اصل حقائق پرمبنی نامہ نگاری ہی سچی صحافت
ڈاک بنگلہ سمبل میں منعقدہ تربیتی ورکشاپ سے ریاض مسرورسمیت سینئرصحافیوں کاخطاب

سرینگر:’دورِ جدید میں صحافت کے بدلتے تقاضے‘عنوان کے تحت ڈاک بنگلہ سمبل بانڈی پورہ میں اتوارکویک روز تربیتی ورکشاپ منعقد ہوا،جس کااہتمام انجمن اْردوصحافت جموں وکشمیر اوربانڈی پورہ ورکنگ جرنلسٹس ایسوسی ایشن نے باہمی اشتراک سے کیاتھا۔

کشمیر نیوز سروس کے مطابق صبح ساڑھے10شروع ہوئے اس تربیتی ورکشاپ میں بانڈی پورہ اورگاندربل سے تعلق رکھنے والے تقریباً30سے زیادہ صحافیوں،نامہ نگاروں اورپرنٹ والیکٹرانک میڈیاسے وابستہ دیگرافرادنے شرکت کی جبکہ میزبان کی حیثیت سے بانڈی پورہ ورکنگ جرنلسٹس ایسوسی ایشن کے ذمہ داروں نے یہاں سارے انتظامات کئے۔

انجمن اْردوصحافت جموں وکشمیر کاایک اعلیٰ سطحی وفد اس تربیتی ورکشاپ میں معاون مہتمم کے بطورشامل ہوا۔افتتاحی تقریب کے فوراًبعدپہلی نشست میں ’دیہی نامہ نگاری،تقاضے مسائل اور حل‘کے موضوع سینئرصحافی اور بی بی سی اردو کے بیورو چیف برائے جموں وکشمیر ریاض مسرور نے اپنے تجربات اور مشاہدات کے مطابق مفصل روشنی ڈالی۔انہوں نے واضح کیاکہ نامہ نگاری کودیہی یاشہری بنیاد پرتقسیم کرناٹھیک نہیں ہے۔

انہوں نے کہاکہ خبر زیادہ ترمضافاتی علاقوں سے ہی نکل کرآتی ہے۔انہوں نے اپنے تجربات اورمشاہدات کی روشنی میں کہاکہ ایک نامہ نگارکیلئے کسی خاص ڈگری یاسندکی اتنی ضرورت نہیں،جتنی اسبات کی کہ ایک نامہ نگارکسی علاقہ میں پیش آئے کسی حادثے یاواقعے کواصل حقائق کیساتھ رپورٹ کرے۔ریاض مسرورکاکہناتھاکہ یہ کہنادرست نہیں کہ اْردوزبان کوکوئی خطرہ لاحق ہے،یاکہ اْردوصحافت زوال پذیر ہے۔

اس حوالے سے انہوں نے ملکی اوربین الااقوامی سطح کے کچھ اداروں کی تجزیاتی یاسروے رپورٹس کاحوالہ دیتے ہوئے کہاکہ اب بھی اْردوبہت سارے ممالک میں پڑھی،بولی اورلکھی جاتی ہے۔

کشمیر میں اْڑدوصحافت کے ماضی اورحال کے تناظرمیں مستقبل کاذکر کرتے ہوئے سینئرومعروف صحافی ریاض مسرورکاکہناتھاکہ اْردوصحافت سے وابستہ صحافیوں کاعصرحاضر کے تقاضوں سیہم آہنگ ہونالازمی بن گیاہے۔انہوں نے کہاکہ آج سوشل میڈیاکادورہے،کوئی حادثہ یاواقعہ پیش آتے ہی اس کوشیئرکیاجاتاہے۔تاہم انہوں نے کہاکہ خبرتب تک نامکمل رہتی ہے،جب تک اس سے جڑے سبھی معاملات اورحقائق کورپورٹ نہ کیاجائے۔

