خبراردو:
مر کزی وزیر داخلہ راجناتھ سنگھ ریاست کی سیکورٹی اور سیاسی صورتحال کا جائزہ لینے کے لئے ایک روزہ دورہ پر سرینگر پہنچ گئے ہیں ۔ وزیر داخلہ سرینگر کے بین الاقوامی ہوائی اڈے پر منگلوار کی صبح تقریباًساڑھے 10بجے پہنچے جس کے دوران ان کا استقبال چیف سیکریٹری ،گورنر کے مشیر کے وجے کمار ریاستی پولیس کے سر براہ دلبا غ سنگھ،ڈی سی بڈگام ،کے علاوہ دیگر کئی سیول و پولیس انتظامیہ کے افسران نے کیا ۔مر کزی وزیر داخلہ راجناتھ سنگھ انڈین آئر لائنز کی ایک پرواز کے زریعے دہلی سے سرینگر پہنچے اور سرینگر ہوائی اڈے سے فوجی ہیلی کاپٹر کے ذریعے مر کزی وزیر داخلہ راجناتھ سنگھ شیر کشمیر انٹر نیشنل کنووکیشن سنٹر پہنچے جہاں انہوں نے ریاستی گورنر ستیہ پال ملک اور اعلیٰ سول، پولیس و سیکورٹی عہدیداروں کے ساتھ ایک اعلیٰ سطح میٹنگ کرکے ریاست بالخصوص وادی کی سیکورٹی صورتحال کا جائزہ لیا۔معلوم ہوا ہے کہ میٹنگ کے دوران وزیر داخلہ نے پاکستان کے ساتھ لگنے والی لائن آف کنٹرول اور بین الاقوامی سرحد کی سیکورٹی صورتحال پر بھی سینئر فوجی عہدیداروں سے بریفنگ لی۔ راجناتھ سنگھ اپنے دورے کے دوران مختلف سیاسی جماعتوں بالخصوص نیشنل کانفرنس اور پی ڈی پی کے نمائندوں سے ملاقات کی اور انہیں آنے والے پنچایتی انتخابات کا بائیکاٹ ختم کرنے پر قائل کرنے کی کوشش کی ۔اس دوران معلوم ہوا ہے کہ مر کزی وزیر داخلہ راجناتھ سنگھ نے اپنے دورہ سرینگر کے دوران کچھ سیول سو ساٗئٹی ممبران کے ساتھ بھی ملاقات کی جس کے دوران سیول سو سائٹی ممبران نے مر کزی وزیر داخلہ کو ریاست کی درپیش ابتر صورتحال سے آگاہ کیا ۔وزیر داخلہ نے منگل کی صبح اپنے ایک ٹویٹ میں کہا ’کہ جموں وکشمیر کے ایک روزہ دورے پر سری نگر کے لئے روانہ ہوگیا ہوں۔ سیکورٹی صورتحال کے علاوہ ریاست میں اٹھائے جانے والے اہم اقدامات کا جائزہ لوں گا۔یاد رہے کہ مر کزی وزیر داخلہ ریاست میں گور نر راج کے نفاز کے بعد پہلی بار وادی کے دورے پر آئے ہیں ۔

اس دوران معلوم ہوا ہے کہ نیشنل کانفرنس کے ایک اعلیٰ سطحی وفد نے شیر کشمیر انٹرنیشنل کنونشن سنٹر میں مرکزی وزیر داخلہ شری راج ناتھ کیساتھ ملاقات کی۔ وفد کی قیادت پارٹی جنرل سکریٹری علی محمد ساگر کررہے تھے جبکہ اُن کے ہمراہ معاون جنرل سکریٹری ڈاکٹر شیخ مصطفےٰ کمال، صوبائی صدر ناصر اسلم وانی، سٹیٹ سکریٹری سکینہ ایتو، سینئر لیڈران و ایم ایل اے اوڑی محمد شفیع اوڑی، ایم ایل اے عید گاہ مبارک گل، ترجمانِ اعلیٰ آغا سید روح اللہ مہدی ایم ایل اے بڈگام، جنوبی زون صدر و ایم ایل اے سوناواری محمد اکبر لون،سابق وزیر قانون میر سیف اللہ اور تنویر صادق بھی تھے۔ وفد نے وزیر داخلہ کو وادی کی موجودہ سیاسی، سیکورٹی ،امن و قانون اورانسانی حقوق کی پامالیوں کی صورتحال کے بارے میں تفصیلات پیش کیں اور اس بارے میں ایک میمورنڈم بھی پیش کیا۔راج بھون میں ریاستی گونر ستیا پال ملک نے راجناتھ سنگھ کو یقین دہانی کرائی کہ ریاستی انتظامیہ ریاست میں تعمیراتی منصو بوں کو پورا کر نے کے علاوہ فلاحی اسکیموں کی عمل آوری ،کرپشن کا خاتمہ یقینی بنانے اور لو گوں کو در پیش مسائل کے حل کا ازالہ کر نے کے لئے کام کر ے گی ۔ اس دوران مر کزی وزیر داخلہ راجناتھ سنگھ نے گونر ستیا پال ملک کو ریاست میں بلدیاتی انعقاد کی کامیابی اور بناء کسی شورش کے ان انتخابات کے انعقاد پر مبار کباد دیتے ہو ئے کہا کہ مر کزی سرکار کی جانب سے ریاست کو پنچایتی انتخابات کے کامیاب انعقاد کے لئے مکمل تعاون فراہم کر ے گی ۔

راجناتھ سنگھ نے نہرو گیسٹ ہاؤس میں پریس کانفرنس سے خطاب کے دوران کولگام میں ہوئی عام شہریوں کی ہلاکت پر گہرے رنج و غم کا اظہار کرتے ہوئے اسے بدقسمتی سے تعبیر کیا۔ وزیر داخلہ نے بتایا کہ ہمیں اطلاع موصول ہوئی ہیں کہ وہاں جھڑپ اختتام پذیر ہونے کے ساتھ ہی لوگوں کی بڑی تعداد جمع ہوئی جس دوران کچھ بارودی شل پھٹ جانے کے نتیجے میں کئی نوجوان اپنی جانوں سے ہاتھ دھو بیٹھے۔انہوں نے بتایا کہ انسانی جا ن قیمتی ہے اور روپیوں پیسوں سے انسانی جان کی قیمت لگانا ٹھیک نہیں تاہم ہم جاں بحق نوجوانوں کے اہل خانہ کے ساتھ دلی تعزیت کا اظہار کرتے ہوئے جاں بحق نوجوانوں کے حق میں فی کس 5لاکھ روپے بطور ایکس گریشیا ریلیف واگزار کرتے ہیں۔ وزیر داخلہ نے بتایا کہ ریاست میں امن کی بحالی کے لیے مرکزی و ریاستی حکومت کام کررہی ہے۔ مرکزی سرکار ہر اُس شخص کے ساتھ بات کرنے کو تیار ہیں جو ریاست میں امن کو خواہاں ہو۔ انہوں نے بتایا کہ ملک کے زیر اعظم نریندر مودی نے سیاسی پہل کی شروعات کرتے ہوئے پاکستان کا سفر کیا تاہم وہاں کی جانب سے ایسی کوئی ٹھوس کوشش نہیں ہوئی۔ انہوں نے بتایا کہ دہشت گردی اور بات چیت ایک ساتھ نہیں چل سکتے۔ انہوں نے بتایا کہ بھارت معاشی طور پر بہت آگے بڑھ چکا ہے البتہ بھارت مخالف عناصر ہماری معیشی ترقی کو برداشت نہیں کررہے ہیں ، اسی لیے وہ بھارت کو کمزور کرنے کے لیے دہشت گردی کا سہارا لے رہے ہیں۔ وزیر داخلہ نے بتایا کہ ہم ایسے عناصر کے مکروہ عزائم کو کبھی بھی کامیاب نہیں ہونے دیں گے۔

