قاہرہ، ایرانی مسلح افواج کے ایک ڈرون نے منگل کے روز بین الاقوامی آبی حدود میں ایک ’’معائنہ مشن‘‘ مکمل کیا، جس کے فوراً بعد امریکی فوج نے دعویٰ کیا کہ اس نے ایک ایرانی ڈرون کو مار گرایا ہے جو ایک امریکی طیارہ بردار بحری جہاز کے قریب جارحانہ انداز میں آنے کی کوشش کر رہا تھا۔

ایران کی نیم سرکاری خبر رساں ایجنسی تسنیم نے ایک ذریعے کے حوالے سے بتایا کہ ایران کا اپنے ایک ڈرون سے رابطہ منقطع ہو گیا ہے، جس کی وجوہات کی تحقیقات کی جا رہی ہیں۔

فارس خبر رساں ایجنسی نے نامعلوم ذرائع کے حوالے سے کہا کہ اس ڈرون نے ایران سے ملحقہ علاقوں میں فوجی سرگرمیوں کی کامیابی کے ساتھ نگرانی کی اور حقیقی وقت میں زمینی مراکز کو ڈیٹا ارسال کیا۔ رپورٹ میں ایسے مشنز کو خطے کی مجموعی نگرانی کے لیے نہایت اہم قرار دیا گیا ہے۔

امریکی سینٹرل کمانڈ نے اس سے قبل کہا تھا کہ بحیرۂ عرب میں امریکی ایف-35 سی جنگی طیارے کو ایرانی شاہد-139 ڈرون کو مار گرانا پڑا۔ کمانڈ کے مطابق ایرانی ڈرون نے یو ایس ایس ابراہم لنکن کی جانب ’’غیر ضروری انداز میں چال بازی‘‘ کی، جب طیارہ بردار بحری جہاز ایرانی ساحل سے تقریباً 800 کلومیٹر دور بین الاقوامی آبی حدود سے گزر رہا تھا۔

امریکی بیان کے مطابق ڈرون کو اپنے دفاع میں کی گئی کارروائی کے دوران مار گرایا گیا۔ امریکی فوج نے کہا کہ اس تصادم میں نہ تو کوئی امریکی فوجی زخمی ہوا اور نہ ہی کسی ساز و سامان کو نقصان پہنچا۔ یہ واقعہ ایسے وقت پیش آیا ہے جب آنے والے دنوں میں امریکہ اور ایران کے درمیان ممکنہ مذاکرات کے عارضی امکانات پر غور کیا جا رہا تھا۔

اس سے قبل دن میں، ایرانی صدر مسعود پزشکیان نے کہا تھا کہ انہوں نے وزارتِ خارجہ کو امریکہ کے ساتھ منصفانہ اور منصف مزاج مذاکرات کرنے کی ہدایت دی ہے۔

سوشل میڈیا پلیٹ فارم ایکس پر مسعود پزشکیان نے کہا کہ یہ قدم خطے کی حکومتوں کی جانب سے امریکی صدر ڈونالڈ ٹرمپ کی مذاکراتی پیشکش پر ردعمل دینے کی درخواست کے بعد اٹھایا گیا ہے۔ انہوں نے کہا کہ کوئی بھی بات چیت ’’وقار، دانائی اور مستعدی‘‘ کی حدود میں ہونی چاہیے۔

ترکی نے اس معاملے میں ثالثی کی پیشکش کی ہے، تاہم ایران مذاکرات کے دائرۂ کار کو محدود رکھنے کی کوشش کر رہا ہے۔

امریکی خبر رساں ایجنسی ایکسیوس نے ذرائع کے حوالے سے بتایا کہ ایران مذاکرات کے مقام کے طور پر عمان کو ترجیح دیتا ہے اور عرب و مسلم ممالک پر مشتمل وسیع فارمیٹ کے بجائے امریکہ کے ساتھ براہِ راست بات چیت کا خواہاں ہے۔

ایران کی وزارتِ خارجہ کے ترجمان اسماعیل بقائی نے کہا کہ آئندہ دنوں میں ہونے والے مذاکرات کے مقام کے تعین کے لیے مشاورت جاری ہے۔ سرکاری خبر رساں ایجنسی ایرنا کے مطابق انہوں نے بتایا کہ ترکی، عمان اور کئی دیگر علاقائی ممالک نے مذاکرات کی میزبانی کے لیے آمادگی ظاہر کی ہے، جسے ایران نہایت اہمیت دیتا ہے۔ تاہم اس سفارتی کوشش کی اسرائیل نے مخالفت کی ہے۔

امریکی خصوصی ایلچی اسٹیو وِٹکوف منگل کے روز یروشلم پہنچے، جہاں انہوں نے وزیر اعظم بنیامین نیتن یاہو اور وزیر دفاع اسرائیل کاٹز سے ملاقات کی۔ اس دوران ان کی ایرانی وزیر خارجہ سید عباس عراقچی سے ممکنہ ملاقات کا بھی امکان ظاہر کیا جا رہا ہے۔

ملاقات کے بعد نیتن یاہو کے دفتر نے کہا کہ ایران نے بارہا یہ ثابت کیا ہے کہ وعدوں کی پاسداری کے معاملے میں اس پر بھروسہ نہیں کیا جاسکتا۔

اسرائیل کے سرکاری نشریاتی ادارے کان کے مطابق، اسرائیلی حکام امریکہ سے ایران کے خلاف کارروائی کی مکمل آزادی کی یقین دہانی چاہتے ہیں اور تہران کے بیلسٹک میزائل پروگرام اور یورینیم افزودگی کو مکمل طور پر روکنے کے لیے دباؤ ڈال رہے ہیں۔

معاملے کو مزید پیچیدہ بناتے ہوئے ایران اس وقت یورپی یونین کے ساتھ بھی ایک سفارتی تنازع کا سامنا کر رہا ہے۔

یو این آئی۔ ایم جے