خبراردو:

ریاست جموں وکشمیر میں تعینات سیکورٹی ایجنسیوں نے آنے والے موسم سرما کے دوران جنگجوؤں کی تعداد میں اضافہ ہونے کا امکان ظاہر کیا ہے۔ ایک رپورٹ کے مطابق سیکورٹی ایجنسیوں نے وادی میں نوجوانوں کی عسکریت پسندوں کی صفوں میں شمولیت سے متعلق اعداد و شمار پر گفتگو کرتے ہوئے کہا کہ گزشتہ 10مہینوں کے دوران وادی کے سبھی اضلاع سے تعلق رکھنے والے 164نوجوانوں نے جنگجوؤں کی صفوں میں شمولیت کی ہے۔ انہوں نے بتایا کہ مذکورہ تعداد گزشتہ برس کے مقابلے میں کہی زیادہ ہے اور موسم سرما کے دوران اس میں مزید اضافہ ہونے کا قوی امکان ہے۔ انہوں نے بتایا کہ سرحدی علاقوں میں برف باری کی وجہ سے راستوں پر برف کی تہہ جمع ہونے کے نتیجے میں جنگجوؤں کو اس پار داخل ہونے میں مشکلات کا سامنا کرنا پڑتا ہے لہٰذا سیکورٹی ایجنسیوں کو خدشہ ہے کہ برف باری سے قبل ہی جنگجوؤں کی ایک بڑی تعداد سرحد عبور کرنے کی تاک میں ہیں۔ سیکورٹی ایجنسیوں نے اس بات کا خدشہ ظاہر کیا ہے کہ سال رواں میں نوجوانوں کی عسکری صفوں میں شمولیت کے نتیجے میں یہ قوی امکان ہے کہ موجودہ تعداد 350سے 400تک پہنچے کا اندیشہ ہے۔سیکورٹی ایجنسیوں کا ماننا ہے کہ سال 2015میں 66نوجوانوں نے عسکریت پسندوں کی صفوں میں شمولیت کا باضابطہ آغازکردیا جس کے بعد سال 2016میں یہ تعداد 88تک پہنچ گئی۔

ایجنسیوں نے رپورٹ میں واضح کردیا ہے کہ سال 2017میں 120نوجوانوں نے جنگجوئیت کی راہ اختیار کی۔انہوں نے بتایا کہ سال رواں کے فروری اور مارچ مہینوں میں نوجوانوں کی جنگجوئیت کے تئیں کمی دیکھنے کو ملی تاہم سال رواں کے جون، جولائی اور اگست میں اس میں ہوشربا اضافہ ہوا۔ رپورٹ میں بتایاگیا ہے کہ اگست 2018میں 25نوجوانوں نے حزب المجاہدین، لشکر طیبہ اور جیش محمد نامی عسکری گروپوں میں شمولیت کی جبکہ جون اور جولائی مہینوں میں بالترتیب 24اور 25نوجوانوں نے جنگجوؤں کی صفوں میں شمولیت اختیار کی۔سیکورٹی ایجنسیوں کا ماننا ہے سب سے بڑی تعداد جیش محمد نامی عسکری گروپ میں شامل ہیں جس کے مطابق سال رواں کے جنوری مہینے سے اب تک 60نوجوان اس تنظیم میں شامل ہوئے ہیں۔رپورٹ میں بتایا گیا ہے کہ نوجوانوں کی مجموعی تعداد جنوبی کشمیر کے کولگام، اننت ناگ، شوپیان اور پلوامہ سے تعلق رکھتے ہیں ۔ انہوں نے بتایاکہ سال رواں کے دوران جن نوجوانوں نے ہتھیار اُٹھائے اُن میں 164جنگجوؤں میں سے 50کا تعلق ضلع پلوامہ سے ہیں جبکہ اسی طرح ضلع شوپیان میں بھی سال رواں کے دوران 30نوجوانوں کا بندوق تھامے۔

سیکورٹی کے ایک اعلیٰ حکام نے بتایا کہ وادی میں نوجوانوں کی جنگجوؤں کے صفوں میں بھرتی انتہائی تشویش کن معاملہ ہے جس کی کئی وجوہات ہوسکتی ہے۔ انہوں نے بتایا کہ ریاستی جموں وکشمیر کو خصوصی پوزیشن فراہم کرنے والی دفعہ 35A، سابق مخلوط حکومت پی ڈی پی اور بی جے پی کا رشتہ منقطع ہونا اور اس کے نتیجے میں وادی بھر میں امن و قانون کی صورتحال درپیش رہنا جیسی کئی وجوہات ہیں جس کی وجہ سے وادی میں نوجوانوں کی عسکری صفوں میں شمولیت میں بے پناہ اضافہ دیکھنے کو مل رہا ہے۔سیکورٹی ایجنسیوں نے جنگجومخالف آپریشنوں کے دوران سال رواں کے جنوری سے 26اکتوبر تک 180جنگجوؤں کو ہلاک کیا گیا جبکہ سال گزشتہ میں فورسز اہلکاروں نے 210جنگجوؤں کو مختلف آپریشنوں کے دوران مارگرایا۔اس حوالے سے سابق ڈی جی پی سکمز جنہوں نے انٹلی جینس بیورو میں کشمیر ڈیسک کو کئی برس تک سنبھالا ہے نے بتایا کہ لائن آف کنٹرول اور بین الاقوامی سرحد پر پاکستانی کی طرف سے مسلسل دراندازی اور گولہ باری سے یہ بات پایہ تکمیل کو پہنچ جاتی ہے کہ پاکستان ریاست جموں وکشمیر میں صرف خون خراب کو روکنے میں مخلص نہیں ہے۔

انہوں نے بتایا کہ سرحدوں پر تناؤ اور تشویش کن صورتحال کو رفع کرنے کی خاطر مفاہمت کا طریق کار اپنانے کی ضرورت ہے۔ رپورٹ میں بتایا گیا ہے کہ مرکزی سرکار نے ریاست میں امن وامان کو بحال کرنے اور ترقی کو فروغ دینے کے لیے ماہ رمضان کے دوران جنگجو مخالف آپریشنوں پر روک لگادی مگر بدقسمتی سے جنگجوؤں نے نئی دہلی کی پیش رفت کو مؤثر طریقے پر جواب نہیں دیا۔ رپورٹ میں کہا گیا ہے کہ مرکزی سرکار ریاست میں زمینی سطح پر امن کی راہ کو ہموار کرنے کی جدوجہد کررہی ہے جس کے نتیجے میں حال ہی میں مرکزی وزیر داخلہ راجناتھ سنگھ نے بھی وادی کا دورہ کرکے یہاں حالات کا جائزہ لیا۔