خبراردو: اس دوران علاقے میں جھڑپ شروع ہونے کےساتھ ہی نوجوانوں کی مختلف ٹولیوں نے سڑکوں پر آکر فورسز کارروائی کے خلاف جم کر نعرے لگانے کےساتھ ساتھ جھڑپ والے مقام کی جانب پیش قدمی شروع کی تاہم یہاں موجود فورسز اہلکاروں نے مظاہرین کی کوشش کو ناکام بنانے کےلئے آنسو گیس کے درجنوں گولے داغنے کےساتھ ساتھ پیلٹ فائرنگ کی ۔

فوج کی 19آر آر، سی آر پی ایف اور ایس او جی سے وابستہ مشترکہ اہلکاروں نے جنگجوﺅں سے متعلق مصدقہ اطلاع ملنے کے بعد بڈورہ اکنگام اننت ناگ علاقے کا سوموار کی صبح کڑا محاصرہ عمل میں لاکر یہاں جنگجو مخالف آپریشن شروع کردیا۔ معلوم ہوا کہ سیکورٹی فورسز کو گاﺅں میں 2سے3جنگجوﺅں کے چھپے ہونے کی مصدقہ اطلاع موصول ہوئی تھی جس کے بعد فورسز کی مشترکہ پارٹی نے گاﺅں کے ارد گرد سخت محاصرہ عمل میں لاکر فرار کے تمام ممکنہ راستوں پر سخت پہرے بٹھادئے۔

اس دوران تلاشی پارٹی نے جونہی گاﺅں کے اندر داخل ہوکر چند رہائشی مکانات کی تلاشی لی تو عین اسی دوران قریبی مکان میں چھپے بیٹھے جنگجوﺅں نے مکان کے اندر سے تلاشی پارٹی پر خود کار ہتھیاروں سے زبردست فائرنگ شروع کی ۔ اس موقعے پر فورسز نے مذکورہ مکان کے ارد گرد گھیراﺅ کو تنگ کرتے ہوئے جنگجوﺅں کی فائرنگ کا جواب دیا جس کے ساتھ ہی گاﺅں میں جنگجوﺅں اور فورسز کے درمیان جھڑپ کا آغاز ہوگیا۔ گاﺅں میں موجود فورسز دستوں نے اس موقعے پر فورسز کی اضافی کمک کو طلب کرتے ہوئے یہاں جگہ جگہ فورسز کو الرٹ کردیا اور کسی بھی شخص کو باہر آنے کی اجازت نہیں دی۔ اس دوران طرفین کے درمیان گولیوں کا تبادلہ وقفے وقفے سے جاری رہا۔ فوجی ذرائع نے بتایا کہ جائے جھڑپ کے ارد گرد فورسز اہلکاروں نے دوپہر سے قبل تلاشی کارروائی کا سلسلہ شروع کیا تو یہاں 2جنگجوﺅں کی لاشیں پائی گئی۔

انہوں نے کہا کہ جنگجوﺅں کی شناخت اور تنظیمی وابستگی سے متعلق تحقیقات عمل ہنوز جاری ہے۔ ادھر جائے جھڑپ کی تلاشی لینے کے دوران یہاں ملبے کے اندر چھپے بیٹھے زندہ جنگجو نے فورسز پر زبردست فائرنگ کی جس کے نتیجے میں فوج کے میجر سمیت 4اہلکار شدید طور پر زخمی ہوئے۔ پولیس ذرائع کا کہنا تھا کہ جائے جھڑپ کی تلاشی لینے کے دوران یہاں چھپے بیٹھے تیسرے جنگجو نے فورسز پر فائرنگ شروع کی جس کے نتیجے میں میجر سمیت 4اہلکار گولیاں لگنے سے زخمی ہوگئے۔ انہوں نے بتایا کہ زخمی ہوئے اہلکاروں کو قریب ہی واقع فوجی ہسپتال منتقل کیا گیا تاہم یہاں میجر راہل ورما زخموں کی تاب نہ لاکر دم توڑ بیٹھا۔ انہوں نے بتایا دیگر زخمی اہلکاروں کا فوجی ہسپتال میں علاج و معالجہ جاری ہے۔

اس دوران معلوم ہوا کہ گاﺅں میں جھڑپ شروع ہونے کے ساتھ ہی بڈورہ اکنگام اور متصل بستیوں سے نوجوانوں کی مختلف ٹولیوں نے سڑکوں کا رخ کرکے فورسز کارروائی کے خلاف جم کر نعرے بازی کی۔مظاہرین نے اس موقعے پر فورسز کارروائی میں رخنہ ڈالنے کی کوشش کرتے ہوئے جائے جھڑپ کی جانب پیش قدمی شروع کی تاہم یہاں تعینات فورسز اہلکاروں نے مظاہرین کی کوشش ناکام بناتے ہوئے آنسو گیس کے درجنوں گولے داغنے کےساتھ ساتھ پیلٹ فائرنگ کی جس کے ساتھ ہی گاﺅں میں افرا تفری کے ماحول میں مزید اضافہ دیکھنے کو ملا۔

مقامی لوگوں نے کے این ایس کو بتایا کہ فورسز اہلکاروں نے احتجاج کررہے نوجوانوں کو منتشر کرنے کی خاطر آنسو گیس گولوں کا بے دریغ استعمال کرنے کےساتھ ساتھ پیلٹ فائرنگ کی جس کے ساتھ ہی گاﺅں میں خوف ودہشت کا ماحول پیدا ہوا۔ اس دوران ضلع بھر میں امن و قانون کی صورتحال کو برقرار رکھنے کےلئے انتظامیہ نے سوموار صبح سے ہی موبائل انٹرنیٹ سروس کا کریک ڈاﺅن عمل میں لایا۔ معلوم ہوا کہ فورسز کی طرف سے گاﺅں کا محاصرہ عمل میں لانے کےساتھ ہی یہاں بے لگام افواہ بازی پر لگام لگانے کےلئے موبائل انٹرنیٹ سروس پر بریک لگائی گئی۔

معلوم ہوا کہ بڈورہ اچھ بل اور مضافاتی علاقوں میں جھڑپ کے پیش نظر مکمل ہڑتال سے معمولات کی زندگی بری طرح سے متاثر ہوکر رہ گئی۔ عینی شاہدین کے بقول ہڑتال سے تجارتی، کاروباری، نجی اور غیر سرکاری سرگرمیاں مکمل طور پر ٹھپ ہوکر رہ گئیں جبکہ سڑکوں سے ٹریفک کی نقل و حمل بھی مانند پڑگئی۔