ہندوستان

بجٹ بڑے صنعتکاروں کے مقاصد کے حصول کے لیے بنایا گیا ہے: اپوزیشن

Published

2 years ago

February 11, 2025

نئی دہلی، لوک سبھا میں اپوزیشن اراکین نے بجٹ کو بڑے صنعت کاروں کے مفادات کی خدمت قرار دیتے ہوئے کہا ہے کہ اس میں عام لوگوں کے مسائل کو حل کرنے کے لئے کوئی قدم نہیں اٹھایا گیا ہے لوک سبھا میں سماج وادی پارٹی کے اکھلیش یادو نے بجٹ پر تیسرے دن کی بحث شروع کرتے ہوئے کہا کہ بجٹ 2025-26 کے ہدف کو مدنظر رکھتے ہوئے تیار کیا گیا ہے اور کہا کہ یہ بجٹ بڑے لوگوں اور بڑے صنعت کاروں کے مفاد میں ہے۔ اس میں ترقی کا کوئی مقصد نہیں ہے۔ حکومت نے 2047 تک ملک کو ترقی دینے کا ہدف مقرر کیا ہے لیکن اس بجٹ میں اس ہدف کو حاصل کرنے کی کوئی کوشش نہیں کی گئی ہے ۔ کامیاب بجٹ صرف چند لوگوں کو فائدہ پہنچانے کے لیے نہیں بنایا جانا چاہیے بلکہ اس میں سب کے مفادات کی عکاسی ہونی چاہیے۔

مسٹر یادو نے کہا کہ کسانوں کی آمدنی دوگنی کرنے کے لیے بجٹ میں کوئی روڈ میپ نہیں پیش کیا گیا ہے۔ کسانوں کو کم از کم امدادی قیمت (ایم ایس پی) کی گارنٹی نہیں مل رہی ہے، جبکہ کئی کسان اس لڑائی میں اپنی جان گنوا چکے ہیں۔ حکومت سوامی ناتھن کمیشن کی سفارشات کو نافذ کرنے کے دعوے ہی کرتی ہے لیکن اسے نافذ نہیں کرتی۔ اس بجٹ میں پھلوں اور سبزیوں کے لیے کچھ نہیں ہے۔ زرعی شعبے میں تحقیق کے لیے کوئی انتظامات نہیں کیے گئے ہیں ۔ حکومت نے فصل بیمہ اسکیم کے حوالے سے بہت تشہیر کی ہے ، لیکن جب دعوے پورے کرنے کی بات آتی ہے تو کسانوں کو کچھ نہیں دیا جاتا۔ حکومت بڑے صنعت کاروں کے قرضے معاف کر دیتی ہے لیکن کسانوں کے قرضے معاف نہیں ہوتے۔ انہوں نے کہا کہ کسانوں کے زیر استعمال اشیاء پر کوئی جی ایس ٹی نہیں ہونا چاہئے۔

انہوں نے کہا کہ مہاکمبھ میں لوگوں کو پریشانی کا سامنا ہے، ہر شخص ٹریفک جام میں پھنسا ہوا ہے جبکہ پوری انتظامیہ ٹریفک جام کو صاف کرنے میں مصروف ہے۔ حکومت چاند تک پہنچنے کی بات کرتی ہے لیکن جب زمین ہی نہیں ہے تو چاند تک پہنچنے کا کیا فائدہ۔ ڈیجیٹل کمبھ کی بات ہو رہی ہے، لیکن وہاں بھگدڑ میں مارے جانے والوں کی تعداد ابھی تک سامنے نہیں آئی ہے۔ ڈیجیٹل گرفتاری کے واقعات میں مسلسل اضافہ ہو رہا ہے، لیکن حکومت صرف ڈیجیٹل انڈیا کی بات کرتی رہتی ہے۔

ایس پی کے لیڈر نے کہا کہ حکومت نے ایس ایم ایس ای کے لیے بجٹ میں کوئی بندوبست نہیں کیا ہے حالانکہ وہ 11 کروڑ لوگوں کو ایس ایم ایس ای روزگار فراہم کرتی ہے۔ یہ ملک میں سب سے زیادہ روزگار ہے، لیکن ایسے لوگوں کے لیے بجٹ میں کوئی بندوبست نہیں کیا گیا۔ایس ایم ایس ای کو حکومت سے کوئی فائدہ نہیں مل رہا ہے، لیکن انہیں یقین ہے کہ حکومت ایس ایم ایس ای کے لیے ضروری اقدامات کرے گی۔ بجٹ میں تمام لوگوں کی ترقی کے لیے انتظامات ہونا چاہیے لیکن اس بجٹ میں کچھ نہیں کیا گیا ہے ۔ اتر پردیش میں حکومت لوگوں کو آوارہ جانوروں سے نجات دلانے میں ناکام ہے جبکہ اس کی وجہ سے آئے روز واقعات ہو رہے ہیں۔ حکومت آسمان چھوتی مہنگائی کو نہیں روک سکی اور کمپنیوں سے بھتہ وصول کیا جا رہا ہے۔