ریاض مسرورنے انجمن اْردوصحافت کے رول اورمشن کواہم قراردیتے ہوئے کہاکہ اْردوصحافت کوجدیدتقاضوں اوربنیاد اصولوں سے روشناس ہوناپڑے گا،اوراس ضمن میں تربیتی ورکشاپ کلیدی اہمیت کے حامل ہیں۔انہوں نے کہاکہ کوئی صحافی یانامہ نگارچاہئے کتنے برسوں سے میدان عمل میں سرگرم کیوں نہ ہو،اْس میں سیکھنے کاجذبہ ہوناچاہئے،تاکہ وہ خودکودورجدیدیاعصرحاضر کے نئے تقاضوں سے آراستہ رکھ سکے۔

ورکشاپ میں شامل سبھی صحافیوں اورنامہ نگاروں کوتازہ دم رکھتے ہوئے معروف مزاحیہ شاعر وفن کار تاثیرافضل نے اپنے منفرداندازمیں کشمیری زبان میں اپنامزاحیہ اورطنزیہ کلام پیش کیا،جس سے حاضرین کافی محظوظ ہوئے۔دوسری نشست میں ایک اورسینئرصحافی ہارون رشید نے ’صحافت کے ماعصرتقاضے‘عنوان کے تحت اپنے تجربات اورمشاہدا ت بیان کئے۔انہوں نے کہاکہ اْردوصحافت کوکوئی خطرہ لاحق نہیں ہے لیکن ہم سب کونئی چیزوں،نئی تیکنیک اورنئے تقاضوں کے بارے میں جانکاری حاصل کرتے رہناپڑے گا۔

ہارون ریشی کاکہناتھاکہ ہرصحافی کی اپنی اہمیت ہوتی ہے،لیکن صحافت کے میدان میں ڈٹے رہناآسان نہیں۔انہوں نے کہاکہ ایک صحافی یانامہ نگارچاہئے کسی بھی زبان میں لکھے،اْس کواْس زبان پراتنی حدتک عبورہوناچاہئے کہ وہ اپنی تحریریابات قارئین اورناظرین تک آسان لفظوں میں پہنچاسکے۔

وقفہ ظہرانہ کے بعدتیسری نشست میں وادی کے ایک سینئر صحافی منوہر لال گامی نے ’خبر نگاری کا صحافتی اسلوب‘ کے موضوع پر شرکائے ورکشاپ کو اپنے تجربات اور مشاہدات سے مستفید کیا جبکہ ’ملٹی میڈیا کی اہمیت اور تقاضے‘ کے موضوع پربراڈ کاسٹ جرنلسٹ سید تجمل الاسلام نے روشنی ڈالی۔

دو نشستوں اور چار الگ الگ موضوعات پرمشتمل پر ورکشاپ کے دوران زاہد مشاق،اظہر رفیقی،زبیر قریشی اور شوکت ساحل نے نظامت کے فرائض انجام دئیے۔ورکشاپ کی نظامت کے فرائض انجمن کے سینئررْکن وصدارتی مشیر ناظم نذیر نے انجام دیئے جبکہ انجمن کے ترجمان اعلیٰ زاہد مشتاق نے انجمن اْردو صحافت جموں وکشمیرکاتعارف دیااورانجمن کے اغراض ومقاصد بیان کئے۔ انجمن اردو صحافت کے صدر ریاض ملک نے صدارتی خطبہ دیا جبکہ بانڈی پورہ ورکنگ جرنلسٹس ایسوسی ایشن کے جنرل سیکریٹری ساجد رسول نے خطبہ استقبالیہ پیش کیا۔

انجمن اردو صحافت کے صوبائی صدر کشمیربلال برقانی نے تحریک شکرانہ پیش کی۔ورکشاپ کو منعقد کرنے میں انجمن اردو صحافت کے جنرل سیکریٹری امتیاز احمد خان، آر گنائز فردوس رحمان اورسوشل میڈیاانچارج شوکت ساحل نے کلیدی کردار ادا کیا۔

انجمن کے رْکن بلال مولوی اور بانڈی پورہ ورکنگ جرنلسٹس ایسوسی ایشن کے خصوصی نمائندے نذیر ساحل نے شرکائے ورکشاپ کی رجسٹریشن خدمات انجام دیں۔ورکشاپ کے اختتام پر شرکائے ورکشاپ میں توصیفی اسناد تقسیم کی گئیں۔