انہوں نے پنچایتی انتخابات کے حوالے سے کہا کہ جو لوگ جمہوریت پر یقین رکھتے ہوں انہیں چاہیے کہ وہ اپنی خاموشی توڑکر انتخابات میں بڑھ چڑھ کر حصہ لیں۔ جو لوگ انتخابات کا بائیکاٹ کریں گے وہ عوام کے خیر خواہ نہیں ہوسکتے۔ انہوں نے بتایا کہ جو لوگ عوام کی نمائندگی کا دعویٰ کرتے ہیں انہیں چاہیے کہ وہ آنے والے پنچایتی انتخابات میں حصہ لے کر عوام کی خدمت کا فریضہ انجام دیں۔ پریس کانفرنس کے دوران وزیر داخلہ نے بتایا کہ ریاستی نوجوانوں کی بہتری اور بازآبادکاری کے لیے مرکزی و ریاستی حکومت ٹھوس اقدامات اُٹھانے جارہی ہے جس کے تحت آنے والے وقت میں لاکھوں نوجوانوں کو روزگار فراہم کیا جائے گا۔ انہوں نے بتایا کہ مرکزی اسکیم کے تحت ریاستی نوجوانوں کو مختلف مرحلوں کے دوران معقول روزگار سے نوازا جائے گا۔انہوں نے بتایا کہ ہماری سرکار نوجوانوں کو ہرطرح کی امداد فراہم کرنے کے لیے بھر پور اقدامات اُٹھائے گی۔ وزیر داخلہ نے بتایا کہ ریاست کے تینوں خطوں جموں، کشمیر اور لداخ میں ترقی کو یقینی بنانے کے لیے ٹھوس اقدامات اُٹھائیں جارہے ہیں جس کے تحت سرحدی علاقوں بشمول کرگل، دراس، ٹنگڈار، مژھل سمیت دیگر علاقوں میں زمینی سطح پر سڑکیں بنائی جائیں گی۔

انہوں نے بتایا کہ وادی کی جھیل ڈل کی خوبصورتی کو دوبارہ بحال کرنے کی خاطر مرکزی اسکیم کے تحت 350کروڑ سے زائد کی رقم صرف کی جائے گی تاکہ جھیل ڈل کی شان رفتہ کو پھر سے بحال کیا جائے۔ انہوں نے بتایا کہ جب بھی میں ریاست کے دورے پر وار دہوا تو مجھے ہر بار انتظامیہ میں کرپشن کی شکایات موصول ہوئیں۔ مرکزی وریاستی حکومت ریاست سے کرپشن کے خاتمنے کو یقینی بنانے کے لیے موثر اقدامات اٹھائی گی۔ انہوں نے کہا کہ دہشت گردی کو جڑ سے ختم کرنے کے لیے سبھی طبقوں کو اپنا رول ادا کرنا ہوگا۔ وزیر داخلہ نے بتایا کہ یک روزہ دورے کے دوران میں نے یہاں 5وفود کے ساتھ ملاقاتیں کیں جس دوران میں نے انہیں الیکشن میں حصہ لینے پر زور دیا۔ایک سوال کے جواب میں مرکزی وزیر داخلہ نے بتایا کہ ریاست جموں وکشمیر کو بی جے پی کے ساتھ ماضی قریب میں اتحاد سے جو ثمر حاصل ہوا اس کا تجریہ لوگ خود کرسکتے ہیں۔
یاد رہے ضلع کو لگام میں ہو ئی شہری ہلاکتوں کے بیچ مر کزی وزیر داخلہ راجناتھ سنگھ اپنے یک روزہ دورے پرمنگلوار کو سرینگر پہنچے جس کے دوران انہوں نے ریاست کی مجموعی سیکورٹی اور سیاسی صورتحال کا جائزہ لینے کے علاوہ مختلف سیاسی جماعتوں کے نمائندوں کے ساتھ االگ الگ ملاقا تیں کیں جبکہ سابق وزیر اعلیٰ اور پی ڈی پی صدر محبوبہ مفتی نے بھی راجناتھ سنگھ کے ساتھ ملاقات کی ۔اس دوران معلوم ہوا ہے کہ مر کزی وزیر داخلہ نے ریاستی گور نر ستیا پال ملک کے ساتھ راج بھون میں جس کے دوران انہوں نے ریاستی گورنر کے ساتھ ریاست میں مرکزی کی جانب سے تعمیراتی منصوبوں کے علاوہ ریاست میں نو جونوں کی مثبت مصروفیت کے علاوہ اسمبلی انتخابات کے حوالے سے بھی بات چیت کی ۔