بی جے پی کی ہیما مالنی نے خواتین کی بہتری کے لیے وزیر اعظم نریندر مودی کے کام کی تعریف کی اور کہا کہ وزیر خزانہ نرملا سیتا رمن اپنا آٹھواں بجٹ پیش کر رہی ہیں۔ حکومت تیز رفتاری سے کام کر رہی ہے اور ان کے پارلیمانی حلقے میں ترقیاتی کاموں کو بھی فروغ دے رہی ہے۔ وزیر خزانہ نے اس بات پر زور دیا ہے کہ ملک کی معاشی ترقی میں خواتین کی شرکت بڑھنی چاہیے۔ تمام سرکاری سکولوں میں براڈ بینڈ کنیکٹیویٹی کو اہم قرار دیتے ہوئے انہوں نے صحت کے شعبے میں حکومت کے کام کی تعریف کی اور کہا کہ ہر ہیڈ کوارٹر میں کینسر سنٹر کھولنا ایک غیر معمولی فیصلہ ہے۔ انکم ٹیکس میں اب تک کی سب سے بڑی چھوٹ کا اعلان کیا گیا ہے اور اس اعلان کا متوسط طبقے پر بہت مثبت اثر پڑا ہے۔

انہوں نے مہاکمبھ کے کامیاب انعقاد کے لئے وزیر اعلی یوگی آدتیہ ناتھ کا شکریہ ادا کیا۔

جاری ۔ یو این آئی ۔ ع خ

ہندوستان

مودی-شاہ انتخابی میچ فکسنگ کے لیے گیانیش کمار کا استعمال کرتے ہیں: راہل

Published

12 hours ago

September 26, 2026

Online Desk

نئی دہلی، کانگریس کے سابق صدر اور لوک سبھا میں اپوزیشن لیڈر راہل گاندھی نے ہفتہ کے روز چیف الیکشن کمشنر گیانیش کمار کے حوالے سے وزیر اعظم نریندر مودی اور وزیر داخلہ امت شاہ پر نشانہ لگایا اور الزام لگایا کہ وہ مسٹر کمار کا استعمال انتخابات کی ‘میچ فکسنگ’ کے لیے کرتے ہیں۔

مسٹر گاندھی نے ہفتہ کی دیر شام سوشل میڈیا ایکس پر کہا کہ مسٹر مودی اور مسٹر شاہ نے پہلے مسٹر کمار کو بی جے پی کے لیے بھرتی کرنے میں استعمال کیا اور بعد میں انہیں انتخابات میں ‘میچ فکسنگ’ کی ذمہ داری سونپ دی۔

انہوں نے لکھا، “پہلے گیانیش کمار— پھرحاضر سروس آئی اے ایس افسر —کا استعمال بی جے پی کے لیے بھرتی کرنے میں کیا گیا۔ پھر مودی اور شاہ نے انہیں (گیانیش کمار) امپائر بنا دیا اور ہندستان کے انتخابات کی میچ فکسنگ کی ذمہ داری سونپ دی۔”

مسٹر گاندھی کا یہ بیان کیرالہ کانگریس کے ایک بیان کے بعد آیا ہے جس میں پارٹی سوشل میڈیا ایکس پر دعویٰ کرتے ہوئے کہتی ہے، “گیانیش کمار کو لے کر بڑا انکشاف۔ کیرالہ کے سابق چیف سکریٹری جی جی تھامسن نے کہا ہے کہ مسٹر کمار نے ان سے رابطہ کر کے بی جے پی کے ٹکٹ پر الیکشن لڑنے کے لیے کہا تھا اور انہیں وزیر کے عہدے کی پیشکش بھی کی تھی۔”

کیرالہ کانگریس نے سوال کرتے ہوئے کہا، “گیانیش کمار یہ تجویز کس حیثیت سے دے رہے تھے۔ وہ کس کے اختیار سے بول رہے تھے اور 2016 میں بی جے پی کے لیے سیاسی بھرتی میں ایک الیکشن کمشنر مبینہ طور پر کیوں شامل تھے؟”

اس کے ساتھ ہی کیرالہ کانگریس نے مسٹر تھامسن کا ایک ویڈیو بھی شیئر کیا ہے جس میں وہ ملیالم میں مسٹر گیانیش کمار کے بارے میں دعویٰ کرتے ہوئے دکھائی دے رہے ہیں۔

