن میں علی محمد ساگر شامل ہیں۔