محکمہ جنگلی حیات نے جاری کی ایڈوائزی
خوراک کی تلاش میں جنگلی جانور آبادی والے علاقوں کی طرف کرسکتے ہیں رخ

سرینگر: رواں موسم سرما کے دوران کئی مراحل کے دوران ہوئی بھاری برفباری کے نتیجے میں کشمیر وادی میں ’انسان۔حیوان تصادم‘ کا خطرہ پیدا ہوگیا ہے کیونکہ جنگلی جانور خوراک کی تلاش میں آبادی والے علاقوں کی طرف رُخ کرسکتے ہیں۔

محکمہ جنگلی حیات نے اس ضمن میں ایک ایک ایڈوائزی جاری کی،جسکے تحت لوگوں سے کہا گیا ہے کہ خبردار رہیں اور جنگلی جانوروں کی کسی بھی نقل وحرکت کو دیکھتے ہی متعلقہ محکمہ سے رابطہ قائم کر یں۔ادھر جنوبی کشمیر کے کئی علاقوں میں جنگلی جانوروں کے نمودار ہونے سے لوگوں میں خوف پایا جارہا ہے۔

کشمیر نیوز سروس (کے این ایس)کے مطابق رواں موسمی سرما کے دوران7نومبر2019سے برفباری کا سلسلہ شروع ہوا ہے اور وقفے وقفے سے یہ سلسلہ ہنوز جاری ہے۔برفباری سے پیدا شدہ صورتحال کا ایک منفی پہلو یہ تصور کیا جارہا ہے کہ کشمیر میں حالیہ بھاری برفباری کے بعد ’انسان۔حیوان تصادم‘ کا شدید خطرہ لاحق ہوگیا ہے۔جنگلی حیات کے ماہرین نے اس ضمن میں تشویش ظاہر کی ہے۔ان کا کہناتھا کہ خوراک کی تلاش میں جنگلی جانور آبادی والے علاقوں کی جانب رُخ کرسکتے ہیں،جس دوران انسان۔

حیوان تصادم ہونے کا خطرہ لاحق ہوگیا ہے۔ محکمہ جنگلی حیات نے اس سلسلے میں ایک ایڈوائزی بھی جاری کی ہے۔محکمہ جنگلی حیات نے لوگوں سے اپیل کی ہے کہ وہ انسان۔حیوان تصادم سے محفوظ رہنے کیلئے خبردار رہیں۔ایڈوائزی میں کہا گیا ہے کہ لوگ جنگلی علاقوں میں روایتی راستوں کا انتخاب کریں اور کسی بھی چوٹھے راستے (شاٹ کٹ) کا انتخاب کرنے سے گریز کریں۔ایڈوائزی میں یہ بھی کہاگیا ہے کہ لوگ شام کے وقت گھروں سے باہر آنے کے دوران روشنی کے آلات کا استعمال کریں جبکہ کنڈی اور دور دراز علاقوں میں رہائش پذیر لوگ اپنے گھروں کے باہر بھی معقول روشنی کا انتظام کریں،تاکہ اگر یہاں جنگلی جانور رخ کریں،تو وہ خود غیر محفوظ تصو ر کریں۔

محکمہ جنگلی حیات کی ایڈوائزی میں یہ بھی کہا گیا ہے کہ دیہی علاقوں میں رہائش پذیر لوگ اپنے گھروں کے احاطوں میں متواتر بنیادوں پر گھاس اور جھاڑیوں کو ہٹائیں۔ایڈوائزی میں کہا گیا ہے کہ اس طرح کے احتیاطی اقدامات سے جنگلی جانوروں جن میں تیندوے اور ریچھ شامل ہیں،رہائشی مکانوں سے دور رہ سکتے ہیں۔محکمہ جنگلی حیات کے اعداد وشمار کے مطابق گذشتہ2ماہ کے دوران18سیاہ ریچھوں کو جنگلی علاقوں کی طرف واپس دھکیل دیا گیا جبکہ 3کو زندہ پکڑ لیا گیا۔ان کو شوپیان اور پلوامہ اضلاع کے جنگلی علاقوں میں چھوڑ دیا گیا جبکہ اس عرصے کے دوران 3تیندؤں کو بھی واپس دھکیل دیا گیا اور ایک زندہ پکڑ کر جنگلی علاقے میں چھوڑ دیا گیا۔

محکمہ جنگلی حیات کے اعلیٰ افسران نے بتایا کہ انسان۔حیوان تصادم کو روکنے کیلئے مؤثر اور ٹھوس اقدامات اٹھائے جارہے ہیں جبکہ جنگلی جانوروں کیلئے خوراک کا بھی انتظام کیا جاتا ہے،تاکہ وہ آبادی والے علاقوں کی طرف رخ نہ کریں۔ان کا کہناتھا کہ انسان۔حیوان تصادم آرائی کا خطرہ اُس وقت لاحق رہتا ہے جب جنگلی علاقوں میں جنگلی جانوروں کو خوراک کی کمی کا سا منا کرنا پڑا تا ہے۔ان کا کہناتھا کہ مستقبل میں انسان۔حیوان تصادم آرائی کی ضمانت نہیں دی جاسکتی ہے،کیونکہ جنگلی جانوروں کا آبادی والے علاقوں کی طرف رخ کو روکنا ناممکن ہے،تاہم خوراک کے انتظام سے اس کے روکتھام میں مدد ملتی ہے۔

ان کا کہناتھا کہ ہانگل اور سرمئی ہمالیہ لنگور گھاس،پودوں اور پتوں پر انحصار کرتے ہیں۔ان کا کہناتھا کہ ہلکی برفباری کی وجہ سے بھی خوراک تک انکی رسائی نا ممکن بن جاتی ہے جسکی وجہ سے بعض او قات کو نچلے علاقوں کی طرف رخ کرنے پر مجبور ہوتے ہیں۔ان کا کہناتھا کہ داچھی گام نیشنل پارک میں جنگلی جانوروں کیلئے خوراک کا انتظام کیا جاتا ہے۔ادھر جنوبی کشمیر کے کئی علاقوں میں جنگلی جانوروں کے نمودار ہونے سے لوگوں میں خوف پایا جارہا ہے۔

ایک میڈیا رپورٹ کے مطابق پلوامہ کے پاریگام میں چار روز قبل مقامی لوگوں نے اُس وقت ایک تیندوے پر لاٹھیوں اور آہینی ہٹھیاروں سے حملہ کرکے اُس کو ہلاک کردیا جب تیندوے نے علاقے میں دن دھاڈے نمودار ہوکر علاقے کے2 نوجوانوں پر حملہ کرکے زخمی کیا۔محکمہ جنگلی حیات کے اعلیٰ حکام نے بتایا کہ احتیاط ہی انسان۔حیوان تصادم آرائی سے محفوظ رہنے کا واحد راستہ ہے۔انہوں نے لوگوں سے اپیل کی کہ وہ جنگلی جانوروں کی نقل وحرکت کو دیکھتے ہیں متعلقہ محکمہ سے رابطہ کریں۔