یواین آئی۔الف الف

ہندوستان

سونیا-راہل نے منموہن سنگھ کو خراجِ عقیدت پیش کیا

Published

17 hours ago

September 26, 2026

Online Desk

نئی دہلی، کانگریس پارلیمانی پارٹی کی لیڈر محترمہ سونیا گاندھی اور لوک سبھا میں اپوزیشن کے لیڈر راہل گاندھی نے سابق وزیر اعظم ڈاکٹر منموہن سنگھ کے یومِ پیدائش پر انہیں گلہائے عقیدت نذر کر کے خراجِ عقیدت پیش کیا۔

محترمہ گاندھی نے ڈاکٹر سنگھ کو خراجِ عقیدت پیش کرتے ہوئے کہا کہ انہیں ان کی دانشمندی، عاجزی اور قوم کے لیے غیر متزلزل عزم کے لیے ہمیشہ یاد رکھا جائے گا۔ انہوں نے کہا کہ ہندوستان کی معاشی تبدیلی میں ان کا تعاون اور ملک کے لیے ان کی خدمات تاریخ کا ایک دائمی حصہ ہیں۔

مسٹر گاندھی نے ڈاکٹر سنگھ کو خراجِ عقیدت پیش کرتے ہوئے انہیں معاشی اصلاحات کا معمار قرار دیا اور کہا کہ انہوں نے دانشمندی، ایمانداری اور عاجزی کے ساتھ ملک کی خدمت کی نیز ان کے پرسکون عزم اور مدبرانہ بصیرت نے چیلنجنگ اوقات میں ملک کی رہنمائی کی۔ انہوں نے کہا کہ ہمہ گیر ترقی اور عوامی خدمت کے لیے ڈاکٹر سنگھ کا عزم لوگوں کو تحریک دیتا رہے گا۔

یواین آئی ایف اے

ہندوستان

ہندوستان- خلیجی کونسل تجارتی بات چیت آگے بڑھی، تجارت اور توانائی کے تعاون کو مضبوط کرنے پر زور

Published

17 hours ago

September 26, 2026

Online Desk

نئی دہلی، ہندوستان اور خلیجی تعاون کونسل (جی سی سی) کے درمیان وزرا کی سطح کی میٹنگ میں تجارت، سرمایہ کاری، توانائی، سکیورٹی اور عوامی رابطوں کو مضبوط کرنے پر تبادلہ خیال ہوا۔

دونوں فریقوں نے ہندوستان-جی سی سی آزادانہ تجارتی معاہدے (ایف ٹی اے) کی بات چیت کو آگے بڑھانے اور 2024-28 کے مشترکہ عمل کے منصوبے پر تعاون جاری رکھنے پر اتفاق کیا۔

وزارت خارجہ نے ہفتے کے روز بتایا کہ وزیر خارجہ ڈاکٹر ایس جے شنکر کی قیادت میں جمعہ کے روز نیویارک میں اقوام متحدہ کی جنرل اسمبلی کے 81 ویں اجلاس کے حاشیے پر منعقدہ میٹنگ میں رکن ممالک کے نمائندوں نے شرکت کی۔ دونوں فریقوں نے بتایا کہ مالیاتی سال 2025-26 میں ہندوستان اور جی سی سی کے درمیان کل تجارت 178.66 ارب ڈالر رہی۔

میٹنگ میں ہندوستان-جی سی سی مشترکہ عمل کا منصوبہ 2024-28 کی پیش رفت کا جائزہ لیا گیا۔ اس میں تجارت اور سرمایہ کاری، غذائی تحفظ، نقل و حمل، توانائی، صحت، ثقافت اور تعلیم جیسے شعبے شامل ہیں۔

ہندوستان اور جی سی سی نے اس سال فروری میں آزادانہ تجارتی معاہدے کے لیے شرائط و ضوابط اور دائرہ کار طے ہونے کے بعد شروع ہونے والی بات چیت کا خیرمقدم کیا۔ دونوں فریقوں نے کہا کہ معاہدے سے تجارت بڑھانے اور برآمدات میں تنوع لانے میں مدد مل سکتی ہے۔

ڈاکٹر جے شنکر نے مغربی ایشیا میں حالیہ کشیدگی کے دوران توانائی اور کھاد کی سپلائی جاری رکھنے کے لیے خلیجی ممالک کا شکریہ ادا کیا۔ قابلِ تجدید توانائی، بایو فیول اور گرین ٹیکنالوجی میں تعاون بڑھانے پر بھی زور دیا گیا۔

میٹنگ میں مغربی ایشیا کی صورت حال، بین الاقوامی آبی گزرگاہوں میں تجارتی جہازوں کی سکیورٹی، کثیر ملکی اداروں میں اصلاحات، استحکام اور دہشت گردی جیسے مسائل پر بھی خیالات کا تبادلہ کیا گیا۔ دونوں فریقوں نے اگلی ہندوستان-جی سی سی اسٹریٹجک ڈائیلاگ میٹنگ جلد منعقد کرنے پر اتفاق کیا۔

یواین آئی ایف اے